Éxodo 31:1-18
31 Ari iquemajiri Moiseshi Tasorentsi,
2 icantiri: “Pinquemena: Ainiro picarajeitica nocoyeaqueri yora ishanincapeeni Judá pajitachari Besalel itomi Urí, yora icharine Hur.
3 Iriotaque otasoncaventaqueri noshire, iotacaasanoyeteri intsapayetero paitapeerica coiteayetachaneri aisati irovetsicantayetearo oro, plata jero bronce.
4 -
5 Aisati irivintonatashiyetero mapijaniquipee cameetsaquiri pinatasanoyetachari, inquichatashiyetero taaverapee, cameetsa avicayetantapaaquearori oshanincapee. Aisati irovetsicayeteri paitapeerica shiacantsiyetatsiri.
6 Ainiro nocoyeaqueri aisati amitacoterine pajitachari Aholiab itomi Ahisamac, yora ishanincapeeni Dan, jeri maaroni ioyetatsiri. Niotacaasanojeiteri irimajeitantearori irivetsiquero maaroni nocantayetaquempiri:
7 ora Pancotsi pampatotimentantenari aisati maaroni timayetatsineri,ora Cajón onanteari Nocantacantiri, aisati otatacoro;
8 ora meesa aisati maaroni timayetatsineri,jeri tsiorontsinaqui ioshitaquea oro aisati maaroni timayetatsineri;jero altar pintaapinitantenarori casancayetatsiri;
9 jero antearo altar pintaapinitantenariri pivirapee; aisati maaroni timayetatsineri;jero antearo chomo aisati osavicantanaqueari;
10 jero quitsaarentsi cameetsamaotasanotatsineri inquitsaateari Aarón jeri itomipee, ariorica inqueacaapiniteri Nonanteariqui irantaveetanteari,
11 jeri quejitsi pinashitacaajeiteari pisainajeitanteariri antaveeyetatsine;jero casancapatsayetatsineri pintayeri Nonanteariqui.
Oca nocantaquempiri ocameetsati irimoncarajeitero maaroni.”
Quitaiteri irimaoreantapinijeiteari
(Éxo. 35.1-3)
12 Ari iquemajiri Moiseshi Tasorentsi, icantiri:
“Pinquenquetsatacaapeeri maaroni pishanincapee; jeroca pincanteriri: ‘Otimatiye impincatsajeitero quitaiteri nonashitacaacari. Irotaque piojeitanteari quiso noajeitaquempi noncantaitatiyempani; tempa avirojeitaque nocoyeajeitaqueri.
13 -
14 “ ‘Ora quitaiteri nonashitacaasanotaquempiri, ontimatiye pimpincatsajeitero; tempa irotaque nocantacantiri.“ ‘Yora caari moncaraterone, ontimatiye poacanteri; aisati pinquempeteari yora antaveetantaquerone, eiro icarajeitantimpitsi.
15 “ ‘Ocameetsati pantaveejeite oncarate 6 quitaiteri; iro caratapaatsine 7, irotaque pimpincatsajeitantenari. Tempa irotaque nonashitacaaquempiri, te onquempeyetearo otsipapee quitaiteri.“ ‘Jaanicarica antaveetantaquearone, ontimatiye poacanteri.’
16 “Irotaque ocameetsatantari pimoncarajeitero pimaoreantearo quitaiteri sábado; ancaratavacaapinijeitanteari osarentsipeequi.
17 “Irotaque aisati piojeitanteari noncantaitatiyempani quiso noyempi.”
Tempa ocarataque 6 quitaiteri yovetsicantacariri Tasorentsi timayetatsiri inquitequi aisati quipatsiqui. Iro caratapaatsiri 7, irotaque yoipacantacarori.
Yovetsicaque Aarón oro ishiacaantaqueri vaca
(Deut. 9.6-29)
18 Itsoncantanacarori Tasorentsi iquenquetsatacairi Moiseshi anta toncaariqui Sinaí, irosati ipacotantacari apicotatequeti mapi isanquenatacotantacarori iriori Icantacantiri.