Costa Rica rilikam i nichuahlei ah a ummi Puerto Limón tilawng dinhnak khua le a pawngkam ah a ṭhangmi ka si. Unau pariat kan si i kei cu a pasarihnak ka si. Kumriat ka si ah ka pa nih a kan thihtak i ka nu nih amah lawng tein a kan zohkhenh.

Baseball celh cu ka caah a biapi tukmi a si. Ka ngakchiat lio tein zaanglente celh kha ka huam. Kumhrafai ka si tikah nuamhnak ca men in dirhmi phu ah kaa tel ve. Kum 20 leng ka si tikah mingiatu pakhat nih Nicaragua ram i lente celh man pek a simi phu ah i celh dingin a ka sawm. Asinain mah lio caan ah ka nu cu a dam lo i keimah nih ka zohkhenh caah Nicaragua ram i va um ding kha ka duh lo. Cucaah mah sawmnak kha ka rak al. A hnuah, a dang mingiatu pakhat nih Costa Rica ram aiawh in dirhmi baseball phu ah i celh dingin a ka sawm. Mah tikah ka cohlan. 1949 in 1952 tiang ram aiawh in dirhmi phu ah kaa celh i Cuba, Mexico le Nicaragua ram hna zongah kaa celh. Baseball kha ṭha tein kaa celh khawh caah palhnak um loin voi 17 tiang hmanh a peh tein kaa celh khawh. Mipi nih ka min an aumi ka theih tikah kaa nuam tuk.

Ngaihchiat awk ngai a simi cu ziaza rawhralnak lam ah ka phan. Nungak cu pakhat lawng ka ngei ko nain a dang nu tampi he zong kaa pehtlai. Zu zong ka ding tuk. Voikhat cu zu ka rit tuk caah a thaizing i kaa ṭhangh tikah zeitindah inn ka rak ṭin ti hmanh kha kaa cinken ti lo. Domino zong kaa celh i awngbali zong ka ṭhu.

Cu bantukin khua ka sak lioah ka nu cu Jehovah Tehte pakhat a hung si. A zumhnak kong hna kha a ka chimh ko nain a hmasa ahcun a hlawh a tling lo. Zaanglente celh dah ti lo cun zeihmanh ka huam lo. Baseball celh kan cawn ahcun rawl ei caan hmanhah ka paw a ṭam lo. Lente celhnak lawngah ka lungthin cu a um. Zeidang vialte nakin baseball celh kha ka duh bik.

Asinain kum 29 ka si lio i lente kan i celh lioah bawlung tlaih kaa zuamnak ah fakpi in kaa khawng. Ka dam ṭhan hnuah mah  phu in ka chuak. Asinain ka inn pawngah nuamhnak caah dirhmi baseball phu ah saya pakhat in ka ṭuan ṭhan.

1957 ah baseball ka rak i celh tawnnak lente celhnak inn ah Jehovah Tehte Hna nih an tuahmi pengkomh civui ah kaa pum. Mipi ṭhutnak i ka ṭhut tikah Jehovah Tehte Hna i upat awk a tlakmi an umtuning le baseball lente celhnak ah ka rak hmuh tawnmi, a aukhuangmi mipi i an umtuning aa dan tukmi kha ka hun hmuh. Mah nih Jehovah Tehte Hna he Baibal hlathlai awk le i pumh awkah a ka forh.

Ka hun hngalhmi Baibal cawnpiaknak hna nih ka lung a ka suk tuk. Tahchunhnak ah, Jesuh nih ni hmanung bik caan ah a zultu hna nih vawleicung pumpi ah Pathian Pennak kong thawngṭha an chim lai tiah a rak chimchung. (Matthai 24:14) Cun a hmaanmi Khrihfa hna cu tangka hmuh duh ruangah phung an chimmi a si lo ti zong ka hun hngalh. Jesuh nih “man pek loin nan hmuh i man pek loin va pe ve hna u” tiah a ti.—Matthai 10:8.

