Éxodo 17:1-16
17 Yaniijeitantanajarori caaraiteri Sin ishanincajeitaniri Israel, imoncarataquero icantaqueriri Tasorentsi. Jentsiquero icantajeitanaja, irosati yareejeitantacaro Refidim, iro cantaincha te aneeroji nija.
2 Irosati icantimentantajeitacari ishanincapee Moiseshi, icantajeiti:
—¡Pimpajeitenata nija nirajeiteri!
Ari yacanaqueri iriori Moiseshi:
—¡Paita pamanantapinijeitanari narori! ¡Paita caari pishirejeitantari Tasorentsi, pineantajeitacari!
3 Oshequi, aasanojeitaqueri ishanincapee imire, irotaque iquisatsajeitantajariri aisati icantajiri:
—¡Irompa paajeitantajantanari anta Egiptoqui, paacantajeitena nomire! ¡Picoaque poamaajeitena maaroni, aisati notomipee jeri novirapee!
4 Irosati yaventantacari Moiseshi Tasorentsi, icantiri:
—Notasorentsite, ¿jaoca noncantajeiteriri yoca atiripee? ¡Irotaintsi impichaajeitena!
5 Ari yacanaqueri Tasorentsi, icantiri:
—Pijate pijivajeitanaqueri, pintsipajeitanaqueari aparopee jivatacaajeitiriri. Aisati paanaquero pinchaquiire pipasaajatantacarori chapinqui nija Nilo.
6 Ari nooyempiri anta toncaariqui Horeb imperitaqui. Pimposapempero pinchaquiire imperita, osotoaajatantanaqueari nija irirajeiteri atiripee.
Aitaque icantaquerori Moiseshi, imoncarataquero icantaqueriri Tasorentsi, ineajeitaquero jivatacaajeitiriri ishanincapee.
7 Irosati ipajitantacaro Moiseshi ora quipatsi Meribá, tempa aitaque icantimajeitaqueriri. Aisati ipajitaquero Masá, tempa aitaque ineantajeitacariri Tasorentsi, icantantacari: “¿Icarajeitaqueempa Tasorentsi? ¿Tempa incarajeiteeji?”
Imanajeitaqueri Amalec ishanincajeitaniri Israel
8 Yora ishanincapeeni Amalec ijatashijeitaqueri ishanincajeitaniri Israel anta Refidim, irimanajeitantavaqueariri.
9 Irosati icantantari Moiseshi Josué, yora jivatacairiri manajeitachari:
—Pincoyeajeite acarajeitica, pijajeite pimanajeitavaqueri ishanincapee Amalec. Naroquea jatamanatsine toncaariqui, naanaquero ninchaquiire icantaquenari Tasorentsi.
10 Ari imoncarataquero Josué icantaqueriri Moiseshi, irosati ijatacaajeitantamanacari. Ari iquenanaque iriori Moiseshi anta toncaariqui, itsipatanacari irirenti Aarón jeri Hur.
11 Ari yoancapaaquero Moiseshi iracojempequi, irosati yanaacojeitantacari ishanincapee Israel yora ishanincapeeni Amalec. Iro cantaincha yora Moiseshi imaojempequitapaaque yoarianajiro iraco, yanaacojeitaqueri iriori Amalec.
12 Ari icatsiquiitapaaque, irosati yaantacanari Aarón jeri Hur mapi irisavicanteari. Impoiji yoancajempequitaqueri irampatequi, irio itsipa iracosanoriqui, caari ipariavacotantaja, irosati ishaavijiiteantanaja catsirincaiteri.
13 Irosati Josué yoaarantaitiri manajeivetachari ishanincapeeni Amalec; yanaacotasanojeitaqueri.
14 Irosati icantantacari Tasorentsi Moiseshi. Icantiri:
—Pisanquenatacotero oca yantajeitaqueri pishanincapee, inquenqueshireacoyeetanteariri. Aisati pincanteri Josué: ‘Nontsoncasanojeitajeri catsini Amalec.’
15 Irosati yoirincantapaaja. Ari yovetsicacantapaaque altar ipajitaquero: “Iriotaque Notasorentsite Anaacotantatsiri.”
16 Aisati icanti:“¡Iriotaque Tasorentsi, anaacotantatsiri!¡Iriotaque tsoncajeiterine ishanincajeitaniri Amalecaisati irishanincajeivetajeari coajica!”
