1. Paul nih “Khrih cu Pathian hmual . . . a si” tiah zeicah a ti?

JEHOVAH nih Jesuh Khrih hmangin a ṭhawnnak kha khuaruahhar lam in a langhter. Jesuh vawleicung a um lioah khuaruahhar thil a tuah. Mah lak i cheukhat kha Baibal ah kan hmuh i mah nih kan zumhnak a fehter khawh. (Matt. 9:35; Luka 9:11) Jehovah nih Jesuh kha ṭhawnnak a pek caah lamkaltu Paul nih “Khrih cu Pathian hmual . . . a si” tiah a ti khawh. (1 Kor. 1:24) Jesuh tuahmi khuaruahhar thil hna nih zeitindah ṭhatnak a kan pek?

2. Jesuh tuahmi khuaruahhar thil hna in zeidah kan cawn khawh?

² Jesuh tuahmi khuaruahhar thil hna nih zeidah a kan cawnpiak? Kum Thongkhat Uknak chungah Jesuh nih a tuah laimi thil kong a kan cawnpiak. Mah tikah vawleicung mi vialte ṭhatnak a pe hngami a ngan deuhmi khuaruahhar thil hna a tuah lai. Jesuh tuahmi khuaruahhar thil nih amah le a Pa sining kong tam deuh hngalhthiam awkah a  kan bawmh. Hi capar ah Jesuh tuahmi khuaruahhar thil pathum kong kan i ruah hna lai, mah nih tuchan le hmailei ah zeitindah ṭhatnak a kan pek khawh ti zong kan i ruah hna lai.

3. (a) Jesuh nih a hmasa bik khuaruahhar thil kha zeicah a tuah? (b) Kana khua ah Jesuh nih zeitindah siannak a langhter?

³ Jesuh nih Kana khua i ṭhitumnak puai ah a hmasa bik khuaruahhar thil a tuah. Puai i a rami cu an i ruahmi lengin an tam deuh caah mitsur zu an i zat lomi a si kho men. Mah cu aa ṭhiumkami nuva hna caah ningzak ngai a si, zeicahtiah puai a rami hna dangh cu an rian a si. Puai a zawhmi hna lakah Jesuh a nu Mary zong aa tel ve. Mary nih a fapa he aa tlaimi chimchungbia vialte kha ṭha tein a ruah ko lai. Cun “Cungnung Bik Pathian Fapa” tiah auh a si lai zong kha a hngalh. (Luka 1:30-32; 2:52) Jesuh nih khuaruahhar thil tuah khawhnak ṭhawnnak a ngeih kha a zumh caah Mary nih bawmh awkah a fialmi a si maw? Mary le Jesuh nih nuva hna bawmh an duh hna ti cu a fiang ko. Jesuh nih ti liter 380 (Gallon 100) kha ‘a ṭha bik zu’ ah khuaruahhar lam in a thlen. (Johan 2:3, 6-11 rel.) Jesuh nih mah khuaruahhar thil hi tuah awkah rian a ngei maw? A ngei lo. Mi zawn a ruah caah le a siangmi a Pa aa zohchunh caah a tuahmi a si.

4, 5. (a) Jesuh tuahmi hmasa bik khuaruahhar thil nih zeidah a kan cawnpiak? (b) Kana khua ah tuahmi khuaruahhar thil nih hmailei kong zeidah a kan cawnpiak?

⁴ Jesuh nih mi tampi caah a za in a ṭha bikmi zu kha khuaruahhar in a tuah. Mah khuaruahhar thil nih zeidah a kan cawnpiak? Jehovah le Jesuh cu a hnemmi si loin a siang tukmi an si kha a kan cawnpiak. Mi pawl intuarnak zong biapi ah an chiah ti kha a kan zumhter. Cun vawlei thar ah Jehovah nih rawl tampi pek awkah a ṭhawnnak a hman lai ti zong a langhter.—Isaiah 25:6 rel.

