1, 2. (a) Jesuh nih a hawikom ṭha pawl kha zei bianabia dah a chimh hna? (A hramthawknak hmanthlak zoh.) (b) Tuu le meheh bianabia he aa tlaiin zeidah hngalh a herh?

JESUH nih a hawikom ṭha a simi Piter, Andru, Jeim le Johan kha lungthawh awk ngai a simi kong a chimh hna. Zumhawk a tlakmi le a fimmi sal, ngaknu pahra le sal pathum bianabia a chimh hna hnuah a dang bianabia pakhat a chimh ṭhan hna. Mah ah “Mi Fapa” nih “vawleicung mi vialte” bia a ceih hna lai caan kong a chim. “Mi Fapa” nih mi kha tuu le meheh tiin phu pahnih in a ṭhen hna lai tiah a chim. Cun a biapi ngaimi a pathumnak phu a simi Siangpahrang “unau” pawl kong a chim.—Matthai 25:31-46 rel.

² Lamkaltu hna bantukin tuchan Jehovah salle zong nih mah bianabia kha hngalh an duh, zeicatiah minung nunnak he aa pehtlaimi a si caah a si. Mi cheukhat cu zungzal nunnak an hmu lai nain a dang tu cu hrawh an si lai tiah Jesuh nih a chim. Cucaah mah bianabia a sullam le zungzal nunnak hmuh awkah  tuah a herhmi hngalh cu a biapi tuk. Hi capar ah mah biahalnak hna hi kan i ruah hna lai: Mah bianabia hngalhthiam awkah Jehovah nih zeitindah a kan bawmh? Mah bianabia nih phungchim rian kong a hleiin a langhter ti kha zeitindah kan hngalh khawh? Ahote nih dah phung an chim awk a si? Atu ah “Siangpahrang” le a “unau” pawl cungah zumhfek tein um cu zeicah a biapit?

3, 4. (a) Tuu le meheh bianabia hngalhthiam awkah zeidah hngalh a herh? (b) 1881, Vennak Innsang nih mah bianabia kha zeitindah a fianter?

³ Tuu le meheh bianabia hngalhthiam awkah mah hna hi hngalh a hau: (1) “Mi Fapa,” asiloah “Siangpahrang” cu ahodah a si, tuu le meheh cu ahote dah an si, Siangpahrang “unau” cu ahote dah an si? (2) “Mi Fapa” nih tuu le meheh kha zeitikah dah a ṭhen hna, asiloah bia a ceih hna? (3) Mi cheukhat cu zeicah tuu tiah auh an si i a dang cu meheh tiah auh an si?

⁴ 1881, Vennak Innsang nih “Mi Fapa,” asiloah “Siangpahrang” cu Jesuh a si tiah a fianter. Cun Siangpahrang “unau” cu van ah Jesuh he uktu a ṭuan hngami lawng si loin vawlei ah a um hngami vialte zong mitling an si dih tikah a unau an si ve lai tiah a fianter chap. Mah lengah mi cu Khrih Kum Thongkhat Uknak chungah ṭhen an si lai i an tuahmi kip ah Pathian dawtnak aa zohchunhmi hna cu tuu tiah auh an si lai tiin a fianter.

5. 1923 ah Pathian miphun nih tuu le meheh bianabia kha zeitindah an hngalhthiam?

⁵ A hnuah, Jehovah nih a miphun kha mah bianabia hngalhthiam chin awkah a bawmh hna. 1923, October 15, Vennak Innsang nih “Mi Fapa” cu Jesuh a si tiah a ti. Cun bianabia chung i “unau” nih Jesuh he uktu a ṭuanṭi hngami lawng kha a aiawh hna, annih cu Kum Thongkhat Uknak chungah van ah an um lai tiah Biabal cacang pawl hmangin a fianter. Mah lengah tuu nih Jesuh le a unau pawl uknak tang, vawleicung ah a um hngami kha a aiawh hna tiah a fianter. Annih nih Siangpahrang unau pawl kha an bawmh hna tiah bianabia nih a ti caah ṭhennak asiloah biaceihnak cu Kum Thongkhat Uknak aa thawk hlan, Jesuh i chiti thuhmi unau pawl vawleicung an um rih lioah a si a hau lai tiah a ti. Cun tuu cu Jesuh a zummi le Pennak nih a ṭha deuhmi nunnak a kan pek lai ti a zummi hna an si lai tiah a ti chap.

