Kum tampi chungah kan cauk hna nih Magog ram i Gog timi cu Satan kha vancung in hlawnh a si hnuah pekmi min a si tiah an fianter. Zeicah? Biathlam cauk nih vawleicung pumpi i Pathian miphun dohnak kha Satan nih a hruai tiah a langhter caah a si. (Biat. 12:1-17) Cucaah Gog timi cu Satan i mindang a si tiah kan rak ruah.

Asinain mah fianternak ah buaibainak cheukhat a um. Mah kong hna hi ruathmanh: Gog hrawhnak kong chimmi ah Jehovah nih “sa ei hmang va le ramlak sahrang hna rawl ah kaan ser hna lai” tiah Gog kha a ti. (Ezek. 39:4) Cun hitin a ti chap: “Khi ni ah Israel ram ah . . . Gog cu vuinak hmun kha ka pek lai.” (Ezek. 39:11) Asinain mit in hmuh khawh lomi, thlarau pum a simi Satan cu va le saram nih zeitindah an ei khawh lai? Vawlei ah tah zeitindah vui khawh a si lai? Satan cu saram nih ei asiloah vui a si lai lo. Kum 1,000 chung dongh hngal lo khor ah thlak a si lai tiah Baibal nih fiang tein a chim.—Biat. 20:1, 2.

Satan cu kum 1,000 a dih tikah dongh hngal lo khor in chuah a si lai i “vawlei kili ah aa ṭhekmi miphun vialte kha hlen awkah aa thawh lai, cu mi hna cu Gog le Magog mi kha an si” tiah Baibal nih a ti. (Biat. 20:8) Asinain Satan cu Gog a si ahcun amahle amah aa hleng lai tinak a si. Cucaah Ezekiel le Biathlam cauk chung i “Gog” timi nih Satan kha a chimduhmi a si lo ti cu a fiang ko.

Cu a si ah Magog ram i Gog timi cu ahodah a si? Mah kha hngalh awkah Pathian miphun a dotu cu ahodah a si ti kha Baibal in kan kawl a hau. Baibal ah ‘Magog ram i Gog’ dohnak, ‘chaklei siangpahrang’ dohnak le “vawleicung siangpahrang hna” dohnak tiah a ti. (Ezek. 38:2, 10-13; Dan. 11:40 NW, 44, 45; Biat. 7:14; 19:19) Mah dohnak hna cu an i dang maw? An i dang men lai lo. Baibal ah dohnak pakhat kha min dangdang in a hman tawn. Zeicah cutin kan chim khawh? Armageddon aa thawk hlante i hmanung bik dohnak ah vawleicung miphun vialte an i tel tiah Baibal nih a ti caah a si.—Biat. 16:14, 16.

Pathian miphun hmanung bik doh an si lainak kong Baibal chimmi hna kan tahchunh tikah  Magog ram i Gog nih Satan kha a chimduhmi a si lo ti a fiang. Magog ram i Gog nih miphun vialte aa telmi phu pakhat kha a chimduhmi a si. Mah phu kha ‘chaklei siangpahrang’ nih a hruai lai maw? Fiang tein cun kan chim kho lo. Asinain mah fianternak cu Jehovah nih Gog he aa tlaiin a chimmi mah bia he tlak dawh a si: “Nangmah le na sinah a ummi miphun tampi, rel cawk a ti lomi ralkapbu nganpi, rangcung ralkap lawng te nih, chakleipi i a ummi nan inn cu kaltak nan timh.”—Ezek. 38:6, 15.

Cu bantukin Ezekiel chan ah a nung vemi profet Daniel nih chaklei siangpahrang kong kha hitin a chim: “Khi tikah nichuahlei le chaklei in thawngpang a hung thangmi nih amah cu an lauter lai i mi tampi kha thah awk le hloh awkah thinhung ngaiin a chuak lai. A bawi puan inn cu rili le tlang thiang, tlang vialte lak i aa dawh bikmi karlak ah cun a phun lai, sihmanhsehlaw ahohmanh bawmtu ngei loin a donghnak kha a phan lai.” (Dan. 11:44, 45) Mah cu Ezekiel cauk ah ṭialmi Gog nih a tuah hngami thil he aa lo.—Ezek. 38:8-12, 16.

Hmanung bik dohnak a dih hnuah zeidah a cang lai? Daniel nih hitin a chim: “Khi caan ah a nganmi vancungmi, na miphun a zohkhenhtu hna, Mikhael [Jesuh Khrih] kha [Armageddon ah] a hung chuak lai, Cun hi miphun nih miphun an si hramthawk in an tonmi harnak [harnak nganpi], harnak ṭhalo bik kha a tlung lai. Sihmanhsehlaw khi caan ah cun Pathian cauk chungah an min khumh a simi na mi hna cu an luat lai.” (Dan. 12:1) Jesuh nih a tuah laimi he aa lomi kha Biathlam 19:11-21 ah kan hmuh.

Asinain Biathlam 20:8 i “Gog le Magog” timi cu ahodah a si? Mah min nih kum 1,000 a dih hnu, hmanung bik hneksaknak ah Jehovah le a miphun a dotu vialte kha a chimduhmi a si. Annih cu Armageddon aa thawk hlante ah Pathian miphun a domi miphun, Magog ram i Gog bantukin huatnak lungput an ngei ve lai. Mah miphun cu Armageddon ah hrawh a si lai bantukin Gog le Magog zong hrawh a si ve lai. (Biat. 19:20, 21; 20:9) Cucaah kum 1,000 a dih hnu i dotu vialte kha “Gog le Magog” tiah auh cu aa tlakmi a si.

Baibal ṭha tein a hlathlaimi kan si bantukin hmailei ah a ra hngami ‘chaklei siangpahrang’ cu ahodah a si ti hngalh kha kan duh tuk. Pathian miphun doh awkah miphun hna a hruaitu cu aho a si hmanhah kan zumhmi thil pahnih a um: (1) Magog ram i Gog le a ralkap hna cu an sung lai i hrawh an si lai. (2) Kan Siangpahrang, Jesuh Khrih nih Pathian miphun kha a khamh hna lai i daihnak le himnak a umnak vawlei thar ah a hruai hna lai.—Biat. 7:14-17.