1. Lamkaltu Johan nih zei kong dah ruah awkah a kan forh, zeicah?

LAMKALTU Johan nih Jehovah i a liannganmi a dawtnak kong kha thukpi in ruah awkah a kan forh. 1 Johan 3:1 ah hitin kan hmuh: “Pathian nih zeitluk in dah a kan dawt hi ruathmanh u!” Jehovah nih zeitluk in dah a kan dawt ti le a dawtnak kha zeitindah a langhter timi kan ruah tikah amah he kan i naih deuh lai i kan dawt deuhdeuh lai.

2. Pathian nih a kan dawt ti hngalhthiam awkah mi cheukhat cu zeicah an i harh?

² Ngaihchiat awk ngai a simi cu minung hi Pathian nih a kan dawt ti kha mi cheukhat nih hngalthiam an i harh. Pathian nih minung hi zei ah a kan rel lo tiah an ruah. Annih nih Pathian cu nawlbia a ser i a nawlbia a ngai lomi hna dan a tattu men in an ruah. A cheu nih Pathian cu a puarhrangmi a si i amah dawt cu a si kho lo tiah an ruah. A dang tu nih cun Pathian nih mi vialte hi a kan dawt caah zei thil kan tuah hmanhah a poi lo tiah an ruah. Asinain Baibal na hlathlai tikah Jehovah he  aa tlaimi biatak kha na hun hngalh. Dawtnak cu Pathian ngeihmi sining hna lakah a ngan bikmi a si ti le na caah a Fapa kha tlanhnak man in a pek ti kha na hun hngalh. (Johan 3:16; 1 Johan 4:8) Asinain na nunnak i na tonmi thil hna ruangah Jehovah dawtnak kha hngalhthiam awkah naa harh kho men.

3. Jehovah dawtnak hngalhthiam awkah zeinihdah a kan bawmh?

³ Jehovah dawtnak hngalhthiam awkah Jehovah cu a kan sertu a si ti kha kan hngalh hmasa a hau. Jehovah nih nunnak a kan pek. (Salm 100:3-5 rel.) Cucaah a hmasa bik minung kha “Pathian fapa” tiah Baibal nih a ti. (Luka 3:38) Jesuh nih Jehovah kha “vancung khua i a um kan Pa” tiah auh awkah a kan cawnpiak. (Matt. 6:9) Cucaah Jehovah cu kan Pa a si i pa nih a fale a dawt hna bantukin a kan dawt.

4. (a) Jehovah cu zei bantuk Pa dah a si? (b) Atu capar le a hnu capar ah zei kong dah kan i ruah hna lai?

⁴ Mi cheukhat caah pale kha dawtnak a ngeimi in ruah cu a har. An pale nih puarhrang ngaiin an pehtlaih hna caah an pale cungah lungfahnak an ngei kho men. Jehovah nih cun a fale kha zeitikhmanh ah cutin a pehtlaih bal hna lai lo. Jehovah cu a ṭha bikmi Pa a si. (Salm 27:10) A kan dawt tuk i lam tampi in a kan zohkhenh. Jehovah dawtnak kan hmuh deuhdeuh tikah amah kha kan dawt deuhdeuh ve lai. (Jeim 4:8) Hi capar ah Jehovah nih a kan dawt a langhternak lam pali kha kan i ruah hna lai. A hnu capar ah Jehovah kan dawtnak langhter khawhning lam pali kha kan i ruah hna lai.

5. Pathian nih mi vialte kha zeidah a pek hna?

⁵ Lamkaltu Paul nih Greece ram, Athens khua ah siasal tampi a ummi le cuka mi hna nih an pathian cu nunnnak petu a si tiah an zumhmi kha a hmuh. Cucaah “vawlei le a cung i a ummi thil vialte a sertu Pathian” kong kha a chimh hna. “Pathian cu minung kha nunnak le thaw le zeizong vialte a petu a si” i “amah chungah kan nung, kan cawl kan cang i khua kan sa” tiah a ti hna. (Lam. 17:24, 25, 28) Jehovah nih a kan dawt caah kan nun nakhnga le kan nunnak kan i nuamhpi khawh nakhnga a herhmi thil vialte a kan pek. A kan pekmi thil cheukhat kong kha ruathmanh.

