Baibal tuanbia a hmaan ti a langhtermi thilhlun hlathlaitu pawl hmuhmi a um maw? 2014 ah chuahmi mekazin pakhat (Biblical Archaeology Review) i capar pakhat ah, “Hebru Baibal chungin minung pa zeizat dah thilhlun hlathlaitu pawl nih an cohlan hna?” timi biahalnak aa tel. “A tlawm bik ah minung 50 hrawng an si” tiah a phi a pek. Mah capar i cazin chungah aa tel lomi pakhat cu Tattenai a si. Amah cu ahodah a si? Baibal ah langhtermi a kong tawite kha zohhmanh hna u sih.

Jerusalem khua cu Persia nih a ukmi ram tampi lakah aa tel bal ve. Mah khua cu Zufrates tiva i nitlaklei, Persia mi nih Tiva Ral tiah an auhmi hmun ah a um. Persia nih Babilon a tei hnuah sal taangmi Judah mi hna kha a thlah ṭhan hna, cun Jerusalem khua i Jehovah biakinn kha sak ṭhan awkah nawl a pek hna. (Ezra 1:1-4) Asinain Judah mi hna ral pawl nih innsaknak rian kha an khenkham i Persia kha an ralchanh tiah a hmaan loin sual an puh hna. (Ezra 4:4-16) Darius I nih a uk lioah (BC 522-486), Persia bawi pakhat a simi Tattenai nih mah kong kha a hlathlai. Baibal nih amah cu “Tiva Ral ram a uktu bawi” tiah a auh.—Ezra 5:3-7.

Tattenai timi min aa ṭialnak cuneiform ca tampi cu chungkhar thinhlun khonnak i chuahkehnak cazin ah atu tiang a um rih. Cuneiform ca pakhat ah mah cazin chung i mi pakhat kha Baibal ah aa telmi mi pakhat he pehtlai in a langhter. Mah ca cu BC 502, Darius I i a uknak kum 20nak nithla aa khenhmi biahrennak ca a si. Mah ca ah, “Tiva Ral ram a uktu bawi Tattannu” i a rianṭuantu pakhat kha rian pakhat caah tehte in a langhter. Tattannu timi cu Ezra Baibal cauk ah a kong ṭialmi Tattenai kha a si.

Tattenai i a rian cu zeidah a si? BC 535 ah A Liannganmi Sairas nih a ukmi ram hna kha ramṭhen in a dirh hna, mah lak i pakhat cu Babilon le Tiva Ral tiah auh a si. A hnuah mah ramṭhen cu ṭhenhnih ah aa ṭhen i ṭhenkhat kha Tiva Ral tiah an auh. Mah ah Coele-Siria, Foinisia, Samaria le Judah ram hna an i tel i Damaskas khua in rak uk dawh a si. Tattenai nih mah ram hna kha BC 520 hrawngin 502 tiang a uk.

Tattenai cu Judah mi nih Persia an ralchanh timi kong hlathlai awkah Jerusalem khua ah a va kal. Mah hnuah Jehovah biakinn sak ṭhan awkah Sairas sinin nawl an hmuhmi a si ti kha Darius sinah thawng a thanh. Siangpahrang inn i thilhlun khonnak ah an kawl tikah mah cu a hmaan ti kha an hmuh. (Ezra 5:6, 7, 11-13; 6:1-3) Cucaah Tattenai cu Judah mi kha hnahnawh lo awkah nawl pek a si i mah ningin a rak tuah.—Ezra 6:6, 7, 13.

“Tiva Ral ram a uktu bawi Tattenai” timi min cu tuanbia ah zeihmanh a si lo. Asinain Baibal nih cun a kong le a rian ṭuanmi kha a dikthliar in a langhter. Mah cu Baibal tuanbia a hmaan ti a langhtermi thlihlun hlathlaitu hna hmuhmi lakah langhternak pakhat a si.