1, 2. (a) Paradis i zei thluachuah kha dah hmuh lai naa ngaih? (A hramthawknak hmanthlak zoh.) (b) Vawlei thar ah zeinihdah a kan nuamhter bik lai?

“ZUNGZAL nunnak” hmuh lai kha kan i ngaih tuk. Lamkaltu Paul nih mah kha “nunnak taktak” tiin a langhter. (1 Timote 6:12, 19 rel.) Mi tam deuh kan caah nunnak taktak timi cu vawlei Paradis ah zungzal in nun kha a si. Zing fatin dam tein le nuam tein kan thawh tikah zeitindah kan um lai khi ruathmanh. (Isa. 35:5, 6) A tho ṭhan hngami hna i telin na chungkhar le na hawikom hna he caan hmanṭi cu zei tlukin dah a nuamh lai ti kha ruathmanh. (Johan 5:28, 29; Lam. 24:15) Na huammi rian cawnnak caan zong na ngei lai. Tahchunhnak ah, science lei kong tam deuh in na cawn khawh lai. Asiloah aw dawh tumning hna na cawn khawh i inn pungsan suaining zong na cawn khawh lai.

² Mah vialte kha kan i ngaih tuk ko nain Jehovah biaknak nih a kan nuamhter bik lai. Jehovah min thianter a si lai i mi vialte nih Jehovah kha an Uktu in an cohlan tikah zei tlukin  dah kan hna a ngam lai khi ruathmanh. (Matt. 6:9, 10) Vawleicung ah a tlingmi minung in khat hna seh timi Pathian tinhnak a tlinmi kan hmuh tikah kan lung a cawlcang tuk lai. Cun a tlingmi kan hun si thluahmah tikah Jehovah naih awkah zei tlukin dah a fawi cang lai ti kha ruathmanh.—Salm 73:28; Jeim 4:8.

3. Atu in zeicah kan i timhtuah awk a si?

³ Mah thluachuah vialte kha Jehovah nih a kan pek lai ti kan zumh. Zeicahtiah “Pathian caah cun zeizong vialte hi a si kho ko.” (Matt. 19:25, 26) Vawlei thar ah zungzal in nun kan duh ahcun atu in zungzal nunnak kha “fek tein i tlaih” a hau. A rauhhlan ah donghnak a phan cang lai ti kha kan hngalh. Cucaah zeitik caan paohah donghnak a ra kho ti kan i ruahchan kha kan nunning in kan langhter awk a si. Vawlei thar nunnak caah atu in i timhtuah awkah kan tuah khawhmi zei paoh kan tuah awk a si. Zeitindah kan i timhtuah khawh ti kha zoh hna hmanh u sih.

4. Vawlei thar nunnak caah atu in zeitindah kan i timhtuah khawh? Tahchunhnak pe.

⁴ Vawlei thar nunnak caah atu in zeitindah kan i timhtuah khawh? Ramdang ah i ṭhial dingin timhnak kan ngei hei ti u sih. Mah caah zeitindah kan i timhtuah khawh? Tahchunhnak ah, cuka ram nih an hmanmi holh le nunphung hna kha kan cawn khawh. Cun an rawl cheukhat zong kha kan ei chunh khawh. Cu bantukin vawlei thar ah a um cangmi bantukin a si khawh chungin kan nunnak thawngin vawlei thar nunnak caah atu in kan i timchung kho. Cutin kan tuah khawhnak lam cheukhat kha i ruah hna u sih.

5, 6. Jehovah bupi lamhruainak zulh dingin kan cawnmi nih vawlei thar nunnak ca, i timhtuah awkah zeitindah a kan bawmh lai?

⁵ Kan duhmi zei paoh tuah khawh a si tiin Satan nih ruahter a kan duh. Mi tampi nih Pathian nawlngaih a hau lo, zalong tein um hi a biapi tiah an ruah. Mah ruangah sifah harnak le ngaihchiatnak tampi a chuak. (Jer. 10:23) Asinain Jehovah cu dawtnak in a khatmi Uktu a si. Jehovah kha mikip nih a nawl an ngaih lai caan, vawlei thar nunnak cu zei tlukin dah a ṭhat chinchin lai.