Baibal ka hlathlai tikah Baibal chimmi le Jehovah Tehte Hna tuahsernak kha ka tahchunh. Vawleicung pumpi ah Pathian Pennak kong thawngṭha a karh nakhnga fakpi in an i zuammi nih ka lung a ka suk tuk. Jesuh nawl pekmi, Khrihfa hna nih langhter awk a simi pek duhnak lungput kha an sinah ka hmuh. Marka 10:21 i “Ra law ka zul” timi Jesuh sawmnak kha ka rel tikah Jehovah Tehte pakhat si ka hun duh ve.

Asinain ka biakhiahnak ningin tuah awkah caan tlawmpal ka la. Tahchunhnak ah, zarh fatin keimah “vanṭhatnak a ka pemi” nambar in awngbali ka ṭhunak hi kum tampi a si cang. Asinain “Vanṭhatnak pathian” a biami le a hak a kaumi cu Pathian nih a huat hna ti kha Baibal in ka hun hngalh. (Isaiah 65:11, NW; Kolose 3:5) Cucaah awngbali ṭhu ti lo dingin bia ka khiah. Awngbali ka ṭhu ti lonak in a voikhatnak Zarhpi Ni ah keimah “vanṭhatnak a ka pemi” nambar nih teinak a hmuh. Mah zarh i ka ṭhu lo ruangah mi nih an ka nihsawh i ṭhu ṭhan awkah fakpi in an ka hnek. Asinain ka duh lo. Awngbali kha zeitikhmanh ah ka ṭhu ti lo.

Jehovah Tehte Hna tuahmi pengkomh civui pakhat ah tipil ka ing. Mah ni ah “mihring thar” hruknak he aa tlaiin hneksaknak pakhat ka tong. (Efesa 4:24) Mah zanlei ah hotel i ka ṭin tikah a hmasa ka nungak nu nih ka khaan hmaiin a rak ka hngahmi kha ka hmuh. “Sammy, caanṭha hmangṭi u sih” tiah a ka ti. Asinain “ka duh lo” tiah ka leh colh. Atu cu ziazalei he aa tlaiin Baibal phunglam ningin ka nung cang tiah ka ti. (1 Korin 6:18) Mah tikah “zeitin ee?” tiah a vun ka auhnawh. Nupa sualnak he aa tlaimi Baibal hmuhnak kha zei ah a rel lo i a hlan bantukin i pehtlaih ṭhan awkah a ka hnek. Asinain ka khaan chungah ka luhtak i innka ka khar. 1958 i Jehovah Tehte pakhat ka si ni thawkin ka nunning kaa thlenmi kha zumhfek tein kaa tlaih peng caah kaa lawm tuk.

Baibal lamhruainak zulhnak thawngin ka hmuhmi ṭhatnak hna kha cauk pakhat in ka ṭial khawh lai tiah ka ruah. Mah lak i cheukhat cu atu ah hawikom ṭha tampi ka ngeihmi, ka nunnak sullam a ngeihmi le nuamhnak taktak ka hmuhmi hna hi an si.

Atu tiang baseball celh kha ka duh rih ko nain ka sunsakmi tu cu aa dang cang. Baseball kaa celh lioah cun minthannak le tangka cu ka hmu ko nain mah cu an hmun lo. Asinain Pathian he a ṭhami pehtlaihnak ka ngeihmi le vawleicung pumpi unaurual lakah kaa telmi tu cu zungzal in a hmunmi an si. Baibal nih hitin a ti: “Vawlei le a chung i a ummi thil minung nih an duhmi hna hi an lo cuahmah cang; sihmanhsehlaw Pathian duhnak a tuahmi cu zungzal in an nung.” (1 Johan 2:17) Atu ahcun zeidang vialte nakin Jehovah Pathian le a miphun kha ka duh deuh cang.