Éxodo 39:1-43
39 Ari yovetsicayetaqueneri iitsaarepee yora antaveeyetatsineri Irinanteariqui Tasorentsi. Iro yovetsicayetaqueri quitioncatsanirori, quisaatsanirori jero quitioncatsari. Aisati inashitacaacanari iriori Aarón inquitsaateari, imoncarataquero icantaqueriri Tasorentsi Moiseshi.
2 Irovetsicantearori efod, irio yaaqueri oro aisati itijaque quitioncatsanirori, quisaatsanirori, quitioncatsari jero lino quiricatsatachari.
3 Ipichaataroquitaqueri oro martiyoqui, itotsayetaqueri ipeanaca iirotsa. Irotaque inconoyerori intijacoyetantearori quitioncatsanirori, quisaatsanirori, quitioncatsari, jero quiricachari lino.
4 Irosati yovetsicantacanari apite irishiticacotantearori efod ishempaqui. Aisati iquempetaquero irishiticacoteari itsaquiqui. Imoncarataquero icantaqueriri Tasorentsi Moiseshi.
5 -
6 Aisati yovicaquero apite mapiqui cornalina ivintonaqui oro, osanquenataca ivajiropee itomipeeni Israel.
7 Impoiji yora Besalel yoayetaquero oshiticacoroqui efod ishempaquiniri, irotaque inquenqueshireacotanteariri Tasorentsi ishanincapeeni Israel. Imoncarataquero icantaqueriri Tasorentsi Moiseshi.
8 Aisati yovetsicaque pectoral iquempetacantaquero efod. Irisati yaaque marereatsari oro, quitioncatsanirori, quisaatsanirori, quitioncatsari itijacotaqueri linoqui.
9 Ocaratsarancajaniquitaque aisati otontamaojaniquitaque ocarataque 22 centímetro omoncaratavacaaca acaquerocapeequi.
10 Ocarataque 4 oveshintsaayetaca mapijaniquipee cameetsatasanoyetatsiri onashiyetaca. Ora intacarori oveshintsaaca otimayetaque: rubí, crisólito jero esmeralda.
11 Iro apitetapaintsiri: granate, zafiro jero jade.
12 Jero mavatapaintsiri: jacinto, ágata jero amatista.
13 Iro vecarantacarori: topacio, cornalina jero jaspe. Yoayetaquero maaroni ivintonapeequi oro.
14 Ocarataque 12, tempa icarajeiti 12 ivajiropee itomipeeni Israel osanquenayetaca.
15 Aisati yampitsataque oro oshiticacoteari pectoral.
16 Aisati ivintonataque apite oro aisati apite iyempitataque yoayetaqueri ocaratsarancajaniquiyetapaaque pectoral jenioquiji.
17 Yora orotsa apitetatsiri yoiminqueaqueri oyempitapeequi.
18 Aisati yoveraatsatapaaca yoayetaquero apite vintonatachari oro yaacotantacarori oshiticacoroqui efod oquisotantacari.
19 Aisati iquempetaquero ishaaviji iyempitataquero apite ocaratsarancajaniquiyetapaaque itsipataacotantacarori efod.
20 Aisati yovetsicavaji apite oro iyempitayetaquerori oshiticacoroqui efod ari jenioquiji.
21 Impoiji itsipataaquero oyempitayetacari pectoral aisati oyempitayetacari efod, ishiticacotantacaro iviritsa quitioncatsanirori otimantanacari jenioquiji pectoral. Imoncarataquero icantaqueriri Tasorentsi Moiseshi.
22 Maaroni ocaramaoti efod ioshitaca itijeetaquero quitioncamaonirori.
23 Ora imorotaquerori nianqui inquitsaatantearori, yapinaicaquero itsanoquiniri eiro otsereantatsi.
24 Aisati yoameetsayetaquero overaamaotapaaca iroicoro yapitivimoncoinajaniquiyetaquero lino quiricatsatachari quitioncatsanirori, quisaatsanirori jero quitioncatsari.
