Hngak Peng Ko
‘A rauh hmanhah hngak peng ko.’ —HAB. 2:3, NW.
HLA: 32, 45
1, 2. Jehovah salle nih zei lungput dah an ngeih?
JEHOVAH salle nih chimchungbia pawl a tlin lai kha lungsau tein an hngah. Tahchunhnak ah, Babilon mi hna nih Judah ram an hrawh lai kha Jeremiah nih a rak hngah i BC 607 ah a rak tling. (Jer. 25:8-11) Jehovah nih Judah mi hna kha an ram ah a kirter ṭhan hna lai tiah Isaiah nih a rak chimchung. Hitin a ti: ‘BAWIPA a hngakmi vialte cu an i lawm lai.’ (Isa. 30:18, NW) Mikah zong nih Jehovah biakam a tlin lai kha a hngah i ‘kei cu BAWIPA kha ka hngah zungzal lai’ tiah a ti. (Mik. 7:7, NW) Kum tampi chungah Pathian salle nih Biakammi Messiah asiloah Khrih a rat lai kha an rak hngah.—Luka 3:15; 1 Pit. 1:10-12. *
2 Tuchan zongah Jehovah Pennak kong he aa tlaimi chimchungbia pawl a tlin lai kha kan hngah. Mah Pennak i Siangpahrang a simi Jesuh nih a rauhhlan ah Pathian salle kha ṭih a nungmi hi vawlei in a khamh cang hna lai. Miṭhalo pawl kha a hrawh dih hna lai i sifah harnak vialte kha a donghter dih lai. (1 Johan 5:19) Jehovah ni cu zeitik caan paohah a rat khawh caah kan hngah zungzal awk a si, mah ni ca timhcia kan si khawh nakhnga kan tuah khawhmi zeipaoh kan tuah awk a si.
3. Donghnak a rat lai caan kha kum tampi chung kan hngah cang a si ahcun zeitindah kan hun ruah khawh?
3 Pathian duhnak vawleicung i a tlin lai caan kha kan i ngaih tuk. (Matt. 6:10) Asinain donghnak a rat lai caan kha kum tampi chung kan hngah cang a si ahcun ‘hngah peng awkah a ruang ṭha a um rih maw?’ tiin kan hun ruah khawh.
Zeicah Kan Hngah Zungzal awk a Si?
4. Zeicah ‘ralring tein um peng’ cu a biapit?
4 Jesuh nih a zultu hna kha ‘ralring tein um peng ko u’ tiah a ti hna. Cucaah hngah zungzal cu a biapi tuk. (Matt. 24:42, NW; Luka 21:34-36) Jehovah bupi zong nih ‘Pathian ni hngah awk’ le Jehovah kamhmi vawlei thar kong kha ruah peng awkah ralrin a kan pek zungzal.—2 Piter 3:11-13 rel.
5. Jehovah ni hngah peng awkah zeicah a herh khun?
5 Kumzabu pakhatnak i Jesuh zultu hna hmanh nih Jehovah ni kha an hngah a hauh ahcun tuchan kan caah cun a hau chinchin. Zeicahtiah Jesuh chimmi hmelchunhnak nih Jesuh cu 1914 thawkin Pathian Pennak Siangpahrang a si cang ti le ni hmanung bik asiloah “chan donghnak” caan ah kan nung ti kha a langhter. Tahchunhnak ah, Jesuh nih a rak chimchung bantukin vawlei thil sining cu a chia chin i Pennak kong thawngṭha cu vawleicung pumpi ah chim a si. (Matt. 24:3, 7-14) Jesuh nih donghnak caan cu zei can a rauhhnu ah a ra te lai tiah a chim lo caah ralring tein kan um awk a si.
6. Donghnak caan a naih chin tikah vawleicung thil sining cu a chia chin lai ti kha zeitindah kan hngalh?
6 “Chan donghnak” timi nih atu nakin vawleicung thil sining a chiat chin tik, hmailei caan kha a chimduhmi a si maw? Baibal nih “ni hmanung bik” caan ah mi pawl cu an ṭhalo chin lengmang lai tiah a ti. (2 Tim. 3:1, 13; Matt. 24:21; Biat. 12:12) Atu zongah thil sining cu a chia tuk ko nain a chia chin thluahmah rih lai ti kha kan hngalh.
