ANITA cu Jehovah Tehte pakhat a hung si tikah a vapa cu a thin a hung tuk. * Pumhnak ah a kalter duh lo i Pathian min kha zeitikhmanh ah na chim lai lo tiah a ti. Anita nih Jehovah min a chimmi a theih hmanhah a thin a hung tuk.

Mah lengah a fale kha Jehovah kong na cawnpiak hna lai lo i pumhnak ah na kalpi hna lai lo tiah Anita kha a vapa nih a ti. A vapa hngalh loin a fale Jehovah kong cawnpiak cu Anita caah a har tuk.

Kannih zong Anita bantukin chungkharmi ralchanhnak kan tong kho ve. Asiloah a dang a harmi thil sining kan tong men lai. Damlonak, fale asiloah innchunghawi thihnak, chungkharmi pakhat nih Jehovah kaltak ti bantuk kan tong kho men. Mah thil sining hna ah Jehovah cung zumhfek tein um khawh awkah zeidah na tuah khawh?

Lamkaltu Paul nih ‘inkhawhnak ngeih a hau’ tiah a ti. (Heb. 10:36, NW) Cu a si ah inkhawhnak ngeih awkah zeinihdah aan bawmh lai?

Harnak na ton tikah inkhawhnak ngeih awkah Jehovah i bochan a hau ti kha philh hlah. Bawmhnak hmuh awkah thla cam. Ana cu an i umnak kum 30 a si cangmi a vapa nih ruahlopi in a thihtak tikah cutin a tuah. Ana nih hitin a chim: “A rian ṭuannak in zeitikhmanh ah a rak ṭin ti lo. Anih cu kum 52 te lawng a si rih.”

Ana cu a rian a tam tuk ko nain a lungfahnak cu a tlau hlei lo. Zeidah a tuah? Hitin a chim: “Ka lungthin kha Jehovah sinah ka bungh i rak ka bawm tiah ka nawl.” Thla a cam dih tikah a lung a hun daih caah Jehovah nih a ka bawmh ti kha a hngalh. Ana nih hitin a chim: “Jehovah nih ka vapa a thawhter ṭhan lai ti kha ka zumh tuk.”—Fil. 4:6, 7.

Jehovah nih a salle an thlacamnak kha ka ngaih lai tiah bia aa kam. (Salm 65:1) Amah an biak khawh zungzal nakhnga a herhmi zei paoh a pek hna lai. A har tukmi thil sining hmanhah zumhfek tein um awkah Jehovah nih aan bawmh lai.

Inkhawhnak ngeih awkah Jehovah nih a kan bawmhnak a dang lam pakhat cu Khrihfabu i unau pawl a kan pekmi hi a si. Hremnak an ton lioah pakhat le pakhat aa bawmmi Thesalonika khua i unau pawl sinin kan i cawn khawh. Cu bantuk caan ah a hleiin pakhat le pakhat tha i pek an herh. (1 Thes. 2:14; 5:11) Hmunkhat ah an i pumhnak thawngin le naih tein an umnak thawngin Jehovah cung zumhfek tein um awkah an unau pawl kha an bawmh hna. Thesalonika khua i unau hna bantukin zumhfek tein um awkah zeidah kan tuah khawh?

Khrihfabu he naih tein um le pakhat le pakhat tha i pek kan herh, a hleiin harnak caan chungah kan herh. (Rom 14:19) Lamkaltu Paul cu hremnak le a dang buaibainak ruangah harnak a tong nain Jehovah nih inkhawh awkah thazaang a pek. Tahchunhnak ah, unau pawl hmangin Paul kha Jehovah nih tha a pek. Paul nih a hawile kong kha hitin a chim: “Ka caah bawmtu ṭhahnem ngaingai an si.” (Kol. 4:10, 11) Mah unaupa hna nih Paul kha an dawt tuk. Cucaah bawmhnak a herh tikah an hnemh i tha an pek. Nan Khrihfabu i unau pawl nih nangmah tha pek awkah an chimmi asiloah an tuahmi kha na ruat men ko lai.

