Sal Pathum Bianabia in Cawng
“Pakhat cu thong nga, pakhat cu thong hnih a pek i pakhat nolh cu thong khat a pek.”—MATT. 25:15.
1, 2. Jesuh nih sal pathum bianabia kha zeicah a chim?
JESUH nih chiti thuhmi a zultu pawl an rian zei a si langhter awkah sal pathum bianabia kha a chim. Asinain mah bianabia cu Jesuh zultu dihlak he aa pehtlai. Cucaah vancung ruahchannak a ngeimi kan si ah, vawleicung ruahchannak a ngeimi kan si ah mah bianabia a sullam kha kan hngalhthiam a hau.
2 Jesuh nih mah bianabia kha zeitikah dah a chim? Siangpahrang a si cang ti le donghnak caan aa thawk cang ti a langhter hngami hmelchunhnak kong a zultu pawl a chimh hna lioah a chimmi a si. (Matt. 24:3) Cucaah sal pathum bianabia cu mah hmelchunhnak ah aa tel ve i kan chan ah a tling.
3. Matthai dal 24 le 25 ah ṭialmi bianabia hna in zeidah kan i cawn khawh?
3 Jesuh nih sal pathum bianabia a chim lioah donghnak caan hmelchunhnak ah aa tel vemi a dang bianabia pathum zong a chim. Mah bianabia dihlak nih zultu hna nih an ngeih a herhmi sining pakhat cio kha an langhter. Matthai 24:45 in 25:46 tiangah mah bianabia hna kha kan hmuh khawh. A pakhatnak bianabia cu zumhawktlak sal kong a si, mah sal cu Jehovah miphun cawnpiak awkah rian a ngeimi chiti thuhmi phu hmete a si. Mah sal cu zumhawktlak tein le fim tein a um a herh. * A changtu bianabia cu ngaknu pahra kong a si. Mah ah Jesuh nih chiti thuhmi dihlak kha a rat lai ni le caan an hngalh lo caah timhcia tein le ralring tein um awkah ralrin a pek hna. * Mah hnuah chiti thuhmi dihlak nih an rian fakpi in ṭuan a herh ti cawnpiak awkah sal pathum bianabia kha Jesuh nih a chim. A donghnak ah, tuu le meheh bianabia kha a chim, mah nih vawleicung nun ding ruahchannak a ngeimi hna kong kha a langhter. Annih cu Jesuh i chiti thuhmi unau pawl cungah zumhfek tein an um a hau i an si khawh chungin an bawmh hna a hau ti kha a hleiin a langhter. * Hi capar ah sal pathum bianabia sullam kha kan i ruah hna lai.
Mipa nih a Salle kha Tangka a Pek hna
4, 5. Bianabia chung i mipa nih ahodah a aiawh, tangka thong khat cu zeizat tluk dah a si?
4 Matthai 25:14-30 rel. Sal pathum bianabia ah Jesuh nih khual a tlawngmi pa kong a chim. Mah he aa lomi a dang bianabia ah Jesuh nih Siangpahrang si awkah khual a tlawngmi pa kong a chim. * (Luka 19:12) Mah bianabia pahnih chung i mipa nih AD 33 ah vancung a kaimi Jesuh kha a aiawh tiah kan cauk hna nih kum tampi chung a fianter. Asinain Jesuh cu vancung a kaile cangka Siangpahrang a si colh lo. “A ral kha a ke lamh i a ser hna” caan, 1914 tiang a hngah.—Heb. 10:12, 13.
5 Bianabia chung i mipa cu tangka thong riat a ngei tiah Jesuh nih a chim. Mah cu a tam tukmi a si. * Mipa nih khual a tlawn hlanah a salle kha tangka a pek hna. Mah tangka kha karhter awkah a fial hna. Mah pa caah tangka cu a sunlawi tuk bantukin Jesuh caah a sunglawi tukmi thil pakhat a um. Mah cu zeidah a si? Vawleicung i a um lioah a ṭuanmi rian kha a si.
“Lo khi ṭha tein hei zoh hna hmanh u; rawl cu an hmin dih cang i ṭuan an cu diam cang khih”
6, 7. Tangka nih zeidah a aiawh?
