1. Phungchimnak ah Matthai 6:9-13 i Jesuh cawnpiakmi thlacamnak kha zeitindah kan hman khawh?

MATTHAI 6:9-13 i thlacamnak kha mi tampi nih an hngalh. Pennak cu a um taktakmi cozah a si i mah nih vawlei kha paradis ah a thlen cang lai timi kong mi cawnpiak awkah mah thlacamnak hi kan hman. Pathian nih min a ngei i a min thianter a herh ti langhternak caah “na min thiang cu upat si ko seh” timi bia kha kan hman.—Matt. 6:9.

2. Thla kan cam fate biafang pakhat nolh lengmang cu Jesuh nih a duh lo ti kha zeitindah kan hngalh?

² Mi tampi nih an tuah tawn bantukin thla kan cam fatinte biafang nolh lengmang kha Jesuh nih a duh maw? A duh lo. Jesuh nih hitin a ti: ‘Thla nan cam tikah miphun dang hna bantukin biafang pakhat kha nolh lengmang hlah u.’ (Matt. 6:7, NW) A hnuah a zultu hna kha zeitindah thlacam ding ti a cawnpiak hna lio zongah mah thlacamnak kha a chim ṭhan nain a dikthliar in aa lomi biafang cu a hmang lo. (Luka 11:1-4) Cucaah zei bantuk ca hna ah dah thlacam ding a si ti cawnpiak awkah Bawipa thlacam kha a kan chimhmi a si.

3. Bawipa thlacam kong na hlathlai lioah zeidah naa hal khawh?

³ Hi capar le a hnu capar ah Bawipa thlacam kong kha a dikthliar in kan i ruah hna lai. Kan i ruah lioah hitin i hal:  ‘Mah thlacamnak nih thlacam thiam deuh awkah zeitindah a ka bawmh khawh?’ A biapi deuhmi cu, ‘Bawipa thlacam ningin ka nung maw?’ tiah i hal.

4. “Kan Pa” timi bia nih zeidah a kan hngalhter, Jehovah cu zeitindah kan Pa a si?

⁴ Jesuh nih “kan Pa” timi bia in a thlacamnak kha a thawk. Mah nih Jehovah cu vawleicung pumpi ah a ummi unau dihlak i kan Pa a si ti kha a kan hngalhter. (1 Pit. 2:17) Vancung ruahchannak a ngeimi chiti thuhmi hna cu Patian fale an hung si i Jehovah cu an Pa a hung si. (Rom 8:15-17) Vawlei ruahchannak a ngeimi hna zong nih Jehovah kha kan “Pa” tiah an auh khawh ve. Annih kha Jehovah nih nunnak le an herhmi thil a pek hna. Mitling an hung si hnu le hmanung bik hneksaknak ah Jehovah cung zumhfek tein an um hnuah “Pathian fale” tiah auh an si ve lai.—Rom 8:21; Biat. 20:7, 8.

5, 6. Nulepa nih an fale an pek khawhmi hna lakah a ṭha bikmi laksawng cu zeidah a si, fale pakhat cio nih mah laksawng kha zeitindah an tuah awk a si? (A hramthawknak hmanthlak zoh.)

⁵ Nulepa nih an fale kha Jehovah cu vancung kan Pa a si ti hngalhthiam awk le a sin i thlacam awkah an cawnpiak hnanak thawngin laksawng an pek hna. Thlanglei Africa i peng zohkhenhtu pakhat nih hitin a chim: “Ka fanule an chuah thawkin zan fatin hmunkhat ah thla kan cam, inn i ka um lo caan dah ti lo cu ka campiak peng hna. Ka fanule nih ka thlacamnak a biafang a dikthliar kha cu an i cinken lo. Asinain kan Pa Jehovah he a thiangmi pehtlaihnak, lungdaihnak le himnak ti bantuk kong kha cu an i cinken. Thlacam an hun thiam cangka aw chuah in thlacam awkah ka forh hna, mah lawngah an ruahnak le Jehovah cung i an intuarnak kha ka hngalh khawh lai. Mah cu an lungthin chung i a ummi hngalhnak caah caanṭha a si. An thlacamnak sullam a ngeih nakhnga Bawipa thlacam i a kong hna telh awkah ka cawnpiak hna.”

⁶ A fanule cu an ṭhan thluahmah bantukin Jehovah he an i naih thluahmah ve. Atu cu va an ngei cang i an vale he caantling in Jehovah rian an ṭuan. Nulepa nih an fale kha Jehovah cu a um taktakmi a si ti le a hawikom kan si kho ti an cawnpiak hnanak thawngin a ṭha bikmi laksawng an pek khawh hna. Asinain fale pakhat cio nih Jehovah he an i pehtlaihnak a feh nakhnga an i zuam a hau.—Salm 5:11, 12; 91:14.

