Éxodo 23:1-33
23 “Eiro picantacotashitaritsi pishaninca, aisati eiro pacacoventiritsi atiri caari cameetsatatsi, pincantacoventanteariri pashini; pacacoventirocari caari cameetsatatsi.
2 “Eiro piquempetacotaritsi avirori shequiimentirori irantane caari cameetsatatsi. Ariorica pincantacoventasanojeitante cameetsa, eiro pishinetiritsi iroamejeitempi pantajeitantearori caari tampaticatasi.
3 Aisati eiro pamenashitari ashinoncaincari paitarica irantaque caari cameetsatatsi.
4 “Intimerica quisanentempine ashitachaneri ivacate, iraashinote, impeaquearica; ariorica pineajeri, ocameetsati paanajeneri.
5 Ocameetsati pamitacoteri quishimpiri ariorica pineeri iraashinote impariacaaquero inquijacaayeteriri. Pamitacoteri poaniireacotavaqueri.
6 “Ariorica incantacotashiyeeteari coiteaveeyetatsiri anta cantacoventantatsiriqui, eiro pineashitaritsi; ocameetsati irointi pancacoventeri, eiro yoashinoncaashiyeetantaritsi.”
7 “Eiro catsini pitseeyacotashitaritsi yora caari antavetaro paitapeerica, iroamaashiyeetanteariri. Yora tseeyashitachari, noncantasanoteri: ‘Ainiro pantane.’
8 “Eiro pairitsi quirequi poashinoncanteariri pishaninca; tempa yora airiri eiro iquenqueshireanajatsi, aisati eiro imatanajirotsi incantacoventeri cameetsa yora caari antavetaro paitapeerica.
9 “Eiro catsini poashinoncaajeitiritsi pashinisati atiri. Tempa piojeitaquero avirori yoashinonqueejeitaquempi peerani Egiptoqui pisavicantajeivetacari.”
Icantacantiro ontimatiye irimaoreasanojeite
10 “Oncarate 6 osarentsi pantaveete aisati paviitasanojeitantearori pivanquirepee.
11 Iro caratapaatsine 7, eiro pantaveejeititajatsi ontimashitavaqueata quipatsi, aisati eiro paviijeititajarotsi poovamashite jero porivomashite. Pishinejeiteri coiteaveeyetatsiri iraviinontajeitavaqueata ontimanteari iroyeari. Jeri aisati iriori poshiniripee, coquiyetatsiri iroajeitearota.
12 “Oncarate 6 quitaiteri pantayetantearori paitapeerica. Iroquea caratapaatsine 7, irotaque pimaoreacaajeitanteariri pinampirepee jeri pashinisatipee, ontimantanajeari irishintsiyetanaje. Aisati pinquempetaqueri iriori pivacate jeri paashinote.
13 “Pimoncarajeitero maaroni oca nocantaquempiri. Eiro catsini paventashitaritsi ijitasorentsitashiyetari pashinipee, aisati eiro pineaveetacotashitaritsi ivajiroqui.”
Mavatatsiri inquimoshirejeitanteari
(Éxo. 34.18-26; Deut. 16.1-17)
14 Icantiri aisati: “Oncarate mava pinquimoshiretapinijeite aparopeequi osarentsi, pimpincatsajeitantenari.
15 Piveshireimentapinijeitearo quitaiteri poapinijeitantarori tanta caari iconoyeeti tapiacaarori. Oncarate 7 quitaiteri poapinijeitantearori. Pimoncaratero nocantajeitaquempiri cashiriqui Abib. Irotaque pinquenqueshirejeitantearori pishitoantajeitanajari anta Egiptoqui. Aisati tecatsi pocashitachane pishaninca, ontimatiye iramajeitaque iriori.
16 “Aisati piveshireimentajeitearo quitaiteri Yaviitanteetarori Panquirentsipee Jivatatsiri Osampayeti poanepeequi, jero aisati Yaviitanteetarori Vecarantarori Osarentsipeequi, ariorica pintsoncaquero maaroni paviiyetiro pivanquirepee.
