Éxodo 3:1-22
3 Yora Moiseshi icantani yamenaqueneri irovishatepee iriconquiri Jetró, antaveetiniriri Tasorentsi quipatsiqui Madián. Aparo quitaiteri yaajeitanaqueri anta caaraiteriqui iroacaajeiteari paashito, irosati yareetantacaro toncaari inashitacaari Tasorentsi pajitachari Horeb.
2 Ari yonijaacari Inampire Tasorentsi paamariqui amorecaque quitotseequishi. Ineantacarori, ari yamenasanotanaquero, ineaquero amorecasanotaque, iro cantaincha te ontsonquimateaji.
3 Ari iquenqueshireanaca: “¡Paita ojitari morecaintsiri, te noneapiniteroji! Nojate namenaiterota paitampa caari otsoncantaro ontayero quitotseequi.”
4 Ari ijatanaque. Irovetaincha inquempejitapemparome, iquematiiri Tasorentsi amorecasanotaquenta quitotseequi. Icajemaqueri ivajiroqui:
—¡Moiseshi! ¡Moiseshi!
Ari yacanaqueri:
—Jaa, ¿paitani?
5 Irosati icantantacari:
—Eiro piquempejitanatsi. Pisapatorempa, tempa oca quipatsi irotaque nonashitacaari, ocameetsatasanotaque.
6 Icantiri aisati:
—Narotaque Tasorentsi, iquemisantajeitaqueri intacantajeitaquempiniri, yora Abrahamani, Isaacani jeri Jacoboni.
Iquemantacariri Moiseshi Tasorentsi, oshequi itsaroasanotanaque catsini. Irosati ipashivorotantanaca, eiro yamenantaritsi.
7 Iro cantaincha aiquero icantasanotanaitiiri:
—Noneasanotaqueri noshanincapee yashinoncaapinijeitaca anta Egiptoqui. Aisati noquemapinijeitaqueri icavintsaapinijeita yoashinoncaapinitiri yora antaveetacaapinijeitiriri.
8 Irotaque meeca naniireantapaacari noavisaacotantajeariri iperanajeitacari egiptosati. Impoiji naajeitanajeri anta otiminta antearoite quipatsi cameetsaiteri. Oshiocasanoyetapai maaroni panquiveerentsiyetatsiri, eiro ocoiteimojeitajaritsi paitapeerica. Irotaque quipatsi isavicantajeitari cananeopee, ititapee, amorreopee, ferezeopee, heveopee jeri jebuseopee.
9 Queario, noquemapinijeitaqueri ishanincapeeni Israel icavintsaapinijeita aisati noneasanojeitaqueri yora egiptosati, yoashinoncaasanojeitaqueri catsini.
10 Meeca pijate Egiptoqui, nontianquempi anta pincatsariqui poimishitoajeitantajeariri noshanincapee, yora ishanincajeitaniri Israel.
11 Iquemantacarori Moiseshi icantaqueriri Tasorentsi, irosati icantantanacari:
—Tecatsi nojitea narori nojatashitanteari pincatsari Egiptoqui, naajeitantajeariri noshanincapee.
12 Ari icantanajiri iriori:
—Quiso noanaquempi. Jeroca piotasanotanteari narotaque tiancaquempiri, ariorica pamajeitajeri noshanincapee aca toncaariqui, aitaque pimpincatsajeitapaajenari.
13 Ari icantanajiri aisati Moiseshi:
—Jaaquea ariorica nojatashivetaqueari noncantajeivetapemparirica: ‘Itiancana Tasorentsi, yora iquemisantiri intacantajeitaqueerini.’ Ariorica irisampijeitavaquena iriori: ‘¿Jaoca ijitari Tasorentsi?’ ¿Jaoca noncantanaqueriri narori?
14 Ari yacanaqueri iriori:
—Narotaque Tasorentsisanori Timitachari. Pincantajeiteri: ‘Itiancana Tasorentsisanori yora Timitachari.’
15 Aisati pincanteri: ‘Iriotaque iquemisantiri intacantajeitaqueerini: yora Abrahamani, Isaacani jeri Jacoboni.’ Oca novajiro ocantaitatiani otimi. Aitaque nopajitasanotari noncantaitatiyempani, irotaque inquenqueshireacotapiniyeetantenari.
16 Ariorica pareetapempa, pampatoyetapeeri jivatacaajeitiriri pishanincapee, pincantajeitapeeri: ‘Yonijaaquena Tasorentsisanori anta toncaariqui, iriotaque iquemisantajeitaqueri intacantajeiteerini: Abrahamani, Isaacani jeri Jacoboni. Icantaquena: Noneajeitaqueri pishanincapee, oshequi yoashinoncaapinijeitaqueri egiptosatipee.’
17 Icantaquena aisati: ‘Nocoaque noipacaacoventajeitajeri yoashinonqueetaqueri Egiptoqui, naajeitanajeri anta iipatsitequi cananeopee aisati hititapee, amorreopee, ferezeopee, heveopee jeri jebuseopee. Ora quipatsi oshequi oshiocantayetaro maaroni panquiveerentsiyetatsiri, eiro ocoiteimojeitajimpitsi paitapeerica.’
18 Yora jivatacaajeitiriri pishanincapee ariorica pincantajeitapeeri, aitaque inquemisantajeitavaquempi. Irosati iroijajeitantanaquempi anta itiminta pincatsari, pincantantapempariri: ‘Tasorentsi, yora pincatsariventajeiteri ishanincapeeni Israel, yonijaaquena. Icantaquena nojajeitaje anta caaraiteriqui nompincatsajeitapaajeri, nontaajeitapeeneri Notasorentsite novirapee. Irotaque ocameetsatantari pishinejeitajena nojajeitaje oncarate mava quitaiteri naniijeitanaje.’
19 Iro cantaincha yora pincatsari niotasanotaqueri, eiro ishinejeitimpitsi pimpocajeitantajeari, eirorica pishintsinatapinitiritsi.
20 Naroquea nijayeterine notasorenca, noamaajeiteri egiptosati, iroajeitanaquero cavaco maaroni caari ineapinijeiti. Irosatiquea irishinejeitantanajempi pojocajeitantanajearori iipatsite.
21 Aisati noncantacaashireacaajeiteari egiptosatipee, irineacameetsajeitantempiri, impayetantavaquempiri paitapeerica timimoyetiriri, eiroquea pijatashijeitantanajatsi.
22 Aparopeeni tsinane oncoacoyetanaquero otsipanampiyetari, ompantayetavaquearori ashiyetari vetsicayetachari plata, oro jero quitsaarentsi cameetsamaotasanoyetatsiri. Irotaque pinquitsaajeitanaqueriri pitomipee jero pishintopee. Aitaque oncanteari pintsonquitajeitanaqueri maaroni timimoyevetariniri egiptosatipee.
