Mi kha a Dawt hna
‘Minung kha ka dawt tuk hna.’—PTB. 8:31, NW.
1, 2. Jesuh nih minung a dawt tuk hna kha zeinihdah a langhter?
PATHIAN fater a simi Jesuh cu Pathian i a fimnak a langhter biktu a si. Cun a Pa i “rianthiam ngaimi” zong a si. A Pa nih “van hna khi a fehter hna tikah” le “vawlei hram kha a hmelchunh tikah” Jesuh cu zeitluk in dah aa nuamh lai khi ruathmanh. A Pa sermi thil vialte lakah Jesuh nih a hleiin ‘minung kha a dawt tuk hna.’ (Ptb. 8:22-30, 31, NW) Jesuh nih a hramthawk tein minung kha a dawt tuk hna.
2 A hnuah Jesuh nih van kha kaltak in minung pakhat in vawlei i a rat tikah a Pa cung zumhawktlak a sinak, a dawtnak le minung a dawt taktak hna kha a langhter. Cuticun Jesuh nih minung ‘tlanhnak caah a nunnak’ kha a pek khawh. (Matt. 20:28; Fil. 2:5-8) Jesuh vawleicung a um lioah Pathian nih khuaruahhar thil tuah khawhnak ṭhawnnak a pek. Mah khuaruahhar thil hna nih Jesuh nih minung zeitluk in dah a dawt hna ti le a rauhhlan ah minung caah a tuah hngami a ṭha tukmi thil kha a langhter.
3. Hi capar ah zei kong dah kan i ruah hna lai?
3 Jesuh vawleicung a um lioah “Pathian Pennak kong Thawngṭha” kha a chim. (Luka 4:43) Mah Pennak nih a Pa min a thianter lai i minung buaibainak kha zungzal in a hloh lai ti kha a hngalh. Phung a chim lioah khuaruahhar thil tampi a tuah. Mah nih minung a siaherh tuk hna kha a langhter. Mah cu zeicah kan caah a biapit? A tuahmi nih hmailei caah ruahchannak le zumhnak a kan ngeihter caah a si. Cucaah Jesuh tuahmi khuaruahhar thil pali kong i ruah hna u sih.
“Ṭhawnnak cu Jesuh Sinah khan a Um”
4. Jesuh le thinghmui zawtnak a ngeimi pa an i ton lioah zeidah a cang?
4 Phungchim rian a ṭuan lioah Jesuh cu Galilee peng ah a kal lengmang. Galilee peng i khua pakhat ah thinghmui zawtnak a ngeimi pa he an i tong. (Mar. 1:39, 40) Mah pa cu a zual tuk caah siibawi Luka nih “thinghmui zawtnak nih a tuam in a tuammipa” tiah a ti. (Luka 5:12) A zawmi pa nih Jesuh kha a hmuh tikah “a hmaiah khan a bawk i ‘Bawipa, na duh ahcun na ka thianter khawh’ tiah a nawl.” Jesuh cu damter khawhnak ṭhawnnak a ngei ti kha mah pa nih a hngalh ko. Asinain Jesuh nih damter a ka duh hnga maw ti kha cu a hngal lo. Zeicah? Thinghmui zawtnak a ngeimi hna zei i a rel lomi Farasi mi kha a hmuh lengmang hna caah a si. Jesuh nih tah zeitindah a lehrulh hnga? A zawtnak a zual ngaimi mah pa kha Jesuh nih zeitindah a pehtlaih hnga? Nangtah zeidah na tuah lai?
5. Jesuh nih thinghmui zawtnak a ngeimi pa kha zeicah damter a duh?
5 A zawmi pa cu Moses Nawlbia ningin “ka thiang lo, ka thiang lo” tiin au dawh a si lo. (Lev. 13:43-46) Asinain Jesuh cu a thin a hung lo. Mah pa kha a zawn a ruah i bawmh a duh. Jesuh nih a ruahmi kha a dikthliar in kan hngal lo nain a intuarmi tu cu kan hngalh. A zawmi pa kha a zaangfak tuk i ahohmanh nih an tuah hnga lomi thil pakhat a rak tuah. Thinghmui zawtnak a ngeimi pa kha a tawngh. Cun nem tein “damter kaan duh, thiang ko” tiah a ti, mah tikah “thinghmui zawtnak nih cun a kaltak.” (Luka 5:13) Jehovah nih Jesuh kha mah khuaruahhar thil tuah khawh awk le minung zeitluk in dah a dawt hna ti langhter awkah ṭhawnnak a pek.