17 “Maaroni shiramparipee ontimatiye impocapinijeite Nonantariqui oncarate mava osarentsipeequi.
18 “Ariorica poyenari pivira pintayenari, eiro pitsipatairotsi iriraja aisati tanta tapiachari. Aisati eiro paavajitsi ireji pintaantamanajearori.
19 “Ora intayetearone oitsoqui pivanquirepee, ocameetsati paayetanaquero Nonantariqui.
“Eiro picotantaritsi chiivojaniqui otsomija iriniro.”
Intianqueneri Tasorentsi Moiseshi inampire jivatanajerine
20 Icantiri aisati:
“Nontianquempiri Nonampire irojocaacoventajeitanaqueri pishanincapee, cameetsa irareejeitantearori quipatsi nocashiacaajeitaqueriri.
21 Eiroyea pipiatsataritsi, irointi pinquemisantasanoteri; tempa iriotaque quempetanari. Eirorica piquemisantajeitiritsi, eiro ipeacojeitimpirotsi paitapeerica pantajeitiri caari cameetsatatsi.
22 Irompa ariorica pinquemisantasanoteri aisati pimoncaratero maaroni nocantasanotaquempiri, naroquea jocaacoventajeitempine, noasanquetaajeiteri quisajeitempine aisati caari aacameetsajeitempine.
23 Yora Nonampire, iriotaque jivajeitanaquempine iraajeitanaquempi isavicajeitinta canaaneopee, amorreopee, hititapee, ferezeopee, heveopee jeri jebuseopee; iriojeitaque nontsoncajeiteri.
24 Eiro pantajeitirotsi yantajeitiri iriori. Aisati eiro pitiyeroimentajeitaritsi ijitasorentsitashiyetari aisati eiro pipincatsajeitiritsi. Irointiquea pimporoquitasanojeiteri aisati pojoquitasanojeiteri imapinepee inashitacaayevetanariri.
25 Ocameetsati pimpincatsatasanotena nainti apaniro. Irotaque nontasoncacoventapinijeitantempiri, eiro ocoiteimojeitantimpitsi poayeteari aisati pirayeteri.
“Nonijantareacoventempi, eiro catsini opocashijeitantimpitsi mantsiarentsipee.
26 Aisati nontasoncacoventajeitempi, eiro picamitantajeitatsi. Aisati eiro otimitsi tsinanepee jocayetatsine aisati shiravaro.
27 “Jaocarica pinquenajeitanaque nampitsipeequi, noncantacaashireacaajeiteari maaroni quisajeitempine intsaroacaasanojeitantavaquempiri. Antearojenca incajemashijeitanaquea irishiapitsajeitanaquempi.
28 Noncomitacaayeari, eiro iojeitanajitsi jaoca incantajeitanaqueari. Aitaque oncanteari irishiapitsajeitanaquempi yora heveopee, hititapee jeri canaaneopee.
29 Iro cantaincha eirotsita noshinejeitimpitsi pintsonquitajeiteari, otimashitanajacari iipatsitepeeni; ishequiajeitanaquecari irinti covencayetatsiri yoaarantajeitimpicari.
30 Nomatacaajeitempi pojocajeitanteariri jentsiquero. Arioricaquea intimayetanaque oshequi pitomipee, irosati paajeitantaquearo maaroni iipatsitepee.
31 Ora quipatsi nompempiri antearoite oni. Oponeanaca incajarequi Quitioncari, irosati antearojaqui incajare Mediterráneo, isavicajeitinta filisteopee. Oponeanaca aisati caaraiteriqui, irosati pashiniqui nija pajitachari Éufrates. Maaroni savicajeitatsiri narotaque matacaajeitempine, pintsoncantajeiteariri.
32 “Eiro paacameetsatacaaritsi aisati eiro pipincatsatashitaritsi ijitasorentsitashiyeetari.
33 Aisati eiro pishinejeitiritsi irisaviquimojeitempi piipatsitequi, yantacaimpirocari caari cameetsatatsi, pantimotanarocari. Ariorica pinquempejeitanaqueari, irotaque omapocantempiri oashinoncantsi pimpeashijeitanteari.”
