1, 2. Mi cheukhat nih Pathian he aa tlaiin zeitindah an ruah?

MI TAMPI nih zei bantuk thil kan tuah hmanhah Pathian caah a poi lo tiah an ruah. Zei bantuk thil an ton hmanhah Pathian nih zei ah a rel lo tiah an ruah. Tahchunhnak ah, 2013, November ah Philippines ah thlichia fakpi in a hran caah hmun tampi a rawk. Mah tikah khua uktu pakhat nih “Pathian hi hmun dang ah a kal i a si lai” tiah a ti.

² Mi cheukhat nih an tuahmi thil kha Pathian nih a hmu lo tiah an ruah. (Isa. 26:10, 11; 3 Johan 11) Lamkaltu Paul chan i mi cheukhat zong nih cutin an ruah ve. Annih nih “Pathian kong hngalh taktak cu . . . an duh lo” tiah Paul nih a ti. Annih cu ṭhatlonak a phunphun, duhfahnak, puarnak le nahchuahnak in an khat.—Rom 1:28, 29.

3. (a) Zei bia dah kan i hal awk a si? (b) Baibal nih Pathian “kut” a ti tikah zeidah a chimduhmi a si tawn?

³ Kannih tah zeitin? Kan tuahmi vialte Jehovah nih a hmuh ti kha kan hngalh. Asinain Jehovah nih kan zawn a kan ruah taktak tiin tah kan zum maw? Kan nunnak ah Jehovah bawmhnak  hna kha kan hmuthiam maw? Pathian nih a ṭhawnnak a hmanmi kha Baibal nih Pathian “kut” tiin a langhter tawn. Pathian nih a salle bawmhnak caah le a ral pawl teinak caah a ṭhawnnak kha a hman. (Deuteronomi 26:8 rel.) Mi cheukhat nih ‘Pathian kha an hmuh’ lai tiah Jesuh nih a ti. (Matt. 5:8) Mah hna lakah kannih tah kan i tel ve maw? Zeitindah Pathian cu kan “hmuh” khawh? Baibal chung i Pathian bawmhnak a hmuthiammi le a hmuthiam lomi hna kong kha i ruah hna u sih. Pathian bawmhnak hmuhthiam awkah zumhnak nih zeitindah a kan bawmh ti zong i ruah hna u sih.

4. Israel mi ral pawl nih Pathian bawmhnak kha zeicah an hmuhthiam lo?

⁴ Hlanlio ah mi tampi cu Pathian nih Israel mi kha zetindah a bawmh hna ti kha hmuhnak le theihnak caanṭha an ngei. Jehovah nih Egypt ram in a mi pawl luatter awk le Biakammi Ram i siangpahrang hna kha sunghter awkah khuaruahhar thil tampi a tuah. (Josh. 9:3, 9, 10) Mah thawng kha siangpahrang dang hna nih an theih i an hmuh ko nain “Joshua le Israel cu doh awkah lungkhat in an i pum.” (Josh. 9:1, 2) Israel mi kha an doh hna tikah Pathian nih a mi pawl a bawmhmi hna kha an hmuh. Jehovah ṭhawnnak in “ni cu a dir peng i thlapa cu a taang, miphun nih khan an ral hna cu phu an hlam hna hlan tiang.” (Josh. 10:13) Asinain Jehovah nih Israel mi an ral pawl i ‘an lung kha a ṭhawnter’ caah Israel mi kha an doh hna. (Josh. 11:20) Jehovah cu a mi pawl caah ral a do ti kha an cohlan duh lo ruangah annih cu an sung cikcek.

5. Siangpahrang ṭhalo Ahab nih zeidah a cohlan duh lo?

⁵ A hnuah, Siangpahrang ṭhalo Ahab cu Pathian bawmhnak hmuhthiam awkah caanṭha tampi a ngei. Elijah nih Ahab sinah “dap siseh, ruah siseh, ka bia in dah ti lo ahcun hi kum hna chungah hin a um lai lo” tiah a ti. (1 Si. 17:1) Mah cu Pathian bawmhnak thawng lawngin a si khomi a si, asinain mah kha Ahab nih a zum duh lo. Mah hnuah, Elijah nih Jehovah sinah thla a cam i Jehovah nih van in mei a thlaknak thawngin a thlacamnak a lehmi kha Ahab nih a hmuh. Jehovah nih khuakhen kha a donghter lai i fakpi in ruah a surter lai tiah Elijah nih Ahab kha a chimh. (1 Si. 18:22-45) Ahab nih mah khuaruahhar thil vialte kha a hmuh ko nain Jehovah ṭhawnnak kha a cohlang duh hlei lo. Mah in zeidah kan cawn khawh? Kan nunnak ah Pathian kut rianṭuannak kha hmuhthiam awkah kan i zuam awk a si.

