Éxodo 19:1-25
19 Yora ishanincajeitaniri Israel yojocajeitaquero nampitsiqui Refidim. Ari intacaro mavatatsiri cashiri isoquijajeitantacariri Egiptoqui, yareejeitaquero caaraiteri Sinaíquiniri. Aitaque ivancojeitapaacari, imontetacotapaacaro toncaari.
2 -
3 Ari itoncaanaque Moiseshi toncaariqui inquenquetsatacanteariri Tasorentsi. Ari icantaqueri:
—Pincamantajeitajeri maaroni ishanincajeitaniri Jacoboni, yora ipajitari Israel.
4 ‘Avirojei pineajeitaquero noashinoncaajeitantacariri egiptosati aisati namajeitajimpi aca pareejeitantacari. Noquempevetacari antearitatsiri paquitsa yaracairi irijani.
5 Ariorica pinquemisantasanojeitaquena aisati pimoncarataquerorica maaroni nocantacantiri, noncanteani noshanincatajeari. Nopincatsariventiri maaroni timayetatsiri, iro cantaincha avirojei apaniro noncoyeajeiteri.
6 Avirojeitaque pincarajeitenane; nompeajeitempi antaveetapinijeitenaneri, pimpincatsatantenari, aisati noshanincapee nonashitacayeari.’
Irotaque pincamantajeitapeeriri maaroni pishanincapee.
7 Ari yapatotapaaqueri jivatacaajeitiriri ishanincapee, icamantapaaqueri maaroni icantaqueriri Tasorentsi.
8 Irosati icantajeitantanaca:
—Jee, aitaque amoncarajeitaquero maaroni icantacantaqueri Tasorentsi.
Irosati itoncaantanaja Moiseshi icamantajiri Tasorentsi icantajeitaqueri maaroni ishanincapee.
9 Ari icantajiri Tasorentsi:
—Coraquenayea nonijayempi mencoriqui tsitenishaatsiri, inquemantenari pishanincapee nonquenquetsatacayempi, irotaque incanteani inquemisantasanojeitantanaquempiri.
Ari yapiitajiniri Moiseshi Tasorentsi icantajeitaqueri ishanincapee.
10 Ari icantajiri iriori:
—Pimpianaje meeca pincamantapeeri pishanincapee irovetsicajeiteata meeca aisati osaitequera, inquivajeiterota iitsaarepee impincatsajeitantenari.
11 Avisanaquerica apite quitaiteri, pineajeitena maaroni naniiree toncaariqui Sinaí.
12 Aisati poacantapeero mapiqui ovecaratapaaca toncaari. Pishoncacantaquero maaroni, iriotantearori atiripee eiroquea yavisajeitantarotsi. Pincantajeiteri ocameetsati impincatsajeitero, eiro catsini itoncaajeititsi aisati eiro iquempejijeitarotsi. Jaanicarica quempejitaquearone, poacanteri.
13 Jaanicarica pamitashitearone toncaari, ocameetsati pimpichaanatacanteri, teerica, pinquentacanteri. Omavetaquea iriorica virantsi, ocameetsati poacanteri. Aintiquea ariorica inquemaquero tiorentsi, aitaque inquempejijeitapemparori ovecaratapaaca otantotacotaca.
14 Irosati yoirincantapaaja. Ari icamantapaajiri jivatacantajeitatsiri, icantiri:
—Pivetsicajeitea, irotaintsi ampatotimentajeiteari Tasorentsi ampincatsatanteariri. Eiroyea poonaitayetajarotsi pijinapee.
Ari iquemisantaqueri, irosati iquivajeitantacaro iitsaarepee.
15 -
16 Ari omavatapaaque quitaiteri, irosati intantanaca iporecaporecatamanaque aisati antearoite otireatireatamanaque. Aisati aniireapaaque toncaariqui mencori tsitenishaasanotatsiri. Aitaque otimapaaqueri. Irosati iquemantacaro antearojenca tiorentsi, omintsaroajeitaqueri atiripee.
17 Irosati yaajeitantanacari Moiseshi maaroni ishanincapee iquempejijeitapaacaro toncaari, yapatotimentajeitapaacari Tasorentsi.
18 Ari ocachaajencatanaque toncaari, tempa yaniireapaaque Tasorentsi itimantapaacaro paamari. Aiquero catsini ocachaajencatasanotanaitii quempetanaca taaveerentsi aisati antearoite onicanaca toncaari.
19 Aisati aiquero antearojencatanaqueri catsini tiorentsi. Irosati iquenquetsatacantacari Moiseshi Tasorentsi. Ariorica yacanaqueri iriori, iquempetacaro otirei.
20 Yaniireantapaacari Tasorentsi ochoviinaquitapaaque toncaari, irosati icantantacari:
—Caate, pintoncaapaaje pincaratena aca.
Irosati ijatantaca.
21 Ari icantavajiri:
—Poirincanajea pincantapeeri pishanincapee. ‘¡Eiro catsini yavishirotsi otanto inquempejitantearori toncaari! ¡Te noncoacayeriji irineena, icamajeiticari!’
22 Aisati inquempejeitaquea antaveeyetanari, ariorica inquempejitapinitena, ocameetsati irovetsicashirejeitea, eiroquea icamajeitantatsi.
23 Irosati icantantanacari Moiseshi Tasorentsi:
—Tempa picantasanotaquena: ‘Eiro itoncaajeitirotsi pishanincapee.’ Aisati picantasanotaquena. ‘Pintantotacantantayetaqueroyea mapipee. Tempa pinashitacaasanotacaro toncaari.’
24 Ari icantanajiri iriori:
—Pimpianajetsita meeca, impoijiquea pintoncaapaaje aisati. Pintsipataqueari pirenti; irintiquea yora antaveetanari aisati maaroni pishanincapee, te noncoacayeriji iravisajeitapeero otanto, notsoncajeitiricari.
25 Irosati yoirincantapaaja Moiseshi, icamantapaajiri ishanincapee icantajiriri Tasorentsi anta toncaariqui.
