A PHAW CAPAR | Rang Aa Citmi Pali—Na Cungah Huham An Ngeih Ning
Rang Aa Citmi Pali—Ahote Dah An Si?
Rang aa citmi pali cu hngalh awkah a harmi le ṭih a nungmi an lo ko nain cutin an si lo. Zeicah? Rang aa citmi pakhat cio nih zeidah an langhter ti kha Baibal le tuchan ah a cangmi thil sining hna nih fiang tein hngalhthiam awkah a kan bawmh. An i citmi nih vawleicung ah a cangmi harnak hna kha a langhter ko nain mah cu nangmah le na chungkhar caah thawngṭha zong a si kho. Zeitin in dah? Pakhatnak ah, rang aa citmi pakhat cio nih zeidah an langhter ti kha zoh hna u sih.
Rang Raang Aa Citmi
Langhnak cu hitin aa thawk: “Ka hun zoh i rang raang pakhat ka hmuh. A cung i aa citmi nih cun likuk pakhat aa put i amah cu bawiluchin pakhat an pek. Teitu nih tei awkah aa thawh bantukin aa thawh.”—Biathlam 6:2.
Rang raang aa citmi cu ahodah a si? A phi cu Biathlam Baibal cauk chungah hmuh khawh a si, mah ah vancung i rang aa citmi cu “Pathian Bia” a si tiah a langhter. (Biathlam 19:11-13) Bia timi min cu Jesuh Khrih nih a ngeihmi min a si, zeicahtiah anih cu Pathian aiawh in bia a chimtu a si. (Johan 1:1, 14) Mah lengah anih cu “siangpahrang vialte Siangpahrang le bawi vialte Bawi” tiah auh a si i “Zumhawktlak le A hmaanmi” ti zongin auh a si. (Biathlam 19:16) Jesuh cu ral a domi siangpahrang pakhat in nawl a ngei ko nain a nawlngeihnak kha ningcang loin a hmang lo. Asinain biahalnak cheukhat a chuak.
Jesuh kha teinak hmuhnak nawl aho nih dah a pek? (Biathlam 6:2) Profet Daniel nih “Minung a lomi” Messiah kong langhnak pakhat a hmuh. Jesuh kha “bawinak le sunparnak le siangpahrang ṭhawnnak” a pemi cu “zungzal in a nungmi” Jehovah Pathian dah ti lo cun ahohmanh an si kho lo. a (Daniel 7:13, 14) Cucaah Jesuh cu A Ṭhawng Bikmi Pathian nih ṭhawnnak, uknak le biaceihnak nawl a pekmi a si. Baibal nih a raangmi rong cu dinnak caah a hman tawn. Cucaah rang raang nih Pathian Fapa nih dinnak he ral a doh lainak kha a langhtermi cu aa tlakmi a si.—Biathlam 3:4; 7:9, 13, 14.
Zeitik in dah rang cu an hun i cit? A pakhatnak rang aa citmi Jesuh nih bawiluchin a hmuhle cangka a hun i cit ti kha i cinken. (Biathlam 6:2) Jesuh cu zeitik in dah vancung ah Siangpahrang a si? A thih hnu i vancung a kai cangka in a si lo. Caan caankhat chung a hngah ti kha Baibal nih a langhter. (Hebru 10:12, 13) Zei can dah a hngah lai i zeitik in dah vancung ah uktu a ṭuan lai ti hngalhthiam awkah a zultu pawl kha a bawmh hna. A uknak aa thawk tikah vawleicung thil sining hna cu an chia chin lai tiah a ti. Raldohnak, mangṭam le zawtnak hna a um lai. (Matthai 24:3, 7; Luka 21:10, 11) 1914 i Vawleicung Ralpi Inak aa thawk hnu tlawmpal ah minung cu Baibal nih “ni hmanung bik” tiah a auhmi harnak caan chungah an lut ti cu a fiang.—2 Timote 3:1-5.