⁶ Vawlei thar ah Jehovah bupi lamhruainak ningin hi vawlei hi aa dawh tukmi paradis ah canter in a thoṭhanmi hna cawnpiak cu a nuam tuk lai. Jehovah cu kan caah rian tampi a ngei. Asinain hruaitu hna nih kan duh lomi thil pakhatkhat kha tuah awkah an kan fial ahcun zeitin? An nawl kan ngai hna lai maw? Kan rian liim khawh awkah a si khawh chungin nuam tein kan ṭuan lai maw? Vawlei thar i zungzal nunnak ca i timhtuah awkah atu in Jehovah bupi lamhruainak kha kan zulh a hau.

7, 8. (a) Hruaitu hna he zeicah rian kan ṭuanṭi awk a si? (b) Khrihfa cheukhat cu zei thlennak hna dah an ton? (c) Vawlei thar nunnak he aa tlaiin zeidah kan zumh khawh?

⁷ Vawlei thar nunnak ca timhcia si awkah lungsinak ngeih awk le Jehovah bupi le midang he hmunkhat ah ṭuanṭi duhnak lungput ngeih a hau. Tahchunhnak ah, rian thar pek kan si tikah hmunkhat ah ṭuanṭi duhnak lungput ngei in nuam te le lungsi tein ṭuan awkah a si khawh chungin kan i zuam awk a si. Atu in hruaitu hna he rian ṭuanṭi kha kan cawn ahcun vawlei thar zongah cutin tuah kan duh lai. (Hebru 13:17 rel.) Israel mi pawl Biakammi Ram i an luh tikah  khoika ah um ding ti kha camcawh fung zuh in ri an khiahpiak hna. (Nam. 26:52-56; Josh. 14:1, 2) Vawlei thar ah pumpak pakhat cio kha khoika ah um ding timi rikhiahpiak kan si lai ti cu kan hngal lo. Asinain hmunkhat ah ṭuanṭi duhnak lungput ngeih awk kan cawn ahcun khoika kan um hmanhah Jehovah duhnak tuahnak ah kan i nuam lai.

⁸ Pennak uknak tangah a ummi vawlei thar ah umnak nawl hmuh cu tinvo sung a si. Cucaah atu in Jehovah bupi he rian ṭuanṭi kha kan duh i pek kan simi zei rian paoh ṭuan kan duh. Asinain a caan ah kan rian cu aa thleng kho. Tahchunhnak ah, United States i Bethel chungkharmi cheukhat cu lohmun ah rian pek ṭhan an si. Cun kumkhua ruang asiloah a dang thil sining hna ruangah khualtlawng rianṭuantu cheukhat cu special hmaikal in rian pek an si. Annih cu an rian thar ah an i nuam i Jehovah zong nih thluachuah a pek hna. Bawmhnak hmuh awkah Jehovah sin thla kan cam, a si khawh chungin a rian kan ṭuan i pek kan simi zei rian paoh ṭuan duhnak lungput ngeih awkah kan cawn ahcun kan i nuam lai i Jehovah zong nih thluachuah a kan pek lai. (Phungtlukbia 10:22 rel.) Vawlei thar ah um kan duhnak hmun ah si loin kaadang ah um dingin Jehovah bupi nih a kan fial ahcun zeitin? Mah tikah cun khoika ah dah kan um lai, zeidah kan tuah lai ti cu a biapimi a si ti lai lo. Vawlei thar ah kan ummi tu ah khan kan i lawm lai i kan hna a ngam lai.—Neh. 8:10.

9, 10. (a) Vawlei thar ah zeicah lungsaunak kan ngeih a herh khawh men? (b) Lungsaunak kan ngeih kha atu ah zeitindah kan langhter khawh?

