Israel ralkap pawl nih Jeriko khua kha nikhat ah voikhat in niruk chung an vel tiah Joshua 6:10-15, 20 nih a ti. A nisarihnak ni ah khua kha voisarih an vel. Mah hnuah Pathian nih a fek tukmi Jeriko khuakulhnak ralhau kha a cimhter i Israel mi nih khua kha an lak. Baibal nih a chim bantukin Jeriko khua cu caan tawite chungah an lak khawh ti a langhtermi thil pakhatkhat kha hlanlio thil kong hlathlaitu hna nih an hmuhmi a um maw?

Hlanlio chan ah ralkap pawl nih khua pakhat kha doh an timh tikah an kulh hmasa tawn. Cutin an kulh tikah khua mi hna cu khua chungah an khonmi rawl lawng an ei caah caan saupi an kulh hna ahcun an rawl a dih thluahmah. A hnuah ralkap nih khua an lak tikah a tangmi rawl ti bantuk telin an duhmi zeithil paoh an lak. Cucaah cutin doh a rak simi Palestine khua rawk hna an hmuh tikah a tangmi rawl a um lo ti awk tluk a si. Asinain Jeriko khua rawk tu cu aa thleidang. Journal pakhat (Biblical Archaeology Review) nih hitin a chim: “A rawkmi thil hna lakah tlak in sermi thilri hna le facang hi a tam bik hmuhmi an si. . . . Hi tluk tam in facang hmuh a simi cu khuaruahhar a si.”

Jeriko khua in zei thil hmanh nan i lak lai lo tiah Israel mi kha Jehovah nih nawl a pek hna caah zei rawl hmanh an la lo tiah Baibal nih a ti. (Josh. 6:17, 18) Mah lengah rawlṭuan caan a dihka, khua chungah rawl tampi an khon caan a simi ṭhal aa thawkka ah Jeriko khua kha Israel mi nih an lak tiah Baibal nih a ti. (Josh. 3:15-17; 5:10) Cucaah Jeriko khua ah rawl tampi a taan rihmi nih Baibal chimmi ningin khua cu caan tawite chung lawng kulh a si ti kha a langhter.