7. Matthai 24:37-39 nih ni hmanung bik caan chung i vawleicung thil sining kong he aa tlaiin zeidah a kan cawnpiak?
7 Mi cheukhat nih “hremnak nganpi” hlanah ramkip ah raltuknak a um lai i mi tampi cu zawtnak asiloah mangṭam an tong lai tiah an ruah khawh men. (Biat. 7:14) Asinain cutin thil a hung um ahcun mikip nih Baibal chimchungbia a tlinmi kha fiang tein an hngalh lai. Baibal chimmi zei i a rel lomi hna hmanh nih fiang tein an hngalh lai. Ni hmanung bik caan i mi tampi cu ‘zeimanh an hngal lai lo’ tiah Jesuh nih a chimmi kha i cinken. Annih cu an nung sawhsawh lai i Jehovah ni a rat tikah an lau tuk te lai. (Matthai 24:37-39 rel.) Donghnak caan a nai cang ti kha mi nih an zumh nakhnga “hremnak nganpi” hlanah vawleicung thil sining cu a hung chia tuk lai tiah kan ruah awk a si lo.—Luka 17:20; 2 Pit. 3:3, 4.
Kannih cu “chan donghnak” caan ah kan nung ti kha kan zumh
8. Jesuh chimmi hmelchunhnak hna kha ralring tein kan hngah caah zeidah kan zumh?
8 Jesuh chimmi hmelchunhnak hna cu zei caan ah dah kan nun ti kha a zultu hna nih fiang tein an hngalhthiam nakhnga caah a si. Jesuh zultu hna cu ralring tein an um peng. (Matt. 24:27, 42) 1914 thawkin Jesuh chimmi hmelchunhnak hna lak in cheukhat an hung tling. Kannih cu ni hmanung bik caan a simi “chan donghnak” caan ah kan nung ti kha kan zumh. Jehovah nih Satan vawlei a hrawh lai ding caan kha a khiah cang.
9. A rauhhlan ah a ra dingmi donghnak caan kha zeicah kan hngah peng awk a si?
9 A rauhhlan ah a ra dingmi donghnak caan kha zeicah kan hngah peng awk a si? Jesuh Khrih nawl kan ngaih caah a si. Ni hmanung bik caan he aa tlaiin Jesuh chimmi hmelchunhnak hna a tlinmi zong kha fiang tein kan hmuh. Kan theihmi kip kha kan zumh caah si loin Baibal chimchungbia a tlinmi a si caah donghnak caan cu a nai cang ti kha kan zumh. Cucaah donghnak caan hngah buin ralring tein kan um awk a si.
Zei Can dah Kan Hngah rih lai?
10, 11. (a) Jesuh nih a zultu pawl kha zeicah ‘ralring tein um peng ko u’ tiah a ti hna? (b) Donghnak cu kan ruah lengin a rauh hmanhah zei tuah awkah dah Jesuh nih a zultu pawl kha a chimh hna? (A hramthawknak hmanthlak zoh.)
10 Kan lak i tam deuh cu zumhfek tein Jehovah kan bia i Jehovah ni kan hngahnak hi kum tampi a si cang. Asinain kan hngahnak cu zei can a sau cang hmanhah kan hngah peng awk a si. Satan vawlei hrawh dingin Jesuh a rat tikah timhcia tein kan um a herh. Jesuh nih a zultu hna kha hitin a ti hna: “Cu caan cu zei tikah a si lai kha nan hngalh lo caah i ralring te le fimhring tein um ko u. Zei he dah aa lawh lai ti ahcun khualtlawn ah a kal i a sinum hna kha nan rian cio kha ṭha tein rak ṭuan u tiah a ti i innka cawngtupa kha ṭha tein rak cawng tiah bia a riahtatu innbawi he aa lo lai. Innngeitu kha zeitik i a kir lai nan hngalh lo caah ṭha tein hngak ko u. Zanlei ah a si kho, zanṭim ah a si kho, khuadei hlanah a si kho, nichuak ah a si kho. Duak tiah a rat sual ahcun i hngilh hluahmah in, in tanh hna hlah seh. Nan sin ka chimmi hi mi dihlak sin i ka chim a si: Hngilh loin hngak ko u.”—Mar. 13:33-37.