6. Jehovah nih zei bantuk hmun dah a kan pek? (A hramthawknak hmanthlak zoh.)

⁶ Tahchunhnak ah, Jehovah nih kan caah aa dawh tukmi hmun a kan timhpiak. (Salm 115:15, 16) Pathian sermi vankawlawng chungah hin kan vawlei hi aa thleidang bikmi a si. Scientist pawl nih vankawlawng kha an hlathlai tikah vawlei (Jo) tampi an hmuh. Asinain minung nunnak caah a herhmi thil vialte a ummi a dang vawlei tu cu pakhat hmanh an hmu lo. Jehovah nih vawlei kha minung nun khawhnak ca men ah si loin aa dawh i a himmi hmun in a kan serpiak. (Isa. 45:18) Kan Pa, Jehovah nih a kan pekmi hmun kong kan ruah tikah zeitluk in dah a kan dawt ti kha kan hun hngalh.—Job 38:4, 7; Salm 8:3-5 rel.

7. Jehovah nih a kan serning in a dawtnak kha zeitindah a langhter?

⁷ Jehovah nih a dawtnak a langhternak a dang lamkhat cu amah i zohchunh khawh  dingin a kan sermi hi a si. (Gen. 1:27) Mah ruangah Jehovah dawtnak kha kan hmuh khawh i amah kan dawtnak zong kan langhter khawh. Cutin tuahnak nih nuamhnak taktak a kan hmuhter khawh ti kha Jehovah nih a hngalh. Nulepa nih dawtmi fale cu an i nuam tuk. Kannih zong Jesuh nih kan Pa, Jehovah he pehtlaihnak ṭha nan ngeih ahcun nan i nuam lai tiah a kan cawnpiak. (Matt. 5:3) Pathian nih ‘kan ca i a ṭha dingmi zeizong vialte’ a kan pek. Jehovah cu a siang tuk i a kan dawt tuk ti a fiang.—1 Tim. 6:17; Salm 145:16.

8. Jehovah cawnpiaknak kha zeicah kan duh?

⁸ Pale nih an fale kha an dawt tuk hna. Cucaah an fale kha a ping i hruai asiloah hlen an si lai kha an duh lo. Asinain tuchan nulepa tampi cu a hmaan le hmaanlo kong i Baibal phunglam kha an cohlang lo. Cucaah an fale kha aa tlakmi lamhruainak  an pe kho hna lo i ngaihchiatnak an tong tawn. (Ptb. 14:12) Asinain Jehovah cu “zumh awk tlakmi Pathian” a si caah a fale kha a ṭha bikmi lamhruainak a pek khawh hna. (Salm 31:5) Amah kong biatak le biaknak he aa tlaimi kongkau hna kha a kan cawnpiak. (Salm 43:3 rel.) Jehovah nih zeitluk in dah a kan dawt ti langhternak caah zeidah a kan cawnpiak?

9, 10. (a) Jehovah nih amah kong biatak kha zeicah a kan chimh? (b) Kan ca i aa tinhnak he aa tlaiin zeidah a kan cawnpiak?

⁹ A hmasa ah Jehovah nih a kong hngalhter a kan duh caah amah kong biatak a kan cawnpiak. (Jeim 4:8) A min zong a kan chimh. Baibal nih a dang min nakin Jehovah min kha voi tam deuh a langhter. Jehovah nih zei bantuk Pathian dah ka si ti zong a kan chimh. A sermi thil hna kan zoh tikah anih cu a ṭhawngmi le a fimmi a si kha kan hngalh. (Rom 1:20) Cun Baibal kan rel tikah Pathian cu a dingmi a si i zeitluk in dah a kan dawt ti kha kan hngalh. Jehovah i a ṭha tukmi a sining hna kan hngalh deuhdeuh tikah kan i pehtlaihnak a fek deuhdeuh ve.