6 Phungchim rian cu Jesuh caah a biapi tuk. Phung a chimnak thawngin mi tampi cu a zultu an hung si. (Luka 4:43 rel.) Asinain ṭuan awk rian tampi a um rih i mi tampi nih thawngṭha an cohlan lai ti kha a hngalh. Cucaah a zultu kha hitin a ti hna: “Lo khi ṭha tein hei zoh hna hmanh u; rawl cu an hmin dih cang i ṭuan an cu diam cang khih.” (Johan 4:35-38) A felmi lothlotu nih ṭuan a cu cangmi lo kha a kaltak sawhsawh lai lo. Jesuh zong cu bantuk lungput a ngei. Cucaah vancung a kai laite ah a zultu hna kha “va kal u law miphun vialte kha ka zultu ah va ser hna u” tiah nawl a pek hna. (Matt. 28:18-20) Cuticun Jesuh nih a sunglawimi ro a simi phungchim rian a pek hna.—2 Kor. 4:7.
7 A salle tangka a pemi pa bantukin Jesuh nih chiti thuhmi a zultu hna kha zultu siternak rian a pek hna. (Matt. 25:14) Cucaah tangka nih phungchim rian le zultu siternak rian kha a aiawh.
8. Sal pakhat cio hmuhmi tangka cu aa zat lo nain an bawipa nih zeidah aa ruahchan?
8 Bawipa nih a pakhatnak sal kha tangka thong nga, a pahnihnak sal kha thong hnih le a pathumnak sal kha thong khat a pek hna tiah Jesuh nih a chim. (Matt. 25:15) Bawipa nih a salle a pekmi hna tangka cu aa zat lo nain an dihlak in tangka karhter awkah an si khawh chungin an i zuam lai tiah aa ruahchan. Cu bantukin chiti thuhmi a zultu hna nih phungchim rian kha an si khawh chungin an ṭuan lai tiah Jesuh nih aa ruahchan. (Matt. 22:37; Kol. 3:23) AD 33, Pentekos ni thawkin Jesuh zultu hna nih miphun vialte kha zultu ah an hun siter hna. Lamkaltu Baibal cauk kan rel tikah zeitlukin dah rian an ṭuan ti kha fiang tein kan hmuh khawh. *—Lam. 6:7; 12:24; 19:20.
Donghnak Caan ah Sal hna nih Tangka An Hman
9. (a) Zumhfekmi sal pahnih nih tangka kha zeitindah an hman, mah in zeidah kan i cawn khawh? (b) Vawleicung nun ding aa ruahchanmi hna nih zeidah an tuah a herh?
9 An bawipa tangka ṭha tein a hmangmi a hmasa sal pahnih nih donghnak caan ah a nungmi zumhfekmi chiti thuhmi kha an aiawh hna. Annih nih a hleiin 1919 thawkin phungchim rian kha an si khawh chungin an ṭuan. Bianabia chungah sal pahnih hmuhmi tangka cu aa zat lo, mah cu zumhfekmi chiti thuhmi phu pahnih an um tinak a si lo. An pahnih in rian fakpi in an ṭuan i tangka lethnih an hmuh veve. Cu a si ah phungchim rian le cawnpiaknak rian kha chiti thuhmi hna lawng nih maw fakpi in an ṭuan a herh? A si lo. Jesuh chimmi tuu le meheh bianabia nih vawleicung nun ding aa ruahchanmi hna cu Jesuh i chiti thuhmi unau hna cungah zumhfek tein an um a hau i phungchim rian ah an bawmh hna a hau ti a kan hngalhter. Annih nih chiti thuhmi hna bawmh kha tinvo sung in an hmuh. Jehovah miphun cu “tuurun runkhat” an si i an dihlak in phungchim rian le zultu siternak rian kha fakpi in an ṭuan.—Johan 10:16.
10. Donghnak caan ah kan nung ti a langhtermi hmelchunhnak pakhat cu zeidah a si?
10 A zultu dihlak nih mi tampi kha zultu i ser awkah fakpi in an i zuam lai tiah Jesuh nih aa ruahchan. Kumzabu pakhatnak i a zultu hna nih cutin an rak tuah. Jesuh chimmi sal pathum bianabia a tlin caan, hi donghnak caan ah tah a zultu hna nih cutin an tuah maw? An tuah. Cucaah atu ah thawngṭha a theimi le zultu a hung simi hi hlan nakin a let tampi in an tam deuh. Jesuh zultu dihlak nih fakpi in rian an ṭuan caah mi thong tampi cu kum fatin tipil an ing. Cun annih zong phungchimnak ah an hun i tel ve. Cutin rian an ṭuanmi le a phichuak nih phungchim rian cu donghnak caan he aa tlaimi Jesuh chimmi hmelchunhnak ah aa tel ve ti kha fiang tein a langhter. Jesuh cu a rianṭuantu pawl cungah a lung a tling lai ti cu a fiang ko.
