1, 2. (a) Jehovah nih a mi pawl a dawt hna ti kha zeicah na zumh? (b) Minung hi zei a herhmi in dah ser kan si?

JEHOVAH nih a mi pawl a dawt hna ti kha zeicah na zumh? Mah biahalnak na leh hlanah mah tahchunhnak hna hi ruathmanh: Taylene timi unaunu cu unau pawl nih kum tampi chung tha an rak pek. A tlarimi si awk le a si khawh leng tiangin amahle amah i ruahchan lo awk zong an chimh. Taylene nih hitin a chim: “Jehovah nih rak ka daw hlah sehlaw hi tlukin hin a ka cawnpiak zungzal hnga lo.” A vapa a thih hnuah a fale pahnih kha amah lawngin a zohkhenhmi Brigitte nih hitin a chim: “Satan vawlei ah fale zohkhenh cu a har bikmi zuamcawhnak hna lakah pakhat a si, a hleiin innchunghawi um loin pakhat lawngin zohkhenh cu a har tuk. Asinain Jehovah dawtnak kha ka zumh. Mitthli tlak in ka lung a fah tuk lio caan ah Jehovah nih lam a ka hruai i ka inkhawh lo leng tiangin zeitikhmanh ah a ka tonter lo.” (1 Kor. 10:13) Sandra cu damh khawh lomi zawtnak a ngei. Civui  pakhat ah unaunu pakhat nih Sandra cungah pumpak siaherhnak a langhter. Sandra a vapa nih hitin a chim: “Mah unaunu cu kan hngalhmi a si lo nain kan caah a lungre a theihmi nih kan lung a kan suk tuk. Unau pawl nih kan cungah dawtnak an langhtermi thil hme tete hmanh nih Jehovah nih zei tlukin dah a kan dawt ti kha a langhter.”

² Jehovah nih minung kha dawtnak langhter a duhmi in le dawtnak hmuh a duhmi in a kan ser. Asinain zawtnak le tangkalei chambaunak ruang asiloah phungchim rian ah hlawhtlinnak hmuh lo ruangah fawi tein lung a dong kho. Jehovah nih a kan daw ti lo tiah kan hun ruah ahcun Jehovah caah a sunglawimi kan si ti le kan orhlei kut kha a kan tlaih i bawmh awkah timhcia tein a um ti kha kan i cinken awk a si. A cungah zumhfek tein kan um ahcun zeitikhmanh ah a kan philh lai lo.—Isa. 41:13; 49:15.

3. Jehovah i a hmunmi dawtnak nih kan zumhnak kha zeitindah a fehter khawh?

³ A cunglei i langhtermi Jehovah Tehte Hna nih harnak caan chungah Pathian cu an sinah a um ti kha an zumh. Kannih zong cu bantuk zumhnak kan ngei kho ve. (Salm 118:6, 7) Hi capar ah Jehovah nih a kan dawt ti a langhtermi laksawng pali kong kan i ruah hna lai. Mah cu (1) a thil sermi, (2) Baibal, (3) thlacamnak le (4) tlanhnak man hna an si. Jehovah tuahmi thilṭha kong ruahnak nih a hmunmi a dawtnak ca, i lawmh chin awkah a kan bawmh khawh.—Salm 77:11, 12 rel.

4. Jehovah sermi thil in zeidah kan hngalh khawh?

⁴ Jehovah sermi thil kan zoh tikah zei tlukin dah a kan dawt ti kha kan hngalh khawh. (Rom 1:20) Tahchunhnak ah, Jehovah nih vawlei a ser tikah nunnak ding ca men ah a sermi a si lo. Nunnak i nuamhpi khawh awkah a herhmi zei thil paoh a kan pek. Kan dihlak in rawl ei kan herh. Jehovah nih rawl a phunphun a kan pek caah rawl ei kha mikip nih kan duh. (Pct. 9:7) Unaunu Catherine cu sermi thil zoh kha a duh tuk, a hleiin Canada ram i ṭhaal caan kha a duh. Hitin a chim: “Thil vialte an nunning cu khuaruahhar taktak a si. Pangpar an hung par, va pawl cu an umnak hmunte ah an kir ṭhan lengmang. Ka coka thlalang awng lengah ka thlaimi va inn ah va tete cu an rak kir ṭhan. Kan i nuamh khawh nakhnga hi bantukin a kan tuahpiakmi cu Jehovah nih a kan dawt caah a si.” Vancung kan Pa nih a sermi thil kha a dawt, cun mah thil hna kha i nuamhpi hna seh ti zong a kan duh.—Lam. 14:16, 17.

