1. Kan hmuh lomi thil mitthlam i cuanter khawh cu zeicah a ṭhat? (A hramthawknak hmanthlak zoh.)

JEHOVAH nih a sunglawi tukmi laksawng a kan pek. Mah cu kan hmuh lomi thil mitthlam ah kan cuanter khawhmi hi a si. Mah nih hmailei ruahchannak ngeih awk, i timhtuah chung awk le buaibainak hrial awkah a kan bawmh. Jehovah cu hmailei kong a hngal chung khomi a si i hmailei ah a cang hngami thil cheukhat kha Baibal in a kan chimh. Kannih cu hmailei a cang hngami kha kan hmu chung kho lo nain kan mitthlam ah kan cuanter khawh. Mah nih zumhnak ngeih awkah a kan bawmh.—2 Kor. 4:18.

2, 3.(a) Mitthlam cuanternak nih zeitindah a kan bawmh khawh? (b) Hi capar ah zei biahalnak dah kan i ruah hna lai?

² A caan ah a si kho lomi thil kha kan mitthlam ah kan cuanter tawn. Tahchunhnak ah, ngakchianu pakhat nih pelep kaa cit tiah a mitthlam ah a cuanter men lai. Mah cu a si kho lomi a si. Asinain Samuel a nu Hannah nih cun a si khomi thil kha a mitthlam ah a cuanter. Tlangbawi pawl  he rian ṭuanṭi awkah a fapa kha puan biakinn i a kalpi lai ni kong kha a ruat peng. Mah cu mang sawhsawh men a si lo. Tuah awkah bia a rak khiah cangmi a si. Mah ni kong a mitthlam a cuantermi nih Jehovah sinah bia aa kammi ningin tuah awkah a bawmh. (1 Sam. 1:22) Jehovah biakam kong kan mitthlam i kan cuanter tikah a tling taktak hngami thil kong kan mitthlam ah kan cuantermi a si.—2 Pit. 1:19-21.

³ Baibal chan i Jehovah salle tampi nih Jehovah biakam kha an mitthlam ah an cuanter khawh. Cutin tuah cu an caah zeicah a ṭhat? Pathian biakam a tlin lai caan kong mitthlam i cuanter cu zeicah a ṭhat?

4. Abel nih hmailei ruahchannak kong kha zeicah a mitthlam ah a cuanter khawh?

⁴ Abel cu Jehovah biakam a zum hmasa bikmi a si. Adam le Evi nih sualnak an tuah hnuah Jehovah nih rul sinah hitin a chimmi kha a hngalh: “Nangmah le nu cu nan i hua lai, mi le rul cu ral an si lai. Mi nih na lu kha rial an in zuam lai i nang nih an kedil kha cuk naa zuam ve lai.” (Gen. 3:14, 15) Abel nih mah bia zeitindah a dikthliar in a tlin lai ti kha a hngal lo. Asinain Pathian chimmi bia kha ṭha tein a ruat ko lai. ‘Rul nih a cuk hngami, minung pawl mitling si ṭhan awkah a bawm hngami cu ahodah a si hnga?’ tiah Abel nih a ruat ko lai. Jehovah biakam vialte a tling lai ti kha a zumh, cucaah raithawinak a pek tikah Jehovah nih a cohlan.—Genesis 4:3-5; Hebru 11:4 rel.

5. Hmailei kong mitthlam cuanter cu Enok caah zeicah a ṭhat?

⁵ Enok zong Pathian cungah zumhfek tein a ummi a si. Anih cu ‘Pathian zeirel loin a thangchiatmi,’ mi ṭhalomi hna lakah a nungmi a si. Asinain Enok nih Pathian bia kha ralṭha tein a chim. Jehovah nih mi ṭhalo pawl a hrawh cang hna lai tiah a chim. (Judas 14, 15) Cutin chim khawh awkah zeinihdah a bawmh? Vawleicung mi vialte nih Jehovah an biak ahcun zeidah a lawh hnga tiah Enok nih mitthlam a cuanter caah a si kho men.—Hebru 11:5, 6 rel.

