“Donghnak a nai cang!” timi bia na theih tikah na mitthlam ah zeidah a cuang? Mars le Jupiter karlak in nika a velmi vawlei hmete (asteroid) pakhat vawlei ah a tla i mi vialte an thih dihmi maw? Pawngkam a rawhmi maw? Vawlei ralpi 3nak dah? Mi cheukhat nih cun cutin an mithlam ah an cuanter i an thin a phang ko nain mi cheukhat tu nih cun an zumh lo lengah nihchuak a si ti hmanh in an ruah.

‘Donghnak cu a phan lai’ tiah Baibal nih a ti. (Matthai 24:14) Donghnak cu “Lianngan Bik Pathian ni lianngan ni” le “Armageddon” ti zongin auh a si. (Biathlam 16:14, 16) Biaknak tampi ah cun donghnak kong he aa tlaiin an buai lengah a ṭhatlonak lei in an hmuh. Asinain donghnak timi cu zeidah a chim duhmi a si i zeidah a chim duhmi a si lo ti kha Baibal ah fiang tein a langhter. Donghnak a nai cang maw, a nai rih lo dah timi kong kha Baibal ah a langhter. Mah lengah donghnak in luat khawh awkah zeidah tuah a herh timi kong zong a langhter. A hmasa bik ah, donghnak kong he aa tlaiin a hmaan lomi ruahnak hna kha hngalh khawh i zuam in a sullam taktak kha hngalh i zuam a herh. Baibal ningin “donghnak” timi cu zeidah a chim duhmi a si?

1. DONGHNAK TIMI CU VAWLEI PUMPI MEI NIH A KANGH DIHMI PHUN KHA A SI LO

   Baibal ah hitin a ti: ‘[Pathian nih] vawlei cu a umnak hmun ah khan fek tein a bunh.’ (Salm 104:5) Pathian nih vawlei hi a hrawk lai lo i hrawhnak nawl zong a awnh lai lo ti kha mah Baibal cang le a dang Baibal cang hna in hngalh a si!—Phungchimtu 1:4; Isaiah 45:18.

2. DONGHNAK TIMI CU RUAHLOPI IN A CANG DINGMI A SI LO

   Jehovah Pathian nih donghnak caan caah ri a khiah cang ti kha Baibal ah hitin a langhter: “Sihmanhsehlaw cu ni le suimilam caan cu ahohmanh nih an hngal lo, vancung i a ummi vanmi zong nih an hngal lo, Fapa zong nih a hngal lo, Pa lawnglawng nih a hngalh. Cu caan cu zeitikah a si lai kha nan hngalh lo caah i ralring te le fimhring tein um ko u.” (Marka 13:32, 33) “Pa” a simi Pathian nih ri a khiahmi caan ah donghnak cu aa thawk lai.

3. DONGHNAK TIMI CU MINUNG ASILOAH VAN IN A TLAMI VAWLEI HMETE RUANGAH A SI LAI LO

   Donghnak ah zeidah a cang lai? Baibal ah hitin a ti: “Cun van kha aa hung i rang rang pakhat ka hmuh. A cung i aa citmi cu a min ah Zumhawktlak le A hmaanmi ti a si. . . . Rang cung i aa citmi le a ralkap bu kha doh awkah sahrang le vawleicung siangpahrang hna cu an i pum.” (Biathlam 19:11-21) Mah Baibal chimmi cu langhternak a si. Asinain Pathian nih vancung ralkap bu kha hmangin ral pawl kha an ci a hmih hna lai ti kha mah Baibal chimmi in hngalh khawh a si.

1. MINUNG UKNAK A DONGHNAK

   Baibal ah hitin a ti: “Cu siangpahrang hna chan ah cun vancung Pathian nih pennak pakhat a ser lai i cu pennak cu zeitikhmanh ah a rawk lai lo; cu pennak cu midang sinah aa ṭhial lai lo; hi pennak vialte  hi a hrawh dih hna lai i a donghter dih hna lai, sihmanhsehlaw cu pennak tu cu zungzal in a hmun lai.” (Daniel 2:44) Hmasa ah langhtermi nambar 3nak bantukin ‘rang cung i aa citmi le a ralkap bu kha doh awkah sahrang le vawleicung siangpahrang hna cu an i pumh’ tikah cihmih in dohnak cu aa thawk lai.—Biathlam 19:19.