7. Zei tinvo sung dah kan hmuh, zeidah kan tuah awk a si?

⁷ Kannih cu Pathian min hngalhnak le “amah min putu” sinak tinvo sung kan hmu. (Lam. 15:14; Isa. 43:10) “Na min thiang cu upat si ko seh” tiah thla kan cam, mah cu Pathian min thianter a si nakhnga caah a si. Pathian min thang a chiatter hngami zei thil hmanh tuah lo awk asiloah chim lo awkah Jehovah sinah bawmhnak kan hal. Mi an cawnpiakmi hna ningin a tuah lomi kumzabu pakhatnak i mi cheukhat bantuk kan si awk a si lo. Paul nih hitin a ti hna: “Nanmah Judah mi ruangah Jentail mi nih Pathian kha an thangchiat.”—Rom 2:21-24.

8, 9. Jehovah nih a min thianter a duhmi hna a bawmh hnaning kha tahchunhnak in chim.

⁸ Jehovah min thang ṭhatter awkah kan tuah khawhmi zei paoh kan tuah.  A fapa kumhnih a si ah a vapa nih a thihtakmi Norway i unaunu pakhat nih hitin a chim: “Mah caan cu ka nunnak ah a har tukmi caan a si. Chun nitlak, zan khuadei ti awkin nifate thla ka cam. A ṭhalomi biakhiahnak asiloah zumhawktlak loin ka um ruangah Satan nih Jehovah a nihsawh nakhnga lo lungdai tein um khawh awkah thazaang ka pe tiah ka hal. Jehovah min thianter ka duh i Paradis ah ka fapa kha a pa hmuhter ṭhan ka duh.—Ptb. 27:11.

⁹ Jehovah nih a thlacamnak cu a let maw? A leh. Unau pawl he hmaan tein aa hawikomhnak thawngin thazaang a hmu. Kumnga hnuah Khrihfa upa pakhat he an i um. Atu ah a fapa cu kum 20 a si cang i tipil a ing cangmi unau pakhat a si. Hitin a chim: “Ka vapa nih ka fapa zohkhenhnak ah a ka bawmh caah ka lawm tuk.”

10. Pathian nih zeitindah a min kha tling tein a thianter lai?

¹⁰ Jehovah nih a min thang a chiattertu le an Uktu in amah a cohlang lomi vialte a hrawh hna tikah a min kha tling tein a thianter lai. (Ezekiel 38:22, 23 rel.) Mah tikah minung cu mitling an hung si lai, van le vawlei i a ummi vialte nih Jehovah an biak lai i a min thiang kha an upat lai. A donghnak ah dawtnak a ngeimi kan Pa nih “zeizong vialte kha a uk dih cikcek hna lai.”—1 Kor. 15:28.

11, 12. 1876 ah Jehovah nih a miphun kha zei kong dah hngalhthiam awkah a bawmh hna?

¹¹ Jesuh van i a kir ṭhan hlanah a zultu hna nih hitin an hal: “Bawipa, atu caan ah hin maw Israel mi cu uknak kha na pek ṭhan hna lai?” Pathian Pennak aa thawk lai caan hngalh awkah a caan a cu rih lo tiah Jesuh nih a leh hna. Phungchim rian tu biapi i chiah awkah a forh hna. (Lamkaltu 1:6-8 rel.) Asinain Pathian Pennak a tlun nakhnga thlacam awk le mah caan kha i ngaih awkah a cawnpiak hna. Cucaah kannih zong Pennak a rat nakhnga caah thla kan cam pengmi a si.

¹² Jesuh nih van ah uk hram a thawk lai ah Jehovah nih a miphun kha zeitik in dah uknak aa thawk lai ti hngalhthiam awkah a bawmh hna. 1876 ah Charles Taze Russell nih “Jentail mi Caan: Zeitikah dah a Dih lai?” timi capar a ṭial. Daniel chimchungbia i “kum sarih” cu Jesuh chimchungmi “ramdang mi . . . an caan” timi he aa khat tiah a fianter. Mah caan cu 1914 ah a dih lai ti zongin a fianter. *—Dan. 4:16; Luka 21:24.

13. 1914 ah zei thil dah a cang, 1914 thawkin a cangmi vawlei thil sining nih zeidah an langhter?

¹³ 1914 ah Europe ah raltuknak aa thawk i tlawmpal ah vawlei pumpi ah a karh. Raltuknak ruangah mangṭam a tlung. Raltuknak a hun dih, 1918 ah ngal-eu zawtnak ruangah mi tampi an thi i raltuknak ruangah a thimi nakin an tam deuh. Mah thil hna cu Jesuh chimmi “hmelchunhnak” ah an i tel. Hmelchunhnak hna nih 1914 ah Jesuh cu van ah Siangpahrang a hung si ti kha an langhter. (Matt. 24:3-8; Luka 21:10, 11) Mah kum ah Jesuh cu “teitu nih tei awk ah aa thawh bantukin aa thawh.” (Biat. 6:2) Jesuh nih Satan le a khuachia hna kha van in vawlei ah a thlak hna. Mah chimchungbia hi a hung tling: “Vawlei le rili caah cun ṭihnung a va si hringhran dah! Zeicahtiah Khuachia cu nan sinah a rung ṭum cang i cu pinah caan tawite lawnglawng ka ngei ti kha a hngalh fawn caah a thin a linh in a lin ko.”—Biat. 12:7-12.