⁹ Vawlei thar ah lungsaunak kan ngeih a herh caan a um men ko lai. Tahchunhnak ah, mi cheukhat cu an chungkhat pawl le an hawikom pawl an thawhṭhan caah an i lawmh tukmi kha kan theih men lai. Asinain kan dawtmi pakhatkhat an thawhṭhanmi tu cu hngah a hau men lai. Mah tikah lungsaunak langhter in midang he kan i lawmṭi kho lai maw? (Rom 12:15) Jehovah biakam a tlin lai caan kha lungsau tein hngah awkah atu in kan cawn ahcun hmailei zongah lungsau tein um khawh awkah a kan bawmh lai.—Pct. 7:8.

¹⁰ Baibal biatak kan hngalhthiamning thlen a si tikah lungsaunak kan langhternak thawng zongin vawlei thar caah kan i timhtuah khawh. Mah a konglam thar kha kan hlathlai i ṭha tein kan hngalhthiam lo hmanhah lungsaunak kan langhter maw? Cutin kan langhter a si ahcun vawlei thar ah Jehovah nih lamhruainak thar a kan pek tik paohah lungsaunak ngeih awkah a fawi deuh lai.—Ptb. 4:18; Johan 16:12.

11. Midang ngaihthiam kha atu in zeicah kan cawn awk a si, mah nih vawlei thar ah zeitindah a kan bawmh lai?

¹¹ Vawlei thar nunnak ca kan i timhtuah khawhnak a dang lamkhat cu ngaihthiam kan cawnnak thawngin a si. Khrih Kum Thongkhat Uknak chungah mi vialte  a tlingmi si ding ah caan tlawmpal a rau men lai. (Lam. 24:15) Mah lioah pakhat le pakhat cungah dawtnak le ngaihthiamnak lungput kan ngei kho lai maw? Midang ngaihthiam awk le anmah he pehtlaihnak ṭha ngeih awkah atu in kan cawn ahcun vawlei thar ah cutin tuah awkah a fawi deuh lai.—Kolose 3:12-14 rel.

12. Vawlei thar nunnak caah atu in zeicah kan i timhtuah awk a si?

¹² Vawlei thar ah kan duhmi kha a zungzal in kan hmu kho men lai lo asiloah hngah a hauh caan zong a um men lai. Zei bantuk thil sining paohah lunglawm tein le lungsi tein kan um a hau men lai. A tak ti ahcun atu ah Jehovah nih a kan cawnpiakmi sining hna kha mah tik zongah langhter a hau te lai. Cucaah mah sining hna kha langhter awkah atu in kan cawnnak thawngin vawlei thar cu kan caah a um taktakmi a si le zungzal nunnak ca kan i timhtuahmi a si kha kan langhter khawh. (Heb. 2:5; 11:1) Mah lengah Jehovah nawl a ngaimi kip an umnak ding vawlei ah um kan duh taktak zong kan langhter khawh.

13. Vawlei thar ah zeidah biapi bik in kan chiah lai?

¹³ Vawlei thar ah kan i nuamh khawh nakhnga kan herhmi zei paoh kan hmuh lai. Asinain kan i lawmh biknak cu Jehovah he pehtlaihnak ṭha kan ngeihnak thawngin a si lai. (Matt. 5:3) Jehovah rian kha biapi bik ah kan chiah lai i a rian kan ṭuannak ah kan i nuam lai. (Salm 37:4) Cucaah atu in kan nunnak ah Jehovah kha pakhatnak ah kan chiah ahcun vawlei thar nunnak ca kan i timhtuah a si lai.—Matthai 6:19-21 rel.

14. Mino pawl nih Jehovah rian ah zei hmuitinh dah an chiah khawh?

¹⁴ Jehovah rian ah kan i nuamh khawh deuh nakhnga zeitindah kan tuah khawh? Kan tuah khawhnak lamkhat cu hmuitinh chiahnak thawngin a si. Nang cu mino na si  ahcun na nunnak kha Jehovah rianṭuannak i hman awkah fakpi in ruat. Caantling rian a phunphun he aa tlaimi kong kha kan cauk hna ah hlathlainak tuah. Mah lak in pakhat kha hmuitinh ah i chiah. * Kum tampi chung caantling in Jehovah rian a ṭuanmi cheukhat kha biaruah hna. Na nunnak kha Jehovah rianṭuannak ah na hman ahcun man a ngei tukmi cawnpiaknak na hmuh lai. Mah nih vawlei thar ah Jehovah rian ṭuan khawh awkah aan bawmh lai.