6. 1995 ah tuu le meheh bianabia kan hngalhthiam ning cu zeitindah thlen a si?

⁶ Hi donghnak caan ah mi cu phungchim rian thawngin biaceih an si tiah kum tampi chung kan rak ruah. Kan chimmi kha an cohlan ahcun tuu an si i an cohlan lo ahcun meheh an si tiah kan rak ruah. Asinain 1995 ah mah bianabia kan hngalhthiam ning cu thlen a si. Vennak Innsang nih Matthai 24:29-31 (rel) kha Matthai 25:31, 32 (rel) he a tahchunh i Mi Fapa cu ‘Siangpahrang bantukin a rat’ caan, harnak nganpi chungah Jesuh nih mi kha bia a ceih hna lai tiah a fianter. *

7. Tuu le meheh bianabia a sullam cu zeidah a si?

 ⁷ Tuchan ah tuu le meheh bianabia kha fiang tein kan hngalhthiam cang. “Mi Fapa,” asiloah “Siangpahrang” cu Jesuh a si. Siangpahrang “unau” cu thiang thlarau in chiti thuhmi le Jesuh he van ah uktu a ṭuanṭi hngami an si. (Rom 8:16, 17) “Tuu” le “meheh” cu miphun dihlak chung i mi hna kha an si. Annih cu a rauhhlan ah a ra laimi harnak nganpi a donghnak leiah biaceih an si lai. Vawleicung ah a nung rihmi chiti thuhmi an pehtlaih hna ning cungah hrambunh in Jesuh nih bia a ceih hna lai. Mah bianabia le Matthai dal 24 le 25 i a dang bianabia pawl hngalhthiam awkah Jehovah nih a kan bawmh caah kan i lawm tuk.

8, 9. Jesuh nih tuu in biaceih a simi hna kha zeicah “a dingmi” tiah a auh hna?

⁸ Jesuh nih tuu le meheh bianabia ah “phungchim” asiloah “phungchim rian” timi biafang a hmang lo. Cu a si ah mah bianabia nih phungchim rian cu a biapi tuk ti a langhter ti kha zeitindah kan hngalh khawh?

⁹ Pakhatnak ah, Jesuh nih a biapimi kong cawnpiak awkah bianabia a hman ti kha kan hngalh hmasa a hau. Jesuh nih tuu taktak le meheh taktak kong a chimmi a si lo. Cu bantukin tuu in biaceih a si hngami pakhat cio nih chiti thuhmi hna kha rawl le hnipuan pek a hau, an zawt tikah zohkhenh a hau i thong an tlak tikah va len a hau a ti duhnak zong a si lo. Tuu in biaceih a simi hna nih chiti thuhmi hna kha Jesuh unau in an hmuh hna ca le hi harnak caan chungah an cungah zumhfek tein an um caah Jesuh nih “a dingmi” tiah a timi hna a si.—Matt. 10:40-42; 25:40, 46; 2 Tim. 3:1-5.

