Nunnak timi cu lentecelh, rianṭuan, nupi ṭhit va ngeih, chungkhar zohkhenh le tar hi maw a si. Asiloah a dang zei thil dah a um rih hnga tiah na ruat bal maw? (Job 14:1, 2) Mah kong kha mifim pawl hmanh nih an ruah tiah Baibal nih a langhter.—Phungchimtu 2:11 rel.

Nun hnawhchanmi a um maw? A phi hngalh awkah nunnak hi zeitindah aa thawk ti kha kan hal hmasa a hau. Khuaruahhar awk ngai a simi kan thluak le kan pum sining hna an hlathlai hnuah Sertu a um lai tiin mi tampi nih biachahnak an tuah. (Salm 139:14 rel.) Cutin a si ahcun Pathian nih minung a sernak a ruang a um lai ti cu a fiang ko. Mah a ruang kha kan hlathlai ahcun kan nunnak hi sullam a hung ngei deuh lai.

Pathian nih hmasa bik minu le mipa kha thluachuah a pek hna i lungthawh awk ngai a simi rian pakhat zong a pek hna. An ca i aa tinhnak cu fa tampi in ngeih ding, vawlei kha paradis ah canter ding le zungzal in nun ding a si.—Genesis 1:28, 31 rel.

Pathian nawl an ngaih lo caah Pathian tinhnak cu a rak tling lo. Asinain Pathian nih a kan hlaw lo i minung le vawlei ca i aa tinhnak zong a thleng lo. Pathian nih vawlei ca i aa tinhnak tlinter awk le zumhawktlakmi a salle khamh awkah rian a ṭuan tiah Baibal nih a ti. Cucaah Pathian nih aa tinhmi nunnak kha hmuhter aan duh. (Salm 37:29 rel.) Pathian tinhnak hna in zeitindah ṭhatnak ka hmuh khawh lai ti na hngalh nakhnga Baibal ah hlathlai.