⁵ Mah hi ruathmanh. A rauhhlan ah Jehovah nih kan herh taktakmi vialte a kan pek cang lai. Mikip nih inn ṭha kan ngei lai i rawl thaw kan ei lai. Vawlei Paradis ah Jehovah nih thilṭha vialte kha siang ngaiin a kan pek lainak kong kan ruah tikah kan i lawm tuk.

6. Jesuh nih a ṭhawnnak kha zeitindah a hman zungzal, Jesuh kha zeitindah kan i zohchunh khawh?

⁶ Jesuh nih a ṭhawnnak kha mahca ṭhatnak caah zeitikhmanh ah a hmang bal lo. Lung kha changreu i thlen awkah Khuachia nih Jesuh a tukforh lioah a cangmi kha ruathmanh. Jesuh nih a ṭhawnnak kha amah ṭhatnak caah hman a duh lo. (Matt. 4:2-4) Midang bawmhnak caah hman a duh. Mahzawn ruahnak lungput a ngeih lomi kha zeitindah kan i zohchunh khawh? Jesuh nih “midang kha thil va ṭhen hna u” tiah a ti. (Luka 6:38) Midang kha rawl ei kan sawm hnanak thawngin cutin kan tuah khawh. Pumh dih hnuah unau pawl kha caan pek in kan bawmh khawh hna. Unaupa pakhat phungchim a cawnmi ngaihpiak ti  bantukin zongin kan bawmh khawh. Asiloah phungchimnak ah midang kha an herhmi bawmhnak kan pek khawh hna i kan cawnpiak khawh hna. Midang herhmi kan si khawh chungin kan bawmh hnanak thawngin Jesuh siannak kha kan i zohchunh.

7. Satan vawlei ah zeidah a um zungzal lai?

⁷ Sifahnak hi atu lawngin a ummi a si lo. Jehovah nih Israel mi kha “sifakmi hna cu nan ram chungah an dong bal lai lo” tiah a ti hna. (Deut. 15:11) Kum tampi a rauh hnuah Jesuh nih “misifak cu zungzal in pei nan sinah an um ko lai cu” tiah a ti. (Matt. 26:11) Mah cu Jesuh nih vawleicung ah misifak an um zungzal lai tiah a chim duhmi a si maw? A si lo. Satan vawlei i kan nunchung paoh cu sifah harnak a um lai tiah a chim duhmi a si. Vawlei thar i nunnak he cun aa dang tuk lai. Mah tikah sifahnak a um ti lai lo. Kan dihlak in ei awk tampi kan ngei lai i kan hna a ngam lai.

8, 9. (a) Jesuh nih mi tampi kha zeicah rawl a dangh hna? (b) Mah khuaruahhar thil he aa tlaiin zeitindah na ruah?

⁸ Salm caṭialtu pa nih Jehovah kong he aa tlaiin hitin a chim: “Zaa lak in a pek hna i an dihlak in an herhmi kha tling tein an hmuh.” (Salm 145:16) Jesuh vawleicung a um lioah a Pa kha tling tein aa zohchunh i midang an herhmi kha a bawmh hna. A ṭhawnnak langhternak ca men ah cutin a tuahmi a si lo. Jesuh nih mi kha a siaherh taktak hna. Matthai 14:14-21 kha i ruah hna u sih. (Rel.) Mibu nih an khua cio in Jesuh kha an ke in an fuh. (Matt. 14:13) Zanlei a phanh tikah mibu cu an tha a dih lai i an paw a ṭam lai tiah zultu hna cu an thin a phang. Cucaah rawl vaa cawk awkah thlah hna tiah Jesuh kha an ti. Mah tikah Jesuh nih zeidah a tuah?

⁹ Changreu hlumnga le nga pahnih kha pa 5,000 lengah nu le ngakchia zong a dangh hna. Jesuh nih mah khuaruahhar thil hi zeicah a tuah? Mi kha a dawt taktak hna i an zawn a ruah hna caah a si. Jesuh nih rawl tampi a pek hna caah mibu cu “an ei i an khim.” An eimi nih an khualei kir ṭhannak caah a herhmi thazaang a ngeihter hna. (Luka 9:10-17) Khim tein an ei dih hnuah an nganhmi cu bawm 12 hmanh a si.