10. Tuu nih Khrih unau pawl kha zeitindah an bawmh khawh hna?

¹⁰ Pahnihnak ah, Jesuh nih tuu le meheh bianabia kha donghnak caan ah a cang hngami kong a chim lioah a chimmi a si. (Matt. 24:3) Tahchunhnak ah, “Vancung Pennak kong Thawngṭha hi khuazakip ah chim a si lai” tiah a ti. (Matt. 24:14) Mah hnu, tuu le meheh kong a chim hlante ah sal pathum bianabia a chim. Mah cu chiti thuhmi hna kha phungchim rian fakpi in an ṭuan a hau ti cawnpiaknak caah a si. Chiti thuhmi hna cu donghnak a rat hlanah “miphun vialte” sin phungchim awkah rian pek an si. Asinain vawleicung ah chiti thuhmi tlawmpal lawng an taang cang, ṭuan awk rian tu cu tampi a um rih. Tuu le meheh bianabia ah “tuu” nih Jesuh unau pawl an bawmh hna ti kan hmuh. Cutin tuah khawhnak a ṭha bikmi lam pakhat cu phungchim rian ah  bawmh kha a si. Asinain phungchim rian caah thawhlawm pek asiloah mah rian ṭuan awkah thapek lawngin a za maw?

11. Cheukhat nih zeitindah an hal khawh men, zeicah?

¹¹ Tuchan ah Jesuh zultu nuai riat an um cang i tam deuh cu chiti thuhmi an si lo. Annih kha Jesuh nih tangka a pe hna lo. Chiti thuhmi a unau pawl lawng kha a pek hna. (Matt. 25:14-18) Cucaah ‘Jesuh nih tangka a pek lomi, chiti thuh a si lomi hna tah phung chim a herh hnga maw?’ tiah cheukhat nih an hal khawh men. Mah kong cu i ruah hna u sih.

12. Matthai 28:19, 20 i Jesuh bia in zeidah kan hngalh khawh?

¹² Jesuh nih a zultu dihlak kha phungchim awkah nawl a pek hna. Jesuh nih a thawhṭhan hnuah a zultu hna kha midang “zultu va ser” awk le ‘a fialmi vialte’ cawnpiak awkah rian a pek hna. Mah a fialmi hna ah phungchim rian zong aa tel. (Matthai 28:19, 20 rel.) Cucaah zultu a hung simi vialte nih phungchim u timi Jesuh fialmi kha zulh a hau. Van aa ruahchanmi kan si ah, vawlei aa ruahchanmi kan si ah, kan dihlak in phung kan chim awk a si ti cu a fiang ko.—Lam. 10:42.

13. Johan hmuhmi langhnak in zeidah kan hngalh khawh?

¹³ Biathlam cauk in phungchim rian kha chiti thuhmi hna lawng nih si loin midang zong nih an ṭuan awk a si ti kan hngalh khawh. Jesuh nih Johan kha ra u law nunnak ti ding u tiah mi a sawmmi “va ngei laimi ngaknu” kong langhnak a pek. Va ngei lai ngaknu nih vancung ah Jesuh he uktu a ṭuan hngami chiti thuhmi 144,000 kha a aiawh hna. (Biat. 14:1, 3; 22:17) Ti nih sualnak le thihnak a um lomi nunnak hmuh awkah mi a bawmmi Jesuh tlanhnak man kha a aiawh. (Matt. 20:28; Johan 3:16; 1 Johan 4:9, 10) Chiti thuhmi hna nih mi kha tlanhnak man kong le mah in ṭhatnak hmuh khawh ning kong lungtho tein an cawnpiak hna. (1 Kor. 1:23) Johan hmuhmi langhnak nih chiti thuh a si lomi vawleicung nun ding aa ruahchanmi phu pakhat kong zong a langhter. Annih zong mi kha “ra u” tiah sawm awkah nawlpek an si ve. Annih nih mi sinah thawngṭha an chimnak thawngin mah nawlpekmi kha an zulh. Cucaah thawngṭha a cohlangmi vialte nih mi sinah thawngṭha an chim a hau ve ti kha mah langhnak nih a langhter.

14. “Khrih nawlbia” kha zeitindah kan zulh?

