Changreu tuah awkah facang kha facang rialnak lung in an rial. Innchungkhar tampi ah nu pawl le sal pawl nih nifate an ṭuanmi inn rian ah facang rial zong hi aa tel. Facang rialnak lung aw thawng hi hlanlio mi pawl nunning he an langhter chih tawn.—Exodus 11:5; Jeremiah 25:10.

Hlanlio Izipt mi pawl nih an suaimi hmanthlak le an sermi milem hna in zeitindah facang an rial ti kha kan hngalh khawh. Facang rialnak ah hmanmi a tangdanh lung cu a kuar i a hmailei ah a va niam deuh, mah kha rang kengdanh rawlrialnak lung ti zongin an auh. Facang rialtu nih facang rialnak lung ah an ser chihmi lung cungah a khuk a bil, a rialnak lung hmete kha a kuthnih in a tlaih i a hnu, hmai aa thawn i facang kha a rial. A rialnak lung cu pawng 4 in pawng 9 tiang a rit tiah cauk pakhat nih a ti. Mah lung in mi pakhat kha cheh asiloah cumh ahcun a thi kho.—Biaceihtu 9:50-54.

Facang rialnak lung cu chungkhar caah a biapi tukmi a si caah Baibal nih rawlrialnak lung kha nan i hrenpiak lai lo tiah nawlbia a pek hna. Deuteronomi 24:6 nih hitin a ti: “Ahohmanh nih rawlrialnak siseh, rawlrialnak a cunglei lung siseh nan i hrenpiak lai lo, zeitintiah mah cucu minung nunnak hrenpiak a si ko.”

Baibal nih Jesuh kha “a Pa ṭang chung i aa pommi” a si tiah a ti. (Johan 1:18) Mah bia nih Jesuh cu Pathian he pehtlaihnak ṭha a ngeimi, Pathian mithmai ṭha a hmumi a si ti kha a langhter. Mah lengah Judah mi nih rawl an ei lioah an tuah tawnmi phung zong kha a langhter.

Jesuh chan ah Judah mi hna cu rawl an ei tikah capuai pawng i an chiahmi ṭhutdan ah an zau tawn. Capuai lei ah an lu an chiah i an hnulei ah an ke an thluan. Ṭhutdan tlang i a nemmi cungah an kehlei kut an chiah i a sirlei in an ṭhu. Cun an orhlei kut in rawl an ei. Rawl a eimi hna nih an kehlei kut i doh in pakhat hnu pakhat an zau. “Mi pakhat i a lu cu a hnulei ah a zaumi i a ṭang pawngah a um. Cucaah mah pa cu midang ‘ṭang chungah’ a um” tiah cauk pakhat nih a fianter.

Chungkhar lu asiloah rawl ei a sawmtu i ṭang chungah zau cu a hleiin mithmai ṭha pek asiloah a sunglawi tukmi tinvo a si tiah an ruah. Jesuh caah hmanung bik Lanhtak puai an tuah lioah “Jesuh nih a dawtmi zultu,” lamkaltu Johan cu Jesuh ṭang chungah a zau. Cucaah Johan nih Jesuh ṭang, i hngauh in Jesuh kha biahalnak a rak tuah khawhmi a si.—Johan 13:23-25; 21:20.