Pathian nih minung le minung i uk awk, hmailei minung ruahchannak rawh awkah nawl a awnh peng lai maw? A awnh lai lo. Hmasa capar ah kan hmuh bantukin kum tampi chung tonmi sifah harnak le hneknak hna kha Pathian nih a donghter cang lai. Minung le vawlei a Sertu nih thil sining a tawnghtham lai caan a nai cang ti kha hngalhter kan in duh. A biapimi mah kong kha Pathian nih zeitindah a phuan?

Mah tahchunhnak hi ruathmanh: Mawṭaw in khual na tlawng hei ti u sih. A hmasa bik ah online, khuaram hmanthlak le lamhruainak cauk hna in lamhruainak kha na kawl ko lai. Lamhruainak ah aa telmi ca taarnak (signboard) le hmelchunhnak hna kha na hmuh tikah na khual tlawnnak lam a dong cang lai ti kha na zumh a si ko lo maw? Mah bantukin Pathian nih Baibal in vawlei thil sining hna kha a langhter. Vawlei thil sining hna hi zoh tikah donghnak caan ah kan nung ti kha kan zumh.

Vawlei thil sining hna cu voikhat hmanh ton bal lomi a biapimi donghnak caan ah a phan cang tiah Baibal ah a langhter. Minung tuanbia ah a um balmi thil sining hna he i lo loin vawlei thil sining le thil umtuning hna cu donghnak caan ah voikhat te ah fonh in an cangṭi lai. Baibal ah a langhtermi kong cheukhat kha ruathmanh.

1. VAWLEICUNG PUMPI BUAIBAINAK Matthai dal 24 ah aa telmi chimchungbia nih vawleicung ah a cang hngami thil hna kha fonhmi hmelchunhnak pakhat in a langhter. Mah hmelchunhnak cu “atu chan donghnak ding” hmelchunhnak a si i “donghnak” a phanhnak caan lei ah a hruai. (Matthai 24:3, 14) Mah thil sining hna ah raldohnak, mangṭamnak le lihninhnak hna hmunkhat hnu hmunkhat ah a tlun lai lengah dinlonak a karhmi, dawtnak a kihmi le biaknaklei hruaitu hna nih mi pawl lam an pial nakhnga an hlenmi hna zong aa tel. (Matthai 24:6-26) Mah thil sining hna cu hlanlio zongah a cangmi a si ko. Asinain donghnak caan ah mah thil sining hna cu voikhat te ah an cangṭi lai. Mah lakah ralrin peknak a simi hmelchunhnak pathum zong aa tel.

2. MINUNG AN LUNGPUT “Ni hmanung bik”—phun dang in cun donghnak caan i hmelchunhnak pakhat in minung an lungput cu a chia chin lai tiah Baibal ah a langhter. Hitin a ti: “Mi cu anmah zawn lawng aa ruatmi, a hak a kaumi, aa porhlawmi le lung a puammi an si lai; an nu le an pa kha an zomhtaih hna lai i an nawl an ngai duh hna lai lo; lawmh a hngal lomi le biaknak zeihmanh i a rel lomi an si lai; zaangfahnak an ngei lai lo, mi zawnruahnak an ngei lai lo, mi thangchiat duhmi an si lai, ruru-hranghrang in khua a sami an si lai i ṭih a nungmi an si lai; ṭhatnak kha an huat lai; hawi rawi a hmangmi an si lai, duhpaoh khuasa an si lai i porhlawtnak in an khat lai; Pathian nakin nomhnak kha an duh deuh lai.” (2 Timote 3:1-4) Minung pawl an puarhranmi cu atu lawngah a si lo. Asinain “ni hmanung bik” ah puarhrannak cu a karh chinchin. Cucaah mah caan kha “harnak caan” ti zongin auh khawh a si. Minung an lungput voidang nakin a chiat chinmi kha na hmu ko lo maw?

3. VAWLEI A RAWK Pathian nih ‘vawlei a hrawktu hna kha a hrawh’ hna lai tiah Baibal ah a langhter. (Biathlam 11:18) Minung nih vawlei cu zeiti lam in dah an hrawh? Noah chan bantukin, ‘mi vialte cu Pathian mithmuh ah mi ṭhalo an si dih i an ṭhatlonak cu khuazakip ah a karh. Minung kha an sual tuk hringhran caah Pathian nih vawlei cu a zoh tikah khan a ṭha hrimhrim lo ti kha a hmuh.’ Cucaah ziaza a rawkralmi minung hna he aa tlaiin Pathian nih “ka hrawh hna lai” tiah a ti. (Genesis 6:11-13) Vawleicung ah zaangennak a karh chinmi a langhtermi hmelchunhnak hna kha na hmu maw? Minung cu vawlei tuanbia ah thihnak le nunnak tluk in a biapimi caan ah an nung. Thilnung vialte an hrawh hnanak thawngin vawlei a rawh nakhnga tuah khawhnak  ṭhawnnak kha minung nih an ngei. Hriamnam an ngei. Mah lengah lam dang zongin vawlei kha an hrawh. Thilnung vialte a cawmtu thil sining hna, tahchunhnak ah, kan dawpmi thli, thingkung ramkung le a nungmi saram an i pehtlaih ning le rili hna kha mi nih ningcang loin an hman caah duhsah duhsah in an rawk.

