1-3. Kan herhmi kha Jehovah nih a hngalh tiah unaunu pakhat nih zeicah a zumh?

HMAANHMAAN a ṭuanmi Lana nih 2012 ah Germany a tlawn lioah a cangmi kha zeitikhmanh ah a philh kho lo. Jehovah nih ka thlacamnak pahnih a ka leh tiah a ruah. Vanlawng dinhnak hmun lei i tlanglawng in a kal lioah mi pakhatkhat sin thawngṭha chim khawh awkah ka bawm tiah thla a cam. Vanlawng dinhnak hmun a phanh tikah aa cit hngami vanlawng cu thaizing ah a phan te lai ti kha a hngalh. Mah tikah zankhat riah a hau rih, asinain a tangka nih le a dih deng cang fawn i bawmhnak hmuh awkah Jehovah sinah thla a cam.

² Thla a cam dih tikah “Lana, kahin zeidah na tuah?” tiah mi pakhat nih a chawnhmi kha a theih. A vun zoh tikah sianginn a rak kaiṭi hawi a si. Mah a hawipa cu Thlanglei Africa ah kal aa timh caah a nu le a pi nih an rak thlah. Lana nih a sining kha a chimh hna tikah mah pa i a nu le a pi nih an inn ah riah an sawm. Annih nih Lana i a zumhnak kong le hmaikal rian kong he aa tlaiin biahalnak tampi an tuah.

³ A thaizing thaithawh an ei dih hnuah Baibal he aa tlaimi an biahalnak hna kha Lana nih a phit hna. An sinah unau  pakhatkhat nih rak len khawh awkah an address kha a hla hna. Lana cu inn ah tluang tein a phan i atu tiang hmaikal a ṭuan rih. Jehovah nih ka thlacamnak a theih, ka herhmi a hngalh i a ka bawmh tiah a ruah.—Salm 65:1.

4. Hi capar ah zei kong dah kan i ruah hna lai?

⁴ Ruahlopi in harnak kan ton tikah Jehovah sin thlacam cu a fawi i Jehovah nih lunglawm tein a kan ngaihpiak. (Salm 34:15; Ptb. 15:8) Asinain Jesuh cawnpiakmi Bawipa thlacam nih kan cam awk a simi, a biapimi a kong a um rih ti kha a kan hngalhter. Bawipa thlacam i a donghnak lei pali nih Jehovah cungah zumhfek tein um awkah zeitindah a kan bawm khawh ti kha hi capar ah kan i ruah hna lai.—Matthai 6:11-13 rel.

5, 6. Rawl tampi kan ngeih ko hmanhah ‘kan herhmi rawl kan pe’ tiah hal awkah Jesuh nih zeicah a kan cawnpiak?

⁵ Jesuh nih “ka pe tuah” ti loin “kan pe tuah” ti hal awkah a kan cawnpiak. Africa ah peng zohkhenhtu a simi Victor nih hitin a chim: “Zeidah kan ei lai, aho nih dah inn man a kan pekpiak lai tiah lungretheih kan herh lo caah ka nupi he Jehovah kha kan lawmh tuk. Unau pawl nih nifate kan herhmi kha a kan zohkhenh. A kan bawmmi unau pawl i an harnak kha tawnghthamh khawh awkah Jehovah sin thla ka campiak hna.”

⁶ Kannih cu rawl tampi kan ngei men ko lai nain unau tampi cu an si a fak. Cheukhat cu leiser ral an tong. An caah thla campiak lawng si loin an herhmi kan bawmh khawh hna. Tahchunhnak ah, kan ngeihmi kha kan pekṭhenh khawh hna. Cun Jehovah miphun i vawleicung pumpi rianṭuannak caah thawhlawm hmaan tein kan pek khawh. Kan pekmi thawhlawm nih a chambaumi unau pawl kha tampi a bawmh khawh hna.—1 Johan 3:17.

7. “Thaizing kong ah lungrethei in um hlah u” tiah Jesuh nih zeicah a kan cawnpiak?

