1, 2. Khrihfa a simi kip nih zei hmuitinh dah an ngeih awk a si? Tahchunhnak pe.

NU PAKHAT nih dawr ah thingthei a cawk tikah zeitindah a thim? A ngan bikmi asiloah a man a fawi bikmi in a thim theng lai lo. Mah canah a haw a thawmi, a ṭhami le a hminmi te kha a thim ko lai.

² Mi pakhat nih Jehovah sinah aa pumpi i tipil a in hnuah Jehovah he an i pehtlaihnak a ṭhanter zungzal a hau. Aa tinhnak cu Khrihfa nutling, patling si awkah a si. Nutling, patling si timi cu kum upat kha a chim duhmi a si lo. Thlaraulei ṭhancho, phundang in cun Jehovah he a ṭhami pehtlaihnak ngeih kha a chim duhmi a si. Lamkaltu Paul nih Efesa khua i Khrihfa hna kha nutling, patling siter a duh hna. Cucaah hitin a forh hna: “Kan zumhnak le Pathian Fapa kan hngalhnak i pakhat sinak ah khan kan i fon dih lai; nutling, patling kan si lai i Khrih tlinnak a sanning taktak zong kha kan phan ve lai.”—Efe. 4:13.

3. Efesa Khrihfabu le tuchan Jehovah miphun cu zeitindah an i lawh?

 ³ Efesa Khrihfabu cu Paul nih an sinah cakuat a ṭial hlan kum tampi lio in dirh a si cang. Mah Khrihfabu i unau tampi cu hmuhtonnak a ngeimi Khrihfa nutling, patling an si. Asinain an lak i cheukhat cu Jehovah he an i pehtlaihnak a feh nakhnga an i zuam a herh rih. Cu bantukin tuchan zongah unau tampi cu kum tampi chung Jehovah a bia cangmi Khrihfa nutling, patling an si. Asinain cheukhat tu cu cutin an si lo. Tahchunhnak ah, kum fatin mi thong tampi cu tipil an in caah nutling, patling si awkah an i zuam a hau rih. Nangtah zeitin?—Kol. 2:6, 7.

4, 5. Khrihfa nutling, patling a simi hna cu zeitindah an i lawh lo, asinain aa khatmi zei sining dah an ngeih? (A hramthawknak hmanthlak zoh.)

⁴ Dawr ah thingthei na thim tikah an i lawh cio lo kha na hmuh ko lai. Asinain an hmin a langhtermi aa khatmi sining cheukhat cu a um. Khrihfa nutling, patling sinak zongah cutin a si ve. An dihlak in a dikthliar in cun an i lo hna lo. An ram, an sining, an kumkhua le an duhmi aa dang cio. Asinain Khrihfa nutling, patling an sinak a langhtermi aa khatmi sining cheukhat a um. Mah sining cheukhat cu zei hna dah an si?

⁵ Khrihfa nutling, patling a simi nih Jesuh kha aa zohchunh i a “keneh” kha a zulh. (1 Pit. 2:21) Jehovah kha lungthin dihlak, ruahnak dihlak le nunnak dihlak in dawt le mahle mah i dawt bantukin innpa dawt cu a biapi tuk tiah Jesuh nih a ti. (Matt. 22:37-39) Khrihfa nutling, patling a simi nih mah nawlbia zulh awkah fakpi in aa zuam. Jehovah he pehtlaihnak ṭha ngeih le midang dawt cu a caah a biapi tuk ti kha a nunning nih a langhter.

6, 7. (a) Khrihfa nutling, patling sinak a langhtermi sining cheukhat cu zeidah an si? (b) Kanmah le kanmah zeidah kan i hal awk a si?

