Éxodo 11:1-10
11 Ari icantajiri Tasorentsi Moiseshi:
—Apanivani nontiancajeneri oashinoncantsi pincatsari aisati ishanincapee. Ariorica irineajeitavajero, eiro ishinetashitajimpitsi pisoquijashitanajea apaniro, irisati tiancajeitajempi, pisoquijajeitantanajeari.
2 Meeca pincanteri maaroni pishanincapee, shiramparipee aisati tsinanepee incoacojeitapanainterita egiptosati itsipanampiyetari vetsicayetachari oropee jeri plata.
3 Ari icantacashireacaajeitacari Tasorentsi egiptosati, yaacameetsajeivetanajari ishanincapee Israel. Aisati iriori amitacoyetiriri pincatsari, iquempetacantanaqueri Moiseshi irio pincatsari aisati iquempejeitaca maaroni ishanincapee.
4 Ari icantapaajiri Moiseshi pincatsari.
—Aitaque icantiri Tasorentsi: ‘Ariorica onianquiiteanaque, coraquena navisanaquero maaroni Egiptoni,
5 incamajeitanaque itomipee egiptosati jivayetatsiri itimi. Irintanaquearo itomi pincatsari jivatatsiri itimi savicantearone ivincatsarimento, irosati otomipee iveranaro jivatatsiri itimi antaveetatsiri otononcaitanta tirico. Aisati incamayetanaque maaroni irijanipee virantsi jivayetatsiri itimi.
6 Ontsoteanaquea maaroni Egiptoqui antearoite iriraacojeiteri camayetatsineri. Oca irineeri, teeyea irineapiniteroni aisati eiro ineajirotsi coajicani.’
7 Irotaque piojeitanteariri Tasorentsi inashitacaajeitacari egiptosati aisati ishanincapee Israel. Eiro catsini itsarotimatiritsi otsitipee atiri aisati iriori ivirapee.
8 Irosati irijatashitantanaquena maaroni amitacoyetimpiri, intiyeroashijeivetapeena. Incantajeivetena: ‘¡Meeca pijataje, paajeitanajeri maaroni pishanincapee! Incantajeivetapeenarica, eiro nojajeititsi.’
Oshequi itsimaasanotanaca Moiseshi, irosati ishitoapitsatantanajari pincatsari.
9 Tempa irotaque icantaqueriri Tasorentsi Moiseshi incaranqui:
“Eiro iquemisantajeitimpitsi pincatsari, aitaque nontiancajeitajeneri egiptosatipee oashinoncantsipee ora caari ineapinijeiti, nonijaasanotanteariri notasorenca.”
10 Yora Moiseshi jeri Aarón yonijaasanoyevetacari pincatsari maaroni caari ineapinijeiti. Iro cantaincha icantacaashireacaacari Tasorentsi iquisoshiretantacari, caari ishinetantajari isoquijajeitanaje ishanincapee Israel.
