1, 2. Zeinihdah minung cu saram he a kan danter?

MINUNG thluak hi aa thleidang tuk. Tahchunhnak ah, minung nih holh cawn khawhnak sining kan ngei. Holh nih ca rel awk, ca ṭial awk, biachim awk le kan theihmi hngalhthiam awkah a kan bawmh. Mah lengah thla a kan camter khawh i Jehovah sinah thangṭhatnak hla a kan sakter khawh. Mah thil vialte nih saram he a kan danter. Scientist pawl nih kan thluak rianṭuannak kha ṭha tein an hngalthiam lo.

² Holh kan hman khawhmi hi Jehovah pekmi laksawng a si. (Salm 139:14; Biat. 4:11) Saram he a kan thleidantermi a dang laksawng pakhat zong a kan pek rih. Minung cu “Pathian he i lo in” ser kan si. Cun zalong tein i thimnak nawl kan ngei. Kan thiammi holh kha hmangin Jehovah kha kan biak khawh i kan thangṭhat khawh.—Gen. 1:27.

3. Jehovah pekmi zei laksawng nih dah fimnak a kan pek?

³ Jehovah nih amah biak le thangṭhat a duhmi hna caah  Baibal a kan pek. Baibal uktling asiloah a cheubang cu holh phun 2,800 lengin chuah a si cang. Baibal chimmi kha ṭha tein kan ruah ahcun Pathian ruahning in kan hun ruah khawh ve lai. (Salm 40:5; 92:5; 139:17) Jehovah ruahning nih fimnak a kan pek i zungzal nunnak lam ah a kan hruai.—2 Timote 3:14-17 rel.

4. Ṭha tein ruah timi cu zei sullam dah a si, zei biahalnak hna dah kan i ruah hna lai?

⁴ Ṭha tein ruah timi cu thil pakhatkhat kha thukpi in le biapi in ruah kha a si. (Salm 77:12; Ptb. 24:1, 2) Jehovah le Jesuh kong kan cawnmi kha ṭha tein kan ruah tikah ṭhatnak tampi kan hmu. (Johan 17:3) Hi capar ah a tanglei biahalnak hna hi kan i ruah lai: Zeiti lam in kan rel ah dah ṭha tein ruah awkah kan i fawih deuh lai? Zei kong hna dah kan ruah khawh? Ṭha tein ruahnak kha nuam tein le hmaan tein kan tuah khawh nakhnga zeinihdah a kan bawmh khawh?

5, 6. Na relmi i cinken khawh awk le hngalhthiam deuh awkah zeinihdah aan bawmh khawh?

⁵ Thawchuah, lamkal, cycle i cit ti bantuk cu ruah hau loin na tuah khawh ti kha na hngal maw? A caan ah ruat loin ca na rel men ko lai. Ca na rel lioah a dang kong hmanh na ruah men lai. Cutin um lo awkah zeidah na tuah khawh? Na relmi ah lungthin pek le zei sullam dah a si ti ruah cu a biapi. Catlangbu asiloah biatlangte pakhat a dih tikah chikkhat in i din ta law na relmi kha ṭha tein ruat. Na hngalhmi kong kha ruat law hngalhthiam awkah i zuam.

⁶ A kong pakhatkhat kha awchuah in rel ahcun cinken awkah a fawi deuh ti kha Scientist pawl nih an hmuh. Mah kha a kan Sertu nih a hngalh. Cucaah Nawlbia cauk kha “din tein” rel awkah, phundang cun duhsah tein rel awkah Joshua kha a fial. (Joshua 1:8 rel.) * Baibal kha awchuah in relnak nih lungthin pek khawh deuh awk le i cinken khawh deuh awkah aan bawmh lai.