5. Jehovah nih minung a ser tikah a dawtnak kha zeitindah a langhter?

⁵ Jehovah nih sullam a ngeimi rian ṭuan kho dingin a kan ser. Mah rian nih nunnak ah lungsi hnangamnak a kan hmuhter. (Pct. 2:24) Vawleicung ah minung khah  dih ding, zohkhenh ding le Saram pawl zohkhenh awkah Pathian nih minung kha rian a pek hna. (Gen. 1:26-28) Cun amah i zohchunh khawh awkah a ṭhami sining hna he a kan ser.—Efe. 5:1.

6. Pathian Bia kha zeicah ṭha tein kan ruah awk a si?

⁶ Jehovah nih a kan dawt tuk caah Baibal a kan pek. Baibal ah amah kong le minung he aa tlaiin a intuarning ti bantuk hngalh a herhmi kong kha a langhter. Tahchunhnak ah, atu le atu Jehovah nawl a ngai lomi Israel mi hna he aa tlaiin zeitindah a intuar ti kha Baibal nih a kan chimh. Salm 78:38 nih hitin a chim: “Pathian cu a mi hna cungah khan zaangfahnak a ngei, an sualnak kha a ngaihthiam hna i a hrawk hna lo. Thinhun kha voi tampi aa sum i a thinlinhnak kha voi  tampi chuahter loin a um.” Jehovah nih zei tlukin dah aan dawt i aan zohkhenh ti kha hngalh awkah mah Baibal caang ruahnak nih aan bawmh lai. Jehovah nih a kan zohkhenh taktak ti kha kan zumh khawh.—1 Piter 5:6, 7 rel.

7. Zeicah Baibal cu kan caah a sunglawimi a si awk a si?

⁷ Baibal cu kan caah a sunglawi tukmi a si awk a si. Zeicah? Baibal hmangin Jehovah nih a kan chawnh caah a si. Nulepa le fale cu zalong tein an i chawnhbiak tikah pakhat le pakhat an i dawtnak le an i zumhnak cu a fekchin lai. Jehovah cu kan dawtmi kan Pa a si. Jehovah cu kan hmu bal lo i a aw zong kan thei bal lo nain Baibal hmangin a kan chawnh. Mah kha kan ngaih zungzal awk a si. (Isa. 30:20, 21) Baibal kan rel tikah lam a kan hruai i a kan hupphengtu Jehovah kha kan hngalh lai i kan hung i bochan lai.—Salm 19:7-11; Pungthlukbia 1:33 rel.

8, 9. Jehovah nih zeidah hngalhter a kan duh? Baibal i tahchunhnak pakhat kha chim.

⁸ Jehovah nih a kan dawtmi le mitlinglo kan simi lengin a kan hmuhpiakmi kha hngalhter a kan duh. Pathian nih kan ṭhatnak kha a kawl. (2 Chan. 16:9) Tahchunhnak ah, Judah Siangpahrang Jehoshafet i a ṭhatnak kha Jehovah nih a hmuhpiak. Jehoshafet nih Israel Siangpahrang Ahab kha bawmh in Ramoth-gilead i Siria mi hna doh awkah hrut ngaiin biakhiahnak a tuah. Ahab profet deu 400 nih raldohnak ah teinak nan hmu lai tiah an chimchung nain Jehovah profet Mikaiah nih cun nan sung lai tiah a chimchung. Mikaiah chimmi ningin a rak cang taktak. Ahab cu raltuknak ah a thi i Jehoshafet tu cu a luat fangfang a si. Jerusalem a phanh tikah Jehoshafet chimhhrinh awkah Jehovah nih Jehu kha a hman. Asinain Jehu nih ‘na ṭhatnak kha Pathian nih a hmuh’ ti zongin a ti.—2 Chan. 18:4, 5, 18-22, 33, 34; 19:1-3, NW.