⁷ Jesuh nih Bawipa thlacam kong a kan cawnpiak hnuah thilri chawva biapi i chiah lo awk zongah a kan cawnpiak. Jehovah nih ramlak pangpar hmanh a zohkhenh hna ahcun “nannih chinchin cu thuamh loin an um hna hnga maw? Nan zumhnak a va hme hringhran dah. Cucaah cun ‘Khuazei in dah . . . ka hnipuan cu ka hmuh lai’ tiin lungrethei in um hlah ngat u” tiah Jesuh nih a ti. Cun “thaizing kong ah lungrethei in um hlah u” tiah a ti chap. (Matt. 6:30-34) Hmailei kong ah kan lungre a theih awk a si lo. Nifate kan herhmi kan ngeih ahcun kan hna a ngam awk a si ko. Tahchunhnak ah, umnak hmun, chungkhar zohkhenhnak caah rian le ngandamnak caah a ṭhami biakhiahnak tuah khawh awkah fimnak kan pe tiah thla kan cam khawh. Asinain a biapi deuhmi thil pakhat a um rih.

8. Nifate kan herhmi rawl kong he aa tlaiin Jesuh chimmi bia nih zeidah a kan hngalhter? (A hramthawknak hmanthlak zoh.)

⁸ Nifate kan herhmi rawl kong he aa tlaiin Jesuh chimmi bia nih thildang zong a kan hngalhter. Hitin a ti: “Minung hi rawl lawngin a nung kho lo, si hmanhsehlaw Pathian nih a chimmi bia paoh cu a nunnak a si lai.” (Matt. 4:4) Cucaah Jehovah nih a kan cawnpiak zungzal nakhnga le amah he pehtlaihnak ṭha ngeih awkah a herhmi a kan pek nakhnga thla kan cam awk a si.

9. Kan sualnak cu zeicah leiba bantuk a si?

⁹ Jesuh nih ‘kan leiba cu kan ngaihthiam’ tiah thlacam awkah a kan cawnpiak. (Matt. 6:12, NW) A hnu zongah “kan sualnak kha kan ngaithiam” tiah thlacam awkah a kan cawnpiak. (Luka 11:4) Kan sualnak cu leiba bantuk a si caah cutin a kan cawnpiakmi a si. 1951, Vennak Innsang nih sualnak kan tuah tikah Jehovah lei kan bat bantuk a si tiah a fianter. Jehovah kha dawt awk le a nawl ngaih awkah rian kan ngei. Cucaah sualnak kan tuah ahcun Jehovah sinah kan pek awk a simi thil kan pek lo bantuk a si. Jehovah nih a duh ahcun amah he kan i pehtlaihnak kha zeitik caan paohah a hrawh khawh. “Sualnak tuah cu Pathian dawt lo a si” tiah mah Vennak Innsang nih a ti chap.—1 Johan 5:3.

10. Jehovah nih zeicah kan sualnak a kan ngaihthiam, mah kha zeitindah kan hmuh awk a si?

¹⁰ Kan sualnak ngaihthiam awkah Jehovah nih Jesuh tlanhnak man a kan timhtuahpiak caah kan i lawm tuk. Ni fate Jehovah ngaihthiamnak kan herh. Jesuh a thihnak cu kum 2,000 hrawng a si cang nain atu tiang mah in ṭhatnak kan hmu. Mah a sunglawi tukmi laksawng caah Jehovah kha kan lawmh zungzal awk a si. Sualnak le thihnak in luat awkah a herhmi tlanhnak man kha ahohmanh nih kan pe kho lo. (Salm 49:7-9; 1 Piter 1:18, 19 rel.) Bawipa thlacam i “kan sualnak kha kan ngaithiam” timi bia nih kanmah bantukin unau pawl zong nih tlanhnak man an herh ve ti kha a kan hngalhter. Jehovah nih kanmah ca lawng ruat loin unau pawl i thlaraulei zong kha ruahter a kan duh. Mah ah kan cungah sualnak a tuahmi hna an i tel. An sualnak cu a hmete a si ko nain kan ngaihthiam hnanak thawngin kan dawt hna kha kan langhter. Cun kan sualnak kha Jehovah nih a kan ngaihthiam caah kan i lawmh kan langhter zong a si.—Kol. 3:13.