A hmaan lomi biaknak cu zeitik caan paohah khulrang in doh a si kho
11 1914 ah Jesuh siangpahrang a si cang ti kha an hngalh caah donghnak cu zeitik caan poahah a ra kho ti kha Jesuh zultu pawl nih an hngalh. Cucaah phungchim rian ah tam deuh in an i telnak thawngin an i timtuah. Jesuh nih a rat lainak caan cu “khuadei hlanah a si kho, nichuak ah a si kho” tiah a ti. Cutin a si ahcun a zultu hna nih zeidah an tuah a herh lai? Jesuh nih ‘ralring tein um peng ko u’ tiah a ti hna. Cucaah kan hngahnak caan cu a sau tuk cang hmanhah donghnak cu a nai rih lo asiloah kan nunchung ah a ra lai lo tiah kan ruah awk a si lo.
12. Habakkuk nih Jehovah kha zeidah a hal, Pathian nih zeitindah a leh?
12 Profet Habakkuk nih Jerusalem a rawh lainak kong a thanh buin lungsau tein a rak hngah. Mah kong kha amah hlanah a dang profet pawl zong nih kum tampi chung an rak thanh cang. Amah chan ah ṭhatlonak le dinlonak a tam chinmi kha Habakkuk nih a hmuh. Cucaah Habakkuk nih Jehovah kha bawmhnak a hal i “Maw BAWIPA, zei can dah nangmah cu kan auh lengmang lai?” tiah a ti. Jehovah nih donghnak zei tikah dah a rat lai ti cu a chim lo nain “pel loin a ra hrimhrim ko lai” tiah bia a kamh. Jehovah nih Habakkuk kha ‘hngak peng ko’ ti zongin a ti.—Habakkuk 1:1-4; 2:3 * rel.
13. Habakkuk nih zei ruahnak dah a ngeih khawh, mah cu zeicah ṭih a nun?
13 Habakkuk cu Jerusalem a rawh lai a hngahnak ah a lung a dong i hitin a ruat tiah hei ti u sih: ‘Kum tampi chung Jerusalem a rawh lainak caan kha ka hngah cang. Mah cu caan saupi a rau rih men lai. Mah he aa tlaimi kong ka chim lengmangmi hi san a tlai lo. Midang nih chim te ko hna seh.’ Habakkuk nih cu bantuk ruahnak a ngeih ahcun zeidah a cang kho? Jehovah mit hmaiṭha a sung kho. Mah lengah donghnak a rak tikah timhcia tein a um lo ahcun a nunnak zong a sung kho.
14. Jehovah nih donghnak caan hngah peng awkah ralrin a kan pekmi cu zeicah kan i lawmh tuk awk a si?
14 Vawlei thar ah ka um tiah na mitthlam ah cuanter hmanh. Ni hmanung bik caan he aa tlaimi Jehovah chimchungmi vialte cu a tling dih. Cucaah Jehovah kha na zumh chinchin. Cun a dang a biakam vialte zong a tlinter hrimhrim lai ti kha na zumh. (Joshua 23:14 rel.) Donghnak he aa tlaiin Jehovah nih aa tlakmi caan a khiah cang caah le hngah peng awkah ralrin a kan pek caah naa lawm tuk ko lai.—Lam. 1:7; 1 Pit. 4:7.
Kan Hngah buin Phung Kan Chim Peng
Thawngṭha kha lungtho tein na chim maw? (Catlangbu 15 zoh)
15, 16. Hi donghnak caan chungah kan si khawh chungin phungchim rian ah zeicah kan i tel awk a si?
15 Jehovah bupi nih kan nunnak ah Jehovah rian kha biapi bik i chiah awkah ralrin a kan pek lengmang ko lai. Mah ralrin peknak nih Pathian rian kha i manh lo ngaiin ṭuan awk le kan chimmi thawngṭha cu a biapi tukmi a si ti kha fiang tein hngalh awkah a kan bawmh. Jesuh chimmi hmelchunhnak hna cu atu ah an tling cang i donghnak cu a nai tuk cang ti kha kan zumh. Cucaah Jehovah kha kan nunnak ah pakhatnak ah kan chiah i Pennak kong thawngṭha kha kan chim zungzal.—Matt. 6:33; Mar. 13:10.