6, 7. Gibeon mi le Rahab nih zeidah an cohlan?

⁶ Gibeon mi hna cu an pawngkam mi hna he an i thleidang tuk. Annih cu Pathian bawmhnak kha an hmuhthiam. Israel mi kha doh loin anmah he daihnak ser an duh. Zeicah? Jehovah kong le a tuahmi thil vialte kong kha kan theih caah a si tiah an ti. (Josh. 9:3, 9, 10) Jehovah cu Israel mi hna caah ral a do ti kha fim ngaiin an cohlan.

 ⁷ Rahab zong nih Jehovah bawmhnak kha a hmuhthiam. Anih cu Israel mi a si lo nain Jehovah nih Izipt ram in a mi pawl a khamh hnaning kha a theih. Cucaah Israel mi ngiatu pahnih kha “BAWIPA nih hi ram kha aan pek cang hna . . . ti kha ka hngalh” tiah a ti hna. Rahab nih amah le a chungkhar kha Jehovah nih a kan khamh khawh ti kha a zumh. Mah ruangah a tuahmi thil cu ṭih a nung tuk ti kha a hngalh ko nain Jehovah a zumhnak kha Rahab nih a langhter.—Josh. 2:9-13; 4:23, 24.

8. Israel mi cheukhat nih Pathian bawmhnak kha zeitindah an hngalh?

⁸ Elijah nih thla a cam i van in mei a tlakmi a hmumi Israel mi cheukhat cu Siangpahrang ṭhalo Ahab he an i lo lo. Mei a tlaktertu cu Jehovah a si ti kha an hngalh. “BAWIPA hi pei Pathian cu a rak si hi” tiah fakpi in an au. (1 Si. 18:39) Annih nih Pathian ṭhawnnak kan hmuh ti kha fiang tein an hngalh.

9. Tuchan ah Jehovah bawmhnak kha zeitindah kan hmuhthiam khawh?

⁹ ‘Pathian hmuh’ asiloah Pathian bawmhnak hmuhthiam timi a sullam hngalhthiam awkah Baibal chung i zohchunh awk a ṭhami le a ṭhalomi hna kong nih a kan bawmh. Jehovah le a sining hna kan hun hngalh tikah kan lung mit in Pathian kut kha kan hmuh khawh. Mah nih Jehovah nih a mi pawl a bawmh hnaning a hmuthiammi hlanlio le tuchan i zumhfekmi a salle kha i zohchunh awkah a kan forh. Asinain tuchan ah tah Pathian nih a mi pawl a bawmh hna ti a langhtermi thil a um maw?

10. Tuchan ah Jehovah nih minung a bawmh hna ti a langhtermi zei thil dah a um? (A hramthawknak hmanthlak zoh.)

¹⁰ Tuchan ah Jehovah nih minung a bawmh hna ti a langhtermi thil tampi a um. Pathian sin bawmhnak hal awkah thla an cam i an thlacamnak leh an si colhmi hna kong kha atu le atu kan theih. (Salm 53:2) Tahchunhnak ah, unaupa Allan cu Philippines ram i tikulh hmete pakhat ah phung a chim lioah nu pakhat he an i tong. Allan kha a hmuhle cangka mah nu cu a ṭap. Allan nih hitin a chim: “Jehovah Tehte Hna he i tong hram ko u sih tiin Jehovah sinah tuzing ah thla a rak cam.” Mah nu cu kumhra fai a si lioah Jehovah Tehte Hna he Baibal a rak cawng, asinain va a ngei i tikulh ah aa ṭhial caah Baibal a cawng ti lo. A thlacamnak kha Pathian nih a leh colh caah mah nih a lung a suk tuk. Kumkhat a rauhhlan ah Jehovah sinah aa pumpe.

11, 12. (a) Jehovah nih a salle kha zeitindah a bawmh hna? (b) Unaunu pakhat kha Jehovah nih zeitindah a bawmh, fianter.