6. Jesuh tuahmi khuaruahhar thil he aa tlaiin zeidah hngalh na duh, mah nih zeidah an langhter?
6 Pathian pekmi ṭhawnnak kha hmangin Jesuh nih khuaruahhar thil tampi a tuah. Thinghmui zawtnak lawng si loin zawtnak dangdang zong a damter. “A holh kho lomi an holh khawh le a zengmi an dam le kebeimi an kal khawh le mitcawmi nih khua an hmuh ṭhan kha an hmuh hna tikah mizapi cu an khuaruah a har” tiah Baibal nih a ti. (Matt. 15:31) Tuchan ah siibawi te nih mizaw pawl i a ṭhalomi an pum cheubang caah a dang airolh in an thlop tawn hna. Asinain Jesuh cu cutin a tuah a hau lo. A ṭhalomi an pum cheubang kha a damter khawh. Mizaw pawl kha hmakhatte ah a damter khawh hna i a caan ah cun lam hla hmanhin a damter hna. (Johan 4:46-54) Mah khuaruahhar thil hna nih zeidah an langhter? Kan Siangpahrang, Jesuh Khrih cu zawtnak vialte zungzal in hloh khawhnak ṭhawnnak a ngei i hloh a duh ti a lang. Jesuh nih mi zeitindah a pehtlaih hna ti kan hngalh tikah vawlei thar ah “a dermi le sifakmi cungah zaangfahnak a ngei” lai ti a kan zumhter. (Salm 72:13) Jesuh nih harnak a tongmi vialte kha khamh a duh hna i a khamh hna lai.
“Tho tuah, Na Ihphah kha i Lak law Kal tuah”
7, 8. Bethzatha ah Jesuh le a zawmi pa an i ton hlanah zei thil dah a cang?
7 Thinghmui zawtnak a ngeimi pa a damter hnu thla tlawmpal ah Jesuh cu Galilee in Judea peng ah Pathian Pennak kong thawngṭha chim awkah a kal. Jesuh chimmi thawngṭha a theimi le a dawtnak nih an lungthin a sukmi mi tampi an um ko lai. Sifakmi le namnehmi thazaang pek le ruahchannak pek kha Jesuh nih a duh tuk.—Isa. 61:1, 2; Luka 4:18-21.
8 Nisan thla ah Jesuh cu Lanhtak puai tuah awkah Jerusalem ah a kal. Mah puai caah a rami mi tampi ruangah khua cu aa tuai ur ko. Biakinn chaklei ah Bethzatha timi tidil a um i cuka ah Jesuh nih lam a kal kho lomi pa kha a hmuh.
9, 10. (a) Bethzatha tidil ah mi cu zeicah an kal? (b) Tidil ah Jesuh nih zeidah a tuah, mah nih zeidah a kan cawnpiak? (A hramthawknak hmanthlak zoh.)
9 Mizaw tampi cu Bethzatha tidil ah an kal. Zeicah? Ti a cangh lioah tidil i aa paihmi cu khuaruahhar lam in an dam tiah an ruah caah a si. Mizaw pawl cu hnabei dong le ruahchannak ngei loin an um caah le dam an duh tuk caah zeitluk in dah a buai lai khi ruathmanh. Mitling a si i zawtnak a ngei lomi Jesuh cu zeicah cuka hmun ah a um? Minung a dawt hna caah a si. Cuka i a hmuhmi pa i a zawtnak caan cu vawleicung a um caan nakin a sau deuh.—Johan 5:5-9 rel.
