Éxodo 4:1-31
4 Ari icantanajiri Moiseshi Tasorentsi:
—Eiro iquemisantajeitavaquenatsi noncamantajeivetapaaqueari, aisati eiro ishirejeitavacarotsi; irointi incantajeitavaquena: ‘Pitseeya, te ironijayempiji Tasorentsi.’
2 Ari isampitiri iriori:
—¿Jaoca ojitari pajiricaquerira?
Ari yacanaqueri Moiseshi:
—Irointi ninchaquiire.
3 Irosati icantantacari Tasorentsi:
—Jentsite, pojoquero quipatsiqui.
Ari yojocaquero. Ineatiiro opeanaca maranque. Ineantacariri, icoaveta irishiapitsatanaquerime.
4 Iro cantaincha icantavaqueri Tasorentsi:
—Pajiricajeri irointi irishiqui.
Irosati yajiricantajari irishiqui, ineajatiiro peanaja aisati irinchaquiire.
5 Irosati icantantajari:
—Pineaquero meeca, irotaque irishirejeitantavaquearori pishanincapee ora pincantapeeriri: ‘Yonijaaquena Tasorentsisanori, yora Tasorentsi iquemisantajeitaqueri intacantajeitananiri: Abrahamani, Isaacani jeri Jacoboni.’
6 Ari icantajiri aisati:
—Meeca pisatevacotea pinejiqui.
Irosati isatevacotantanaca. Isatevacoreantajari, ineatia quitamaropaconi quempetanaca sharaca.
7 Irosati icantantajari Tasorentsi:
—Pisatevacotajea aisati.
Ari isatevacotanaja. Impoiji isatevacoreaja, ineajatia te aneajeroji. Peanaja oni, quempetanaja tecatsi oyerine.
8 Ari icantanajiri:
—Ariorica ponijaavetaqueari ora nojivataquempiri, eirorica ishirejeitavacarotsi aisati eirorica iquemisantavaquempitsi, impoijiquea ponijayeri pashini irotaque inquemisantantempiri.
9 Irompa eirorica shirejeitimpitsi aisati eirorica iquemisantimpitsi, ariorica ponijaavetaqueari oca apitetatsiri, irosati paacojatantaitea nija Nilo pisacotapeero quipatsiqui. Osacotanaquearica quipatsiqui, irosati ompeantanaquea irajantsi.
10 Irosati icantantanajari Moiseshi Tasorentsi:
—Notasorentsite, eirove nomatirotsi. Oshequi opomerentsitimotana noneaveete cameetsa. Aitaque nocanta, irosati meeca nancasanotimaitempiri avirori, irointita notinotitaro noneaveeti.
11 Ari yacanaqueri icantiri:
—¡Paitampa vetsicaqueneriri ivaante atiripee ineaveetantari! Tempa narotaque mayetirori. Noncoaquerica, nomasontitacayeri eiro ineaveetantanajatsi, aisati nomayempitacayeri eiro iquemantanajatsi, aisati nomaviteajatacayeri eiro yamenantanajatsi. Tempa narotaque amenacaajeitiriri yamenajeitantari.
12 Pijatequeti meeca. Noncanteani quiso noyempi. Narotaque neaveetacayempine cameetsa, pineaveetanteari paitapeerica pincanteri.
13 Ari icantanajiri aisati Moiseshi:
—Notasorentsite, te noncoyero. Pintianque pashini atiri.
14 Irosati iquisantacari Tasorentsi Moiseshi, icantiri:
—¡Timatsi pirenti Aarón ishanincani Leví, iotasanotirori irinti cameetsa ineanati! Aitaque meeca aca intonquiotavajempiri. Ariorica irineajeitavajempi oshequi inquimoshireventasanotapempi.
15 Pinquenquetsatacaavaqueri. Piotacayeri maaroni incanteri. Narotaque tsipatearine aisati avirori ariorica pineanajeite. Aisati niotacayempiro paitarica pantayeteri.
16 Aviro canterine pirenti, pinquempetacantea naro neanataqueriri. Irioquea oavaquenerine pishanincapee paitarica pincanteriri.
