Éxodo 29:1-46
29 “Jero panteri pinashitacanteariri antaveetenaneri. Paacantaque aparo vacajaniqui, irioquea apite ovishajaniqui cameetsatatsiri.
2 Aisati paacantaque cameetsapanetatsiri tirico, povetsicacantayete tantapee caari tapiacha, pinconoacantero oreji orivo. Iro otsipapee pintsiquirijacantayetero quejitsi.
3 Irosati pintetacantantayetaquearo cantirijaniquiqui iraacotantanaquearori Nonanteariqui. Aisati paacantanaqueri iriori vacajaniqui jeri apiiteroqueti ovishajaniqui.
4 Irosati paantanaqueari pirenti jeri itomipee anta pinqueantapinitearoriqui Pancotsi pampatotimentantenari, impoiji pincanteri incaajeite.
5 Ariorica incaajeitaque, irosati pinquitsaatantaqueari iroicoro, iroicotacotantearori efod jero pectoral. Impoiji pishiticacoteneri ishiticatsaquiroqui.
6 Aisati pimpatacacotaquero neantsi isavoinaroqui, irosati pisavoinatantaqueari.
7 Irosati paantaqueari quejitsi pivitejainatanteariri.
8 Impoiji pincanteri inquempejijeitempi itomipee iriori, pinquitsaajeitanteariri. Aisati pinquempetacantaqueri, piquempetaqueri iriri irantaveejeitantajeari iriori. Tempa irotaque nocantacantiri oncantaitatiyempani.
9 -
10 “Ariorica paacantanaqueri vacajaniqui, irovanquetanteanariri iraco iitoqui Aarón jeri itomipee;
11 aitaque poimotenariri pinqueantapinitearoriqui Pancotsi pampatotimentantenari.
12 Paacantavaqueroyea iriraja, impoiji poviinquero pacotsapaqui capichaji, pimpantayetantearori oshevatayetanaqueari altar. Iroquea timaarantapaatsine pisaitantayetearo oitiyetanaqueari.
13 Impoiji pintotacantayeteri irejitsaraquipee isheitoquiniri, iranatare jero ishonquepeo, irosati pintaantaquearo povetsicacanteri altar.
14 Iroquea ivatsa jero imeshina aisati itiapatsapee irisotoacaanaquero irointi, intayero otsapitapaaca pisavicajeitinta. Tempa irotaque intaimenteneriri caari cameetsatatsi yantayetiri.
15 “Impoiji paacanteri iriori ovishajaniqui aisati inquempetajeri irajiricainatajeri.
16 Irosati iroamantajeari. Paacantavajero iriraja pintsiquirijantearo maaroni altar acaquerocapeequi.
17 Impoiji pintotacantayetaqueri aisati pinquivacantayetaquero iramporetsapee, iitipee, irosati intsipataantaqueari ivatsa jero iito.
18 Impoiji iroanqueyetaqueri intaantenariri maaroni, pimpincatsatapinitantenari. Ari noneacameetsajencatasanoteri.
19 “Impoiji paacanteri pashini ovishajaniqui. Aisati inquempetajeri irajiricainatajeri.
20 Irosati poacantantajeari iriori, paacantavajero iriraja. Pimpantayetanteariri pirenti jeri itomipee overaapaaca iyempita iracosanoriquiniri, jivatatsiri iracotsapaqui jero antearotatsiri iititsapaqui. Iroquea timaarantapaatsine pintsiquirijantajearo altar maaroni acaquerocapeequi.
21 Ora iriraja piojayetapaachane altariqui, paaque capichaji aisati pintsipataaqueri quejitsi. Impoiji pintiritacojeitanteari iitsaarepeequi. Aitaque pincantajeitaqueriri, tempa iriotaque nonashitacayeari irantaveetantenari.
22 “Impoiji paacantaquero ireji irishichomequiniri aisati iramporetsaquiniri, iranatarepee, ishonquepeo jero ivori iitisanoriquiniri. Tempa irotaque nonashitacanteariri antaveetenane.
23 Jero tanta caari conoacha tapiacaarori, timatsiri cantirijaniquiqui Nonantariqui. Paye aparo pimerancacantaqueri conoachari quejitsi jero aparo jentamerontari; irosati pimpantaqueari maaroni Aarón aisati itomipee iroancavancatantenarori.
24 -
25 Impoiji paayetajero irosati pintaantaqueari altariqui, pintsipataaqueri pitaaqueri. Irotaque noneacameetsajencatasanoteri pimpincatsatantenari.
