A PHAW CAPAR
Jehovah Tehte Hna cu Ahote dah an Si?
“Jehovah Tehte a simi Mike he kan i komhnak hi kum tampi a si cang. Asinain a biaknak kong kha ṭha tein ka hngal lo. Jehovah cu ahodah a si? Jehovah Tehte Hna nih zeicah puai an tuah lo? Mike hi biaknak aa hruhchihmi bu ah a ummi a si maw?”—Becky, California, U.S.A.
“Ka theihhngalhmi hna nih Jehovah Tehte Hna he Baibal an cawnṭi tikah hitin ka ruat: ‘Jehovah Tehte timi min cu zei sullam dah a si? Biaknak bu pakhat kha mah min pek cu aa thleidang tuk.’”—Zenon, Ontario, Canada.
“Church ah kal in kan i pumh lo caah sualnak kan ngei ti kan ruah lioah Jehovah Tehte Hna nih mah kha caanṭha ah an i lak i an rak kan leng. Hngalh kan duhmi a kong hna kha church nganpipi hmanh nih an kan chim kho lo, cucaah zeihmanh a si lomi Jehovah Tehte Hna nih cun an kan chim kho chinchin lai lo.”—Kent, Washington, U.S.A.
“Hmaan tein chim ahcun Jehovah Tehte Hna hi ahote dah an si i zeidah an zumh ti kha ka hngal lo.”—Cecilie, Esbjerg, Denmark.
Innkhat hnu innkhat ah le zapi lakah phung a chimmi, Baibal hrambunhmi cauk mi a pemi le man loin Baibal cawnpiaknak a tuahmi Jehovah Tehte Hna kha nang zong cutin na ruah ve men hna lai. Mah mekazin hi an sinin na hmuhmi a si men lai. Asinain Jehovah Tehte Hna cu ahote dah an si ti kha hngalh na duh ko lai. Anmah he aa tlaiin na ruahning cu a cunglei ah an kong ṭialmi hna he aa lo kho men.
Jehovah Tehte Hna an zumhnak cu zeidah a si, an phungchim rian le biakinn caah zeitindah tangka an hmuh, na inn ah zeicah an rat, mipi hmaiah an in fuhpanh i zeicah an in chawnh ti bantuk biahalnak hna a phi kha khoika in dah na hmuh lai?
Cecilie nih hitin a chim: “Internet in Jehovah Tehte Hna an kong tampi kha ka rel bal. An kong he aa tlaimi biavakvai hna kha ka theih bal, cun an thangchiat hnanak phungchimnak zong ka ngai bal. Mah ruangah Jehovah Tehte Hna kha a ṭhatnak in zeitin hmanhin ka hmu kho ti hna lo.” Asinain a hnuah Jehovah Tehte Hna he an i tong i anmah theng he bia aa ruah tikah hngalh a duhmi a phi hna kha a hmuh.
Jehovah Tehte Hna he aa tlaimi na biahalnak hna a phi kha hmuh na duh maw? Hi mekazin a chuahtu Jehovah Tehte Hna kha direk in hal awkah kan in forh. (Phungthlukbia 14:15) Jehovah Tehte Hna cu ahote dah an si, zeidah an zumh ti le an rianṭuanning hngalhthiam awkah a hnu capar hna nih an langhter lai.