⁶ Khrihfa nutling, patling a simi nih a langhtermi sining pakhat cu dawtnak a si. (Gal. 5:22, 23) Nemnak, i sumnak le lungsaunak zong a langhter. Mah sining hna nih harnak le lungdonghnak hna kha inkhawh awkah a bawmh. Pumpak Baibal hlathlainak a tuah tikah a ṭhami le a ṭhalomi thleidan thiam awkah a bawmmi  Baibal phunglam hna kha a kawl. Cun Baibal in cawnpiakmi chiaṭha thleidan khawhnak lungthin kha hmangin a ṭhami biakhiahnak a tuah. Khrihfa nutling, patling a simi cu aa toidor, cucaah Jehovah lamhruainak le phunglam hna cu amah ruahnak le phunglam hna nakin an ṭha deuh zungzal ti kha a zumh. * Thawngṭha kha lungtho tein a chim i Khrihfabu lungrualnak a ṭhan nakhnga aa zuam.

⁷ Jehovah kan biaknak zeican a si cang hmanhah hitin kan i hal awk a si: ‘Jesuh kaa zohchunh khawh deuh nakhnga thlennak tuah ka herhmi a um maw? Ka ṭhancho khawh deuhnak lam a um maw?’

8. Jesuh nih Baibal kha zeitluk in dah a hngalhthiam?

⁸ Jesuh nih Cathiang kha ṭha tein a hngalhthiam. Kum 12 a si lio hmanhah biakinn i cawnpiaktu hna he bia an i ruah lioah Cathiang kha a hman. “A bia a theimi paoh cu a fimning le a bia lehning ah khan an khuaruah a har ko.” (Luka 2:46, 47) A hnu i phung a chim  tikah a ral pawl daihter awkah Baibal kha thiam ngaiin a hman.—Matt. 22:41-46.

9. (a) Khrihfa nutling, patling a simi nih zei bantuk hlathlainak cazin dah a ngeih? (b) Zeicah Baibal kan hlathlai?

⁹ Khrihfa nutling, patling si a duhmi nih Jesuh kha aa zohchunh i Baibal kha hngalhthiam awkah aa zuam. “Rawl taktak cu upa nih khan an ei khawh” ti kha a hngalh caah a thukmi Baibal biatak kha hmaan tein a kawl zungzal. (Heb. 5:14) Khrihfa nutling, patling a simi nih Baibal i ‘a hmaanmi hngalhnak’ kha ngeih a duh. (Efe. 4:13, NW) Cucaah hitin i hal: ‘Nifate Baibal ka rel maw? Pumpak Baibal hlathlainak cazin ka ngei maw? Zarh fatin chungkhar pumhnak ka tuah maw?’ Baibal hlathlainak na tuah tikah Jehovah ruahnak le intuarnak hngalh awkah aan bawm hngami Baibal phunglam hna kha kawl. Mah Baibal phunglam hna kha hmangin biakhiahnak tuah. Cutin tuahnak nih Jehovah he i naih deuh awkah aan bawmh lai.

10. Khrihfa nutling, patling a simi nih Pathian nawlbia le phunglam hna kha zeitindah a hmuh?

¹⁰ Khrihfa nutling, patling a simi nih Baibal biatak hngalhnak lawngin a za lo. Pathian nawlbia le phunglam hna kha a duh awk a si. Mah kha amah duhnak nakin Jehovah duhnak a tuahnak thawngin a langhter lai. A nunning, a ruahning le a tuahserning hna hmanh kha thlen awkah timhcia a si lai. Tahchunhnak ah, Jesuh kha aa zohchunh i mihring thar aa hruk, mah cu “a dingmi le a thiangmi nunning i a langmi nunnak taktak kha a si.” (Efesa 4:22-24 rel.) Pathian nih a thiang thlarau hmangin Baibal ṭialtu pawl kha lam a hruai hna. Cucaah Khrihfa pakhat nih Baibal a hlathlai tikah a hngalhnak karhter awk, a dawtnak ṭhanter awk le Jehovah he an i pehtlaihnak fehter awkah Pathian thiang thlarau nih a bawmh lai.

