Éxodo 32:1-35
32 Ari ineaqueri ishanincapee Moiseshi osamani ipeaca anta toncaariqui te impoquitajeaji, irosati ijatashijeitantacari Aarón, icantajeitapaaqueri:
—Nocoajeitaque povetsiquena antasorentsitetajeari anquemisantajeitajeri. Te ayoteji paitarica avishimotaqueriri yora Moiseshi amajeivetajeeri Egiptoqui.
2 Ari yacashitanaqueri Aarón:
—Je, meeca paayetaiteri oro otsayetiri oyempitapeequi pijinapeequi, pitomipeequi jero pishintopeequi, pamajeitaquenari aca.
3 Ari ijajeitanaque, irosati yamajeitantacanari Aarón.
4 Ari yaavaqueri, icotaqueri. Impoiji yaaquero ashirotatsiri yovetsicaque, iquempetacantaqueri vacajaniqui. Ineajeitantacariri ishanincapee, irosati icantajeitashitantanaca:
—¡Jeri yoca Atasorentsite oimishitoajeitajeri Egiptoqui!
5 Iquemantajeitacariri Aarón ishanincapee, irosati yovetsicantanaca altar itsipataaqueri. Impoiji icantajeitaqueri quimojenca:
—¡Osaitequerani anquimoshirejeitamane ampincatsajeitanteariri Tasorentsi!
6 Ari oquitaiteamanaque capichaji quitaite, irosati yaajeitantamanaca ivirapee, yoajeitaqueri itaasanotaqueneri aisati yoajeitaqueri iraacameetsajeitantajeariri. Irosati isavicajeitantanaca yoimentajeitacari aisati irajeitaque. Impoiji icatiajeitanaca iveshireimentajeitacaro paitapeerica.
Te irineacameetsateroji Tasorentsi caari cameetsatatsi
7 Irosati icantantajari Tasorentsi Moiseshi:
—Meeca poirincanaje pamenajeitapaajeri pishanincapee paajeivetajantari Egiptoqui, yantajeitaquero catsini caari cameetsatatsi.
8 Intsipaite ipeacojeitanacaro nocantacantavetacari. Irointi icotanaque oro ishiacantaqueri vacajaniqui; iriotaque ipincatsataqueri aisati itaashitacanari ivirapee. Icantavacaajeita: ‘Jeri yoca Atasorentsite oimishitoajeitajeeri Egiptoqui.’
9 Noneaqueri te incoajeitanajeji inquemisantanajena, oshequi ipiatsajeitanaca.
10 Pishinetena meeca nontsoncajeitajeri, oshequi noquisasanotaca. Te namavetacoteriji yantimojeitaquenari. Avintiquea noshequiacaasanojeitaje.
11 Iro cantaincha yora Moiseshi icoaque incatsimareacajeari Tasorentsi, icantiri:
—Notasorentsite, ¿paitaquea pintsoncajeitantajeariri? Tempa iriotaque pishanincapee. Aisati avirotaque oimishitoajeitajiriri Egiptoqui ponijaajeitantacariri pitasorenca.
12 ¿Paitaquea pishinetanteariri incantajeite egiptosati: ‘Irompa yaajeitantanajariri Tasorentsi anta toncaariqui, icoaque intsoncajeitajeri maaroni?’ ¡Eiro piquishimentiritsi yantajeitaqueri, pincavintsaajeiteri! ¡Eiro pitsoncajeitiritsi pishanincapee!
13 Pinquenqueshireteri Abrahamani, Isaacani jeri Jacoboni, iriojeitaque quemisantimpiri; tempa peerani picantasanotaqueri: ‘Queario nocantasanotimpi, tempa narotaque Tasorentsi. Noshequiacaasanojeitajeri pishanincajeitajeari inquempeteari impoquiropee.’ Picantasanotaqueri aisati. ‘Oca quipatsi, irotaque nompajeiteriri incanteani irisavicantajeitearo.’
14 Irosati ipashinitantajaro Tasorentsi iquenqueshirevetacari intsoncajeitajerime ishanincapee.
Yoirincantanajari Moiseshi
15 Irosati ipitsocantanaja Moiseshi yoirincanaja anta isavicapaaquenta Josué. Yaanaquero apicotatequeti mapi isanquenatantacarori Tasorentsi icantacantaqueri acaquerocapeequi; tempa iriotaque vetsicaquerori.
16 -
17 Iquemantacarori Josué icajemajeiti ishanincapee, icantiri Moiseshi:
—Noquemaquero icajemajeiti ashanincapee asavicajeitinta, quempetaca imanatavacaajeita.