16 Midang sin thawngṭha kan chim tikah a rauhhlan ah a ra laimi Satan vawlei hrawhnak in luat awkah kan bawmhmi hna a si. 1945 ah Wilhelm Gustloff tilawng a pilmi cu rili ah a cangmi lakah a fak bikmi leiser ral a si. Mi thong tampi an thi. Unaunu pakhat le a vapa cu mah tilawng in khamh an si. Tilawng a pil cuahmah lioah nu pakhat nih a ṭah buin “Ka bag le ka lungvar pawl a khaan chungah ka kaltak. Ka thil vialte ka sung dih cang” tiin a chimmi kha unaunu nih aa cinken rih. Asinain a dang khual a tlawngmi hna nih cun a biapi bikmi kha an hngalh i minung nunnak khamh awkah fakpi in an i zuam. Tuchan zongah mi pawl cu an nunnak caah ṭih a nung. Kannih zong mahzawn aa ruat lomi khualtlawngtu hna bantukin phungchim rian kha a biapi tukmi lungput in kan ṭuan. Hi chan ṭhalo donghnak in mi pawl nih luatnak an hmuh khawh nakhnga kan tuah khawhmi zeipaoh tuah a hau.
A ṭhami biakhiahnak tuah law phungchim rian kha a biapi tukmi lungput in ṭuan zungzal (Catlangbu 17 zoh)
17. Zeitik caan paohah donghnak cu a ra kho tiah zeicah kan zumh awk a si?
17 Vawlei thil sining hna kan zoh tikah Baibal chimchungbia a tlinmi le hi chan ṭhalo donghnak a naih tuk cangmi kha fiang tein kan hmuh khawh. “Ki pahra” le “sahrang” nih a hmaan lomi biaknak a simi a Liannganmi Babilon an hrawh lai caan kha kan hngak. (Biat. 17:16) Mah thil a can nakhnga caan tampi aa duh rih tiah kan ruah awk a si lo. A hmaan lomi biaknak doh awkah Pathian nih “an lungthin chungah a chiah” i mah cu zei tik caan paohah khulrang in a ra kho ti kha philhhlah. (Biat. 17:17) Satan vawlei donghnak cu a rauhhlan ah a ra cang lai. Cucaah Jesuh ralrin peknak hi kan zulh awk a si: “I ralring tuah u. Zudin sa-einak le khuasak tintuk harnak lawng kha ruat hlah u, cuti nan si ahcun cu Ni nih cun ruahlopi ah an tlun hnawh sual hna lai. Zeicahtiah cu Ni nih cun vawleicung i a ummi vialte hi rap bantukin a foih hna lai.” (Luka 21:34, 35; Biat. 16:15) Cucaah ralring tein um hna u sih law Jehovah rian kha i manh lo ngaiin ṭuan hna u sih. Pathian nih ‘amah aa bochantu hna caah rian a ṭuan’ lai ti kha zum hna u sih.—Isa. 64:4.
18. A hnu capar ah zei kong dah kan i ruah hna lai?
18 Hi vawlei donghnak kan hngah lioah zultu Judas ruahnak cheuhnak hi kan zulh awk a si: “Ka hawile hna, nannih cu a thiang bikmi nan zumhnak cungah khan fek chin lengmang in i sa chin lengmang ko u. Thiang Thlarau ṭhawnnak thawng khan thlacam u law Pathian dawtnak chungah khan um ko u. Cun kan Bawipa Jesuh Khrih nih zaang an fah hna ruang i zungzal nunnak aan pek hna lai ni cu hngak ko u.” (Judas 20, 21) A rauhhlan ah a ra laimi Pathian vawlei thar kan hngahmi le kan i ngaih tukmi kha zeitindah kan langhter khawh? Mah kong kha a hnu capar ah kan i ruah hna lai.
^ cat. 1 Messiah kong Baibal chimchungmi cheukhat le mah hna cu zeitindah a tlin ti kha Baibal Cawnpiakmi Taktak Cu Zeidah A Si? timi cauk i cahmai 200 ah zoh.
^ cat. 12 Habakkuk 2:3 (NW): “Zeicahtiah langhnak na hmuhmi nih khan sawhmi caan a ngei i cucu langhnak taktak cu a si. A tlin lainak caan cu khulrang in a ra lio. A rauhhmanh ah hngak peng ko, zeicahtiah pel loin a ra hrimhrim ko lai.”
