Éxodo 13:1-22
13 Jero pashini icantaqueriri Tasorentsi Moiseshi:
“Ocameetsati pinashitacayenari maaroni jivayetatsiri itimi, tempa maaroni itomipee pishaninca jivayetatsiri itimi, iriojeitaque nashi. Aisati pinquempeteri maaroni irijani ivirapee jivayetatsiri itimi.”
2 -
3 Irosati icantantacari Moiseshi ishanincapee:
“Pinquenqueshiretapinijeitero ora quitaiteri yonijaajeitantaqueerori Tasorentsi itasorenca. Yoipacaacoventajeitantajeeri iperanajeitanteevetaqueerini egiptosati. Eiro poajeitarotsi tanta conoachari tapiacaarori.
4 Tempa irotaque quitaiteri aisati cashiri icanteetiri Abib, ashitoantajeitanajari Egiptoqui. Yora cashiri irotaque piveshireimentapinijeitanteariri Tasorentsi. Iraajeitantanajempiri anta quipatsiqui oshiocayetapai maaroni panquiveerentsiyetatsiri, eiro ocoiteimojeitimpitsi paitapeerica. Irotaque quipatsi icantasanotitacariri intacantajeitaqueerini: ‘Coajica nompajeiteri pishanincajeitajeari; irotaque irisavicantajeitajeari.’ Tempa aitaque isavicajeitiri cananeopee, yora hititapee, amorreopee, heveopee jeri jebuseopee.
5 -
6 Aisati oncarate 7 quitaiteri poapinijeitantearori tanta caari tapiacha. Iro vecarantapaarori quitaiteri sietetatsiri, irotaque piveshireimentasanojeitanteariri Tasorentsi, pimpincatsatanteariri. Eiro catsini otimayetitsi tanta tapiayetachari ivancopeequi ashanincapee.
7 -
8 Irotaque pincamantajeiteriri pitomipee jeri pishanincajeitajeari coajicani: ‘Oca nantajeitiri, noquenqueshirejeitiro peerani yomishitoajeitantajanari Tasorentsi nosavicantajeivetacaniri Egiptoqui.
9 Oca pantapiniteri, irotaque pinquenqueshiretapinijeitantearori maaroni icantacantiri Tasorentsi. Irotaque pimatantearori pinquenquetsatacotapinijeitero, pinquempetacantea pisatoncaatacojeitacaro pijempequipeequi ariorica pivancainapeequi. Tempa iriotaque nijaajeitaqueerori itasorenca.
10 Irotaque piveshireimentapinijeitanteariri. Pinquenqueshiretapinijeitero osarentsipeequi, omoncaratapaajearica oca quitaiteri Yavisantaniri.’ (Icanteetiro Pascua.)
11 “Ariorica irareetacaajeitajempi Tasorentsi anta iipatsitequi canaaneopee, icantasanotaqueriri intacantajeitaqueerini, pinquenqueshiretapaajero nocamantajeitaquempiri. Ariorica ontimayeteri pijinapee pitomi, maaroni jivayetatsine intime iriotaque pinashitacayeteanariri Tasorentsi. Aisati pinashiyeteanari irijanipee pivira jivayetatsine intime, iriojeitaque irashitasanojeiteari Tasorentsi.
12 -
13 Iro cantaincha iriorica timatsine orijani paashinote, ocameetsati irointi pimpinaajeri irijani ovisha, teerica, chiivojaniqui. Teerica pincoyeji pimpinayeri paashinote, ocameetsati pinquentsireeri. Aisati pitomipee jivayetatsine intime iriotaque pimpinaayeteriri.
14 Ariorica irisampijeitempi pitomipee jeri pishanincajeitajeari: ‘¿Paitampa pantapinijeitantarori?’ Ari pancanaqueri: ‘Iro nantajeitantarori: noquenqueshirejeitiro peerani yonijaajeitantaquenarori Tasorentsi itasorenca, yomishitoajeitantajanari anta Egiptoqui, iperanajeitanteevetaquenaniri.
15 Aisati iquisoshiretantacari pincatsari, caari ishinejeitantanani noshitoajeitanajearo iipatsite. Irotaque yoamaitajeitantacariniri itomipee jivayetatsiri itimi aparopeeni ishanincapee, aisati iquempetitajeitaqueri irijanipeeni ivira jivayetatsiniri itimi. Irotaque meeca nonashitacantayetanariri Tasorentsi irijanipee virantsi jivayetatsiri itimi, aisati nopinayetiriri notomipee jivayetatsiri itimi, virantsi nontayeneriri.
16 Oca nantapinijeitiri oquempevetaca nosatoncaajeitaca nojempequipeequi aisati novancainapeequi. Irotaque quenqueshirecaajeitempironeri yantaqueri Tasorentsi Egiptoqui antearoite itasorenca yomishitoajeitantajeeri.’ ”
Ojivajeitaqueri mencori aisati paamari ishanincajeitaniri Israel
17 Ishinejeitantajariri pincatsari ishanincajeitaniri Israel ishitoajeitanajero iipatsite, te inquenacaanajeriji Tasorentsi avotsiqui jatantachari iipatsitequi filisteopee irareejeitantajeameri intsipaite. Tempa ioshirejeitaqueri eiro icoajeititsi irimanajeitapeeri, irointi incoajeitanaje impiajeitaje aisati Egiptoqui.
18 Irotaque yaajeitantanacariri irishoncajeitanaquea caaraiteriqui, irosati jatantachari anta incajarequi pajitachari Quitioncari.
Ishitoajeitantanajari ishanincajeitaniri Israel, cameetsa iveshintsaajeitanaca, iquempejeivetanacari manajeitachari.
19 Yora Moiseshi yaacantanajiro itonquini Joséni. Tempa peerani icantajeititacarini ishanincapee: “Queario iramitacojeitempi coajicani Tasorentsi, iraajeitanajempi anta aipatsitesanoriqui. Ariorica omoncaratapaaquea oca, ocameetsati paajeitanajero notonqui anta.”
20 Ari yojocanajiro Sucot, yovaajeitanaja irosati yareejeitantacaro Etam, intanacaronta caaraiteri. Aitaque isavicajeitapaajiri.
21 Icantani Tasorentsi itsipajeitacari quitaiteriqui, iquempevetacaro mencori ocatiatsantsaataca yonijaajeitantariri avotsi. Aisati tsiteniriqui iquempevetacaro paamari itsiotacojeitaqueri. Irotaque imajeitantari yaniijeitanaque quitaiteriqui aisati tsiteniriqui.
22 Ora mencori ocantani ojivatapinijeitaqueri maaroni quitaiteripeequi aisati tsiteniripeequi oquitasantetacotapinijeitaqueri.
