Éxodo 22:1-31
22 “Intimerica coshiterine ishaninca ivacate, ariorica iroaqueri, teerica, impimantaqueri; ontimatiye iroimpiajeneri incarate 5. Irompa iriorica incoshitaqueri irovishate; ontimatiye iroimpiajeneri incarate 4 ovisha.
2 “Yora coshitatsine ariorica irineetaqueri incoshitaque tsiteniriqui, ariorica iroyeetaqueri; yora oavaquerine te intsataashiteariji, eiro icantajeitiritsi ishanincapee irinti oantatsiri.
3 Irompa ariorica iroavaqueri quitaiteriqui, aitaque irijiyeetaqueri oantatsiri.
“Intimerica coshitatsine, ontimatiye impinatajero ocarati icoshitaqueri. Iro cantaincha teerica aneeriji iireequite, ocameetsati impimanteeteri impinatantajearori.
4 “Irompa ariorica irineacoyeetaqueri virantsi icoshitaqueri, teerica, iroyeriji; ontimatiye iroimpiajeneri apite, iriorica vaca, aashino jeri ovisha.
5 “Intimerica omishitoayeterine ivirapee, ariorica irijayetanaque otsipapeequi ivaashitote ishaninca, teerica, iroantsitequi otiminta irovamashite; ariorica iraatiquitayetapaaqueri, ocameetsati impinatajeri.
6 “Intimerica taaveeyetatsine, ariorica ojayetanaque quitotsemashiqui areetanaquearica iroanequi pashini, ontaapaaquerorica ipioyetiri tirico, iroorica iroaquera sampaquiyevetacha; yora taaquerori ocameetsati impinatajeri.
7 “Intimerica atiri oacayerine ishaninca quireequi, iroorica pinatasanoyetachari, ariorica incoshitacantitaqueri, irineacotavaqueririca aavetacarori; ocameetsati impinatapinitajeri paitapeerica icoshiyetiri.
8 Irompa eirorica ineajiritsi, irosati irantanaqueari yoacaavetanacari anta cantacoventantatsiriqui, incantacoventanteariri anta Nonanteariqui; iriotacanteariri iriorica coshitaqueriri, irompa teerica.
9 “Aisati inquempeyeeteri aashiyetearone paitapeerica timimoyetiriri ishaninca: iriorica vaca, aashino, ovisha, iroorica quitsaarentsipee, ariorica irineavetajearo ashitarori, incantavetapemparirica: ‘Irointi nashi,’ ariorica incantanaque itsipa: ‘Caari, irointi nashi;’ irosati iraantanaqueari anta cantacoventantatsiriqui incantacoventanteariri Tasorentsiqui, iriotacanteariri. Yora cantashitainchari ocameetsati impinatapinitajeri paitapeerica yaashiyevetacari.
10 “Intimerica atiri oacayeterine ishaninca ivirapee, iriorica aashino, vaca, ovisha, paitapeerica, iro cantaincha ariorica incamimotaqueri, incarajaquerica, teerica, icoshitacantitaqueri, tecatsirica neerine; yora amenavetanariri ocameetsati incamantasanoteri ashitariri: ‘Te noncoshitempiji, ioti Tasorentsi queario nocantasanotaquempi.’ Yora ashitariri ocameetsati inquemisantero icantasanotaqueriri, eiro icoacotashitajaritsi.
11 -
12 Irompa ariorica incoshiyeetaqueri, ocameetsati impinatajeri.
13 Irompa iriorica oaquearine maniti, ocameetsati iraanaqueneri yoaarantacari ironijantapempariri, eiroquea ipinatashitantajaritsi.
14 “Intimerica atiri canterine ishaninca: ‘Pimpavaquenata aparo pivira irantaveetena,’ iro cantaincha ariorica incamimotaqueri, ocameetsati impinatajeri.
15 Irompa ariorica intsipateari ashitariri, tecatsi oncantea impinatajeri; irointiquea impinateri ovinaro yantaveetaqueneri.
Icantacantiro icoacaaqueri Tasorentsi atiri irantayete cameetsa
16 “Intimerica atiri amatavitirori evancaro caariquera neayetiri shirampari, caari icashia irayero; ariorica irantaquero ocameetsati impinatacoventero imperi iri ocarati yamejeitari, irosati iraasanotantaquearo.
17 Iro cantaincha yora iri, teerica incoacayeriji impacayeri, ocameetsati impinatajeri irotaque yamejeitari ipinacoventiro caari neayeterine shirampari.
18 “Eiro pishinetiritsi catsini intime sheripiariyetatsine, ontimatiye poacantajeiteri.
19 “Intimerica antayeterone virantsipee, ontimatiye poacanteri.
20 “Intimerica oayeterine ivira intaanteanariri ijitasorentsitashiyetari, ontimatiye poacaneri. Tempa ocameetsaveta intaasanotenarime apaniro nainti.
21 “Eiro poashinoncaajeitiritsi pashinisati, aisati eiro piperanatashijeitaritsi. Tempa aisati avirojeitaque pashinisati, pisavicantajeivetacaniri anta Egiptoqui.
22 “Aisati eiro poashinoncaajeitirotsi camajimentaaropee aisati iriori janequipee camayetatsiri iriripee.
23 Ariorica poashinoncaajeiteri, iraventaquenarica, aitaque nompiacoventaqueari nonquisasanojeitempi avirori. Nontiancajeitempiri oajeitempine, ora pijinapeeni jeri pitomipeeni intimashijeitanaquea iriori.
24 -
25 “Ariorica incoacotempi quireequi noshaninca coiteavetatsiri saviquimotimpiri, eiro picoacotajiritsi quimota iroanaavajempiri, piquempetaricari ashitaarantincari papinitiriri itsipapee quireequi.
26 Irompa ariorica irojocanaquempiro iitsaare, piotanteari aitaque iroimpiajempiri; iro cantaincha ocameetsati poimpiitajeanari irishaavijiiteanajerica catsirincaiteri.
27 Tempa irotaque iquitsaatapinitari, caari aantari catsincaiteri. Eirorica poipiitajanaritsi, ¿jaoca inquitsaatanajeari tsiteniriqui? Ariorica iraventaquena, aitaque namitacotaqueri; tempa oshequi nocavintsanti.
28 “Eiro catsini pitsenquimatanatsi, tempa naro Pitasorentsi, aisati eiro picantimatiritsi jivatacaajeitimpiri.
29 “Ocameetsati pimoncaratero pamapinitenaro ora pivanquirepee pinashitanari jero ovaja.
“Pinashitacayenari pitomipee jivayetatsine intime.
30 Aisati pinquempetaquenari iriori irijanipee pivira, iriorica vaca jeri ovisha. Iro cantaincha oncarate 7 quitaiteri intsipatavaquearotsita iriniro. Ariorica omoncaratapaaquea 8 quitaiteri, irosati pimpantajenari.
31 “Nocoaque pincameetsatasanojeitanaque pinquemisantajeitena, tempa nonashitacaajeitaquempi.
“Eiro poajeitaritsi ivatsa poshiniripee yatsicayetiri maniti; pimperi iroyeari otsitipee.