11. Midang ngaihthiam cu zeicah a biapit?

¹¹ Mitling lo kan si caah kan thin a kan huntermi hna ngaihthiam cu a caan ah cun a fawi lo. (Lev. 19:18) An tuahmi thil kha mi sinah kan chim tikah pakhat le pakhat i ṭanhnak a chuak kho i mah nih Khrihfabu lungrualnak kha a hnorsuan khawh. Cutin sinak nawl kan awnh ahcun Pathin laksawng a simi tlanhnak man kan sunsak lo bantuk a si lai i mah in ṭhatnak kan hmu kho lai lo. (Matt. 18:35) Midang kan ngaihthiam hna lo ahcun Jehovah nih a kan ngaithiam ve lai lo. (Matthai 6:14, 15 rel.) Jehovah ngaihthiamnak hmuh kan duh ahcun a huatmi zei thil paoh kan hrial awk a si.—1 Johan 3:4, 6.

12, 13. (a) Jesuh tipil a in hnuah zeidah a cang? (b) Tukforhnak i kan tlak ahcun zeicah midang kan mawhchiat hna awk a si lo? (c) Jesuh nih a thih tiang zumhfek tein a umnak thawngin zeidah a langhter?

¹² Bawipa thlacam i “hneksaknak chungah kan phakter hlah” timi bia nih Jesuh tilpil a in hnu tlawmpal ah a cangmi thil kha a kan hngalhter. Pathian thlarau nih Jesuh kha “Satan nih rak tukforh awkah” ramlak ah a kalpi. (Matt. 4:1; 6:13) Mah kha Jehovah nih zeicah a awnh? Adam le Evi nih Jehovah uknak an ralchanh lioah a chuakmi thil kha tawnghtham awkah Jehovah nih Jesuh kha vawlei ah a rak thlah. Adam le Evi dohnak ruangah a chuakmi biahalnak hna cu caan pek in tawnghtham a hau. Tahchunhnak ah, Jehovah nih minung a ser hna tikah a chambaunak a um maw? A tlingmi pakhat cu “miṭhalo pa” tukforhnak ton tikah Jehovah cungah zumhawktlak tein a um kho lai maw? Minung nih anmah tein an i uk ahcun a ṭha deuh hnga maw? (Gen. 3:4, 5) Hmailei ah Jehovah nih mah biahalnak hna kha lungtling lakin a tawnghtham tikah van le vawlei ah a ummi vialte nih Jehovah uknak hi a ṭha bikmi a si ti kha an hngalh lai.

 ¹³ Jehovah cu a thian caah mi kha ṭhatlonak tuah awkah a tukforh bal hna lo. Satan cu ‘Tukforhtu’ a si. (Matt. 4:3, NW) Satan nih lam tampi hmangin a kan tukforh. Asinain thim awk kan ngei. Tukforhnak kha kan al lai maw, al lai lo ti kha pakhat cio nih bia kan khiah khawh. (Jeim 1:13-15 rel.) Satan nih a tukforh tikah Jesuh nih Baibal cherhchan in a rak al colh. Pathian cungah zumhawktlak tein a um. Asinain Satan cu a lung a dong lo. Jesuh kha tukforh awkah caanṭha a hngak. (Luka 4:13) Satan nih zeitin aa zuam hmanhah Jesuh nih Pathian kha a Uktu in a nawl a ngaih zungzal. Mitling pakhat cu a har tukmi thil sining hmanhah Jehovah cungah zumhawktlak tein um khawh a si ko ti kha Jesuh nih a langhter. Asinain Satan nih nangmah telin Jesuh zultu vialte kha Jehovah nawl ngaih lo awkah a tukforh hna.