11. Jesuh cu vawleicung a um lioah zeidah a ton?

¹¹ Jesuh cu mitling a si. Asinain vawleicung a um lioah a pawngkam mi cu mitling lo lawngte an si. A nu le a pa le a unau hna cu mitling lo an si. A dawt tukmi a zultu hna hmanh nih porhlawtnak le mahzawn ruahnak lungput an langhter. Tahchunhnak ah, a thih lai zan ah a zultu pawl cu an lakah “ahodah a ngan bik” tiah bia an i al. (Luka 22:24) Asinain mitling lo a simi a zultu pawl cu Khrihfa patling an hung si lai i lungrualnak a ummi Khrihfabu an dirh lai ti kha Jesuh nih a hngalh. A zultu pawl an lung aa rual khawh nakhnga mah zan ah thla a campiak hna. “Ka Pa, keimah cu nangmah chungah ka um i nangmah cu keimah chungah na um bantuk hin annih zong kan chungah um ve hna seh. Nangmah le keimah cu pakhat kan si bantuk hin pakhat an si khawh ve nakhnga” tiah thla a cam.—Johan 17:21, 22.

12, 13. (a) Khrihfa a simi kan hmuitinh cu zeidah a si? (b) Lungrualnak ṭhanter awkah unaupa pakhat nih zeitindah a tuah?

¹² Khrihfa nutling, patling a simi nih Khrihfabu lungrualnak kha a ṭhanter. (Efesa 4:1-6, 15, 16 rel.) Khrihfa a simi kan hmuitinh cu i ṭhencheu loin hmunkhatte ah i ṭem kha a si, mah cu lungrual tein rian ṭuanṭi kha a si. Cu bantuk lungrualnak ngeih khawh awkah toidornak a hau. Cucaah midang tlinlonak nih a hnorsuan  tik hmanhah Khrihfa nutling, patling a simi nih Khrihfabu lungrualnak a rawh nakhnga lo aa zuam. Hitin i hal: ‘Unau pakhatkhat nih palhnak a tuah tikah zeitindah ka lehrulh? Pakhatkhat nih ka lung an ka fahter tikah zeitindah ka um? Amah kha chawnh duh loin ka um maw asiloah kan i pehtlaihnak ṭhatter ṭhan awkah dah kaa zuam?’ Khrihfa nutling, patling a simi nih cun buaibainak a chuahtertu si loin buaibainak a tawnghtham khotu si kha a duh.

¹³ Unaupa Uwe kong hi ruathmanh. A hlanah cun unau pawl tlinlonak ruangah a thin a hung tawn. A hnuah Baibal le Insight on the Scriptures chungin David kong kha hlathlai awkah bia a khiak. Zeicah David kong kha aa thim? Pathian salle cheukhat nih Baibal he aa tlak lomi tuahsernak hna an tuahmi kha David nih a hmuh. Tahchunhnak ah, Siangpahrang Saul nih David cu thah a timh i mi cheukhat nih lung in cheh an zalh. A nupi hmanh nih a nih sawh. (1 Sam. 19:9-11; 30:1-6; 2 Sam. 6:14-22) Midang nih a cungah zei bantuk thil an tuah hmanhah David nih Jehovah kha a dawt i aa bochan zungzal. Cun David cu zaangfahnak a ngeimi zong a si. Uwe nih David kong a hlathlai hnuah David kaa zohchunh a hau ti kha a hun hngalh. Unau pawl tlinlonak he aa tlaiin a lungput thlen a hauh kha a hun hngalh. Unau pawl palhnak kha i cinken loin Khrihfabu lungrualnak ṭhanter awk tu ah aa zuam a hau. Nangtah cutin tuah awkah hmuitinh na ngei maw?

