Éxodo 24:1-18
24 Ari icantiri Tasorentsi Moiseshi:
—Pintoncaapaaje notimaqueca; pincarajeitaqueri Aarón, Nadab, Abiú jeri carajeitatsiri 70 jivatacaajeitiriri pishanincapee. Iro cantaincha eiro iquempejijeitapanatsi, ainti intiyeroajeitapempa nianqui impincatsajeitantapeenari.
2 Avintiquea quempejitapeenane, tecatsiyea oijatempine.
3 Irosati yoirincantapaaja. Ari icamantapaaqueri Moiseshi maaroni ishanincapee icantaqueriri Tasorentsi. Irosati icantajeitantanaca:
—¡Jee, aitaque! ¡Amoncarajeiteneri maaroni icoacaajeitaqueeri!
4 Irosati isanquenatacotantacaro Moiseshi maaroni icantaqueriri Tasorentsi. Ari capichaji quitaite itinaamanaca, yovetsicacantaque altar anta ovecaratapaaca toncaari. Aisati yoayetaquero mapipee ocarataque 12 inashitacaacari, imoncarataqueri icarajeiti ishanincasanoripee itomipeeni Israel.
5 Ari itiancayetaque aparopee evancari yoajeitaqueri vaca. Aparo itaasanotaqueneri Tasorentsi, irio itsipa itaimentaquerori iraacameetsajeitantajeariri.
6 Ari yaarantavaque Moiseshi iriraja ijaaquero aparoqui coviti, impoiji isaque pashiniqui coviti itsiquirijantacarori altar.
7 Irosati yaantacaro isanquenatacotaqueri icoacaaqueriri Tasorentsi, ineanajeitaqueneri ishanincapee. Irosati icantajeitantanaca:
—Ocameetsati amoncarateneri aisati antajeitero icoacaajeiteeri.
8 Irosati yaantanacaro Moiseshi iriraja vaca yoacotaqueri incaaranqui, itsiquirijainajeitaqueri ishanincapee. Ari icantajeitiri:
—Oca irajantsi, irotaque iotacantatsiri icarajeitaquee Tasorentsi, irimoncaratero ocantacotiriri Sanquenarentsi.
9 Irosati itoncaantanaja Moiseshi, yaanaqueri Aarón, Nadab, Abiú jeri carajeitatsiri 70 jivatacaajeitiriri ishanincapee.
10 Ari ineapaaqueri ishanincapee Israel Itasorentsite. Anta iitiqui timatsi shipaquireatsiri quempevetarori sancanatasanotatsiri oshiavetacaro inquite.
11 Iro cantaincha te iroashinoncaajeiteriji Tasorentsi yora jivatacaajeitiriri ishanincapee Israel. Ineajeivetacari, ari yoajeitaca aisati irajeitaque.
Ijataque Moiseshi toncaariqui Sinaí
12 Ari icantajiri Tasorentsi Moiseshi:
—Caatanaque aca, pincatiapee ara; nompempiro mapicota nosanquenatantacarori Nocantacantiri, poamejeiteriri maaroni pishanincapee.
13 Iquemantacariri Moiseshi, irosati itoncaantanaca, icaratanaqueri Josué amitacotiriri.
14 Icantajeitanaqueri jivatacaajeitiriri ishanincapee:
—Poyeajeitavajenatsita aca, ancaratavacaajeitantanajeari ampiajeitanaje. Jeri yoca pincarajeitaiteri Aarón jeri Hur. Ariorica ompomerentsitimoyetaquempi paitapeerica, iriotaque pincantajeiteri iroameetsajeitantajempirori.
15 Icantantanacariri Moiseshi, irosati itoncantanaca toncaariqui, ari apataavaqueri mencori otishiqui.
16 Ora ishipaquireane Tasorentsi aniireapaaque otimantapaacaro toncaari Sinaí; ocarataque 6 quitaiteri apataaquero. Iro caratapaintsiri 7 quitaiteri icajemaqueri Moiseshi Tasorentsi otimaquenta mencori.
17 Ora ishipaquireane Tasorentsi ineajeitaquero ishanincajeitaniri Israel, oquempevetacaro paamari tsoncantatsiri, otimaque ochoviinaquitapaaque toncaari.
18 Yora Moiseshi opeavaqueri mencori toncaariqui, itimaque anta ocarataque 40 quitaiteri aisati 40 tsiteniri.
