KUMKUA ka si in ka ṭhang kho ti lo. Atu ah kum 43 ka si cang nain pe thum lawng ka si. Ka ṭhang kho ti lai lo ti kha ka nu le ka pa nih an hngalh tikah ka tung kong lawng ruat loin rian i zuam awkah tha an ka pek. Cucaah kan inn hmaiah thingthei ka zuar i dawh te le thiang tein ka chiah. Mah nih thilcawtu pawl kha an mit a hlan ngai hna.

Asinain rian i zuamnak nih zeizong vialte kha a thleng dih lo. Ka niam ṭhiamṭhiam rih ko. Tangka chiahnak phanh lo ti bantuk thil sawhsawhte hmanh ka caah a har. Zeizong vialte hi keimah nakin lethnih hrawng a sangmi hna caah sermi lawngte si dawh a lo. Mah tikah ka ngaih a chia tuk, asinain kum 14 ka si ah thil sining aa thleng.

Nikhat cu Jehovah Tehte nu pahnih nih thingthei an ka cawk i Baibal cawnpiak na duh maw tiah an ka ti. A rauhhlan ah Jehovah le aa tinhnak kong hngalh cu ka tung nakin an biapi deuh tuk ti kha ka hun hngalhthiam. Mah nih tampi a ka bawmh. Salm 73:28 cu ka duh bikmi Baibal cacaang a hung si. Mah cacaang a thawknak ah hitin a ti: “Pathian pawng um cu a va nuam hringhran dah!”

Ruahlopi in kan innchungkhar cu Côte d’Ivoire ram in Burkina Faso ram ah kan i ṭhial. Mah tikah ka nunnak ah thlennak tampi a um. A hmasa kan innpawng hna nih cun thingthei zuarnak dawr ah an ka hmuh zungzal i an caah khuaruahhar ka si ti lo. Asinain atu kan innpawng hna caah cun mising ka si i mi tampi nih khuaruahhar ngaiin an ka zoh tawn. Mi nih an ka zoh tuk caah zarh tampi chung innchung ah kaa khumh. Mah caan chungah Jehovah he i naih cu ka caah zeitluk in dah a ṭhat ti kha ka philh lo. Cucaah Jehovah Tehte Hna zung ṭengnge ah ca ka ṭial. Mah tikah ka sinah missionary a simi Nani kha an an rak thlah. Anih cu keimah len awkah mawṭaw cycle hmete i cit in a ra tawn.

Kan innpawng i thetse lam cu a nal ngai i furpi ahcun nawncek in a khat. Baibal cawnpiak awk i a rat tikah Nani cu a mawṭaw cycle in a tlu lengmang, asinain a lung a dong lo. Nikhat cu pumh a ka sawm. Innleng ka chuah ahcun mi nih an ka zoh lai ti kha ka hngalh. Mah lengah a mawṭaw cycle hnulei ah kaa pherh ahcun a rit deuh cang lai i mawngh aa harh deuh lai ti zong ka hngalh. Asinain  i pumh awkah bia ka khiak. Ka duh bikmi Baibal cacaang chung i “BAWIPA chungah khan himnak ka hmuh” timi bia kha ka hun i cinken.

A caan ah Nani he nawncek lakah kan tlu tawn ko nain pumhnak kha kan sunsak caah kan zei a poi lo. Biakinn chungah hmaipanh tein an ka nihmi le a leng ah mi nih an ka zohchihmi cu aa dang tuk hringhran. Thlakua a rauh hnuah tipil ka ing.

Ka duh bikmi Baibal cacaang nih “a tuahmi thil vialte kha ka thanh lai” ti zongin a ti. Phungchimnak kal cu ka caah zuamcawhnak ngan bik a si. Innkhat hnu innkhat phungchimnak ah kaa tel hmasa bik lio kha kaa cinken rih. Ngakchia he upa he an ka zohchih, an ka dawi i capo ah an ka saih. Mah nih ka lung a ka fahter tuk. Asinain keimah bantukin annih zong Paradis an herh ve ti kha ka ruah ṭhan tikah ka inkhawh ṭhan.

Umkal kaa fawih deuh nakhnga ke pathum a ummi cycle kha kaa cawk. Phungchim ka kalṭi hawi nih cho ah a ka nampiak i a kal khawh hnuah cycle cungah a rak kai tawn. Phungchimnak ah a hmasa ahcun kaa harh tuk ko nain ka hun i nuam thluahmah. Cucaah 1998 in hmaanhmaan ka hun ṭuan.

Baibal cawnpiaknak tampi ka ngei i an lakin pali cu tipil an ing cang. Mah lengah ka naunu zong nih biatak a hun cohlan ve. Tha pek ka herh lio caan ah midang an ṭhanchomi ka theihmi nih thazaang a ka pek. Nikhat cu malaria in ka zawt lioah Côte d’Ivoire in cakuat pakhat ka hmuh. Burkina Faso i sianghleiruun a kaimi pakhat kha innka hramah Baibal cawnpiaknak ka thawk i unaupa pakhat kha Baibal cawnpiaknak tuah awkah ka fial. A hnuah mah pa cu Côte d’Ivoire ah aa ṭhial. Mah pa cu tipil a ing rih lomi thawngthanhtu pakhat a hung si ti thawng ka theih caah kaa lawm tuk.

Zeitindah ka paw kaa cawm? A tlam a tling lomi pawl a bawmmi bu pakhat nih thilṭhit an ka chimh. A kan chimtu pakhat nih rian kaa zuammi kha a hmuh tikah “chatpiat tuah zong kan in chimh lai” tiah a ka ti. Cun an ka chimh taktak. Cucaah inn ah chatpiat ka tuah. Ka tuahmi chatpiat kha mi nih an duh tuk i midang zong an chimh chin hna. A ke pathum a ummi cycle hmete kha kaa cit i chatpiat a duhmi hna kha ka va pek hna.

Ngaihchiat awk ngai a simi cu 2004 in ka keng a fah tuk caah hmaikal in kaa din. Asinain phungchimnak ah hmaan tein ka kal lengmang.

Mi nih a hmai aa panh zungzalmi in kan in hngalh tiah an ka ti. Pathian pawng um cu ka caah a nuamh tuk caah i lawmh awk a ruang tampi ka ngei.—Sarah Maiga nih a chim.