Montreal khua i sifakmi umnak sang ah a ṭhangmi ka si. Thlaruk ka si ah ka pa cu a thi i innlei zohkhenhnak rian vialte cu ka nu rian a hung si. Kei cu unau pariat lakah a hniang bik ka si.

Ka hun upat tikah ritnak sii, phekah le zaangen hna kha ka hmang. Cun miṭhalo bu hna he zong kaa kom. Kum 10 ka si ah hlawhhlang pawl le tangka karh tampi a eimi hna nih fial chukchomi ka hung si. Mihlen ka hun hmang i cutin ka tuahmi kha kaa lunghmuih tuk. Ritnak sii a hmangmi hna bantukin mihlen loin ka um kho ti lo.

Kum 14 ka si ah cun mihlen zia ka thiam tuk cang. Tahchunhnak ah, sui rong thuhmi suimilam, banhrolh le kutdonghrolh hna kha ka cawk i 14-carat (9 peyi) a ummi sui tiah hmelchunhnak ka khenh, cun lam cung le thilzuarnak dawr nganpi i mawṭaw dirnak hna ah ka zuar. A fawinak in tangka kawl kha ka duh tuk. Voikhat cu nikhat te lawngah Dollar 10,000 ka hmuh.

Kum 15 ka si ah ziaza remhnak sianginn in an ka chuah caah umnak ka ngei lo i ka vakvai. Lam cung, pangpar dum le chikkhat hmuhnak ah komhmi ka hawile inn ah ka riak tawn.

Mi ka hlen zungzal hna caah palik pawl nih an ka check tawn. Firmi thil ka zuar lo caah thong cu ka tla bal lo. Asinain mihlen ruang, aiawhtu deu hman ruang le thilzuarnak nawl ngei loin thil ka zuar ruangah ngunkhuai tampi ka pek. Ṭihnak zeihmanh ngei loin tangka karh tampi a eimi hna caah leiba ka cawhpiak hna. Mah rian cu ṭih a nun tuk caah meithal hmanh kaa ken tawn. Thil sining cheukhat ah cun miṭhalo bu he hmanh kan ṭuanṭi.

Kum 17 ka si ah Baibal kong kha a voikhatnak ka theih. Ka nungaknu sin ka um lioah anih cu Jehovah Tehte Hna he Baibal a cawng. Asinain Baibal phunglam hna kha ka duh lo caah amah cu ka kaltak i a dang kaa chiahmi nungak sinah ka va um.

 A pahnihnak ka nungaknu zong Jehovah Tehte Hna he Baibal a hun hlathlai tikah thlennak a hung um. Anih cu a nunning tampi aa thleng. A hlan nakin a lung a sau deuh i a lung zong a nem deuh, mah nih ka lung a ka suk tuk. Cucaah Jehovah Tehte Hna Biakinn i pumh a ka sawmmi kha ka cohlan. Jehovah Tehte Hna nih hmaipanh tein le lunglawm tein a kan conglawmh. Ka rak umnak vawlei he cun aa dang tuk. Kei cu ka chungkhar zongah zeirel lomi ka si caah ka ngakchiat lio tein dawt ka tong bal lo. Hmuh ka duh tukmi dawtnak kha Jehovah Tehte Hna sinin ka hmuh. Baibal cawn awk an ka sawm tikah lunglawm tein ka cohlan.

Baibal ka hlathlaimi nih ka nunnak a ka khamh. Phekah ruangah Dollar 50,000 leng leiba ka ngei, mah chamnak caah ka hawile pahnih he damiah ṭeih kan i tim. Asinain damiah ka rak ṭeih ṭhan lo, mah cu ka caah a ṭha tuk. Ka hawile pahnih tu cu kan i timhcia bantukin diamiah an ṭeih. Pakhat cu an tlaih i a dang pakhat tu cu an thah.

Baibal ka cawn thluahmah tikah ka nunnak ah thlennak tampi tuah a herhmi kha ka hun hngalh. Tahchunhnak ah, 1 Korin 6:10 i Baibal chimmi hi ka hngalh: “Mi thil a chutmi le hak a kaumi le zu a rimi le mi congoih a hmangmi le mifir a simi hna nih cun Pathian pennak cu an co lai lo.” Mah Baibal caang ka rel fatinte ka nunning ruangah ka mitthli a tla. Ka nunning dihlak in thlen a hauh kha ka hun hngalh. (Rom 12:2) Mah hlanchung vialte mi ka rak hlen hna, mi he kaa vel i ṭhatlonak zong ka tuah.

Asinain Baibal ka cawn tikah Jehovah cu zaangfah le ngaihthiam a hmangmi a si ti kha ka hngalh. (Isaiah 1:18) Hlanlio ka nunning in ka luat khawh nakhnga ka bawm tiah Jehovah kha fakpi in ka nawl. Jehovah bawmhnak thawngin ka zia hna cu duhsah duhsah in a hun i thleng. Thlennak nganpi ka tuahmi cu ka nungaknu kha phung ningin ka ṭhitmi hi a si.

Kum 24 ka si ah kan i um i fa 3 kan ngei cang. Atu cu dingfel tein rian ka ṭuan a hau cang. Asinain fimcawnnak zeihmanh ka ngei lo i bawmtu zong ka ngei lo. Cucaah Jehovah sinah atu le atu thla ka cam. Mah hnuah rian ka kawl. Rianngeitu hna kha ka nunning i thlen in ṭha tein rian ṭuan ka duh kha ka chimh hna. Cun atu Baibal ka cawng i rammi ṭha si zong ka duh tiah ka ti hna. Asinain rianngeitu tam deuh nih rian an ka pe duh lo. A donghnak rian ka sawk lioah hlanlio ka nunning a ṭhalomi vialte kha ka chimh hna, mah tikah biahaltu nih hitin a ka ti: “Zei ruangah ti cu ka hngal lo, asinain pakhatkhat nih rian pek dingin a ka fialmi a lo.” Mah cu Pathian nih ka thlacamnak a ka lehmi a si. A hnuah ka nupi he Jehovah Tehte pakhat in tipil kan ing.

Baibal phunglam ka zulh i Khrihfa nunning in ka nun caah atu tiang ka nunmi a si. A nuam tukmi chungkhar zong ka ngei. Jehovah nih a ka ngaihthiam ti kha ka zumh i ka chiaṭha thleidannak lungthin zong a thiang.

Midang kha Baibal kong hngalh awk a bawmmi caantling rian ah kaa telnak hi kum 14 a si cang, naiah ka nupi zong mah rian ah a hun i tel ve. A luancia kum 30 lengah ka rian ṭuanṭihawi 22 kha Jehovah a biami si awkah ka bawmh khawh hna caah kaa lawm tuk. Atu zongah thil zuarnak dawr nganpi ah ka kal rih ko, asinain hlanlio bantukin mihlen awkah a si ti lo. Mah canah miṭhalo le mi hrokhrol pawl an um ti lai lonak hmailei vawlei thar ruahchannak kong chim ding ah a si.—Salm 37:10, 11. (w15-HK 05/01)