15. Jehovah rian ah a dang zei hmuitinh hna dah kan chiah khawh?

¹⁵ Jehovah rianṭuannak ah kan chiah khawhmi hmuitinh tampi a um. Tahchunhnak ah, Phungchim rian ah kan thiamnak a ṭhancho deuh nakhnga hmuitinh kan chiah khawh. Asiloah Baibal phunglam hna le mah kha kan nunnak ah zeitindah kan hman khawh ti kha hngalhthiam chin awkah kan i zuam kho. Pumhnak ah zapi hmai Baibal relnak, phungchimnak le a phi peknak ah ṭhancho dingin kan i zuam kho. Cu bantuk hmuitinh chiahnak nih Jehovah rian ah lungthawhnak ngeih peng awk le vawlei thar nunnak ca, i timhtuah awkah aan bawmh lai.

16. Jehovah rianṭuan cu zeicah a ṭha bikmi nunning a si?

¹⁶ Vawlei thar nunnak ca, i timhtuah awkah a caan kan pek ruangah atu ah kan sunghmi pakhatkhat a um maw? A um lo. Jehovah rianṭuannak cu a ṭha bikmi nunning a si. Mi pakhatkhat nih a kan forh ruangah asiloah harnak nganpi in luatnak ca men ah a rian kan ṭuanmi a si lo. Jehovah he pehtlaihnak ṭha kan ngeih ahcun kan nunnak cu a ṭha chin lai i kan i nuam chin lai. Mah cu a kan timhpiakmi a si. Kan nunnak ah Pathian dawtnak le a lamhruainak  kan hmuhmi cu a dang zei bantuk thil nakhmanh in a ṭha deuh. (Salm 63:1-3 rel.) Lungthin dihlak in Jehovah kan biaknak thawngin atu hmanhah nuamhnak kan hmu kho. Pathian rianṭuan cu a ṭha bikmi nunning a si ti kha kum tampi chung Pathian rian a ṭuanmi hna nih an hngalh.—Salm 1:1-3; Isa. 58:13, 14.

17. Paradis ah kan huammi thil tuahnak le hrimhnak hna cu zeitluk in dah a biapit lai?

¹⁷ Paradis ah kan huammi thil tuahnak ca le hrimhnak ca zongah a caan kan ngei te lai. Jehovah nih nuamh duhnak lungput he a kan ser. Cun ‘thilnung vialte i an duhnak kha ka tlinter lai’ ti zongin bia aa kam. (Salm 145:16, NW; Pct. 2:24) Kannih cu hrimhnak kan herh i i dinh zong kan herh. Asinain Jehovah he kan i pehtlaihnak kha pakhatnak ah kan chiah tikah mah nakin kan i nuam deuh. Vawlei thar zongah cutin a si te lai. Cucaah “Pathian Pennak . . . kha biapi” ah chiah le Jehovah rianṭuannak in hmuhmi thluachuah hna ah lungthin pek cu fim a si.—Matt. 6:33.

18. Paradis i zungzal nunnak ca kan i timhtuah kha zeitindah kan langhter khawh?

¹⁸ Vawlei thar nunnak cu kan ruah khawh lengin a ṭha deuh lai. “Nunnak taktak” caah atu in kan i timhtuahnak thawngin cuka ah zei tlukin dah um kan duh ti kha langhter hna u sih. Jehovah nih a kan cawnpiakmi ziaza hna kha langhter in thawngṭha chimnak ah lungtho tein i tel hna u sih. Kan nunnak ah Jehovah biaknak kha hmasa bik ah kan chiahnak thawngin nuamhnak hmu hna u sih. Jehovah nih a biakam vialte kha vawlei thar ah a tuah hrimhrim lai ti kha kan zumh. Cucaah vawlei thar ah a um cangmi bantukin nung hna u sih.