7. Baibal kong ṭha tein ruah awkah a ṭha bikmi caan cu zeitik ah dah a si? (A hramthawknak hmanthlak zoh.)

⁷ Kan hlathlaimi kong ah lungthin pek awk le ṭha tein ruah awkah fakpi in i zuam a hau. Cucaah na tha a bat lo caan le na lung aan vaivuanhter khomi thil a um lonak, a daimi hmun ah ṭha tein ruah cu a ṭha bikmi a si. Salm caṭialtu David cu zanṭim i aa ṭhangh tikah ṭha tein a ruat tawn. (Salm 63:6) Mitling a simi Jesuh nih ṭha tein ruah awk le thlacam awkah a daimi hmun kha aa thim.—Luka 6:12.

8. (a) Zei kong dah ṭha tein kan ruah khawh? (b) Midang sinah amah kong kan chim tikah Jehovah cu zeitindah a um?

⁸ Baibal na relmi lawng si loin na ruah khawhmi a dang thil hna a um rih. Tahchunhnak ah, Jehovah sermi khuaruahhar thil hna na hmuh tikah chikkhat dir ta law ‘mah nih Jehovah kong zeidah a ka cawnpiak?’ tiah i hal. Cu bantuk ruahnak nih Jehovah sinah thlacamnak in lawmhnak bia chim awkah aan forh lai. Midang he nan umṭi ahcun na intuarnak kha chimh na duh ko hna lai. (Salm 104:24; Lam. 14:17) Jehovah kong ṭha tein kan ruahmi, thla kan cammi le a kong kan i ruahceihmi kha Jehovah nih a ngaih i a sunsak. Baibal nih hitin a ti: “Amah [BAWIPA] a ṭihmi hna le an lungchung in a min aa cinkenmi [a ruatmi, NW] hna cu a hmaika i cazin chungah an min kha a khumh hna.”—Mal. 3:16.

9. (a) Paul nih Timote kha zeidah ruah awkah a fial? (b) Phungchimnak ca kan i timhtuah tikah zeidah kan ruah khawh?

⁹ A biachim, a tuahsernak le a cawnpiaknak nih midang zeitindah ṭhatnak a pek hna ti kha ruah awkah lamkaltu Paul nih Timote kha a forh. (1 Timote 4:12-16 rel.) Nang zong mah kong hna kha na ruah khawh ve. Tahchunhnak ah, Baibal cawnpiaknak ca naa timh tikah a caan pek in ṭha tein ruah a hau men lai. Baibal na cawnpiakmi kha ruat law ṭhancho  awkah a bawm hngami biahalnak asiloah tahchunhnak pakhat kha i thim. Cutin timhlamhnak na tuah ahcun na zumhnak a fek deuh lai, Baibal cawnpiak a thiam deuhmi le a lung a tho deuhmi na hung si lai. Phungchim na kal hlanah na lungthin naa timhtuahnak zongin ṭhatnak na hmu lai. (Ezra 7:10 rel.) Phungchimnak ah a lung a tho deuhmi na si khawh nakhnga aan bawm hngami Lamkaltu Baibal cauk in dal pakhatkhat kha na rel khawh. Mah ni ah hman naa timhmi Baibal caang hna le pek naa timhmi cauk kong zong na ruah khawh. (2 Tim. 1:6) Phungchimnak ah na tonmi hna kong kha ruat law hngalh an duh hngami kong zong ruat. Cutin naa timhtuah ahcun phungchimnak ah Baibal kha hmualngei tein na hman khawh lai.—1 Kor. 2:4.