1914 ah Jesuh siangpahrang a si ahcun thil sining hna cu ṭhat chin loin zeicah a chiat chin? Mah lio caan ah Jesuh nih vawleicung ah si loin vancung ah uknak a thawk caah a si. Vancung ah raldohnak a um i Mikhael tiah auhmi Siangpahrang thar Jesuh nih Satan le a khuachia pawl kha vawlei ah a thlak hna. (Biathlam 12:7-9, 12) A nawlngeihnak rikhiahpiak a simi Satan cu caan tawite lawnglawng ka ngei cang ti a hngalh caah a thin a hung tuk. Pathian nih Satan cu a hrawh lai i vawleicung ah a duhnak a tlinter lai caan cu a nai tuk cang. (Matthai 6:10) A dang rang aa citmi pathum nih harnak caan a simi “ni hmanung bik” caan ah kan nung ti zumh awkah zeitindah a kan bawmh ti kha zohhmanh u sih. A pakhatnak rang aa citmi bantukin mi pakhat kha an langhtermi a si lo, a dang pathum nih cun minung bu hna fakpi in a hnorsuang hngami vawleicung thil sining kha an langhter.
RANG SEN AA CITMI
“Rang dang pakhat a hung chuak i rang sen a si. A cung i aa citmi cu vawleicung i ral thawhternak ṭhawnnak kha an pek, cucu zeicahdah a si tiah, mi kha pakhat le pakhat i that hna seh ti caah a si; amah cu vainam nganpi an pek.”—Biathlam 6:4.
Rang sen aa citmi nih raltuknak kha a aiawh. Miphun tlawmpal sin lawngah si loin vawleicung dihlak i daihnak kha a lak tiah a ti. 1914 ah minung tuanbia lakah a voikhatnak vawleicung pumpi raltuknak a um. Mah hnuah a hmasa nakin rawhnak a tam deuhmi vawlei ralpi pahnihnak nih a hun zulh. 1914 thawkin raltuknak le ralchanhnak ruangah a thimi hi nuai 100 leng an si cang tiah cheukhat nih an ti. Cun hliamnak a tongmi zong an tampi.
Tuchan ah raldohnak hna cu zeitluk in dah an i thleidan? A hlan bantuk hmanh si loin minung nunnak vialte ci hmih khawh dawh a si. UN ti bantuk daihnak a sermi bu hmanh nih rang sen aa citmi kha an kham kho lo.
RANG NAK AA CITMI
“Ka hun zoh i rang nak pakhat ka hmuh. A cung i aa citmi nih cun cuaithlainak pakhat aa put. Saram nung pali hna lakin a chuakmi aw a lomi aw pakhat ka theih i cu aw nih cun, ‘Nikhat ni hlawh caah changvut cu khiat khat, barli cu khiat thum. Sihmanhsehlaw oliv chiti le mitsurhang cu hrawk hna hlah,’ a ti.”—Biathlam 6:5, 6.
Rang nak aa citmi nih mangṭam kha a aiawh. Changvut khiat khat (1.08 L) ah ngun tangka phar khat a si, mah cu kumzabu pakhatnak lio i nikhat ni hlawh a si caah rawl a har tukmi kha a langhter. (Matthai 20:2) Ngun tangka phar khat nih changvut a chia phun barli kha khiat thum (3.24 L) a cawk khawh. Innchungkhar a tammi nih cun zeitindah an ei khim lai? Mah lio caan ah nifate a bik in ei-dinmi oliv chiti le wine hna kha semrel awkah ralrin pek an si.
Rang nak aa citmi cu 1914 thawkin aa cit ti a langhtermi thil sining kha kan hmu cang maw? Kan hmuh cang. Kumzabu 20 chungah mangṭam in a thimi hi nuai 70 hrawng an si. Report pakhat nih “2012-2014 karah mi nuai 805 cu vatamin an chambau, mah cu vawleicung milu pakua ah pakhat tluk hrawng an si” tiah a ti. Cun a dang report pakhat nih “Kum fatin AIDS, malaria le TB zawtnak ruangah a thimi nakin mangṭam ruangah a thimi cu an tam deuh” tiah a ti. Mangṭam a tongmi hna bawmh awkah fakpi in an i zuam ko nain rang nak aa citmi cu a kal thluahmah rih ko.