Jehovah nih Khrihfa upa hna zong aan pek. Mah pa hna nih tha an i pek khawh i Baibal hmangin ruahnak an in cheuh khawh. “Annih cu thlitu a hran tikah dornak le thlichia a hran tikah i thuhnak hmun bantuk an si lai. Annih cu thetse ram i tiva luang bantuk le ramcar i lungpi naidem bantuk an si.” (Isa. 32:2) Kanmah bawmh awkah Khrihfa upa pawl cu timhcia an si ti hngalh cu thazaang petu taktak a si. Cucaah harnak na ton tikah Khrihfa upa sinah bawmhnak hal hna. Jehovah biak zungzal awkah an in bawmh khawh.

Khrihfa upa nih na tonmi buaibainak vialte kha an thawngtham kho lai lo. Nangmah bantukin annih zong mitling lo an si. (Lam. 14:15) Asinain Khrihfa upa sin na kal tikah na tonmi buaibainak kong kha Jehovah sinah thla an in campiak khawh. Mah tikah na hna a ngam deuh lai. (Jeim 5:14, 15) Tahchunhnak ah, kum tampi chung fakpi in a zawmi Italy i unaupa pakhat kha Khrihfa upa nih tha an pek. Hitin a chim: “Unau pawl dawtnak le atu le atu an ka lenmi nih inkhawhnak ngeih awkah a ka bawmh.” Harnak na ton tikah Khrihfa upa sinah bawmhnak hal hna seh tiah Jehovah nih a duh.

Jehovah rian kha biapi ah kan chiah ahcun Jehovah nih a kan bawmhmi kan hmuh lai. John nih cutin a tuah. Kum 39 a si ah cancer zawtnak a ngeih kha a hun hngalh. Mino te a si nain a zawtnak cu a zual tuk caah a lung a rawk tuk. A nupi le kumthum lawng a si rihmi a fapa kong zongah a lungre a thei. Hitin a chim: “Ka nupi nih kan fate a zohkhenh lengah keimah zong a ka zohkhenh, cun ka siithlopnak vialte zongah a ka bawmh.” Sii aa thlopnak ruangah John cu a tha a dih i a paw zong a fak. Mah lawng cu a si rih lo. John a Pa cu a thi deng cang i zohkhenhtu a herh.

Mah a har tukmi caan chungah John le a chungkhar cu zeinihdah a bawmh hna? John cu a dam lo tuk ko nain an chungkhar ningin Jehovah rian kha biapi ah an chiah. Hitin a chim: “Pumhnak a dihlak in kan i pum, phungchimnak ah zarh fate kan i tel i a har hmanhah chungkhar pumhnak kha hmaan tein kan tuah.” Jehovah he an i pehtlaihnak fehter zungzal cu zeitluk in dah a biapit ti kha John nih a hngalh. A hmasa ahcun a lau i a lungre a thei ko nain tlawmpal ah a lung a hun dai ṭhan. Jehovah nih a dawtmi le a herhmi thazaang a pekmi kha a hngalh. Nang zong na lungre a theih asiloah na ṭih tikah cu bantuk lam in Jehovah nih aan bawmh khawh. John nih hitin a ti: “Jehovah nih a ka bawmh bantukin nang zong aan bawmh khawh ve.”

Harnak na ton tikah ‘inkhawhnak ngeih a hau’ timi Paul bia kha i cinken. A sinah thla na camnak thawngin Jehovah kha i bochan. Unau pawl he naih tein um, Khrihfa upa sinah bawmhnak hal hna law Jehovah rian kha biapi ah chia zungzal. Atu ah na tonmi asiloah hmailei ah na ton khawhmi harnak hna kha inkhawh awkah Jehovah nih aan bawmh lai.