18 Ari icantiri iriori:
—Te ari oncantea incajemacojeiteri anaacojeitantatsiri; aisati te ari oncantea incajemacoyeeteri yanaacoyeetaqueri. Irointi noquemaque pashinisato pampoyeantsi.
19 Yareetantajari Moiseshi isavicajeitaquenta ishanincapee, ineajeitapaatiiri ishiacantaqueri vacajaniqui aisati imitajamitajajeitanaque, oshequi catsini iquisasanotapaaca, irosati ipishonquimotantapaacari mapicota yamavetacari, ora isanquentaqueri Tasorentsi, oporocapaaque quipatsiqui.
20 Irosati yaantacari yovetsicaqueri vaca, ipishoncaqueri paamariqui. Impoiji itononcaqueri ishipetavanetanaque, irosati ijatantacari nija ipajeitaqueri ishanincapee iracojeitaqueri.
21 Irosati iquisatsatantacari Aarón, icantiri:
—¡Paita pantaqueri! ¡Jaoca icantajeitaquempiri ashanincapee pantacaajeitantacariri antearoite caari cameetsatatsi!
22 Ari incantanaqueri iriori Aarón:
—Iye, eiro piquisanatsi. Tempa pineapinijeitiri ashanincapee, aitaque icantajeita; icoasanojeitiro caari cameetsatatsi.
23 Irotaque icantajeitantaquenari: ‘Pivetsicajeitena antasorentsitetajeari jivatacaajeitajeeneri. Tempa te ayojeiteji paitarica oaqueriri Moiseshi amajeivetajeeri aca.’
24 Ari nocantiri: ‘Pamayetaquenaqueti oropee yashiyetari acarajeitiri.’ Irosati yamajeitantaquenari. Ari naavaqueri, nojocaqueri paamariqui, irosati ishitoantanaca yoca quempevetacariri vacajaniqui.
25 Ari ineaqueri Moiseshi ishanincapee yantashijeitacaro paitapeerica icoacaajeitacari. Te iraamaajeiteariji manajeiterine irishirontimentajeiteari iroashiventanteariri; tempa yora Aarón te incantimenteriji.
26 Irosati ijatantanaca Moiseshi otsapitapaaca inampi. Ari icanti:
—Maaroni coatsiri inquemisantajeiteri Tasorentsi, impocanaqueta aca incarajeitena.
Ari ipocajeitapaaque ishanincapeeni Leví.
27 Irosati icantantari Moiseshi:
—Aitaque icantiri Tasorentsi, yora iquemisantaqueri Israel: ‘Meeca pijajeite pivancopeequi, paajeitapee pisataamento. Impoiji pintsoteayetero isavicajeitinta ashanincapee, poaarantayeteri jaanicarica pintonquiotavaqueari; omavetaquea iriorica pirentipee, teerica, pitsipatapinivetari jeri pitsipanampiyevetari.’
28 Ari imoncarajeitaquero icantaqueriri Moiseshi. Icarati camajeitaintsi 3,000 shiramparipee aparo quitaiteri.
29 Irosati icantantacari:
—Meeca pimajeitaquero nocantaquempiri. ‘Poaarantayetaqueri ashanincapee.’ Meecaquea intasoncacoventasanotempi Tasorentsi aisati impeasanotempi antaveetenerine.
Ipianaja Moiseshi toncaariqui
30 Ari oquitaiteamanaji icantiri Moiseshi ishanincapee:
—Avirojei, oshequi catsini pantajeitaquero caari cameetsatatsi. Meeca nompianaje anta toncaariqui ininta Tasorentsi, nonquenquetsatacanteariri arioyeata impeacojeitajempiro pantaqueri.
31 Irosati itoncaantanaja. Ari iquenquetsatacaapaajiri, icantiri:
—Notasorentsite, queariotasanotaque yantajeitaquero noshanincapee caari cameetsatatsi, yovetsicanontacari oro ijitasorentsitashitacari.
32 Meeca noncantempi: Pimpeacojeitajeneri. Irompa eirorica, ¡ocameetsati poamayena narori!
33 Ari icantanaqueri iriori:
—Eiro noamaimpitsi avinti, irintiquea noamaajeite yora antimojeitaquenarori caari cameetsatatsi.
34 Meeca pimpiashitanajeri, paajeitanajeri anta quipatsiqui nocantaquempiri. Ainiro Nonampire jivatanajempineri. Ariorica omoncaratapaaquea noasanquetaajeiteri, aitaque noasanquetaimentaqueri caari cameetsatatsi yantajeitaqueri.
35 Irosati itiancantacanari oashinoncantsi, yoasanquetaimentajeitaqueri vacajaniqui ipincatsatashijeitacari yovetsicaqueneriri Aarón.
