1. Zumhnak cu zeitluk in dah a biapit? (A hramthawknak hmanthlak zoh.)

‘HARNAK nganpi chungin Jehovah nih khamh a ka duh hnga maw’ tiah naa hal bal maw? Khamhnak hmuh awkah a biapi tukmi sining pakhat cu zumhnak a si tiah lamkaltu Paul nih a ti. “Zumhnak loin Pathian lungton khawh a si lo” tiah a ti. (Heb. 11:6) Mah cu a sawhsawh te a lo ko nain “zumhnak cu mi vialte ngeihmi a si lo.” (2 Thes. 3:2, NW) Mah Baibal caang pahnih nih zumhnak fehter cu zeitluk in dah a biapit ti kha hngalhthiam awkah a kan bawmh.

2, 3. (a) Kan zumhnak cu zeitluk in dah a biapit? (b) Hi capar ah zei kong dah kan i ruah hna lai?

² Lamkaltu Piter nih zumhnak a biapitnak kha a hleiin a langhter. “Hneksaknak” a ing khomi nan zumhnak thawngin “Jesuh Khrih a langh ni ah cun thangṭhatnak le upatnak le sunparnak kha nan hmuh lai” tiah a ti. (1 Piter 1:7 rel.) Harnak nganpi cu a naih tuk cang caah “zumhnak a ngei i khamhnak a hmumi” si kha kan duh. (Heb. 10:39) Siangpahrang Jesuh Khrih Armageddon i a rat tikah laksawng a hmu hngami si kha kan duh. Cucaah kan zumhnak fehter awkah fakpi in kan i zuam a hau. “Ka zumhnak a zat lo ahcun ka bawm tuah” tiah Jesuh a nawlmi pa bantukin kan nawl ve ding a si. (Mar. 9:24, NW) Asiloah lamkaltu hna bantukin “kan zumhnak hi nganter  deuh tuah” tiah kan ti ve ding a si.—Luka 17:5.

³ Hi capar ah a tanglei kong hna hi kan i ruah hna lai: kan zumhnak kha zeitindah kan fehter khawh, a fekmi zumhnak kan ngeih kha zeitindah kan langhter khawh, zumhnak ngeih deuh awk i thla kan cam tikah Pathian nih a kan leh lai tiah zeicah kan zumh khawh.

4. Ahote kong hna nih dah kan zumhnak a fehter khawh?

⁴ Zumhnak cu a biapit tuk caah zumhnak a langhtermi hna kong kha Jehovah nih Baibal ah a langhter. Mah “aa ṭialmi vialte cu kanmah cawnpiaknak caah a si.” (Rom 15:4) Abraham, Sarah, Isak, Jakob, Moses, Rahab, Gideon, Barak le a dang mi tampi i an kong nih kan zumhnak a fehter khawh. (Heb. 11:32-35) Hlanlio mi hna kong lawng si loin tuchun unau pawl lak zongah khuaruahhar in a zumhnak a fekmi hna zong an um. *

5. Elijah nih Jehovah a zumhnak a feh kha zeitindah a langhter, zei bia dah kan i hal awk a si?

⁵ Baibal tahchunhnak pakhat cu profet Elijah a si. Jehovah aa bochan ti a langhtermi mah sining panga hi zohhmanh. (1) Elijah nih Siangpahrang Ahab kha Jehovah nih khuakhen a umter lainak kong a chimh tikah zumhnak he hitin a ti: “BAWIPA, Israel Pathian, a hmaika i ka dir tawnmi a nun bangin dap siseh, ruah siseh, ka bia in dah ti lo ahcun hi kum hna chungah hin a um lai lo.” (1 Si.17:1) (2) Elijah nih khuakhen chungah amah le midang an herhmi kha Jehovah nih a kan pek lai ti a zumh. (1 Si. 17:4, 5, 13, 14) (3) Elijah nih nuhmei nu fapa kha Jehovah nih a thawhter khawh ti zong a zumh. (1 Si. 17:21) (4) Karmel Tlang cung i rai a thawi tikah Jehovah nih van in mei a tlakter lai ti kha a zumh. (1 Si. 18:24, 37) (5) Zei ruah hmanh a sur hlanin Elijah nih zumhnak he Ahab kha hitin a ti: “Hung kal law hung ei law hung ding tuah, zeitintiah ruah a sur hluahmahmi thawng a um.” (1 Si. 18:41) Mah kong hna kan ruah hnuah ‘Elijah bantukin kei tah ka zumhnak a fek maw?’ tiah kan i hal kho.

