Éxodo 21:1-36
21 Jero otsipa icantacantiri Tasorentsi:
2 “Ariorica pamananteri aparo pishaninca pimperanatanteariri, oncarate 6 osarentsi pantaveetacayeri. Iroquea caratapaatsine 7, poimpacaajeri. Eiro ipinacoventanajatsi irijatashitajea.
3 Iriorica caari timatsi ijina, irijataje apaniro. Irompa yamaquerorica ijina, ocameetsati iraanajero.
4 Irompa ariorica impacaaqueri nampitavacariri ijina, intimacaaquerorica itomi, iroorica irishinto; icoapaajirica irijataje, ocameetsati irojocajeitanajeneri. Irijatajeta apaniro.
5 Irompa teerica incoye irijate, tempa inintiro ijina jeri itomipee, aisati inintiri nampitariri;
6 ocameetsati iraanaqueri nampitariri anta Nonanteariqui, yoashinampiyetiroriqui iqueantapinitarori; irisatayeri iyempitaqui. Irioyeetanteariri incanteani irinampitasanoteari.
7 “Itimirica shirampari pimanteroneri irishinto irinampiyeetantearori, yora aavaqueroneri eiro ishinetajirotsi ojataje ariorica omoncaravetapempa 6 osarentsi. Eiro iquempetacantiritsi shirampari ishinetiri irinti.
8 Yora nampitarori, teerica incoyeji irijinantearo, ocameetsati incanteri iri impinaventajero iraantanajearori. Eiroquea ipimantirotsi pashiniqui atiri.
9 Irompa ariorica impacaaqueri itomi, ocameetsati inquempetacantajero irishintosanori. Eiro iperanatanajarotsi.
10 Ariorica iraaje otsipa ijina, eiro imanintanaquerotsi yaitari. Ocameetsati quiso iroyero, irimaacotero aisati impero oitsaare jero oyeari.
11 Iro cantaincha, eirorica imoncaratinirotsi ocapee, ocameetsati irishinetero ojataje, Eiro opinacoventanajatsi ojatashitajea.”
Icantacantiro jaoca incanteeteriri antayetirori covencayetatsiri
12 “Itimirica oantashiyetachaneri, ontimatiye iroyeetajeri iriori.
13 Irompa teerica intsataashiteariji, tempa naro shinetaqueriri incame, Naro cantatsine coajica jaocarica nonashitacayeanariri nampitsi iraventeari; eiroquea yoanteetaritsi.
14 Iriorica quisanentashitariri ishaninca, tecatsirica irantavetea, iroashitaquearirica; aitaque incoacoayeetanaqueri iriori. Irishiavetanaquearica iraventapemparo altar, ariorica irineetajeri; ontimatiye iroyeetajeri iriori.
15 “Jaanicarica posherine iriri iroorica iriniro, otimatiye iroyeeteri iriori.
16 “Aisati jaanicarica aashiyetearine ishaninca, ariorica impimantaqueri, teerica, iperanatacari; ontimatiye iroyeeteri.
17 “Aisati inquempetea tseenquimatiriri iriri jero iriniro; ontimatiye iroyeeteri.
18 “Aisati inquempetea antavacaachari, ariorica imposantaqueari mapi itsipa, teerica, incapojaqueri irojoquiitanaquearica imaamentoqui; yora capojaqueriri tecatsi incanteeteri, tempa yora iposaqueri aniitanaji capichaji yaniitantajaro irinchaquiire. Irointiquea impinatajeri ipeacaaqueri irantaveere aisati impinacoventajeri ocarati ovinaro yaavintacantaca.
19 -
20 “Intimerica peranatantachaneri ariorica impasataqueri inchaquiqui iveranaro: iriorica shirampari, teerica tsinane, iroaqueririca, ontimatiye iroashinoncaimenteeteri.
21 Irompa eirorica icamitatsi, intimanajerica aparopee quitaiteri, eiro yoashinoncaimenteetiritsi; tempa iriotaque irashi iveranaro.
22 “Ariorica irantavacaimotearo shirampari tsinane tsomontetatsiri, imposatsomontetapaaquerorica, iro cantaincha eirorica ocamitsi, irojocacaashitaquearorica; ocameetsati impinatajeri ojime jaocarica oncarate incoacotajeri, aisati jaocarica incante yora cantacoventantatsiri.
23 Irompa ariorica iroamaaquero, inquempeyeetajeri iriori; iroyeetajeri.
24 Yora quitsoreajatantatsine, inquitsoreajaquiyeetajeri iriori. Yora ajireitantirori ajitsi, irajireiteetajeri iriori. Yora posantatsine, imposheetajeri iriori. Yora paatiatantatsine, impaatiayeetajeri iriori.
25 Yora taantatsine, intayeetajeri iriori. Yora satantatsine, irisatayeetajeri iriori. Yora pasatantatsine, impasayeetajeri iriori.
26 “Yora posaajaquiterine iveranaro, iriorica shirampari, teerica tsinane, yamashijaquitaqueririca, ocameetsati irishinetajeri irijataje, irotaque ompinatanajeari yamashijaquitaqueri.
27 Aisati ijireitaqueririca iraji, ocameetsati irishinetajeri irijataje, irotaque ompinatanajeari yajireitaqueri.”
Icantacantiro avishimoyeteririca covencatatsiri
28 “Intimerica viratachane vaca catsimari, irisataaqueririca atiri, ariorica iroamaaqueri; ontimatiye impichaanayeeteri iriori irosati incamantaquea. Ora ivatsani eiro yoyeetarotsi. Yora ashitariri tecatsi incanteeteri.
29 Irompa iovetaririca oshequi isataanti, teerica incoyeji irashitacoteri; ontimatiye impichaanayeeteri irosati incamantaquea, aisati inquempeyeetaqueri iriori ashitariri.
30 Teerica incoyeji iroyeeteri, ocameetsati irointi impinatajeri yora ishaninca camaintsiri jaocarica incantaqueri cantacoventantatsiri.
31 Aisati inquempetea iriorica irisataaque jananequi, iroorica tsinane, aisati iriorica irisataaque nampirentsi, teerica, tsinane; yora ashitariri vaca ocameetsati impinatajeri nampitariri incarate 30 imentaqui quireequi. Impoiji impichaanateri vaca, irosati incamantaquea.
32 -
33 “Intimerica quianatatsine yaajatantari nija, ipeacotanacarorica irashitanajero, inquenapaaquerica vaca iriorica aashino intetapaaquearorica; ariorica incamaque, ontimatiye impinatajeri quireequi ashitariri, irosati iraantavaqueari.
34 -
35 “Intimerica ashiyetachaneri vaca, ariorica irisataaqueri itsipa, incamaquerica; yora oamantaintsiri ocameetsati impimanteri, impoiji impaarantajeriri iriori quireequi ashitariri camaintsiri. Aisati inquempetaqueri ivatsa camaintsiri, impaarantaqueri iriori.
36 Irompa ineapinivetaririca isataavacaapinita, teerica incoyeji irashitacotapiniteri; ocameetsati iroimpiajeneri pashini, irioquea iraavajeri iriori camaintsiri.”