Jesuh nih bawmh a herhmi hna kha a kawl hna
10 Jesuh nih mah pa kha dam na duh maw tiah a hal. Dam ka duh ko nain tidil chung i a ka paih hngami bawmtu ka ngei lo tiah Jesuh kha a chimh lioah mah pa cu zeitluk in dah a ngaihchiat lai ti khi na mitthlam ah cuanter hmanh. Mah tikah Jesuh nih a si kho lomi thil tuah a fial. Na ihphah kha i lak law kal tiah a ti. Cucaah mah pa nih a ihphah cu a lak i lam a hung kal. Mah khuaruahhar thil nih vawlei thar ah Jesuh nih a tuah hngami thil kha a langhter. Cun Jesuh nih mi a dawt tuk hna ti zong a langhter. Bawmh a herhmi hna kha a kawl hna. Hi vawlei i a cangmi thil ruangah a lung a dongmi hna kha kawl peng awkah Jesuh kong nih a kan forh awk a si.
“Ahodah Ka Puan a Tawng?”
11. Jesuh nih mizaw pawl a dawt hna ti kha Marka 5:25-34 nih zeitindah a langhter?
11 Marka 5:25-34 rel. Nu pakhat cu kum 12 chung zawtnak ṭhalo in a zaw. A zawtnak nih biaknak telin a nunnak kip kha a hnorsuan. Siibawi tampi sinah aa thlop i a ngeihmi tangka vialte zong a hmaan dih nain a zawtnak cu a zual chin. Nikhat cu thil dang pakhat a tuah, mibu sinah a kal i Jesuh puan kha a va tawngh. (Lev. 15:19, 25) Jesuh nih a pum chungin ṭhawnnak a chuah kha a hngalh tikah ahodah a ka tawng tiah a hal hna. Mah tikah minu cu “ther lengmang le phang lengmang in a ra i a ke hram ah a bawk i a kong kha a chimh dih.” Jehovah nih mah minu a damter ti kha Jesuh nih a hngalh caah nem tein hitin a ti: “Ka fanu, na zumhnak nih aan damter cang. Dai tein va kal law na zawtnak cun va dam ko cang.”
Jesuh tuahmi khuaruahhar thil nih Jesuh cu kanmah le kan tonmi buaibainak cungah siaherhnak a ngei ti a langhter (Catlangbu 11, 12 zoh)
12. (a) Atu kan i ruahmi a kong hna in Jesuh kha zeitindah na hmuh? (b) Jesuh nih zei zohchunh awk dah a chiah?
12 Jesuh nih mizaw mi telin mi vialte a dawt hna ti hngalh cu hnemtu taktak a si. Satan he an i dang tuk. Satan nih cun man ka ngei lo, ahohmanh nih an ka daw lo tiah zumhter a kan duh. Asinain Jesuh cu kanmah le kan tonmi buaibainak cungah siaherhnak a ngei, mah kha a tuahmi khuaruahhar thil nih a langhter. Cu bantuk dawtnak a ngeimi Siangpahrang le Tlangbawi Ngan kan ngeih caah kan i lawm tuk. (Heb. 4:15) Caan saupi a zawmi pakhat i a intuarnak hngalhthiam cu a har men lai, ahleiin kan dam lio caan ah a har men lai. Jesuh kong kha ruathmanh. Anih cu a zaw bal lo nain a zawmi hna kha a zaangfak hna. Cucaah Jesuh kha kan si khawh chungin i zohchunh hna u sih.—1 Pit. 3:8.
“Jesuh cu a Ṭap”
13. Lazaruh thawhṭhannak nih Jesuh kong zeidah a langhter?
13 Midang an lung a fah tikah Jesuh cu a lung a fak ve. Tahchunhnak ah, a hawipa Lazaruh a thih ruangah Lazaruh i a chungkhar le a hawile an ṭahmi a hmuh tikah Jesuh cu “a hnarno a ṭam i a lung a hno.” (Johan 11:33-36 rel.) Lazaruh kha ka thawhter ṭhan lai ti a hngalh ko nain Jesuh cu a ṭap. A intuarmi midang nih an hmuh lai kha a phang lo. Jesuh nih Lazaruh le a chungkhar kha a dawt tuk hna caah Pathian pekmi ṭhawnnak hmangin Lazaruh kha a thawhter ṭhan.—Johan 11:43, 44.