26 “Pinashitacanteariri Aarón, paavaquero aisati imonqui, irosati poancavancatantaquenaro. Impoiji pinashitearo. Irotaque pashiteari avirori.
27 Ora ineji pinashitacaacari poancaquenari jero ivori pimpapinitenari. Irotaque pinashitacaapiniteanariri Aarón jeri itomipee. Oca nocantaquempiri incanteani iramapinijeitena pishanincapee; irotaque intaimenterori naacameetsajeitantajeariri nompeacojeiteneri caari cameetsatatsi yantajeitiri.
28 -
29 “Ora quitsaarentsipee pinashitacayeanariri Aarón, irotaque inquitsaatajeari coajicani poyetajearine irantaveetajena.
30 Yora antaveetatsine coajicani, irishanincatajeari Aarón, ariorica inqueero Pancotsiqui pampatotimentantenari, irantaveetanteari, oncarate 7 quitaiteri inquitsaatearo.
31 “Impoiji iraaque ivatsa ovisha irinashitacayeanari Aarón, iriotaque incoteri anta tsompoinaqui oyaaraiteritequi Nonanteari nonashitacayeari.
32 Irosati iroajeitantaqueari inqueapinitenta, intsipataaqueri tanta tetachaneri cantirijaniquiqui. Inquempeteari Aarón jeri itomipee yoapinitari iqueapinitantaroriqui.
33 Iro iroajeitanteariri, tempa iriotaque intaimenterori caari cameetsatatsi yantajeitiri, nompeacotanteanariri. Aisati nompincatsaritacanteariri irantaveetantenari. Iro cantaincha eiro yoacaaritsi pashinisati.
34 Aisati ariorica intimaarantapaaque ivatsa iroorica tanta, ocameetsati intaajero. Tecatsi oimatearone catsini, tempa irotaque nonashitacaari.
35 “Ocameetsati pimatacaajeiteri ocapee nocantaquempiri, tempa irotaque nocoacaaquempiri. Oncarate 7 quitaiteri pincantapiniteri pirenti jeri itomipee irimatantearori irantaveejeite Nonanteariqui.
36 Oca sietetatsiri, pincanteani quitaiteripeequi pintaapinitenari vacajaniqui, nompeacojeitantempirori caari cameetsatatsi pantajeitiri. Aisati pisaitapinitero altar quejitsi, pinashitacantenarori.
37 Oncarate 7 quitaiteri pintaantapinitearo virantsi altar, irotaque nompeacojeitantempirori caari cameetsatatsi. Aitaque oncanteari nonashitacaasanotantearori oncameetsatasanotanaque catsini yora antaqueroneri altar nonashitacaasanoteari.”
Impapiniteriri Tasorentsi
(Núm. 28.1-8)
38 Ari icantiri aisati:
“Incanteani impapinitena ovishajaniqui incarate apite moncarataquerori aparo irosarentsite.
39 Iriotaque intaapinitenari maaroni quitaiteripeequi, eiroyea ipeacotarotsi. Aparo intayenari iroaque onquitaiteamane, irio itsipa intayenari irishaavijiiteanajerica catsirincaiteri.
40 Yora irinteari, iroyeri intsipataavaqueri cameetsapanetatsiri tirico oncarate 2 kilo, inconoavaquero oreji orivo oncarate aparo litro. Impoiji irisaitantaquearo ovaja oncarate aparo litro.
41 Aisati inquempetajeri itsipa, yora intaanajeri ishaaviniji, intsipataayetavaqueri tiricopane. Tempa irotaque noneacameetsajencatasanotiri.
42 Yora intaapinitenari pinqueantapinitearoriqui Pancotsi pampatotimentantenari, irotaque pimpincatsatapinijeitantenari, tempa aitaque noneanatempiri. Aisati inquempetajea iriori pishanincajeitajeari, incantaitatiyempani intaapinitenari.
43 Aitaque nonijayeriri notasorenca pishanincapee, iriojeitanteari irotaque nonashitacaasanotacari.
44 Aisati nonashitacaacaro Pancotsi pampatotimentantenari jero iroori altar, aisati iriori Aarón jeri itomipee, iriojeitaque antaveetenane.
45 Aitaque nontimimojeitempiri; tempa narotaque Pintasorentsiteteari.
46 Aitaque piojeitanajeri narotaque Tasorentsisanori Pitasorentsite. Narotaque omishitoajeitajimpiri anta Egiptoqui, nocantani quiso noajeitaquempi. Tempa narotaque Tasorentsisanori Pitasorentsite.”