¹⁰ Jehovah nih kan ca i aa tinhnak zong a kan chimh. Kannih cu a innchungkhar ah aa telmi kan si kha a kan chimh. A innchungkhar a simi kip he lungrual tein le rem tein rian kan ṭuanṭi khawh nakhnga a herhmi zong a kan cawnpiak. A ṭhami le a ṭhalomi kongah kanmah tein biakhiahnak tuah khawh dingin a kan ser lo kha Baibal ah fiang tein a langhter. (Jer. 10:23) Kan caah a ṭha bikmi kha Jehovah nih a hngalh. Jehovah nawlngeihnak kha kan cohlan i a nawl kan zulh lawngah a dai i a nuammi nunnak kan hmu kho lai. Jehovah nih a kan dawt caah mah a biapimi biatak kha a kan cawnpiak.

11. Dawtnak a ngeimi kan Pa nih hmailei kong he aa tlaiin zeidah a kan chimh?

¹¹ Dawtnak a ngeimi pa cu a fale hmailei kong kha thukpi in a ruat. A ṭhami nunnak ngeihter a duh hna. Ngaihchiat awk ngai a simi cu tuchan i mi tampi cu hmailei kong ah an lungre a thei tuk i a hmun lomi thil caah an caan kha an hman dih. (Salm 90:10) Kan Pa, Jehovah nih atu ah zeitindah nuam tein nun khawh a si ti a kan cawnpiak lawng si loin a ṭha tukmi hmailei ruahchannak zong bia a kan kamh.

12. Jehovah nih Kain le Baruk kha zeitindah a bawmh hna?

¹² Kain nih thil ṭhalo a tuah hnik ti kha Jehovah nih a hmuh tikah bawmh aa zuam. Hitin a ti: ‘Zeicahdah na thin a hun i na hmai a chiat? Atu in ṭhatnak na tuah ahcun mithmai ṭha na hmu ṭhan ko lai.’ (Gen. 4:6, 7, NW) Kain nih Jehovah bawmhnak kha a al caah harnak a tong. (Gen. 4:11-13) Baruk cu a ṭhalomi ruahnak nih a batter i a lung a donghter ti kha Jehovah nih a hmuh. Cucaah Jehovah nih Baruk kha na  ruahnak a palh i naa thlen a hau tiah ralrin a pek. Jehovah chimhhrinhnak kha Baruk nih a ngaih caah a nunnak aa khamh khawh.—Jer. 45:2-5.

13. Jehovah nih zumhfekmi a salle kha harnak ton awkah zeicah a awnh hna?

¹³ Jehovah nih a kan dawt caah lam a kan hruai i a kan chimhhrinh. (Heb. 12:6) Chimhhrinhnak timi cu dantat lawng kha a si lo. Lam a phunphun a um. Mah ah cawnpiak zong aa tel. Miṭha, miding si awkah Jehovah nih a cawnpiakmi, zumhfekmi a salle kong Baibal ah kan hmuh. Tahchunhnak ah, Josef, Moses le David cu a har tukmi thil sining hna an tong. Mah caan chungah Jehovah cu an sinah a um. Harnak caan chungah an cawnmi thil nih Jehovah nih a pek hna hngami rian ngan deuh caah timhcia a siter hna. Jehovah nih a miphun zeitindah a bawmh hna i a cawnpiak hna ti kha Baibal i kan rel tikah Jehovah nih a kan dawt taktak ti kha kan hun hngalh.—Phungthlukbia 3:11, 12 rel.

14. Thil ṭhalo kan tuah tik hmanhah Jehovah nih a dawtnak kha zeitindah a langhter?

¹⁴ Thil ṭhalo kan tuah hmanhah Jehovah nih kan cungah dawtnak a langhter rih ko. A kan chimhhrinhmi kha kan cohlan i kan i ngaihchih ahcun “khulrang in” a kan ngaihthiam lai. (Isa. 55:7) Mah cu zei sullam dah a si? Jehovah ngaihthiamnak he aa tlaiin David chimmi nih zaangfahnak a ngeimi Pa kan ngei ti kha a langhter. Hitin a ti: “Ka sualnak vialte kha a ka ngaihthiam i ka zawtnak vialte kha a ka damter; thlan chungin a ka khamh i dawtnak le zaangfahnak he thluachuah a ka pek; nichuahlei le nitlaklei an i hlat tluk khin kan sualnak cu kanmah he i hlaat ah a kan ṭhialpiak.” (Salm 103:3, 4, 12) Jehovah nih lam a phunphun in lamhruainak a kan pek i a kan chimhhrinh. Cu bantuk caan ah thlennak kan tuah colh maw? Jehovah nih a kan dawt caah a kan chimhhrinhmi a si ti kha i cinken zungzal.—Salm 30:5.