⁹ A hmasa kum hna ah Jehoshafet nih a bawi pawl, Levi mi pawl le tlangbawi pawl kha Judah ram i khua hna ah a thlah hna i Jehovah Nawlbia cawnpiak awkah a fial hna. Miphun dang hna hmanh nih Jehovah an hngalh caah hlawhtlinnak taktak an hmu. (2 Chan. 17:3-10) A hnuah Jehoshafet nih a ṭhalomi biakhiahnak a tuah nain a hmasa ah a rak tuahmi ṭhatnak kha Jehovah nih a philh lo. Kannih zong a caan ah palhnak kan tuah khawh caah mah kong cu kan caah hnemtu taktak a si. Asinain kan si khawh chungin Jehovah rian kan ṭuan ahcun Jehovah nih a kan dawt lai i a ṭhami thil kan rak tuahmi kha a philh lai lo.

10, 11. (a) Thlacamnak cu zeicah Jehovah sinin hmuhmi a hleikhunmi laksawng a si? (b) Pathian nih kan thlacamnak kha zeitindah a kan leh khawh? (A hramthawknak hmanthlak zoh.)

¹⁰ Dawtnak a ngeimi pa cu a fale nih chawnh an duh tikah a caan pe in a ngaihpiak hna. A fale kha a dawt tuk hna caah an intuarmi kha hngalh a duh. Dawtnak in a khatmi kan Pa Jehovah zong cutin a si ve. A sinah thla kan cam tikah a kan ngaihpiak. Vancung kan Pa sin biachim cu a sunglawi tukmi tinvo sung a si.

¹¹ Jehovah sinah zeitik caan paohah thla kan cam kho. Anih cu kan Hawi a si i kan thlacamnak ngaihpiak awkah timhcia a si zungzal. A hmasa ah a kong chimmi Taylene nih “Jehovah kha zei kong paoh na chimh khawh” tiah a ti. Jehovah kha kan ruahmi kong kan chimh tikah Baibal caang caangkhat, kan cauk i capar pakhat asiloah unau  pakhatkhat sinin ṭhapeknak hna kha hmangin a kan leh men lai. Jehovah nih lungtho tein kan halmi kha a kan ngaihpiak. Ahohmanh nih a kan hngalhthiam lo hmanhah Jehovah nih cun a kan hngalhthiam. Kan thlacamnak a kan lehmi nih a hmunmi a dawtnak kha a langhter.

12. Baibal ah kan hmuhmi thlacamnak hna kha zeicah kan hlathlai awk a si? Tahchunhnak pe.

¹² Baibal ah kan hmuhmi thlacamnak hna in a biapimi kong kan cawn khawh. A caan ah chungkhar pumhnak ah mah thlacamnak hna kha kan hlathlai khawh. Hlanlio Pathian salle nih lungtho tein thla an cammi kha ṭha tein kan ruah ahcun kan thlacamnak hmual a ngei deuh ve lai. Tahchunhnak ah, ngapi paw chungin Jonah nih toidor tein thla a cammi kha hlathlai. (Jonah 1:17–2:10) Biakinn pekchanh lioah Solomon nih lungtak tein thla a cammi kha hlathlai. (1 Si. 8:22-53) Cun Jesuh cawnpiakmi Bawipa thlacamnak zong kha ṭha tein ruat. (Matt. 6:9-13) A biapi bikmi cu ‘nan herhmi kha Bawipa sinah’ hmaan tein “hal u.” Cutin nan tuah ahcun “Pathian daihnak, minung hngalhnak a lonhtu nih cun . . . nan lungthin le nan ruahnak cu him tein a chiah lai.” Mah tikah Jehovah i a hmunmi dawtnak cung kan i lawmhnak kha a karh chin lai.—Fil. 4:6, 7.

13. Tlanhnak man thawngin zei tinvo dah kan ngeih?

¹³ ‘Nunnak kan ngeih’ nakhnga Jehovah nih tlanhnak man laksawng a kan pek. (1 Johan 4:9) Pathian dawtnak he aa tlaiin lamkaltu Paul nih hitin a ṭial: “Zeihmanh a tuah kho lomi kan si ko lioah khan, cu caan thengte ahcun miṭhalomi kan caah Khrih kha a thi. Miṭha caah cun thih ngamh zong an um phum hnga nain a dingmi ca i thih cu a harmi thil a si. Asinain Pathian nih cun zei tlukin dah a kan dawt kha hitihin a langhter: kannih cu misual kan si ko rih lioah hin Khrih cu kan caah a thi.” (Rom 5:6-8) Tlanhnak man cu Pathian i a ngan bikmi dawtnak a si i mah nih minung kha Pathian he pehtlaihnak ṭha a ngeihter hna.

