Éxodo 10:1-29
10 Ari icantajiri aisati Tasorentsi Moiseshi:
—Pijatashitajeri aisati pincatsari. Tempa narotaque cantacaashireacaacariri aisati amitacoyetiriri inquisoshiretasanotanteari, nonijaasanojeitanteariri antearoite caari ineapinijeiti ora nanteri,
2 pincamantajeitanteariri coajicani pitomipee aisati picharinepee, noshirontimentajeitacari egiptosatipee aisati nonijaasanojeitaqueri caari ineapinijeiti. Irotaque piojeitantenari narotaque Tasorentsisanori.
3 Irosati ijatashitantajari Moiseshi jeri Aarón pincatsari, icantavetapaajari:
—Aitaque icantiri Tasorentsisanori, yora ipincatsajeitiri noshanincapee: ‘¿Jaoca oncarate pojoquero pitseencana, pimpincatsatantajenari? Pishinejeitajeri noshanincapee irijajeitaje, impincatsajeitantapaajenari.
4 Irosatirica pincantea pimpiatsatena, eirorica pishinejeitajiritsi irijajeitaje, osaitequerani nontiancajeitempiri tsinaropee piipatsitequi. Oshequi catsini irinajeitapee, intsoteanaquero maaroni Egiptoni, eiro oconijatanajitsi quipatsi. Impoiji iroajeitapemparo ora capichaji panquirentsipee caari otsoncayetanaque iriniqui, aisati inquempejeitanaquero iroori inchatopee oantsipeequiniri.
5 -
6 Aisati ijaanaquearo pivincatsarimento jero ivancopee amitacoyetimpiri aisati maaroni pishanincapee egiptosati. ¡Oca pineajeiteri, teeyea irineeroni pirini jeri picharinepeeni irosati meeca!’
Itsoncantanacarori ineaveeti Moiseshi pincatsari, irosati isoquijantanaja ivincatsarimentoqui faraón.
7 Irosati icantantajeitanaca amitacoyetiriri:
—¿Jaoca oncarate iroashinoncaacantaapinijeitee yoca shirampari? Novincatsarite, ¡pishineteri irijajeitajeta impincatsatapaajeri itasorentsite, icantiri Tasorentsisanori! ¿Tempa pinquenqueshiretimateroji aneajeitaqueri oashinoncantsipee, otsoncaarantajeitaquee?
8 Irosati icajemacantantanajari Moiseshi jeri Aarón. Ari icantavajiri:
—Pijajeitajequeti pimpincatsajeitapaajeri picantiri Tasorentsisanori, Pitasorentsite. Iro cantaincha nocoi pincamantena, jaanica jajeitatsine.
9 Ari icantanaqueri iriori Moiseshi:
—Maaroni naajeitanaqueri noshanincapee. Tecatsi savicajeitanajantsine aisati iriori novishatepee jeri novacatepee. Irotaque nonquimoshireventasanojeitanteariri Notasorentsite.
10 Iro cantaincha icantanaqueri pincatsari:
—¡Niotacotaquempi te oncameetsateji picoajeitaqueri! ¿Pijijeitimpa quiso iroanaquempi Pitasorentsite, aisati pijijeitimpa ario noshinetaquempiri jananequipee irijajeite?
11 Eiro pimatirotsi paajeitanaqueri. Irintiquea paajeitanaque antearipee, pimpincatsajeitanteariri Pitasorentsite, tempa irotaque picoajeitaqueri.
Irosati yojocacantantacari isavicamentoqui.
12 Ari icantajiri aisati Tasorentsi Moiseshi:
—Poanquero paco, pijicotajero Egipto impocajeitanteari tsinaropee iroajeitantapemparori panquirentsipee aisati maaroni caari otsoncanaque iriniqui.
13 Ari yoancanaquero iraco, irosati itiancantacaro Tasorentsi tampea oquenapaaque isoquijapiniti catsirincaiteri. Ocantani ojeoncapinitaque quitaiteriqui aisati tsiteniriqui. Ari oquitaiteamanaji, irosati amajeitantacari oshequi catsini tsinaropee.