¹⁴ “Khrih nawlbia” a zulmi vialte nih phung chim a hau. (Gal. 6:2) Jehovah nih amah a biami vialte kha aa khatmi nawlbia a pek hna. Hlanlio zongah Israel  mi le an sinah a ummi ramdangmi hna nih aa khatmi nawlbia an rak zulh. (Ex. 12:49; Lev. 24:22) Tuchan ah cun Israel mi a rak pekmi hna nawlbia kha zulh a hau ti lo. Asinain chiti thuhmi kan si zong, si lo zongah “Khrih nawlbia” tu kan zulh a hau. Jesuh nih a kan cawnpiakmi lakah a biapi bikmi cu dawtnak ngeih ding timi kha a si. (Johan 13:35; Jeim 2:8) Jehovah, Jesuh le midang kan dawt hna a hau. Dawtnak langhternak ah a ṭha bikmi lam cu Pennak kong thawngṭha chimnak hi a si.—Johan 15:10; Lam. 1:8.

15. Phungchim u timi nawlpekmi cu Jesuh zultu dihlak he aa pehtlai tiah zeicah kan chim khawh?

¹⁵ Jesuh nih a zultu tlawmpal sinah a chimmi cu a caan ah a zultu tampi he aa pehtlai. Tahchunhnak ah, Jesuh nih Pennak biakamnak kha a zultu 11 he lawng a rak tuah. Asinain mah biakamnak cu 144,000 he zong aa pehtlai. (Luka 22:29, 30; Biat. 5:10; 7:4-8) Cun Jesuh nih a thawhṭhan hnuah phungchim awk i nawl a pekmi hna kha a zultu tlawmte lawng nih an theih. (Lam. 10:40-42; 1 Kor. 15:6) Asinain kumzabu pakhatnak i Jesuh zultu dihlak nih mah nawlpekmi kha an zulh. (Lam. 8:4; 1 Pit. 1:8) Tuchan zongah phungchim u timi Jesuh nawlpekmi kha kan thei ve lo nain phung kan chim awk a si ti kan hngalh. Atu ah phungchim rian a ṭuanmi hi nuai riat kan si cang. Phung kan chimnak thawngin Jesuh kan zumh taktak  kha kan langhter khawh ti kan hngalh.—Jeim 2:18.

16-18. Khrih unau pawl kha zeitindah zumhfek tein kan bawmh khawh hna, atu ah zeicah cutin kan tuah awk a si?

¹⁶ Satan nih “caan tawite lawnglawng” ka ngei cang ti a hngalh caah vawleicung ah a um rihmi chiti thuhmi Khrih unau pawl kha fak chinchin in a doh hna. (Biat. 12:9, 12, 17) Cutin dohnak an tong ko nain chiti thuhmi hna nih phungchim rian kha an hruai zungzal i atu ah thawngṭha a theimi hi hlan nakin an tam deuh tuk. Jesuh nih chiti thuhmi hna kha a umpi hna i lam a hruai hna ti cu a fiang ko.—Matt. 28:20.

¹⁷ Phungchimnak thawngin Khrih unau pawl kan bawmh khawhmi hna kha tinvo sung in kan hmuh. Thawhlawm peknak in le Biakinn, Civui tuahnak Inn le zung ṭengnge saknak ah fakpi in kan ṭuannak thawng zongin kan bawmh hna. “Zumhawk a tlakmi le a fimmi sal” nih rian a pekmi Khrihfa upa le a dang unaupa pawl an nawl kan ngaihnak thawngin Khrih unau pawl bawmh kan duh hna kha kan langhter.—Matt. 24:45-47; Heb. 13:17.

¹⁸ A rauhhlan ah a taang rihmi chiti thuhmi hna nih hmanung bik hmelchunhnak an hmuh cang lai. Mah hnuah vancungmi hna nih “vawleicung thlitu pali” kha an thlah lai i harnak nganpi aa thawk lai. (Biat. 7:1-3) Armageddon aa thawk hlanah Jesuh nih chiti thuhmi hna kha vancung ah a kaiter hna lai. (Matt. 13:41-43) Cucaah tuu in biaceih kan duh ahcun atu ah chiti thuhmi Khrih unau pawl cungah zumhfek tein kan um awk a si.