Khuari thawng bantukin rang pawl cu phawhhnih in an tli thluahmah. A ṭhawngmi rang pali le aa citmi hna kha Baibal nih a langhter hna tikah a fiang tuk i Baibal chungin a rak chuak taktak dingmi an lo. A pakhatnak cu rang raang a si i a liannganmi siangpahrang thar nih aa cit. A hnulei in rang sen nih a zulh i vawleicung in daihnak laknak nawl a ngeimi nih aa cit. A pathumnak a simi rang nak nih a hnulei in a hun zulh, ei-din a har lai timi thawngpang chia langhternak caah rang aa citmi nih cuaithlainak aa put. A palinak cu rang rau diapduap a si i aa cittu cu Thihnak a si, mah cu zawtnak le thihnak a chuahter khomi rai hna a um lai tinak hmelchunhnak a si. Minung nunnak a la hngami thlan nih a hnuah naih tein a hun zulh.—Biathlam 6:1-8.

“Rang aa cittu pali kong a hmasa bik ka rel lioah ka rak ṭih tuk. Biaceihnak Ni cu a ra cang lai, kei cu timhcia ka si rih lo caah khamh ka si lai lo tiah ka rak ruah.”—Crystal.

“A rong aa khat lomi rang pali le aa citmi pali kong nih ka lung a ka lak tuk. Mah langhnak i a sullam kha ka hun hngalhthiam tikah ka caah sullam a ngei tuk.”—Ed.

Biathlam Baibal cauk chung i rang aa citmi pali he aa tlaiin Crystal asiloah Ed bantukin na intuar ve maw? Zeiti a si hmanhah rang aa citmi pali kong cu Baibal cauk i a donghnak Biathlam cauk ah aa telmi, a lang ngaimi langhnak hna lakah pakhat a si. Mah langhnak i a sullam kha ka hngalhthiam ahcun ṭhatnak ka hmu kho ti kha na hngal maw? Zeitin in dah? Biathlam cauk ah aa ṭialmi kong hna a relmi le a hlathlaimi, cun mah ningin a zulmi cu lunglawmhnak taktak an hmu lai tiah Pathian nih bia a kan kamh.—Biathlam 1:1-3.

Rang aa citmi pali kong langhnak cu a cheu caah ṭihnung a si ko nain a tak ti ahcun ṭih ding a si lo. Mi nuai tampi cu mah langhnak thawngin an zumhnak a fek chin i hmailei kong an i ruahchannak zong a ceu chin. Na ca zongah cutin a si kho. Zaangfahnak in rel thluahmah rih.