Pakhat le pakhat aa daw i aa upatmi nulepa sinah a ṭhangmi fale cu sining ṭha he an ṭhang. (Kolose 3:14, 19) Jehovah nih a Fapa Jesuh kha a thangṭhat bantukin nulepa ṭha nih an fale kha an dawt hna i an thangṭhat hna.—Matthai 3:17 rel.

Vancung kan Pa nih a fale kan thlacamnak kha biapi ah a chiah i a kan ngaihpiak. Cucaah nulepa nih Jehovah kha i zohchunh in fale chimmi bia kha ṭha tein ngaihpiak awk a si. (Jeim 1:19) Fale i an intuarnak lawng si loin an lung tlinglonak zong kha hngalhthiampiak awk a si.—Nambar 11:11, 15 rel.

Nulepa a simi nih fale caah phunglam chuahnak nawl nan ngei. (Efesa 6:1) Jehovah kha i zohchunh u. A fale a simi Adam le Evi sinah a fiangmi nawlbia a pek hna lengah nawlngaih lo ruangah a chuak khomi ṭhatlonak zong a chimh hnanak thawngin a dawtnak kha a langhter. (Genesis 3:3) Tuchan zongah Jehovah nih a nawlngaih awkah a kan hnek lo i a hmaanmi thil tuah ahcun zei ṭhatnak dah a chuak lai ti kha a kan chimh.—Isaiah 48:18, 19 rel.

Nan fale nih Pathian an dawt nakhnga bawmh awkah hmuitinh chia u. Cutin nan tuah ahcun nanmah nan um lo tik hmanhah fim ngaiin thil an tuah lai. Pathian nih a bia le a tuahsernak in a kan cawnpiak bantukin nan fale nih Pathian an dawt nakhnga nan biachim le nan tuahsernak in cawnpiak ve hna u.—Deuteronomi 6:5-7; Efesa 4:32; 5:1 rel. (w15-HK 06/01)