10. Hmailei ah sifah harnak cu zeitindah a um cang lai?

¹⁰ A hak a kaumi le a ziaza a rawkralmi uktu hna ruangah mi tampi cu harsa ngaiin khua an sa. Kan unau cheukhat zong ei awk a za in an ngei lo. Asinain a rauhhlan ah Jehovah nawl a ngaimi cu ziaza rawhralnak le sifahnak a um lomi vawlei ah an um cang lai. Jehovah cu cungnung bik Pathian a si, ṭhawnnak a ngei i mikip nih an herhmi kha tuahpiak a duh hna. A rauhhlan ah sifah harnak vialte ka donghter lai tiah bia a kan kamh.—Salm 72:16 rel.

11. Khrih nih a rauhhlan ah vawlei pumpi caah a ṭhawnnak a hman lai tiah zeicah kan zumh khawh, mah tikah zeidah tuah na duh?

¹¹ Jesuh vawleicung a um lioah khuaruahhar thil kha kumthum le a cheu chung hmun tlawmpal ah a tuah. (Matt. 15:24) Asinain Jesuh nih Siangpahrang in Kum Thongkhat Uknak ah mi vialte caah ṭhatnak a tuah lai. (Salm 72:8) Jesuh tuahmi khuaruahhar thil nih kan caah a ṭhawnnak hman a duh ti kha a kan hngalhter. Kannih cu khuaruahhar thil tuah khawhnak ṭhawnnak kan ngei lo, asinain zeidah kan tuah khawh? Baibal nih a kan kamhmi hmailei ruahchannak kong kha mi sin chim awkah kan caan le kan thazaang kan hman khawh. Mah cu  Jehovah Tehte Hna caah kan rian a si. (Rom 1:14, 15) A rauhhlan ah Khrih nih a tuah dingmi kong kan ruah ahcun mah kong kha midang sinah lungtho tein chim kan duh lai.—Salm 45:1; 49:3.

12. Jesuh nih vawlei pawngkam thil sining vialte kha ṭha tein a hngalh tiah zeicah kan chim khawh?

¹² Pathian nih vawlei le vawleicung i thil vialte a ser lioah Jesuh cu ‘a pawngah rianthiam ngaimi bantukin a rak um.’ (Ptb. 8:22, 30, 31; Kol. 1:15-17) Cucaah Jesuh nih vawlei pawngkam thil sining vialte kha ṭha tein a hngalhthiam. Kokek thil hna kha zeitindah hman ding ti le uk ding ti kha a hngalh.

13, 14. Khrih nih kokek ṭhawnnak zeitindah a uk khawh ti kha tahchunhnak in chim.

¹³ Jesuh vawleicung a um lioah kokek ṭhawnnak a uknak thawngin Pathian pekmi ṭhawnnak a ngeih kha a langhter. Tahchunhnak ah, Jesuh nih thlichia a ukmi kha ruathmanh. (Marka 4:37-39 rel.) Baibal lei mifim pakhat nih Marka cauk chung i “thlichia” timi Greek biafang cu a fak tukmi thlichia asiloah hurricane caah an hman tawn tiah a ti. Cu bantuk thlichia a hun hran tikah khuadawm a hun nak, thli fakpi in a hrang, khua a ri i ruah fakpi in a sur. Thlichia a hran dih tikah thil vialte cu aa tuai ur dih.

¹⁴ Mah thil sining hi ruathmanh: Tilet nih lawng cu a den lengmang i ti cu lawng chungah a lut. Thlichia hran thawng a thang i tilawng aa vawr len ko nain Jesuh cu a bat tuk caah aa hngilh. A zultu hna cu an thin a phan tuk caah Jesuh kha an ṭhangh i “kan thi dih cang lai” tiah an ti. (Matt. 8:25) Jesuh nih zeidah a tuah? A tho i thli le rili kha “hrang ti hlah, . . . Dai tuah” tiah a ti. (Mar. 4:39) Mah tikah thlichia cu a dai i “rili cu dai zirziar tein a um.” Kokek ṭhawnnak a uk khomi Jesuh ṭhawnnak cu zeitluk khuaruahhar dah a si.