6. Buanchukcho hnuah Noah nih zei kong hna dah a ruah khawh men?

⁶ Noah nih Jehovah kha a zumh caah Buanchukcho ah hrawh a si lo. (Heb. 11:7) Cun Jehovah sinah saram raithawinak a pekmi zong hi a zumhnak ruangah a si. (Gen. 8:20) Buanchukcho hnuah vawleicung ah ṭhatlonak a hung um ṭhan. Nimrod nih Jehovah kha a ralchanh ko nain Noah tu cu zumhfek tein a um. (Gen. 10:8-12) Abel bantukin Pathian nih sualnak le thihnak hi nikhatkhat ah a hrawh lai ti kha a zumh. Noah cu a puarhrangmi uktu pawl an um ti lai lo caan zong a ruat ko lai. Kannih zong a rauhhlan ah a um hngami, a ṭha tukmi hmailei ruahchannak kha kan mitthlam ah kan cuanter khawh.—Rom 6:23.

7. Abraham, Isak le Jakob nih zeibantuk hmailei kong dah an mitthlam an cuanter khawh?

⁷ Abraham, Isak le Jakob nih a ṭha tukmi hmailei ruahchannak kong kha  an mitthlam ah an cuanter khawh. An “tefa” thawngin miphun vialte nih thluachuah an hmuh lai tiah Jehovah nih bia a kamh hna. (Gen. 22:18; 26:4; 28:14) Cun an chungkhar cu miphun nganpi pakhat ah an cang lai i Biakammi Ram ah an um lai ti zongin bia a kamh hna. (Gen. 15:5-7) Abraham, Isak le Jakob nih Jehovah biakam cu a tling lai ti an hngalh caah cuka ram ah an chungkhar an ummi kha an mitthlam ah an cuanter khawh. Adam le Evi nih sualnak an tuah thawkin Jehovah nih zumhfekmi a salle kha zeitindah minung cu a tlingmi an si ṭhan lai ti hngalhthiam awkah a bawmh hna.

8. Abraham kha a fekmi zumhnak ngeih awk le nawlngaih awkah zeinihdah a bawmh?

⁸ Abraham zumhnak cu a feh tuk caah a har tukmi thil sining hmanhah Jehovah nawl a ngai. Abraham le a dang zumhfekmi hna cu an nun lioah Pathian biakam pawl a tling rih lo nain an mitthlam ah an cuanter khawh. Baibal nih “lamhlatpi in an rak hmuh i an rak i lawm” tiah a ti. (Hebru 11:8-13 rel.) Abraham nih Jehovah nih hlanlio ah a biakam a tlinter zungzal ti a hngalh caah hmailei zongah a biakam vialte a tlinter hrimhrim lai tiah a zumh.

9. Pathian biakam a zumhmi nih Abraham cu zeitindah a bawmh?

⁹ Abraham nih Jehovah biakam a zumh caah a fialmi vialte a tuah dih. Tahchunhnak ah, Ur khua kha a kaltak i a nunchung vialte khua pakhat ah a um zungzal lo. An umnak pawng khua hna cu Jehovah a bia lomi uktu hna nih an uk caah a hmun zungzal lai lo ti kha a hngalh. (Josh. 24:2) Mah canah Jehovah le a cozah nih a zungzal in vawlei an uk lai caan kha aa ruahchan. Mah cozah cu “zungzal in a hmunmi khuapi, Pathian sermi” kha a si. (Heb. 11:10) Abraham lawng si loin Abel, Enok, Noah le a dang nih thawhṭhannak kha an zumh. Annih nih vawleicung zungzal nunnak kong an ruah tik poahah Jehovah an zumhnak cu a fek chin.—Hebru 11:15, 16 rel.

10. Jehovah biakam ruangah Sarah nih zei kong dah a mitthlam ah a cuanter khawh?

¹⁰ Abraham nupi Sarah cu Jehovah biakam a zum tukmi a si. Kum 90 a si tiang hmanhah fa a ngei rih lo nain fa a ngeih lai caan kha aa ngaih tuk. Sarah nih a fale miphun nganpi an si lai hmanh kha a mitthlam ah a cuanter khawh. (Heb. 11:11, 12) Zeicah cutin zumhnak a ngeih khawh? Jehovah nih Abraham kha hitin a ti caah a si: “Amah cu thluachuahnak ka pek lai i fapa pakhat an hrinpiak lai. Amah cu thluachuah ka pek lai i miphun hna nu a si lai; a tefa hna lakah cun siangpahrang zong an um lai.” (Gen. 17:16) Jehovah nih bia a kamh bantukin Sarah  nih fapa pakhat a hrin i a min ah Isak a si. Mah khuaruahhar thil nih Jehovah biakam vialte a tling dih lai ti kha a zumhter. Jehovah biakam vialte kan mitthlam kan cuanternak thawngin kan zumhnak a fek kho.