15. Jehovah nih a kan dawtnak a langhternak a dang lamkhat cu zeidah a si?

¹⁵ Dawtnak a ngeimi pa nih a chungkhar kha ṭihnungmi thil in a huhphenh hna. Kan Pa, Jehovah zong cutin a si. Salm caṭialtu nih hitin a chim: “A mi kha a huhphenh hna i miṭhalo mi pawl kut chung khan a chuah hna.” (Salm 97:10) Kan mit cu kan caah a sunglawi tuk i thil pakhatkhat he aa tawngh tikah kan huhphenh colh. Cu bantukin kannih cu Jehovah caah kan sunglawi tuk i harnak a kan pemi thil sining a um tikah a kan huhphenh colh ve.—Deuteronimi 32:10 rel.

16, 17. Jehovah nih a miphun kha zeitindah a huhphenh hna?

¹⁶ Jehovah nih a miphun a huhphenh hnanak lamkhat cu vancungmi a hman hnanak thawngin a si. (Salm 91:11) Vancungmi pakhat nih zankhat te ah Assiria  ralkap 185,000 kha a thah hna i Pathian miphun kha a khamh hna. (2 Si. 19:35) Kumzabu pakhatnak zongah vancungmi hna nih Piter, Paul le midang kha thonginn in a khamh hna. (Lam.5:18-20; 12:6-11) Nai ah, Africa ram pakhat ah ṭih a nung tukmi raltuknak pakhat a um. I dohnak, firnak, tlaihhremnak le thahnak hna ruangah an ram cu lak awk tlak loin aa tuai ur. Unau pawl cu pakhat hmanh an thi lo nain tam deuh cu an ngeihmi thil vialte an sung dih. Asinain an dihlak in Jehovah dawtnak le zohkhenhnak an hmu. Harnak an tong ko nain an i nuam ṭhiamṭhiam ko. Zungpi aiawhtu nih a va tlawng hna i unau pawl an sining kha a hal hna tikah “Jehovah bawmhnak thawngin kan tlam a tling ko” tiah an ti.

¹⁷ Steven bantukin Jehovah salle cheukhat cu zumhfek tein an um caah an nunnak hmanh a liam. Cu bantuk thil sining hna ton lo awkah Jehovah nih a zungzal in cun a huppheng hna lo. Asinain Satan hlennak a phunphun kha ralrin a pek hnanak thawngin a miphun kha an phu ningin a huhphenh hna. (Efe. 6:10-12) Mah ralrin peknak hna kha Baibal le Jehovah bupi chuahmi cauk hna ah kan hmuh. Tahchunhnak ah, Internet le tangka duh tuknak ṭih a nunning, ziaza rawhralnak le zaangennak a hlorhmi video, cauk le game pawl ṭih a nunning hna kha kan hun hngalh. Jehovah nih a kan dawt i huhphenh a kan duh ti cu a fiang tukmi a si.

18. Jehovah dawtnak kha zeitindah na hmuh?

¹⁸ Moses nih Jehovah rian a rak ṭuan lio caan kong a ruah tikah Jehovah nih a ka dawt ti kha a zumh. Hitin a ti: “Zingfate in a fekmi na dawtnak in kan khahter, cuticun hla kan sa lai i kan nunchung vialte kan i lawm lai.” (Salm 90:14) Jehovah dawtnak kan hngalhthiam khawhmi le kan hmuh khawhmi cu a sunglawi tukmi tinvo le thluachuah taktak a si. Lamkaltu Johan bantukin “Pathian nih zeitluk in dah a kan dawt hi ruathmanh u” tiah chim ve awkah forh kan si.—1 Johan 3:1.