6. Kan zumhnak a feh nakhnga Jehovah sinah zeidah hal a hau?

⁶ Kanmah tein kan zumhnak kan fehter khawh lo caah Pathian sinah thiang thlarau kan hal a hau. Zeicah? Zumhnak cu thlarau theitlai ah aa telmi a si caah a si. (Gal. 5:22) Jesuh nih a kan cawnpiak bantukin thiang thlarau hmuh zungzal awkah thla kan cammi cu fim a si. Jehovah nih ‘amah sin thiang thlarau a halmi cu a pek hna lai’ tiah Jesuh nih a ti.—Luka 11:13.

7. Kan zumhnak a feh zungzal nakhnga zeitindah kan kilven khawh ti kha fianter.

⁷ A fekmi zumhnak kan ngeih tikah mah  kha kilven a hau. Zumhnak kha mei he tahchunh khawh a si. Mei kan kau ka ahcun a meialh cu a ṭha tuk ko lai. Asinain thing kan tih chap lo ahcun a hnuah a ziam lai i vutcam ah aa cang ko lai. Asinain thing kha hmaan tein kan tih chap ahcun a alh zungzal lai. Zumhnak zong cutin a si ve. Baibal kha nifate kan rel i kan hlathlai ahcun Baibal le Jehovah kan dawtnak cu a ṭhang chin ko lai. Mah tikah kan zumhnak cu a fek chin lai i kan kilven khawh lai.

8. Na zumhnak fehter awk le kilven awkah zeinihdah aan bawmh lai?

⁸ Tipil na in hlan i na hngalhmi kong lawngin na lung a si awk a si lo. (Heb. 6:1, 2) Tahchunhnak ah, a tling cangmi Baibal chimchungbia hna na hlathlaimi nih na zumhnak fehter awk le kilven awkah aan bawmh lai. Na zumhnak a fek maw, fek lo ti hngalhnak caah Baibal kha na hman khawh.—Jeim 1:25; 2:24, 26 rel.

9, 10. (a) Hawikom ṭha nih kan zumhnak fehter awkah zeitindah an kan bawmh? (b) Khrihfabu pumhnak nih kan zumhnak fehter awkah zeitindah a kan bawmh? (c) Phungchimnak nih kan zumhnak fehter awkah zeitindah a kan bawmh?

⁹ Khrihfa hna cu ‘pakhat le pakhat zumhnak in an i bawm’ kho tiah lamkaltu Paul nih a ti. (Rom 1:12) Mah cu zei sullam dah a si? Unau pawl he caan kan hmanṭi tikah kan zumhnak fehter awkah pakhat le pakhat kan i bawm kho. A hleiin “hneksaknak” a ing khomi zumhnak a ngeimi hna he caan kan hmanṭi awk a si. (Jeim 1:3) Hawikom ṭhalo nih kan zumhnak an hrawh khawh i hawikom ṭha nih cun kan zumhnak an fehter khawh. (1 Kor. 15:33) Cucaah hmaan tein i pumh awkah Baibal nih a kan forh. Cuka ah ‘pakhat le pakhat kan i forh’ kho. (Hebru 10:24, 25 rel.) Mah lengah pumhnak i kan theihmi lamhruainak nih kan zumhnak a fehter chin. “Zumhnak cu bia theihnak thawng khan a um” tiah Baibal nih a ti. (Rom 10:17) Cucaah ‘Pumhnak hna cu ka nunnak ah a biapimi a si maw?’ tiah i hal.

¹⁰ Midang kha thawngṭha kan chimh hna i kan cawnpiak hna tik zongah kan zumhnak a fek chin. Kumzabu pakhatnak i Khrihfa hna bantukin Jehovah i bochan awk le zei bantuk thil sining hmanhah ralṭha tein phungchim awkah kan cawn.—Lam. 4:17-20; 13:46.