Jesuh nih a salle kha a sunglawimi ro a simi phungchim rian a pek hna (Catlangbu 10 zoh)
Bawipa cu Zeitikah dah a Rat lai?
11. Jesuh cu harnak nganpi chungah a ra lai ti kha zeitindah kan hngalh khawh?
11 Jesuh nih hitin a ti: “Caan saupi hnuah khin an bawipa cu a ra tlung ṭhan i an tangka hmannak kong kha felfai in a tuahpi hna.” (Matt. 25:19) Bawipa a simi Jesuh nih harnak nganpi a donghnak leiah cutin a tuah lai. Zeitindah kan hngalh khawh? Matthai dal 24 le 25 i chimchungbia ah Jesuh nih a ratnak asiloah a tlunnak kong voi tampi a chim. Tahchunhnak ah, mi nih “Mi Fapa cu . . . vancung in a rat kha an hmuh lai” tiah a chim. Mah nih harnak nganpi chungah Jesuh nih mi pawl bia a ceih hna lai caan kha a langhter. Jesuh nih donghnak caan ah a nungmi a zultu pawl zong kha timhcia tein um awkah ralrin a pek hna. ‘Nan Bawipa a rat lai ni kha nan hngal lo’ tiin le “Mi Fapa cu nan i rin lo caanpi ah a ra ko lai” tiah a ti hna. (Matt. 24:30, 42, 44) Cucaah sal pathum bianabia zongah Jesuh nih mi pawl biaceih awk le Satan vawlei hrawh awkah a rat lai caan kha a langhtermi a si ve. *
12, 13. (a) Bawipa nih sal pahnih kha zeitindah a ti hna, zeicah? (b) Chiti thuhmi hna cu zeitikah dah hmanung bik hmelchunhnak pek an si lai? (“ An Thih tikah aa Tlakmi in Biaceih An Si” timi rinli kulh zong zoh.) (c) Chiti thuhmi a bawmmi hna cu zei laksawng dah an hmuh lai?
12 Bawipa cu a khualtlawnnak in a rak tlun tikah thong nga pek a simi sal he thong hnih pek a simi sal he a miak lethnih in an hmuhmi kha a hmuh. Mah tikah bawipa nih hitin a ti veve hna: “Sal ṭha, zumhawktlak sal, na tuahmi cu a ṭha ngaingai. Tangka tlawmte na lehthalnak ah zumhawktlak na si, cucaah tangka tampi tawngthamtu ah kaan chiah lai.” (Matt. 25:21, 23) Bawipa a simi Jesuh cu hmailei i a rat tikah zeidah a tuah lai?
13 Harnak nganpi aa thawk laite ah Pathian nih vawleicung ah a taang rihmi, rian aa zuammi chiti thuhmi hna kha hmanung bik hmelchunhnak a pek hna lai. (Biat. 7:1-3) Mah hnu, Armageddon hlanah Jesuh nih annih kha vancung ah a thawhter hnanak thawngin laksawng a pek hna lai. Phungchim rianṭuannak ah chiti thuhmi a bawmmi vawlei ruahchannak a ngeimi hna tah zeitin? Annih cu tuu in biaceih an si lai. Pathian Pennak uknak tang i vawleicung ah nun ding timi laksawng an hmu lai.—Matt. 25:34.
A Ṭhalomi le a Tha a Thumi Sal
14, 15. Chiti thuhmi tampi cu a ṭhalomi le a tha a thumi an hung si lai tiah Jesuh nih a chimduhmi a si maw? Fianter.
14 Bianabia nih tangka thong khat a hmumi sal kong zong a chim. Anih nih tangka kha hmangin a miak hmuh awkah aa zuam lo, a karh hmuh awkah bank zongah a chia lo. Mah canah tangka kha a phum lehlam. Cucaah bawipa nih a ṭhalomi le a tha a thumi sal tiah a ti. Mah sal ṭhalo kha a pekmi tangka a chuh ṭhan i a pakhatnak sal kha a pek. Cun “a leng khuamui lakah” a hlonh i cuka ah lungdong ngaiin a ṭap.—Matt. 25:24-30; Luka 19:22, 23.