10. Zei kong hna dah kan ruah khawh rih?

¹⁰ Zei kong hna dah na ruah khawh rih? Zapi ca phungchimnak le civui hna ah na theihmi kha naa ṭial ahcun mah kha hlathlai ṭhan awkah a caan pe. Cutin na tuah tikah ‘Baibal le bupi sinin zei cawn awk dah ka ngeih?’ tiah i hal. Thla fatin chuahmi Vennak Innsang le I Hlau! mekazin le hmanung bik tuahmi civui ah chuahmi cauk hna zong kha ṭha tein na ruah khawh. Yearbook i hmuhtonnak hna na rel hnuah chikkhat dir ta law mah kong kha ruat. Na lung aan suk khawh nakhnga ṭha tein ruat. Bupi chuahmi cauk pawl na rel tikah a biapit biknak kha rin law a kam ah ca i ṭial. Cutin na tuah ahcun lennolh, tuukhal lennak asiloah phungchimnak ca naa timh tikah mah nih aan bawmh lai. A biapi bikmi cu na relmi kong kha chikkhat dir ta in na ruah ahcun na lungthin chungah a phan lai i na hngalhmi he aa tlaiin Jehovah sin thlacamnak in lawmhnak bia chim awkah a caan aan ngeihter lai.

11. Kan ruah awk a simi a biapi bikmi cauk cu zeidah a si, mah nih zeitindah a kan bawmh khawh? (A tanglei fianternak zong zoh.)

¹¹ Ṭha tein kan ruah awk a simi a biapi bikmi cauk cu Baibal a si. Asinain ni khatkhat ah Baibal na ngeih lo tikah tah zeitin? * Na duh bikmi Baibal caang asiloah Pennak hla ti bantuk naa cinkenmi kong ruah lo awkah ahohmanh nih an in kham kho lo. (Lam. 16:25) Pathian thiang thlarau nih na hngalhmi kong i cinken awk le zumhfek tein um awkah aan bawmh lai.—Johan 14:26.

12. Nifate Baibal rel khawh awkah kan tuah khawhmi lamkhat cu zeidah a si?

¹² Nifate in Baibal rel khawh awkah kan tuah khawhmi lamkhat cu zeidah a si? Phungchimning cawnnak i zarhtin Baibal relnak kha zarhkhat cung i ni cheukhat ah na rel khawh i ṭha tein na ruah khawh.  Ni dang ah Thawngṭha cauk i Matthai, Marka, Luka le Johan chung kha na rel khawh i Jesuh nih a chimmi le a tuahmi kha ṭha tein na ruah khawh. (Rom 10:17; Heb. 12:2; 1 Pit. 2:21) Jesuh a nun lio i a cangmi thil kong a langhtermi cauk zong kan ngei. Mah cauk nih Thawngṭha cauk na relmi in ṭhatnak tampi hmuh awkah aan bawmh khawh.—Johan 14:6.

13, 14. Jehovah le Jesuh kong ruah zungzal cu zeicah a biapit tuk, mah nih zei tuah awkah dah a kan forh lai?

¹³ Jehovah le Jesuh kong ṭha tein ruahnak nih Khrihfa nutling patling si awk le zumhfekmi si zungzal awkah aan bawmh lai. (Heb. 5:14; 6:1) Pathian kong ruahnak ah caan tlawmpal lawng a pemi cu Jehovah he an i pehtlaihnak duhsah tein a zor kho asiloah Jehovah kha a hun hlawt khawh. Pathian bia kan theih lo asiloah kan cohlan lo ahcun “lungtho tein a thei i an lung chungah ṭha tein aa cinken” i “aa zuammi” nan si lai lo tiah Jesuh nih ralrin a kan pek. Mah canah “khuaruahhar vansannak le rumnak le nuamhnak nih a rialdipmi” tu kan si kho.—Luka 8:14, 15.

¹⁴ Baibal le Jehovah kong ṭha tein hngalh khawh awkah ruat peng hna u sih. Mah nih Jehovah sining hna le a ziaza hna kha i zohchunh khawh deuh awkah a kan forh lai. (2 Kor. 3:18) Vancung kan Pa kong cawn ding le i zohchunh ding cu a zungzal in kan tuah hngami a si. Amah hleiin upat awk an um lo.—Pct. 3:11.

15, 16. (a) Jehovah le Jesuh kong ruahnak in zeitindah ṭhatnak na hmuh? (b) A caan ah ṭha tein ruah cu zeicah a har khawh men, asinain zeicah kan i zuam zungzal awk a si?