14. Tukforhnak doh awkah zeidah tuah a herh?

¹⁴ Jehovah uknak he aa tlaiin a chuakmi biahalnak hna cu atu tiang tawnghtham a hau rih. Cucaah kanmah tukforh awkah Jehovah nih Satan kha a awnhmi a si. Jehovah nih sualnak tuah awkah a kan tukforh bal lo. A cungah zumhawk tlak tein an um lai ti kha a zumh i bawmh a kan duh. Zalonnak kan ngeihmi kha a upat. Cucaah a hmaanmi thil tuah awkah a kan hnek bal lo. Zumhfek tein kan um lai maw, um lo timi kong ah kanmah tein biakhiahnak nawl a kan pek. Tukforhnak ah kan tlak nakhnga lo kan tuah a herhmi thil pahnih a um. Mah cu Jehovah he naih tein um le thlacam zungzal kha a si. Cu a  si ah kan thlacamnak kha Jehovah nih zeitindah a kan leh?

15, 16. (a) Doh a herhmi tukforhnak cheukhat cu zeidah an si? (b) Tukforhnak chungah kan tlak ahcun ahodah sual phawt awk a si?

¹⁵ Satan tukforhnak doh khawh awkah Jehovah nih thiang thlarau a kan pek. Cun ṭihnungmi thil ralrin peknak caah Baibal le Khrihfabu zong a kan pek. Tahchunhnak ah, a herh taktak lomi thil caah kan caan, kan tangka le kan thazaang tam tuk in hman lo awkah ralrin a kan pek. Espan le Janne cu Europe i ram ṭha ah a ummi an si. An ram i thawngthanhtu a herh deuhnak hmun ah kum tampi chung hmaanhmaan an ṭuan. Fa an hun ngeih tikah hmaikal in an i din. Atu cu fa pahnih an ngei cang. Espan nih hitin a chim: “Pathian rian ah a hlan bantukin caan tampi kan hman khawh ti lo caah tukforhnak chungah kan tlak nakhnga lo Jehovah sinah thla kan cam lengmang. Kan zumhnak a feh nakhnga le phungchim rian ah kan lung a thawh nakhnga rak kan bawmh tiah thla kan cam.”

¹⁶ Doh a herhmi a dang tukforhnak pakhat cu a thurhnawmmi hmanthlak zohnak a si. Mah tukforhnak chungah kan tlak ahcun Satan kha mawhchiat khawh a si lo. Zeicah? A ṭha lomi thil tuah awkah Satan le a vawlei nih a kan hnek khawh lo caah a si. Mi cheukhat nih a thurhnawmmi hmanthlak an zohmi cu a ṭha lomi ruahnak kha an hlawt lo caah a si. Asinain unau tampi nih mah tukforhnak kha an doh khawh caah kannih zong nih kan doh khawh ve ko.—1 Kor. 10:12, 13.

17. (a) “Mi ṭhalopa sin khan him tein kan umter” timi kan thlacam ningin zeitindah kan nun khawh? (b) Zei bantuk hnangamnak caan dah a nai cang?

¹⁷ “Mi ṭhalopa sin khan him tein kan umter” timi kan thlacam ningin zeitindah kan nun khawh? “Vawlei ta” kan si awk a si lo i ‘vawlei hi siseh, a chung thilri hi si hna seh, kan tlaihchan’ awk a si lo. (Johan 15:19; 1 Johan 2:15-17) Jehovah nih Satan le hi vawlei ṭhalo a hrawh tikah zeitluk in dah kan hna a ngam lai khi ruathmanh. Asinain mah caan a phanh hlang tiang Satan cu “caan tawite lawnglawng ka ngei ti kha a hngalh fawn caah a thin a linh in a lin ko” ti kha philh hna hlah u sih. Jehovah kan biak ti nakhnga lo Satan nih a tuah khawhmi zei paoh a tuah lai. Cucaah Satan sinin kan huppheng ko tiah Jehovah sinah thla kan cam zungzal awk a si.—Biat. 12:12, 17.

18. Satan vawlei donghnak in luat kan duh ahcun zeidah kan tuah awk a si?

¹⁸ Satan um lonak vawlei ah um na duh maw? Na duh ahcun Pathian Pennak a rat nakhnga, a min thianter a si nakhnga le vawlei ah a duhnak tuah a si nakhnga thla cam zungzal. Nangmah zohkhenh awk le zumhfek tein um awkah a herhmi zei paoh pek awkah Jehovah kha i bochan. Bawipa thlacam ningin nun awkah na si khawh chungin i zuam.