15 Jesuh nih sal pathum lak i pakhat cu a ṭhalomi le a tha a thumi a si tiah a ti tikah chiti thuhmi cheu thum cheu khat cu cu bantuk sal an si lai tiah a ti duhnak a si lo. Cutin a si kha mah bianabia le a dang pahnih kan tahchunhnak in kan hngalh khawh. Zumhawk a tlakmi le a fimmi sal bianabia ah Jesuh nih a dang sal a hremmi sal ṭhalo kong a chim. Mah cu zumhawk a tlakmi le a fimmi sal ah aa telmi cheukhat cu sal ṭhalo an hung si lai tiah a ti duhnak a si lo. Chiti thuhmi hna kha sal ṭhalo si lo awkah ralrin a pekmi hna tu a si. Cun ngaknu pahra bianabia ah Jesuh nih ngaknu hrut panga kong a chim. Mah cu chiti thuhmi a cheu cu a hrutmi an si lai a ti duhnak a si lo. An i timhcia lo le ralring tein an um lo ahcun zeidah a cang kho ti kha ralrin a pekmi hna tu a si. * Cu bantukin sal pathum bianabia zongah donghnak caan ah a nungmi chiti thuhmi tampi cu a ṭhalomi le a tha a thumi an si lai tiah Jesuh nih a ti duhnak a si lo. Chiti thuhmi hna kha sal ṭhalo bantuk si loin phungchim rian fakpi in ṭuan awkah ralrin a pekmi hna tu a si.—Matt. 25:16.
Phungchim rian fakpi a ṭuanmi a zultu dihlak kha Jesuh nih laksawng a pek hna lai
16. (a) Sal pathum bianabia in zei thil pahnih dah kan i cawn khawh? (b) Hi capar nih sal pathum bianabia hngalhthiam awkah zeitindah a kan bawmh? (“ Sal Pathum Bianabia kha Zeitindah Kan Hngalhthiam awk a Si?” timi rinli kulh zoh.)
16 Sal pathum bianabia in zei thil pahnih dah kan i cawn khawh? Pakhatnak, Jesuh nih chiti thuhmi a zultu hna kha a sunglawimi ro a simi phungchim rian le zultu siternak rian a pek hna. Pahnihnak, phungchim rian fakpi in ṭuan awkah Jesuh nih kan dihlak sinin aa ruahchan. Mah rian kha zumhawktlak tein kan ṭuan, Jesuh nawl kan ngaih i a cungah zumhfek tein kan um zungzal ahcun laksawng a kan pek lai ti kan zumh khawh.—Matt. 25:21, 23, 34.
^ cat. 3 2013, July 15, Vennak Innsang, cahmai 21-22, catlangbu 8-10 nih zumhawk a tlakmi le a fimmi sal aho a si kha a fianter.
^ cat. 3 A hmasa capar nih ngaknu aho an si kha a fianter.
^ cat. 3 Tuu le meheh bianabia kha 1995, October 15, Vennak Innsang, cahmai 23-28 [Kawl] le hi mekazin i a changtu capar nih a fianter.
^ cat. 4 “ Sal Pathum Bianabia le Sui Tangka Bianabia An i Lawhning” timi rinli kulh zoh.
^ cat. 5 Jesuh chan ah tangka thong khat cu mi pakhat i kum 20 chung rianṭuan man tluk a si.
^ cat. 8 Lamkaltu pawl an thih hnu tlawmpal ah zumhpialmi hna cu Khrihfabu kip ah an karh. Kumzabu tampi chungah phungchim rian cu ṭuan a rak si setsai lo. Asinain “rawlṭuan caan” a simi donghnak caan chungah phungchim rian cu thawk ṭhan a si. (Matt. 13:24-30, 36-43) 2013, July 15, Vennak Innsang, cahmai 9-12 ah zoh.
^ cat. 11 2013, July 15, Vennak Innsang, cahmai 7-8, catlangbu 14-18 zoh.
^ cat. 15 “‘Ralring tein’ Na Um Maw?” timi a hmasa capar, catlangbu 13 zoh.