14. Jesuh nih ahote kha dah hawikom ah aa thim hna?

¹⁴ Jesuh Khrih nih mi kha hmaipanh tein a pehtlaih hna. Pa le nu, mino le upa le ngakchia hmanh Jesuh sin an um tikah an za a long. Asinain hawikom tu cu ralring tein aa thim hna. Lamkaltu hna kha “kaan fialmi hna nan tuah ahcun nannih cu ka hawile nan si” tiah a ti hna. (Johan 15:14) Zumhfek tein a hnu a zulmi le Jehovah a daw i a biami hna kha Jesuh nih a hawikom in aa thim hna. Nangtah an lungthin dihlak in Jehovah a dawmi hna kha hawikom ah naa thim hna maw? Mah cu zeicah a biapit?

15. Khrihfa nutling, patling a simi hna he i hawikomhnak in mino pawl nih zeitindah ṭhatnak an hmuh khawh?

¹⁵ Thingthei tam deuh cu ni dat an hmuh tikah ṭha tein an hmin. Cu bantukin unau pawl dawtnak nih Khrihfa nutling, patling si awkah aan bawmh khawh. Nang cu zeidah ka tuah lai tiah khua a ruatmi mino na si maw? Na si ahcun Jehovah a biaknak a sau cangmi le Khrihfabu lungrualnak a ṭhantermi hna kha hawikom in i thim cu fim a si. Annih cu an nunnak ah buaibainak hna le Jehovah an biaknak ah zuamcawhnak hna an tong men ko lai. Cu bantuk mi hna nih a ṭha bikmi nunning kha i thim awkah an in bawmh khawh. Anmah he caan na hmanṭi tikah a ṭhami biakhiahnak  tuah awk le Khrihfa pakhat in ṭhancho awkah an in bawmh khawh.—Hebru 5:14 rel.

16. Khrihfabu i kum upa a simi hna nih unaunu pakhat kha a no lioah zeitindah an rak bawmh?

¹⁶ Helga nih siangsangruun a dih kum ah a tonmi kha aa cinken rih. A khaanhawi pawl nih sianginn kan dih in zeidah kan tuah lai timi an hmuitinh kong an chim. An lak i tam deuh nih rian ṭha hmuh khawhnak caah sianghleiruun kai an duh. Asinain Helga cu an Khrihfabu i nutling, patling a simi a hawile kha ruahnak a hal hna. Hitin a chim: “Ka hawile tam deuh cu keimah nakin an upa deuh i tampi an ka bawmh khawh. Caantling phungchim rian ah i tel ding in tha an ka pek. Cucaah kumnga chung hmaikal rian ka ṭuan. Ka no lio i caan tam deuh kha Jehovah rianṭuannak ah ka hman caah kaa nuam tuk. I ngaihchih awk a ruang zeihmanh a um lo.”

17, 18. Jehovah kha zeitindah a ṭha bikmi kan pek khawh?

¹⁷ Jesuh kan i zohchunh ahcun Khrihfa nutling, patling in kan ṭhangcho lai. Jehovah he kan i naih deuh lai i a rian ṭuan duhnak lungput zong a ṭhang lai. Mi pakhat cu Khrihfa nutling, patling a si tik lawngah Jehovah kha a ṭha bikmi a pek khawh lai. Jesuh nih a zultu pawl kha hitin a forh hna: “Nan ceunak zong cu mi hmaiah a ceu awk a si, cuticun thil ṭha nan tuahmi kha an hmuh lai i vancung khua i a ummi nan Pa kha an thangṭhat lai.”—Matt. 5:16.

¹⁸ Khrihfa nutling, patling a simi nih Khrihfabu zeitindah a bawmh khawh ti kha kan cawn cang. Khrihfa pakhat nih a chiaṭha thleidannak lungput a hmanning zongin nutling, patling a si kha a langhter. Kan chiaṭha thleidan khawhnak lungput nih a ṭhami biakhiahnak tuah awkah zeitindah a kan bawmh khawh? Midang chiaṭha thleidannak lungput kan upat kha zeitindah kan langhter khawh? Mah kong hna kha a hnu capar ah kan i ruah hna lai.