11. Kaleb le Joshua cu zeicah an zumhnak a feh, zeitindah anmah bantukin kan si khawh ve?

¹¹ Jehovah nih a kan bawmhmi le kan thlacamnak a kan lehmi kan hmuh tikah Jehovah kan zumhnak cu a fek chin. Kaleb le Joshua cu cutin an rak si. Biakammi Ram an va ngiat tikah Jehovah an zumhnak kha an langhter. Caan a liam thluahmah bantukin Jehovah nih a bawmhmi hna an hmuh fatinte an zumhnak cu a ṭhawng chin. Joshua nih zumhnak he Israel mi kha hitin a ti hna: ‘BAWIPA nan Pathian nih nanmah kongah biakamnak a tuahmi thilṭha vialte lakah pakhat hmanh pakpalawng a cang lo. A dihlak in a tlung dih.’ A hnu zongah hitin a ti hna: “Cucaah atu cu BAWIPA kha ṭih u  law, amah rian kha lungtakte le zumhawktlak tein ṭuan tuah u. . . . Keimah le ka innchungkhar tu nih cun BAWIPA kha kan biak ko lai.” (Josh. 23:14; 24:14, 15) Kannih zong Jehovah kan i bochan i kanmah theng a kan bawmhmi kha kan hmuh tikah kan zumhnak cu a fek chin lai.—Salm 34:8.

12. A fekmi zumhnak kan ngeih kha zeitindah kan langhter khawh?

¹² A fekmi zumhnak kan ngeih kha zeitindah kan langhter khawh? Lamkaltu Jeim nih hitin a ti: “Kei nih cun ka zumhnak cu ka tuahnak in kaan hmuhsak hna lai.” (Jeim 2:18) Kan tuahsernak nih a fekmi zumhnak kan ngeih kha a langhter. Tahchunhnak cheukhat kha zoh hna u sih.

13. Phungchim rian ah i tel cu zumhnak langhter khawhnak lam a si tiah zeicah kan chim khawh?

¹³ Kan zumhnak langhternak ah a ṭha bikmi lam cu phungchimnak ah i tel hi a si. Zeicah? Phung kan chim tikah donghnak a nai cang i “pel loin a ra hrimhrim ko lai” ti kan zumh kha kan langhtermi a si caah a si. (Hab. 2:3) Kan zumhnak a ṭhawn le ṭhawn lo hngalh awkah hitin kan i hal kho: ‘Phungchim rian cu ka caah zeitluk in dah a biapit? Midang kha Pathian kong chimh awkah ka si khawh chungin kaa zuam maw? Jehovah rian ah tam deuh in i tel khawhnak lam ka kawl maw?’ (2 Kor. 13:5) ‘Kan kaa in kan chimnak’ thawngin, phundang in cun thawngṭha kan chimnak thawngin a fekmi zumhnak kan ngeih kha langhter hna u sih.—Rom 10:10 rel.

14, 15. (a) Nifate kan nunnak ah zumhnak zeitindah kan langhter khawh? (b) A fekmi zumhnak kha tuahsernak in a langhtermi hmuhtonnak pakhat in chim.

¹⁴ Hi vawlei harnak hna kan inkhawhnak  thawng zongin Jehovah kan zumhnak kha kan langhter khawh. Damlonak, lungdonghnak, namnehnak, sifahnak le a dang buaibainak hna kan ton tikah Jehovah le Jesuh nih “kan herh lio caante ah” an kan bawmh lai timi zumhnak kan ngeih a hau. (Heb. 4:16) Jehovah sin bawmhnak kan halnak thawngin kan zumhnak kan langhter khawh. Pathian nih thlaraulei nan herhmi lawng kaan bawmh hna lai tiah ri a kan serpiak lo. ‘Nifate kan herhmi rawl’ telin pumsalei kan herhmi ca zongah thla nan cam khawh tiah Jesuh nih a ti. (Luka 11:3) Kan herhmi zeipaoh Jehovah nih a kan pek khawh ti kha Baibal tuanbia hna nih an langhter. Tahchunhnak ah, Israel ram ah khuakhen a tlun lioah Jehovah nih Elijah kha rawl le ti a pek. “Langak nih zinglei ah rawl le sa, zanlei ah rawl le sa an chanh lengmang i tivate ti cu a din” tiah Baibal nih a ti. (1 Si. 17:3-6) Kannih zong kan herhmi kha Jehovah nih a kan pek khawh timi zumhnak kan ngei.