14 Itsoteajeitapaaquero maaroni Egiptoni. Peerani te intimeji, aisati eiro itimajitsi coajicani iquempetaca meeca yoshequiasanotaque catsini.
15 Yapataapaaquero quipatsi, te onconijatanajeji. Yoajeitapaacaro maaroni panquirentsipee aisati oitsoquipee timaarantayevetanajanchari otsoncaarantanaqueri iriniqui. Te catsini ontimanaje inchatoshipee, eereshiyevetanajanchari oantsipeequi.
16 Ineantacariri pincatsari, intsipaite icajemacantanajiri Moiseshi jeri Aarón. Icantavajiri:
—Oshequi nantimojeitaqueri caari cameetsatatsi picantiri Tasorentsisanori pitasorentsite aisati noquempetaquempi avirori.
17 Iro cantaincha aparo meeca noncantajempi, pimpeacotajenaro oca nantaqueri caari cameetsatatsi. Aisati pamanacoventajena Pitasorentsitequi, arioyeata iroimpeajeri yocapee tsoncantatsiri.
18 Isotoantanajari Moiseshi jeri Aarón, irosati iquenquetsatacantapaajari Tasorentsi.
19 Irosati yoipiantajaro antearo tampea oquenanaji iqueapiniti catsirincaiteri. Aajeitanajiri tsinaropee, oviincajeitajiri incajarequi Quitioncari. Tecatsi catsini timanajantsine aparo Egiptoqui.
20 Iro cantaincha icantacaashireacaajari Tasorentsi pincatsari iquisoshiretantanajari aisati, te irishinejeitajeri ishanincapee Israel irijajeitaje.
Nuevetatsiri oashinoncantsi: otsitenitanaque
21 Ari icantajiri aisati Tasorentsi Moiseshi:
—Poancajero paco jenoqui, ontsitenitanaqueta maaroni Egipto. Ora tsiteniri tsimoirotasanotatsiri imayeetiri impamiyeetero.
22 Irosati yoancantanajaro, irosati omapocantanaca antearoite otsitenitasanotanaque maaroni Egiptoqui.
23 Ocarati mava quitaiteri te irimajeitanajeaji irineavacaajeitanajea. Icantani isavicajeitaque ivancopeequi. Aintiquea isavicajeitinta ishanincajeitaniri Israel, te ontsiteniteji; irosati ocanta oquitaiteti.
24 Irosati icajemacantantanajari pincatsari Moiseshi jeri Aarón, icantavajiri:
—Pijatequeti meeca anta pimpincatsatanteariri Pitasorentsite, paajeitanajeri pitomipee. Iro cantaincha pojocajeitanajeri povishatepee jeri pivacatepee.
25 Iro cantaincha icantanaqueri iriori:
—¡Eirovee, avirotaque pavaquenane pivirapee nontaapeeneriri Novincatsarite Tasorentsi nompincatsatanteariri!
26 Ontimatiye naajeitanaqueri maaroni novirapee, tecatsi aparoni timanajantsine. Iriotaque noncoyearanteri nompincatsatanteariri Notasorentsite. Tequerata meeca nareejeitea, te niojeiteji paitarica incoacayenari nonashitacayeari nompincatsatanteariri.
27 Iro cantaincha icantacaashireacaajari Tasorentsi pincatsari iquisoshiretantanajari. Te irishinejeiteriji irijajeite.
28 Irosati iquisatsatantacari Moiseshi, icantiri:
—¡Pijatanaje meeca aca! ¡Paamaventea pipocajicari pineajena aisati! ¡Ariorica pimpiaje pineajena, aitaque pincamaque!
29 Ari icantanaqueri iriori Moiseshi:
—Jee, cameetsataque picantaquenari; eiro nopiajatsi noneajatempi.