2. RALDOHNAK, ZAANGENNAK LE DINLONAK HNA AN DONGHNAK

   “[Pathian nih] vawleicung pumpi ah ral cu a daihter dih.” (Salm 46:9) “Zeicahtiah miding mi hna cu hi ram chungah hin khua an sa kho lai i ding tein khua a sami hna cu hi ram chungah hin an um lai. Sihmanhsehlaw miṭhalo hna cu ram chung khan hlonh an si lai i mi rawi hmangmi hna cu ram chung cun phawi an si lai.” (Phungthlukbia 2:21, 22) “Atu cu thil vialte kha a thar in ka ser dih cang hna.”—Biathlam 21:4, 5.

3. PATHIAN LE MINUNG CUNGAH ṬUANVO A LA LOMI BIAKNAK HNA AN DONGHNAK

   “Profet hna nih lih in bia an chim i tlangbawi hna zong nih anmah tining paoh kha an zulh ve; . . . sihmanhsehlaw a donghnak a phak tikah, zeitindik nan umte fang lai.” (Jeremiah 5:31) “Cu ni cu a phak tikah mi tampi nih keimah cu ‘Bawipa, Bawipa! Na min in Pathian bia kha kan chim i na min in khuachia kha tampi kan ṭhawl hna i khuaruahharnak tampi kan tuah,’ tiah an ti lai. Khi tikah annih cu ka thawh hna lai i, ‘Nannih cu aho nan si kha kaan hngal bal hna lo. Kal ko u, ṭhatlonak a tuahtu hna,’ tiah ka ti hna lai.”—Matthai 7:21-23.

4. ATU VAWLEI THIL SINING A HMUNH NAKHNGA A BAWMTU HNA AN DONGHNAK

   Jesuh nih hitin a ti. “Biaceih ning cu hitihin a si: ceunak cu vawleicung hi a rung phan ko cang, sihmanhsehlaw mi nih khan thil ṭhalo kha an tuah caah ceunak nakcun muihnaktu kha an duh deuh.” (Johan 3:19) Hlanlio zumhfekmi Noah chan ah a hmasa bik vawleicung pumpi hrawh a sinak kong kha Baibal ah a langhter. “Vawlei hlun a rawktu cu ti ṭhiamṭhiam, buanchukcho kha a si. Sihmanhsehlaw Pathian bia ṭhiamṭhiam nih cun atu i a ummi van le vawlei hi mei in hrawh awkah a zuah rih hna. Pathian zei i a rel lomi hna an bia ceih a si ni le hrawh an si ni caah cun zuah an si.”—2 Piter 3:5-7.

A ra laimi “bia ceih a si ni” le rawhnak ni kha Noah chan i “vawlei” hrawhnak he a tahchunh. Zei vawlei dah a rawk lai. Vawlei cu a hmun lai i “Pathian zei i a rel lomi,” Pathian ral hna cu “hrawh” an si lai. Mah bantukin a ra laimi Pathian ‘bia ceihnak ni’ ah Pathian ral in hmuhmi hna zong hrawh an si lai. Pathian hawikom a simi hna cu Noah le a chungkhar bantukin huhphenh an si ve lai.—Matthai 24:37-42.

Ṭhatlonak vialte kha Pathian nih a hrawh dih hnuah vawlei pumpi cu zeitlukin dah a nuamh lai ti kha na mitthlam ah cuanter hmanh! Donghnak he aa tlaiin Baibal chimmi cu thawngṭha lawngte a si ti cu a fiang. Asinain ‘donghnak a phanhnak caan kha Baibal ah a langhter maw? Donghnak a nai cang maw? Zeitindah luat khawh a si?’ tibantuk kong kha hngalh na duh ko lai. (w15-HK 05/01)