¹¹ Jehovah salle tampi nih kuak zuk, ritnak sii hman asiloah a thurhnawmmi hmanthlak zoh ti bantuk ziaza ṭhalo hna an hlawt tikah Jehovah nih a bawmhmi hna kha an hmuh. Mah ziaza ṭhalo hna kha hlawt awkah anmah tein an i zuam tikah kan hlawh a tling lo tiah an ti. Asinain Jehovah sin bawmhnak an hal tikah Jehovah nih “thil ti khawhnak ṭhawnnak” a pek hna i a donghnak ah mah ziaza ṭhalo hna kha an hlawt khawh.—2 Kor. 4:7; Salm 37:23, 24.

¹² A salle nih an tonmi harnak hna kha inkhawh awk zongah Jehovah nih a bawmh hna. Amy nih cutin a rak ton. Anih cu Pacific Rili i tikulh hmete pakhat ah Biakinn le missionary inn saknak rian bawmh awkah rian pek a si. Cuka mi hna an nunphung cu aa dang tuk, a caan ah ti le mei zong a um lo. Cun ruah a sur tikah lam cu ti nih a khuh dih. Mah lengah Amy cu hotel i a khaan hmete ah a um. A chungkhar zong kha a ngai tuk hna. Nikhat cu rian a ṭuanṭimi unaunu pakhat kha fakpi in a raak sual i a lung a ṭhalo tuk. A mui ngaimi a khaan i a ṭin tikah Jehovah sinah ah thla a cam i bawmhnak a hal. A hnu i mei a rat tikah Vennak Innsang chung i Gilead sianginn a dihmi hna kong aa ṭialmi capar kha a rel. Mah capar nih amah a tonmi harnak he aa lomi kong hna kha a langhter. Hitin a chim: “Mah zan ah Jehovah nih bia a ka ruah tiah ka ruah. Mah nih ka rian kha ṭuan zungzal awkah a ka forh.”—Salm 44:25, 26; Isa. 41:10, 13.

13. Jehovah nih a miphun pawl ṭhawngṭha chimnak nawl an ngeihmi kilven awkah a bawmh hna ti kha zeinihdah a langhter?

¹³ Thawngṭha kha kilven awk le phung ning-in siter awk zongah Jehovah nih a salle kha a bawmh hna. (Fil. 1:7) Tahchunhnak ah, cozah cheukhat nih phungchim rian kha khenkham an i zuam tikah biaceihnak zung ah kan kai i mah kha kan kilven. Vawleicung pumpi i a sangmi biaceihnak zung hna nih teinak 268 hrawng an kan pek. Mah lakin 24 cu Minung Zalonnak kong Europe Biaceihnak Zung nih kum 2000 thawkin teinak  a kan pekmi a si. Pathian bawmhnak kha ahohmanh nih an kham kho lo ti cu a fiang.—Isa. 54:17; Isaiah 59:1 rel.

14. Pathian cu a mi hna sinah a um ti a langhtermi a dang zei thil hna dah a um?

¹⁴ Vawleicung pumpi ah thawngṭha chim a simi zong hi Pathian bawmhnak a langhnak a si. (Matt. 24:14; Lam.1:8) Miphun kip in dirh a simi Jehovah salle an lung aa rualmi zong hi Jehovah bawmhnak thawngin a si. Mah ruangah Jehovah a bia lomi hna hmanh nih “nan sinah hin Pathian a um taktak” tiah an ti. (1 Kor. 14:25) Pathian cu a mi hna sinah a um ti a langhtermi thil tampi a um. (Isaiah 66:14 rel.) Nangtah zeitin? Na nunnak ah Jehovah bawmhnak kha na hmuthiam maw?

15. A caan ah Jehovah nih a kan bawmhmi kha hmuthiam loin zeicah kan um khawh men?

¹⁵ A caan ah Pathian nih a kan bawmhmi kha kan hmuthiam men lai lo. Zeicah? Buaibainak tam tuk kan ton caah Jehovah nih a hlanah a rak kan bawmhmi kha kan philh khawh men. Elijah zong cutin a rak si. Anih cu a ral a ṭhami a si ko nain Siangpahrang nu Jezebel nih thah a timh tikah ṭihnak a hun ngei. Mah tikah a hlanah Jehovah nih a rak bawmhmi kha a philh. Elijah cu thih hmanh a duh tiah Baibal nih a ti. (1 Si. 19:1-4) Khoika in dah bawmhnak le ralṭhatnak a hmuh khawh lai? Jehovah kha aa bochan a hau.—1 Si. 19:14-18.