¹⁵ Jehovah le Jesuh kong ṭha tein ruahnak nih biatak cung i lungthawhnak ngeih zungzal awkah aan bawmh khawh. Na lungthawhnak nih unau pawl le phungchimnak i na tonmi hna kha thazaang a ngeihter hna lai. Jehovah laksawng ngan bik asimi Jesuh tlanhnak man kong na ruah tikah Pathian he nan i pehtlaihnak kha na sunsak chin lai. (Rom 3:24; Jeim 4:8) A zumhnak ruangah kumthum chung thong a tlami Thlanglei Africa ah a ummi unaupa Mark nih hitin a chim: “Ṭha tein ruahnak cu lungcawlcangh awk ngai a simi thil he tahchunh khawh a si. Thlaraulei kong kan ruah deuhdeuh tikah Jehovah he aa tlaimi a kong thar hna kha kan hngalh deuhdeuh ve. Hmailei kong he aa tlaiin ka lungre a theih tik asiloah ka lung a dongh tikah Baibal kha kaa lak i Baibal caang pawl kha ṭha tein ka ruat. Mah nih ka lung a daihter taktak.”

¹⁶ Hi vawlei nunnak ah lung a vaivuanhter khomi thil in a khat. Mah nih Baibal kong ṭha tein ruah awkah caan a umter lo. Africa ah a ummi unaupa  Patrick nih hitin a chim: “Ka lungthin cu ka duhmi he ka duh lomi he a kong a phunphun in a khatmi cakuat chiahnak bawm he aa lo, mah kha nifate in thleidan a hau. Ka lungthin chung i a ummi kha ka check tikah ‘ṭih a nungmi ruahnak’ a um kha ka hmuh tawn. Cucaah lungthin thiang tein ka ruah khawh nakhnga Jehovah sinah thla ka cam. Thlaraulei kong ruahnak ka thawk hlanah caan tlawmpal pe in cutin ka tuah caah Jehovah he kan i naih deuh. Mah nih biatak kong hngalhthiam chin awkah ka lung innka a ka hunpiak.” (Salm 94:19) Nifate in Baibal kan rel tik le kan ruah tikah lam tampi in ṭhatnak kan hmu.—Lam. 17:11.

17. Ṭha tein ruah awkah a caan zeitindah na hmuh khawh?

¹⁷ Mi cheukhat cu Baibal rel awk, ruah awk le thlacam awkah zingka tein an tho. A cheu cu chuncaw ei caan ah cutin an tuah. Na caah zanlei asiloah na ih hlanah Baibal rel cu a ṭha bikmi a si men lai. A cheu cu zingka ah le an ih hlanah Baibal rel kha an duh. (Josh. 1:8) A biapimi cu ‘caanṭha na hmuhmi paohpaoh kha ṭha tein hman,’ phundang in cun nifate Baibal rel khawh awkah a biapi theng lomi thil hna in a caan lak kha a si.—Efe. 5:15, 16.

18. Nifate Baibal ṭha tein a ruatmi le an hngalhmi kong zulh aa zuammi hna kha Baibal nih zeidah a kamh hna?

¹⁸ Baibal ṭha tein a ruatmi le an hngalhmi kong zulh aa zuammi hna kha Jehovah nih thluachuah a pek hna lai tiah Baibal nih bia a kan kamh. (Salm 1:1-3 rel.) Jesuh nih hitin a ti: “Pathian bia kha a thei i a ngaimi caah cun zeitluk in dik lunglawmhnak a si chinchin.” (Luka 11:28) A biapi bikmi cu nifate Baibal ṭha tein ruahnak nih Jehovah a thangṭhatmi lam in nun awkah a kan bawmh lai. Cutin kan tuah ahcun atu ah nuamhnak taktak le vawlei thar ah zungzal nunnak laksawng a kan pek lai.—Jeim 1:25; Biat. 1:3.