¹⁵ Baibal phunglam kan zulh ahcun kan innchungkhar herhmi kan zohkhenh khawh lai ti kha kan zumh. Asia ah a ummi, innchunghawi a ngei cangmi unaunu Rebecca nih cutin a rak ton. An innchungkhar ningin Matthai 6:33 le Phungthlukbia 10:4 i Baibal phunglam kha an zulh. A vapa cu a rian ruangah Jehovah he an i pehtlaihnak a rawhter khomi thil sining a ton caah a rian in a chuak. Asinain zohkhenh a haumi an fale pali an um. Cucaah an nuva in  changreu an tuah i an zuar. Teima tein rian an ṭuan caah innchungkhar zohkhenhnak caah a herhmi tangka a za in an ngei zungzal. Rebecca nih hitin a chim: “Jehovah nih zeitikhmanh ah a kan kaltak bal lo ti kha kan hngalh. Zeitikhmanh ah rawl loin kan um bal lo.” Nangtah zumhnak a fehtermi cu bantuk hmuhtonnak na ngei ve maw?

16. Pathian kan i bochan ahcun zeidah kan hmuh lai?

¹⁶ Jehovah lamhruainak kan zulh ahcun a kan bawmh lai ti kha zeitikhmanh ah kan lung a hrin awk a si lo. Lamkaltu Paul nih Habakkuk bia kha cherhchan in hitin a ti: “Zumhnak thawngin Pathian he aa remmi cu an nung lai.” (Gal. 3:11; Hab. 2:4) Cucaah a kan bawm kho taktakmi Pathian cungah a fekmi zumhnak kan ngeih awk a si. Pathian cu “kan chungah rian a ṭuantu a ṭhawnnak thawngin kan hal khawh leng le kan ruah khawh lengin thil a tuah khotu Pathian” a si tiah Paul nih a ti. (Efe. 3:20) Jehovah salle nih Jehovah duhnak kha an si khawh chungin an tuah nain ri kan ngei ti zong an hngalh. Kan i zuamnak vialte kha thluachuah pek awkah Jehovah kan i bochan. Pathian cu kan sinah a um caah kan i lawm tuk.

17. (a) Lamkaltu pawl nih an halmi kha Jesuh nih zeitindah a leh hna? (b) Zumhnak ngeih deuh awkah kan halmi kha Jehovah nih a kan leh lai tiah zeicah kan i ruahchan khawh?

¹⁷ A cunglei i a kong hna kan i ruah hnuah “kan zumhnak hi nganter deuh tuah” tiah a timi lamkaltu hna bantukin kan intuar ve men lai. (Luka 17:5) Lamkaltu pawl nih an halmi kha AD 33, Pentekos ni ah Jesuh nih a hleikhunmi lam in a rak leh hna. Annih nih thiang thlarau an hmuh tikah Pathian tinhnak kha an hun hngalhthiam chin. Mah nih an zumhnak a fehter chin. A phichuak cu zeidah a si? Mah lio caan ah phungchim rian kha kaupi in an rak ṭuan khawh. (Kol. 1:23) Zumhnak ngeih deuh awkah kan halmi cu leh kan si ve lai tiah kan i ruahchan kho maw? “Amah duh ningin kan hal ahcun” kaan leh hna lai tiah Jehovah nih bia a kan kamh.—1 Johan 5:14.

18. An zumhnak a fehtermi hna kha Jehovah nih zeitindah thluachuah a pek hna?

¹⁸ Jehovah nih amah aa bochanmi hna kha mithmai ṭha a pek hna lai. Zumhnak ngeih deuh awkah kan halmi kha a kan leh lai. Mah tikah kan zumhnak cu a fek deuh lai i ‘Pathian Pennak he aa tlakmi’ kan hung si lai.—2 Thes. 1:3, 5.