11, 12. Jehovah kha dawt chin awkah Moses kha zeinihdah a bawmh?

¹¹ Moses zong Jehovah biakam a zummi a si. Anih cu Izipt siangpahrang fapa in a ṭhangmi a si. Asinain zei dang vialte nakin Jehovah kha a dawt deuh caah rumnak le nawlngeihnak kha a duh lo. A nu le a pa nih Jehovah kong kha an cawnpiak, Hebru mi kha sal sinak in kaan luatter hna lai i Biakammi Ram kaan pek hna lai tiah Jehovah nih bia a kamhmi hna kha a nu le a pa nih an chimh. (Gen. 13:14, 15; Exo. 2:5-10) Mah biakam hna kha Moses nih a ruah deuhdeuh tikah Jehovah kha a dawt deuhdeuh ve.

¹² Baibal nih hitin a ti: “Moses kha a hung upat tikah Faraoh fanu fapa si a duhter lotu kha zumhnak a si. Sualnak chung i caan tawite chung i nuamh nakin Pathian mi hna sin sifah in kha aa thim deuh. Messiah ruang i nihsawhnak in cu Izipt ram chawhlawn vialte nakin a sung deuh ah a rel i cucu zeicahdah a si tiah, hmailei hmuh laimi laksawng kha a rak i ruahchih caah a si.”—Heb. 11:24-26.

13. Jehovah biakam kong ruahnak in Moses nih zeitindah ṭhatnak a hmuh?

¹³ Hebru mi kha sal sinak in ka luatter hna lai timi Jehovah biakam kha Moses nih thukpi in a ruah ko lai. A dang Jehovah salle bantukin Moses nih minung vialte kha thihnak in Jehovah nih a luatter hna lai ti kha a hngalh. (Job 14:14, 15; Heb. 11:17-19) Cucaah Jehovah nih minung zeitluk in dah a kan dawt ti kha Moses nih a hngalhthiam. Mah nih Jehovah kha a dawtter chin i a zumhnak a fekter chin. A nunchung vialte Jehovah rian ṭuan awkah a bawmh. (Deut. 6:4, 5) Faraoh nih thah a duh tik hmanhah Moses nih a ṭih lo. Jehovah nih hmailei ah laksawng a ka pek lai ti kha a hngalh.—Exo. 10:28, 29.

14. Hmailei kong he aa tlaiin mi cheukhat nih zeitindah an ruah?

¹⁴ Mi tampi nih hmailei kong kha an ruah i a si kho lomi thil kha an mitthlam ah an cuanter. Tahchunhnak ah, sifakmi cheukhat nih an hun rum lainak kong kha an ruat. Asinain Satan vawlei ah cun “retheihnak le harnak” a um zungzal lai tiah Baibal nih a ti. (Salm 90:10) Cheukhat nih cun vawlei buaibainak hna hi minung cozah nih a tawnghtham lai tiah an ruah. Asinain Pathian cozah lawng nih cutin a tuah khawh lai tiah Baibal nih a ti. (Dan. 2:44) Mi tampi nih vawlei cu zeitikhmanh ah aa thleng lai lo tiah an ruah. Asinain Pathian nih hi vawlei ṭhalo hi a hrawh lai tiah Baibal nih a ti. (Zef. 1:18; 1 Johan 2:15-17) Jehovah chimmi he i ralkah in a ruatmi hna cu an lung a rawk tuk lai.

15. (a) Pathian nih a kan kamhmi hmailei kong ruah cu zeicah a ṭhat? (b) Zei kha dah naa ngaih bik?