15. Jehovah nih kokek ṭhawnnak a uk khawh kha zeitindah a langhter?

¹⁵ Khrih ṭhawnnak cu Jehovah sinin a rami a si caah Cungnung Bik Pathian nih kokek ṭhawnnak a uk khawh ti kha kan hngalh. Tahchunhnak ah, buanchukcho a tlun hlanah Jehovah nih hitin a ti: “Ni sarih chungah vawleicung ah hin ruah ni sawmli le zan sawmli ka surter lai i ka sermi thil nung vialte cu hrawh an si dih lai.” (Gen. 7:4) Cun Exodus 14:21 (NW) ah hitin kan hmuh: ‘Jehovah nih zan khuadei a ṭhawngmi nichuahlei thli kha a hranter.’ Jonah 1:4 zongah hitin kan hmuh: “BAWIPA nih thlichia a hranter ciammam i rili tilet cu a san tuk caah lawng cu kuai dih hnik aa zal.” Vawlei thar ah Jehovah nih thil vialte a uk dih cang lai ti kan hngalh caah kan i lawm tuk.

16. Jehovah le Jesuh nih kokek ṭhawnnak uk khawhnak ṭhawnnak an ngei ti hngalh cu zeicah hnemtu a si?

¹⁶ Jehovah le Jesuh nih kokek ṭhawnnak uk khawhnak ṭhawnnak an ngei ti hngalh cu hnemtu a si. Khrih Kum Thongkhat Uknak chungah vawleicung ah a ummi mikip nih himnak an hmu  lai. Typhoon, tsunami, meitlang puah asiloah lihnin ti bantuk leiser ral ruangah ahohmanh fahnak le thihnak an tong ti lai lo.  “Pathian umnak inn” cu mi hna sinah a um lai caah zei bantuk leiser ral hmanh kan ṭih ti lai lo. (Biat. 21:3, 4) Kum Thongkhat Uknak chungah kokek ṭhawnnak uk khawh awkah Jehovah nih Jesuh kha ṭhawnnak a pek lai tiah kan zumh khawh.

17. Atu ah Pathian le Khrih kan i zohchunh khawh hnanak lamkhat cu zeidah a si?

¹⁷ Kannih cu leiser ral kha kan kham kho lo. Jehovah le Jesuh lawng nih an kham khawh. Asinain kan tuah khawhmi thil a um. Phungthlukbia 3:27 bia kha kan zulh khawh. (Rel.) Unau pawl harnak an ton tikah pumsalei le lungthinlei an herhmi kha kan bawmh khawh hna i tha kan pek khawh hna. (Ptb. 17:17) Tahchunhnak ah, leiser ral a tongmi hna kha kan bawmh khawh hna. Hurricane thlichia ruangah a inn a rawk dihmi nuhmei nu pakhat nih hitin a chim: “Pumsalei lawng si loin thlaraulei zong a kan bawmmi Jehovah bupi ah kaa tel caah kaa lawm tuk.” A dang unaunu pakhat cu thlichia nih a inn a hrawhpiak dih tikah a lung a dong tuk. Unau pawl nih a inn an remhpiak dih hnuah hitin a chim: “Ka intuarmi cu a chim zia hmanh ka thiam lo. . . . Jehovah kaa lawm tuk.” Unau pawl nih midang an herhmi an bawmh hna caah kan i lawm tuk. A hleiin Jehovah le Jesuh Khrih nih an kan siaherh taktak caah kan i lawm tuk.

18. Jesuh nih khuaruahhar thil a tuahnak zei a ruang nih dah na lung aan suk?

¹⁸ Jesuh nih phungchim rian a ṭuan chungah “Pathian hmual” a si kha a langhter. Asinain a ṭhawnnak kha midang lungthin laknak ca asiloah mahca ṭhatnak caah a hmang bal lo. Jesuh nih mi kha a dawt taktak hna caah a ṭhawnnak kha khuaruahhar thil tuahnak caah a hman. A hnu capar ah a kong tam deuh in kan i ruah hna lai.