‘A luancia kum 100 hrawngah minung nih thilnung vialte hi hrawh khawhnak ṭhawnnak an ngei maw? ti kha ruathmanh. Atu ah cun mi nih chan thar hriamnam pawl an i khawnnak thawngin le pawngkam thil pawl an hrawhnak thawngin thilnung vialte kha hrawh awkah an i zuam. Fimthiamnak cu a ṭhangcho chin ko nain a hnuah fimthiamnak i a ṭhatlonak kha mi nih an hngalh tikah an runven ṭhan. Asinain hmailei vawlei i a sining cu mi pawl i biakhiahnak le runven khawhnak nawl cungah aa hngat lo. Vawlei a rawh hlanah vawlei a hrawktu hna kha Pathian nih ka hrawh hna lai tiah bia aa kam.

4. VAWLEICUNG PUMPI PHUNGCHIM RIANṬUANNAK Donghnak a nai cang ti a langhtermi a dang hmelchunhnak pakhat cu a ṭhangcho chinmi phungchim rianṭuannak a si. “Cun miphun vialte hna ca i tehte si awkah Vancung Pennak kong Thawngṭha hi khuazakip ah chim a si lai. Cun cu hnu lawngah cun donghnak cu a si lai.” (Matthai 24:14) Kum tampi chung ṭuanmi mah phungchim rianṭuannak cu biaknak leemnak rian he aa dang. Ni hmanung bik caan ah “Vancung Pennak kong Thawngṭha” kha biapi ah chia in chim a si. Mah phungchim rianṭuannak kha zei biaknak nih dah an ṭuan? Bu cheukhat cu an chim ko hmanhah hmun pakhat lawngah maw asiloah thawngṭha kha “khuazakip” ah dah an chim?

www.pr418.com website ah “Vancung Pennak kong Thawngṭha” kha a bik in a langhter. Mah website ah thawngṭha kong aa telmi cauk kha holh phun 700 lengin taar a si. Vawleicung pumpi ah thawngṭha a karh nakhnga a ṭuanmi bu kha na hngal hna maw? Internet a chuah hlanpi in Pathian Pennak kong thawngṭha lungtho tein a chimmi Jehovah Tehte Hna kha mi tampi nih an hngalh hna. 1939 lio in Vennak Innsang mekazin a phaw ah “Jehovah Pennak Thanhnak” tiah a langhter. Jehovah Tehte Hna nih phungchim rianṭuannak ah “thazaang chuah in fakpi in an ṭuanmi cu ahohmanh nih phanh khawh an si lo” tiah biaknaklei cauk pakhat nih a ti. Pathian Pennak a rian ṭuannak thawngin a rauhhlan ah “donghnak” a phan cang lai timi thawngṭha kha a bik in an chim.

Mah capar ah langhtermi Baibal hmelchunhnak a pali ningin nangmah na nunnak caan ah a cang ti  kha na hmu maw? Mah mekazin nih donghnak a nai cang ti kha hngalhthiam awkah vawlei thil sining kong a langhternak hi kum za leng a si cang. Asinain mi cheukhat nih cun an zumh lo lengah a konglam le voi zeizat dah a cang timi hna cu hrihram a ngei lo i phuahchommi a si tiah an ti. Vawleicung pehtlaihnak a ṭhancho caah vawlei thil sining a chiatmi kha kan hngalhmi a si ti zongin an ti. Asinain minung tuanbia ah a biapi bikmi caan ah kan nung ti a langhtermi thil a tam chin.

Vawleicung ah thlennak nganpi a um tiah mifim cheukhat nih an zumh. Tahchunhnak ah, 2014, Rianṭuantu Bu (The Scientists Science and Security Board of the Bulletin of the Atomic) phu pakhat nih minung nunnak a bik in a ṭhihphaihmi kong kha UN Security Council ah ralrin peknak bia an chim. Mah Rianṭuantu Bu ah aa telmi science lei mifim hna nih hitin an chim: “Minung nun khawh pengnak ding a ṭhihphaihmi fimthiamnak lei rai cu ṭih a nung tuk tiah ti khawh a si cang.” Kannih cu vawlei tuanbia ah thihnak le nunnak tluk in a biapimi caan ah kan nung ti kha mi tampi nih an cohlan cang. Mah mekazin a chuahtu hna le careltu tam deuh nih cun tu chan hi ni hmanung bik caan a si i donghnak a nai cang ti kha an zumh. Nang cu hmailei kongah lungretheih canah a cang dingmi kong hna kha i ruahchan in naa nuam kho. A ruang cu donghnak caan in na luat khawh lai caah a si. (w15-HK 05/01)