A PHAW CAPAR | Jehovah Tehte Hna cu Ahote dah an Si?
Jehovah Tehte Hna cu Zei bantuk Minung dah an Si?
Jehovah Tehte Hna cu ramkomh bu pakhat an si nain a dang biaknaklei bu he an i cawhkalh lo. An zungpi cu United States ah a um nain Jehovah Tehte tam deuh cu ram dang ah an um. “Miphun vialte hna ca i tehte si awkah vancung Pennak kong Thawngṭha hi khuazakip ah chim a si lai” timi Jesuh bia kha an ngaih caah Jehovah Tehte nuai 8 hrawng nih ram 230 lengah mi kha Baibal an cawnpiak hna.—Matthai 24:14.
Khoika hmun i a ummi kan si hmanhah lungtho tein upadi kha kan zulh. Asinain ramkhel lei ah i tel lo awk le khoika lei hmanh ṭan lo awkah kan i zuam. Mah cu “vawlei ta” si hlah u timi Jesuh nawlbia kan zulh caah a si. Cucaah ramkhel lei ah kan i tel lo i raldohnak zongah kan bawm hna lo. (Johan 15:19; 17:16) Vawlei Ralpi IInak lioah Jehovah Tehte Hna cu khoika lei hmanh an ṭan lo caah thong an thlak hna, an hrem hna i a thah hmanh an thah hna. German bishop a rak ṭuan balmi pakhat nih hitin a ṭial: “Nazi uknak ah an phu ningin ralkap tlak a almi cu Jehovah Tehte Hna lawng an si.”
“[Jehovah Tehte Hna] cu an ziaza a ṭha. Mahzawn aa ruat lomi an si caah ramkhel lei ah rian sangsang pek in hman kan duh hna. Asinain mah rian kha zeitikhmanh ah an cohlang bal lo. . . . Cozah nawlngeitu hna kha an cohlan ko hna nain minung tonmi buaibainak hi Pathian Pennak lawng nih a tawnghtham khawh tiah an zumh.”
—Nová Svoboda thanhca, Czech Republic.
Asinain kannih cu a dang tein a ummi cu kan si lo. Jesuh nih a zultu hna he aa tlaiin Pathian sinah hitin thla a rak cam: “Vawleicung hin la hna tiah kaan nawl a si lo.” (Johan 17:15) Cucaah rianṭuannak ah, dawr ah le sianginn hna ah na kan hmuh ko lai.
Mah Kong Hna Zong Hi Na Duh Khawh Men
BAIBAL BIAHALNAK A PHI
Pathian Pennak Cu Zeidah A Si?
Pathian cozah cu a dang cozah vialte nakin a ṭhat deuhnak a ruang kha hlathlai.
ATU LE ATU AN HALMI BIAHALNAK
Jehovah Tehte Hna Cu Zeicah Nainganzi Ah Khoikalei Hmanhah An Ṭan Lo?
Ram himnak caah ṭihnung an si maw?