25 Aisati itsayetaque campanajaniquipee ioshitaca oro, iconoayetaquero quempetarori chochoqui granada moncoinajaniquiyetatsiri, ishoncaquero maaroni overaamaotapaaca. Irotaque inquitsaatapiniteari irantaveeterica Pancotsiqui. Imoncarataquero icantaqueriri Tasorentsi Moiseshi.
26 -
27 Aisati yaaque lino yovetsicaque cameetsamaotatsiri iitsaare Aarón aisati itomipee. Irosati yovetsicaque turbante, irisavoinateari jero itorosatepee ioshitaca lino.
28 -
29 Iro lino quiricatsatachari irishiticacoteari itsaquiqui oconoayetaca quitioncatsanirori, quisaatsanirori jero quitioncatsari yoameetsayetaquero overaamaotapaaca. Imoncarataquero icantaqueriri Tasorentsi Moiseshi.
30 Aisati yovetsicaque oro icarataroquitaque nashitacaacariri irantaveetanteari, aitaque isanquenataquerori cantatsiri “Inashitacaacari Tasorentsi.”
31 Impoiji yoaqueneri quitioncatsanirori irishiticacotantearori ivancainaqui isavoinaroqui. Imoncarataquero icantaqueriri Tasorentsi Moiseshi.
Itsoncaquero maaroni irovetsicantearori Pancotsi irampatotimentanteariri Tasorentsi
(Éxo. 35.10-19)
32 Ari itsoncaquero maaroni ovetsicantanaqueari Irinanteari Tasorentsi ora Pancotsi irampatotimentanteariri. Yora ishanincajeitaniri Israel imataquero maaroni icantaqueriri Tasorentsi Moiseshi.
33 Impoiji ipajeitaqueri Moiseshi maaroni yovetsicaqueri aisati maaroni timayetatsineri: iraacotantayetearori, taaverapee, antancotashiyetanaqueari, otincamipee aisati oncatiantayetanaqueari.
34 Jero ompashicantanaqueari vetsiqueetiri imeshina ovisha yajaqueetiri quitioncajari jeri meshinantsi jentameshinatatsiri oicotanaqueari aisati ompashicanteari Cajón.
35 Jero Cajón onantari Icantacantiri Tasorentsi, inchaquiirepee aisati otatacoro.
36 Jero meesa aisati maaroni timayetatsineri, jero tanta irinashitacayeanariri Tasorentsi.
37 Jero tsiorontsinaqui ioshitachari oro aisati intsiotantayetanaqueari aisati maaroni timayetatsineri jeri quejitsi tsiotachaneri.
38 Jero altar patacacotachari oro, quejitsi irinashitacayeari jeri intayeri casancajencatatsiri intaapiniteri. Jero oticaashiro inqueapiniyeetantearori Pancotsi irampatotimentanteariri Tasorentsi.
39 Jero altar patacacotachari bronce aisati ampitatashiro jero inchaquiire aisati maaroni timayetatsineri. Jero chomo aisati osavicanteari.
40 Jero oticaashiropee oyaaraiterite, otincamiquiiropee aisati oncatiantayetanaqueari jero oticaashiro ashi inqueapinitantearori oyaaraiterite jero oviritsatepee aisati oaticashiropee oyaaraiterite. Jero maaroni timayetatsineri irantaveetanteanariri Tasorentsi.
41 Jero quitsaarentsi inashitacaacanariri Aarón, irantaveetacayeri Irinanteariqui, jero inquitsaateari aisati itomipee.
42 Imataquero ishanincajeitaniri Israel maaroni icantaqueriri Tasorentsi Moiseshi.
43 Ineantacarori Moiseshi yovetsicayetaqueri, icantaqueri: “Ocameetsatasanotaque maaroni pivetsicajeitaqueri.”