14. (a) Pathian Pennak a rat nakhnga zeicah thla kan cam peng? (b) Atu ah zei a biapimi rian dah kan ṭuan awk a si?

¹⁴ Jesuh Pathian Pennak Siangpahrang a hung si tikah vawlei ah ṭihnungmi thil hna an chuak. Cutin a chuahnak a ruang hngalhthiam awkah Biathlam dal 12 i chimchungbia nih a kan bawmh. Jesuh nih van ah a uk cang ko nain Satan cu hi vawlei uktu a si rih. Asinain a rauhhlan ah Jesuh nih vawleicung i ṭhatlonak vialte a hrawh dih tikah teinak tling a hmuh lai. Mah caan a panh hlan tiang Pathian Pennak a rat nakhnga thla kan cam peng i Pennak kong kha kan chim peng. Kan ṭuanmi rian nih Jesuh chimchungmi mah bia hi a tlinter: “Miphun vialte hna ca i tehte si awkah Vancung Pennak kong Thawngṭha hi khuazakip ah chim a si lai, cun cu hnu lawngah cun donghnak cu a si lai!”—Matt. 24:14.

15, 16. Vawleicung ah Pathian duhnak tuah si seh tiah thlacam lawngin a za maw? Fianter.

¹⁵ A luancia kum 6,000 hrawngah vawleicung ah Pathian duhnak tuah a rak si. Cucaah Jehovah nih thil vialte cu a zoh i “a lung a si ngaingai.” (Gen. 1:31) A hnuah Satan nih a hun ralchanh i mah caan thawkin mi tampi cu Pathian duhnak an tuah ti lo. Asinain atu ah Jehovah a biami nuai riat hrawng an um. Annih  nih vawleicung ah Pathian duhnak tuah a si nakhnga thla an cam i Pathian duhnak kha an tuah. Pathian duhmi lam in an nung i a Pennak kong kha lungtho tein mi an cawnpiak hna.

¹⁶ Tahchunhnak ah, 1948 ah tipil a ing i Africa ah missionary a ṭuanmi kum 80 a simi unaunu nih hitin a chim: “Tuu bantuk lungthin a ngeimi hna sinah a caan a tlai tuk hlanah kan phanh khawh nakhnga le Jehovah kong kan cawnpiak khawh hna nakhnga thla ka cam tawn. Mi pakhat sin thawngṭha ka chim lai ah a lungthin suk khawh awkah fimnak ka pe tiah thla ka cam. Kan hmuh cangmi tuu bantuk lungthin a ngeimi hna kan bawmh hna tikah kan i zuamnak kha thluachuah kan pe tiah Jehovah sinah thla ka cam.” Kum upa a simi mah unaunu nih mi tampi kha Jehovah kong hngalh awkah a bawmh hna. Jehovah duhnak kha lungtho tein a tuahmi kum upa na hngalhmi an um maw?—Filipi 2:17 rel.

17. Minung le vawlei caah Jehovah nih a tuah hngami he aa tlaiin zeitindah na um?

¹⁷ Jehovah nih vawleicung in a ral pawl a hrawh hna hlan tiang a duhnak tuah a si nakhnga thla kan cam peng lai. Vawlei cu paradis ah ser a si cang lai i mi tampi cu an tho ṭhan lai. Jesuh nih “thlan chung i a ummi mithi vialte nih a aw an theih lai caan kha a ra lio, cun an thlan khan an chuak lai” tiah a ti. (Johan 5:28, 29) Kan dawtmi hna an thawh ṭhan tikah zeitluk in dah kan i nuamh lai khi ruathmanh. Pathian nih kan “mitthli vialte kha a hnawh dih” lai. (Biat. 21:4) A tho ṭhan hngami tam deuh cu “miṭhalo” an si, annih cu Jehovah le Jesuh kong biatak a thei bal lomi an si. “Zungzal nunnak” an hmuh nakhnga Pathian duhnak kha kan cawnpiak hna lai.—Lam. 24:15; Johan 17:3.

18. Minung nih kan herh bikmi cu zeidah a si?

¹⁸ Pathian Pennak a tlun tikah a min thianter a si lai i van le vawlei ah a ummi vialte nih Jehovah kha lungrual tein an biak lai. Pathian nih Bawipa thlacam i a thawknak lei pathum kha a kan leh tikah minung nih kan herh bikmi thil a kan pek lai. A hnu capar ah Jesuh nih thlacam awk a kan cawnpiakmi a dang a biapimi kong kan i ruah hna lai.