16. Job bantukin Pathian hmuh awkah zeidah kan tuah khawh?

¹⁶ Job nih a tonmi harnak kha biapi tuk ah a chiah caah a sining kha Jehovah hmuhning in a hmu ti lo. (Job 42:3-6) Kannih zong kan tonmi buaibainak hna a tam tuk caah Pathian bawmhnak kan hmuhthiam lo caan a um ko lai. Cu a si ah kan caah Pathian nih a tuahmi thil hmuhthiam awkah zeinihdah a kan bawmh khawh? Kan tonmi buaibainak  he aa tlaiin Baibal nih zeidah a chim ti kha ṭha tein ruah a hau. Mah tikah Jehovah cu kan caah a um taktakmi a hung si lai i Job bantukin hitin kan chim khawh ve lai: “Hnatheihnak lawngin nangmah cu ka rak in theih, Sihmanhsehlaw atu cu ka mit in kaan hmuh cang.”

17, 18. (a) Na nunnak ah Jehovah bawmhnak kha zeitindah na hmuhthiam khawh? (b) Pathian nih a kan bawmh ti a langhtermi hmuhtonnak pakhat in chim.

¹⁷ Na nunnak ah Jehovah bawmhnak kha zeitindah na hmuhthiam khawh? A kong panga in i ruah hna u sih. Pakhatnak ah, biatak hngalh awkah Jehovah nih a ka bawmh tiah na ruah ko lai. Pahnihnak ah, pumhnak ah phungchimnak pakhat na theih tikah “mah hi ka herhmi te bak a si” tiah na chimmi kha na cinken ko lai. Pathumnak ah, na thlacamnak Jehovah nih aan lehmi kha na hmuh men ko lai. Palinak ah, Jehovah rian tam deuh in ṭuan na duh tikah Jehovah nih aan bawmhmi kha na hmuh men ko lai. Panganak ah, Jehovah rian ṭuan khawh awkah na rian in na chuak men lai. Mah tikah Jehovah nih ‘kaan hlaw bal hna lai lo’ tiah bia aa kammi ningin a tuahmi kha na hmuh men lai. (Heb. 13:5) Jehovah he kan i pehtlaihnak a feh ahcun kan nunnak ah Pathian nih a kan bawmhmi kha fawi tein kan hmuh khawh lai.

¹⁸ Kenya ram i unaunu Sarah nih hitin a chim: “Baibal ka cawnpiakmi kha a sunsak lo tiah ka ruahmi nu pakhat he aa tlaiin thla ka cam. Baibal cawnpiaknak hi ka ngol ah a ṭha hnga maw tiah Jehovah kha ka hal. Ka thlacamnak a dih i ‘Amen’ tiah ka ti cangka ka phone a ra. Mah cu Baibal ka cawnpiakmi nu nih a ka chawnhmi a si. Na sinah kaa pum kho ve lai maw tiah a ka hal caah ka khuaruah a har tuk.” Kan caah Pathian nih a tuahmi kha hmuhthiam kan i zuam ahcun Pathian bawmhnak kha kan hmuh ko lai. Asia ah a ummi unaunu Rhonna nih hitin a chim: “Jehovah nih a kan bawmhmi kha hmuhthiam awkah cawn a hau. Na hmuhthiam tikah Jehovah nih zeitluk in dah kan zawn a ruah ti kha khuaruahhar in na hmuh lai.”

19. Pathian hmuh awkah zeidah tuah a herh rih?

¹⁹ “Lungthin a thiangmi” nih ‘Pathian kha an hmuh lai’ tiah Jesuh nih a ti. (Matt. 5:8) ‘Lungthin thian’ awkah zeitindah kan tuah khawh? Kan ruahnak a thian zungzal a hau i a ṭhalomi thil tuah kha kan hrial a hau. (2 Korin 4:2 rel.) Pathian hmuh awkah amah he kan i pehtlaihnak a feh a hau ti kha hi capar in kan hngalh cang. A hnu capar ah Jehovah bawmhnak fiang chinchin in hmuh awkah zumhnak nih zeitindah a kan bawmh ti kha kan i ruah hna lai.