Donghnak ni ah hrawhnak a um lai ti kha Baibal ah hitin a chim: “Zeicahtiah vawlei hramthawk in nihin ni tiangah a ummi harnak a zeihmanh nakin cu caan i a ummi harnak cu a let tampi in a fak lai. Cubantuk harnak cu a um zong a um bal ti lai lo. Sihmanhsehlaw cu caan cu Pathian nih a tawiter cang, rak tawiter hlah sehlaw cu ahohmanh a nungmi an um hnga lo.” (Matthai 24:21, 22) Asinain mi tampi cu donghnak ni in an luat lai ti kha Pathian nih hitin bia a kan kamh: “Vawlei le a chung i a ummi thil minung nih an duhmi hna hi an lo cuahmah cang; sihmanhsehlaw Pathian duhnak a tuahmi cu zungzal in an nung.”—1 Johan 2:17.

Hi vawlei a loh cuahmah lioah luat in “zungzal in” nun na duh ahcun zeidah na tuah a herh? Rawl maw naa khon lai? Thilri chawva maw a hlankan in naa timhtuah lai? Cutin na tuah lai lo. Papek in ṭuan hngami kong he aa tlaiin Baibal ah fiang tein a kan forhmi a um. ‘Mah thil vialte cu an tit dih lai caah zei bantuk mi dah kan si awk a si ti kha ruat tuah u. Nan nunning cu a thiangmi le Pathian sin i pekmi an si awk a si. Pathian ni nan hngah lioah hin cubantuk cu nan si awk a si.’ (2 Piter 3:10-12) A ti hngami ‘mah thil vialte’ ah ziaza a rawkralmi vawlei uknak hna lengah Pathian uknak nakin mah uknak a cohlangmi hna zong an i tel lai. Cucaah rawl kan i khon ahcun hrawhnak in kan luat kho lai lo.

Mah hrawhnak in luat kan duh ahcun Jehovah kha i bochan in a duhmi ziaza kha cawn a herh. (Zefaniah 2:3) Mi tampi nih an tuahmi ningin tuah loin a biapimi caan ah kan nung ti a langhtermi hmelchunhnak hna kha hmu in ‘Pathian ni kha hngah’ a herh. Donghnak ni in luat khawh awkah zeidah tuah a herh ti kha Jehovah Tehte Hna nih Baibal in an in chimh khawh. (w15-HK 05/01)