14, 15. (a) Tlanhnak man cu chiti thuhmi Khrihfa hna caah zei sullam dah a ngeih? (b) Tlanhnak man cu vawlei ruahchannak a ngeimi hna caah zei sullam dah a ngeih?

¹⁴ Khrihfa phu hmete pakhat nih Jehovah i a hmunmi dawtnak kha a hleikhunmi lam in an hmuh. (Johan 1:12, 13; 3:5-7) Pathian nih annih cu thiang thlarau in chiti a thuh hna caah Pathian fa an hung si. (Rom 8:15, 16) An lak i cheukhat cu vawlei ah an um rih ko nain Paul nih ‘Khrih Jesuh he kan i pehtlaihnak thawngin vancung khua ah amah he a kan thawhter’ tiah zeicah a ti? (Efe. 2:6) Jehovah nih annih kha ‘bia a kamhmi hna thiang thlarau in hmelchunhnak a khenh hna’ caah a si. Mah thiang thlarau cu ‘an hmuh hngami ro i aamahkhaan’ a si. An hmuh hngami ro cu ‘vancung ah an ca i chiahmi ruahchannak’ kha a si.—Efe. 1:13, 14, NW; Kol. 1:5.

 ¹⁵ Chiti thuh a si lomi hna zong nih tlanhnak man an zumh kha an langhter ahcun Pathian hawi an si kho ve. Pathian fale in cohlan an si lai i vawlei paradis ah zungzal nun ding ruahchannak an ngei. Tlanhnak man nih mi vialte cung i Jehovah dawtnak kha a langhter. (Johan 3:16) Zumhfek tein Pathian kan biak ahcun vawlei thar ah a ṭha bikmi nunnak a kan pek lai ti hngalh cu zeitluk lungthawh awk dah a si. Cucaah Pathian i a hmunmi dawtnak a langhter biktu tlanhnak man kan sunsak kha langhter hna u sih.

16. Jehovah dawtnak kong ruahnak nih zei tuah awkah dah a kan forh lai?

¹⁶ Lam tampi in langhtermi Jehovah dawtnak cu rel cawk lo an si. Siangpahrang David cu hitin hla a sa: “Maw Pathian, na ruahnak cu ka caah zei tlukin dah hngalh a har, na ruahnak cu a tam tuk ah a dongh in a dong kho lo. Rel tim hnik hna ning law thetse nak tam an si ṭung.” (Salm 139:17, 18) Jehovah dawtnak a langhtermi lam tampi kha kan ruah ahcun amah dawt ṭhan awk le a ṭha bikmi pek awkah a kan forh lai.

17, 18. Pathian kan dawt langhter khawhnak lam cheukhat cu zei hna dah an si?

¹⁷ Jehovah kan dawtnak kha lam tampi in kan langhter khawh. Tahchunhnak ah, Pennak kong thawngṭha kha midang sinah lungtho tein kan chimnak thawngin Jehovah kan dawt kha kan langhter khawh. (Matt. 24:14; 28:19, 20) Kan zumhnak hneksak a si tikah zumhfek tein kan umnak thawngin Pathian kan dawt kha kan langhter khawh. (Salm 84:11; Jeim 1:2-5 rel.) A fakmi hneksaknak kan ton hmanhah Jehovah nih a kan hmuhpiak i a kan bawmh lai ti kha kan zumh khawh. Zeicatiah kannih cu Pathian caah a sunglawi tukmi kan si.—Salm 56:8.

¹⁸ Jehovah kan dawtnak nih a sermi khuaruahhar thil vialte ruah awkah a kan forh. Jehovah kha kan dawt i a Bia, Baibal kan sunsak caah Baibal kha ṭha tein kan hlathlai. Jehovah kan dawt ca le amah he pehtlaihnak ṭha ngeih kan duh caah hmaan tein thla kan cam. A sunglawimi laksawng tlanhnak man kong kan ruah tikah Pathian kan dawtnak cu a fek chin. (1 Johan 2:1, 2) Mah hna cu Jehovah i a hmunmi dawtnak kan sunsak langhter khawhnak lam tampi lakah cheukhat lawng an si.