¹⁵ Jehovah nih a ṭha tukmi hmailei  kong bia a kan kamh. Mah caan kong kan ruah tikah kan i nuam deuh lai i a rian ṭuan khawh zungzal awkah thazaang kan ngei lai. Naa ruahchanmi cu van a si ah, vawlei a si ah Jehovah biakam ka hmu tiah na mitthlam ah na cuanter kho maw? Vawleicung ah zungzal nun ding naa ruahchan ahcun vawlei kha aa dawh tukmi hmun in ser awkah na hawile he rian nan ṭuanṭimi kha na mitthlam ah cuanter. Mah rian a zohkhenhtu hna nih nangmah zong an in zohkhenh. Cun nangmah bantukin na pawngkam ah a ummi cu Jehovah a dawmi lawngte an si. Na ngan a dam i thazaang tampi na ngei, cun lungretheih awk zeihmanh na ngei lo. Na thiamnak le na thil ti khawhnak kha midang bawmhnak le Jehovah thangṭhatnak ah na hman khawh caah naa lawm tuk. A tho ṭhanmi hna kha Jehovah kong hngalh awkah na bawmhmi hna hmanh a si kho men. (Johan 17:3; Lam. 24:15) Mah thil pawl mitthlam cuanter cu mang sawhsawh men a si lo. Hmailei kong Baibal chimmi vialte a tling dih lai.—Isa. 11:9; 25:8; 33:24; 35:5-7; 65:22.

16, 17. Jehovah nih bia a kan kamhmi hmailei kong chim cu zeicah a ṭhat?

¹⁶ Vawlei thar ah tuah kan duhmi kong unau pawl he kan i chimhmi nih hmailei ruahchannak kong fiang tein mitthlam cuanter awkah pakhat le pakhat kan i bawmh a si. Pakhat cio nih zeidah kan tuah lai ti kha a dikthliar in cun kan hngal lo. Kan i ngaihmi kong kan chimnak thawngin Jehovah biakam kan zumh kan langhter khawh. Cuticun lamkaltu Paul le Rom khua i unau hna bantukin a harmi caan ah Jehovah biak zungzal awkah pakhat le pakhat tha kan i pe.—Rom 1:11, 12.

¹⁷ Hmailei kong Jehovah biakammi  na ruah tikah na harnak kong lawng na ruat ti lai lo. Voikhat cu Piter nih Jesus kha hitin a hal: “Zeizong vialte kha kan kaltak i nangmah kha kan in zulh. Zeidah kan comi a si lai?” Jesuh nih Piter le a dang lamkaltu hna kha hmailei kong ruahter a duh hna. Hitin a ti hna: “Mi Fapa hi ka bawiṭhutdan cung i ka ṭhut tikah nannih a ka zultu hleihnih hna zong hi Israel miphun hleihnih kha an bia ceihpiak awkah bawiṭhutdan cungah nan ṭhu ve lai. Cun keimah ruangah a inn siseh, a lo siseh, a u siseh, a nau siseh, a farle si hna seh, a pa siseh, a nu siseh, a fale si hna seh, a kaltakmi cu a let zakhat in a hmuh ṭhan lai i zungzal nunnak kha pek a si lai.” (Matt. 19:27-29) Cucaah Piter le a dang lamkaltu hna nih vancung in Jesuh he uktu an ṭuanṭimi le vawleicung i nawl a ngaimi minung pawl mitling si awk i an bawmhmi hna kha an mitthlam ah an cuanter khawh.

18. Pathian biakam a tlin lai caan kong mitthlam cuanter cu zeicah a ṭhat?

¹⁸ A fekmi zumhnak ngeih awkah Jehovah salle kha zeinihdah a bawmh hna timi kong kan i ruah cang hna. Abel nih hmailei kong Jehovah biakammi kha a mitthlam ah a cuanter. Mah biakam pawl kha a zumh caah Jehovah mithmai ṭha a hmu. Abraham nih “tefa” he aa tlaimi Jehovah biakam a tlin lai kha a mitthlam ah a cuanter, cucaah a har tukmi thil sining hmanhah Jehovah nawl a ngaih. (Gen. 3:15) Moses nih Jehovah kamhmi laksawng kha aa ruahchih caah Jehovah kha a dawt i zumhfek tein a um. (Heb. 11:26) Kannih zong Jehovah biakam a tlin lai caan kan mitthlam ah kan cuanter tikah Jehovah kan dawtnak cu a fek chin i kan zumhnak a ṭhawng chin. A hnu capar ah mitthlam cuanter khawhnak kha a dang lam in zeitindah kan hman khawh timi kan i ruah hna lai.