14, 15. (a) Jehovah nih minung tonmi sifah harnak hloh a duh ti kha zeinihdah a langhter? (b) “Thlan” tiah lehmi Greek biafang cu zeicah hngalh kan duh awk a si?
14 Jesuh cu a Pa Jehovah he an i lo tuk tiah Baibal nih a ti. (Heb. 1:3) Cucaah Jehovah nih zawtnak, fahnak le thihnak hloh a duh ti kha Jesuh tuahmi khuaruahhar thil nih a langhter. A rauhhlan ah Jehovah le Jesuh nih mi tampi kha an thawhter ṭhan hna lai. Jesuh nih “thlan chung i a ummi mithi vialte” an tho ṭhan lai tiah a ti.—Johan 5:28, 29.
15 “Thlan” tiah lehmi Greek biafang cu ‘hngalhter ṭhan’ timi sullam a ngei. Mah cu Cungnung Bik Pathian, van le vawlei Sertu nih a thimi hna i an kong a dikthliar kha a hngalh i aa cinken khawh caah aa tlakmi a si. (Isa. 40:26) A thimi hna kha Jehovah nih aa cinken khawh hna lawng si loin cinken zong a duh hna. Baibal ah kan hmuhmi thawhṭhannak cu vawlei thar ah a cang hngami thil a langhtertu a si.
Jesuh tuahmi Khuaruahhar thil in Kan i Cawn khawhmi
16. Pathian salle tampi nih zei tinvo dah an hmuh lai?
16 Zumhfek tein kan um ahcun harnak nganpi in luatnak a simi khuaruahhar thil kha kan hmuh lai. Armageddon a dih tlawmpal ah khuaruahhar thil tampi kan hmuh lai. Mah tikah mikip nih a tlingmi ngandamnak kan ngei lai. (Isa. 33:24; 35:5, 6; Biat. 21:4) Mi tampi nih an mit hmaan, an ṭhengṭhunh, mizaw ṭhutnak le theih khawhnak caah hmaanmi thil hna an hlonhmi kha na mitthlam ah cuanter hmanh. Armageddon in a luatmi hna cu ṭuan awk rian tampi an ngeih lai caah Jehovah nih thazaang le ngandamnak a pek hna lai. Annih nih vawleicung pumpi kha aa dawhmi paradis ah an ser lai.—Salm 115:16.
17, 18. (a) Jesuh nih zeicah khuaruahhar thil a tuah? (b) Vawlei thar i luh awkah a herhmi zei paoh kha zeicah kan tuah awk a si?
17 Tuchan i “mibu nganpi” cu Jesuh nih mizaw a damtermi hna kong an rel tikah thazaang an hmu. (Biat. 7:9) Mah khuaruahhar thil hna nih hmailei ah a tlingmi ngandamnak kan ngei lai timi ruahchannak kha a fehter. Cun Jesuh nih minung zeitluk in dah a dawt hna ti zong a langhter. (Johan 10:11; 15:12, 13) Jesuh ngeihmi zaangfahnak nih Jehovah nih a salle pakhat cio kha a dawt tuk hna ti a langhter.—Johan 5:19.
18 Tuchan vawlei cu fahnak le thihnak in a khat. (Rom 8:22) Cucaah vawlei thar kan herh. Vawlei thar ah Pathian nih a kan kamhmi a tlingmi ngandamnak kha mikip nih an ngei lai. Kan ngan a dam ca le tlinlonak in kan luat caah kan i nuam tuk lai i kan lung a cawlcang tuk lai. Cucaah “kawm chungin chuahmi cawfa” bantuk kan si lai tiah Malakhi 4:2 nih a ti. Jehovah cung kan i lawmhnak le a biakam kan zumhnak nih vawlei thar i luh khawh awkah a herhmi zei paoh tuah awkah kan forh ko seh. Jesuh tuahmi khuaruahhar thil nih kum thongkhat uknak chungah minung caah zungzal ṭhatnak a tuah hngami thil a langhter ti hngalh cu thazaang petu taktak a si.