RANG TAU DIAPDUAP AA CITMI
“Ka hun zoh i rang rau diapduap pakhat ka hmuh. A cung i aa citmi cu a min ah Thihnak a si i Hell nih a hnulei in a zulh. Vawleicung cheuli cheukhat uknak nawl kha pek an si i ral in siseh, mangṭam in siseh, rai in siseh, sahrang in siseh, mi thah khawhnak nawl kha pek an si.”—Biathlam 6:8.
A palinak rang aa citmi nih zawtnak le a dang ruangah a chuakmi thihnak kha a aiawh. 1914 hnu tlawmpal ah Spain raifanh nih mi nuai tampi kha a thah hna. Mah zawtnak nih mi nuai 500 hrawng kha a chawnh hna i pathum ah pakhat lawng an nung.
Asinain Spain raifanh cu a thawknak lawng a si rih. Thiamsang pawl nih kumzabu 20 chungah mi nuai tampi cu raise zawtnak ruangah an thi tiah an ti. Tuchan ah siilei fimthiamnak cu a ṭhangcho ko nain mi nuai tampi cu AIDS, malaria le TB zawtnak ruangah an thi.
Raldohnak, mangṭam le zawtnak hna ruang i a phichuak cu thihnak a si. Thlan nih zei bantuk ruahchannak hmanh pe loin, ngol hngal loin a pumh ko hna.
A ṬHA DEUHMI CAAN A RA LIO
Atu i harnak caan cu a rauhhlan ah a dong cang lai. 1914 ah Jesuh cu “teitu nih tei awkah aa thawh bantukin aa thawh” i Satan kha vawlei ah a thlak, asinain teinak tling cu a hmu rih lo ti kha i cinken. (Biathlam 6:2; 12:9, 12) A rauhhlan i a ra lami Armageddon ah Jesuh nih Satan huham vialte le Satan a bawmmi minung vialte kha a hrawh dih cang hna lai. (Biathlam 20:1-3) Jesuh nih a dang rang pathum aa citmi hna lawng kha donghter si loin anmah ruangah a chuakmi rawhralnak vialte zong a remh ṭhan dih lai. Zeitin in dah? Baibal nih zeitindah bia a kan kamh ti kha zohhmanh.
Raltuknak a um ti lai lo i daihnak a um cang lai. Jehovah nih “vawleicung pumpi ah ral cu a daihter dih ko hna, likuk cu a khiah hna i fei cu a hrawh dih.” (Salm 46:9) Daihnak a duhmi hna nih “daihnak kha tlamtling tein an hmuh lai.”—Salm 37:11.
Mangṭam a um ti lai lo i rawl tampi a um cang lai. “Ram chungah rawl tampi in um ko seh; Lebanon tlang i a ummi rawl kung ṭha bantuk nih tlang vialte cu tuam dih hna seh.”—Salm 72:16.
Jesuh nih a dang rang pathum aa citmi hna ruangah a chuakmi harnak vialte kha a rauhhlan ah a remh dih lai
Zawtnak le thihnak a um ti lai lo i mi vialte cu a tlingmi ngandamnak he zungzal in an nung cang lai. Pathian nih “an mitthli vialte kha a hnawh dih hna lai. Thihnak a um ti lai lo, ngaihchiatnak le ṭahnak le fahnak zong a um ti lai lo. Thil hlun vialte cu an lo dih cang.”—Biathlam 21:4.
Jesuh nih vawleicung a um lioah hmailei i amah nih a uk tikah zei bantuk thil sining hna dah a um lai ti kha a rak langhter chung. Daihnak a umter, mi thong tampi kha khuaruahhar lam in rawl a dangh hna, mizaw a damter hna i mithi hmanh kha a nunter ṭhan hna.—Matthai 12:15; 14:19-21; 26:52; Johan 11:43, 44.
Rang aa citmi pali nih an i cit dih tikah zeitindah timhcia na si khawh ti kha Jehovah Tehte Hna nih Baibal in hmuhsak an in duh. Tam deuh in hlathlai awkah an in sawm.