Éxodo 27:1-21
27 “Nocoaque povetsicacante antearo altar. Irosati pintsirajayetaque acacia, oncarate 2 metro, avishimaataque capichaji 25 centímetro. Iroquea poaqueri osorinapeequi oncarate aparo metro, avishimaate capichaji 25 centímetro. Omoncaratavacaaquea maaroni.
2 Aitaque pishevatayetaquerori jenioquiji osorinapeequi oncarate 4. Impoiji pimpichaashiyetaquero bronce omanantanaqueari tsompoina aisati acaqueroca, ampanaquirotantanaqueari.
3 Irisati povetsicayetaque bronce timayetatsineri antearoqui altar: pojocavanetantearori samampo, paarapee, tasopee, teneroripee jero tenazapee.
4 Irisati paaque povetsicashitaquerori pinticayerori ishaaviji ari nianqui pinquempetacantero ampitarentsi; pishoncaquero maaroni. Impoiji pantaque oyempitapee oncarate 4 poayetaqueri osorinapeequi.
5 –
6 Impoiji pimpirincashitero apite inchaquii aisati pampinaicacotaquero bronce omanantanaqueari. Irotaque pisaquiinteri piyempitashitaqueroriqui. Aparo iroaque acaqueroca aisati otsipa araquerora, inquijacotantearori.
7 -
8 Ora iranteri altar oncaaranaquitaque, onquempetaquearo oca nonijaaquempiri.”
Oyaaraiterite Pancotsi Inantari Tasorentsi
(Éxo. 38.9-20)
9 Icantiri aisati:
“Pimoncaratacantero oyaaraiterite Nonanteari. Ontime onticaashitanaqueari iroori oncarate ontsantsate 45 metro.
10 Ora oaticashiyetanaqueari bronce otincamipee, oncarayetaque 20. Aisati oncarate 20 bronce oncatiantayetanaqueari jero plata oyempitayetanaqueari.
11 Aisati onquempeyetaquea acaquerocapeequi, oncarataque onticaashiyetanaqueari 45 metro ontsantsayetaque. Jero oaticashiyetanaqueari oncarate 20 aisati 20 bronce oncatiantayetanaqueari jero plata oyempitayetanaqueari.
12 Iroquea acaqueroca iqueapinitinta catsirincaiteri, oncarate ontsantsate 22 metro ari nianqui, onticaashitanaqueari. Aisati oncarataque 10 otincamipee jero 10 oncatiantanaqueari. Aisati onquempetaquea araquerora isoquijapiniti.
13 –
14 Anta pinqueapinitenta, pisaatencataquero nianqui oncarate 7 metro ontsantsate, onticaashitanaqueari. Aisati oncarate mava otincami jero mava oncatiantanaqueari. Aisati onquempetaquea ontsantsate anta acaqueroca.
15 -
16 Ora saatencatanaintsine nianqui, oncarate 9 metro ontsantsate, onticaashitanaqueari pintijashitaquero lino, quitioncamaonirori, asoorimaonirori, quitioncamaori. Irotaque pinconoayetavaquerori incaninayetantaquearori cameetsa, pinticaashiterori pinqueapinitenta. Povetsicashiyetaquero otincamipee oncarate 4 aisati oncarate 4 oncatiantanaqueari.
17 Ora otincamipee shonquearone Nonanteari ontimatiye povetsicashiyetero plata oyempitayetanaqueari jero paacoyetantaquearori. Iroquea oncatiantayetanaqueari povetsicashitaquero bronce.
18 Maaroni oyaaraitere oncarate ontsantsate 45 metro. Iroquea otsaranca oncarate 22 metro ari nianqui. Impoiji pintijashitero lino pinticaashiterori, irotaque pishintsaayetaqueri. Oncarate ojenoquite 2 metro, avishimaate capichaji 25 centímetro. Aisati povetsicashitaquero bronce oncatiantanaqueari.
19 Maaroni coayetachari pantaveeyetanteari Nonanteariqui, ioshitaquea maaroni bronce. Aisati onquempeyetaquea poatiashijaniquiyetaquerori tsompoinaqui aisati saiteriqui.”
Quejitsi tsiotachaneri
(Lev. 24.1-4)
20 “Pincantapeeri pishanincapee iramajeitempi orivo ioshitaquea oreji, tsiotapinitatsaneri.
21 Yora Aarón jeri itomipee iriojeitaque amenapiniterone tsiorontsinaquipee, ontsiotacotapinitantearori maaroni tsiteniriqui Novancoqui pampatotimentantenari, acaqueroca oticaashiroqui Cajón. Oca nocantacantaqueri, oncantaitatiyempani. Irotaque irimoncarajeiteri pishanincapee aisati irishanincajeitajeari iriori.”