17 Paanaquero oca pinchaquiire, irotaque nomatacayetantempirori caari ineapinijeiti pishanincapee, iroajeitantanaquempiri cavaco.
Ijatantajari Moiseshi Egiptoqui
18 Ari ipianaja Moiseshi ivancoqui iriconquiri Jetró, icantajiri:
—Coqui, ocameetsati nompianaje Egiptoqui isavicajeitinta noshanincasanori. Nocoi namenajateri savicajeitatsirica.
Ari icantanaqueri:
—Pijatequeti, cameetsayea pijate.
19 Ainiroquera isaviqui Moiseshi anta quipatsiqui Madián, ari icantajiri Tasorentsi:
—Ocameetsati pimpianaje Egiptoqui. Te aneajeriji maaroni coavetachari iroyempime, camaque.
20 Ari yovetsicaarantayetaca, yovetsicaqueri iriori iraashinote inquijacotanaqueari itomi jero ijina. Aisati yaaquero irinchaquiire icantaqueriri Tasorentsi.
21 Ari icantajiri Tasorentsi.
—Ariorica pareetapaaquea anta Egiptoqui, ponijaapeeriyea pincatsari ora nomatacaaquempiri, irineantearori caari ineapinijeiti. Naroquea cantacaashireacayemparine inquisoshiretantanaqueari, eiro ishinetantajaritsi irisotoajeitaje pishanincapee.
22 Irosati pincantantaqueari, ‘Icanti Tasorentsi: Yora ishanincapeeni Israel noquempetacantasanojeitaqueri irio notomi jivatatsiri itimi; tempa iriojeitaque noshanincatacari.
23 Noncantempi, pishinejeitajeri irijajeitajeta anta toncaariqui caaraiteriqui impincatsajeitantapaajenari. Irompa eirorica pishinejeitajiritsi, irosati noamantaqueari pitomi, yora jivatatsiri itimi.’
24 Irosati ijajeitantaca. Ari nianqui avotsiqui irimaajeitanajenta, irosati inijantavajari aisati Tasorentsi, icoaveta iroavaquerime. (Tempa te irimoncarateroji icantitacariri peerani Tasorentsi: “Pintoyeantajeitea maaroni shiramparipee.”)
25 Oneacoventantacariri ijina, oshequi otsaroanaque. Irosati aantanaca mapi tsaampitatsiri ototitaqueri otomi omeshina ishiramparitantari. Impoiji opantaqueri ojime iitiqui, ocantiri: “Queario, aviro nojimesanori irajatacantatsiri.” Irotaque ocantantacariri ojime, tempa otoyeantaqueri otomi. Irosati ishinetantajari Tasorentsi Moiseshi irijajeite.
26 -
Ineantajariri Moiseshi irirenti
27 Yora Aarón ainiro quipatsiqui Gosen. Ari iquemaqueri Tasorentsi icantaqueri: “Coraquetaji pirenti Moiseshi. Pijate meeca anta caaraiteriqui, aitaque pintonquiotavajeariri.” Ari ijatanaca Aarón anta toncaariqui pajitachari Horeb, ora inashitacaari Tasorentsi. Aitaque itonquiotavajariri. Oshequi iquimoshiretasanotapaaque ineantavacariri. Ivetsatapaacari, inintavorotapaaqueri.
28 Ari icamantayetavaqueri maaroni icantayetaqueriri Tasorentsi aisati irimatacayeriri caari ineapiniyeti ironijanteariri pincatsari.
29 Irosati yoijajeitantanajari. Yareejeitantapaajari quipatsiqui Gosen, yapatojeitapaaqueri Aarón maaroni jivatacaajeitiriri ishanincapee. Icamantayetapaaqueri maaroni icantayetaqueriri Tasorentsi Moiseshi. Irioquea Moiseshi nijayetapaaqueriri caari ineapinijeiti, ora ironijayeriri pincatsari.
30 -
31 Ineajeitantacarori, irosati ishirejeitantavacaro. Iojeitanaque queario iriotaque Tasorentsi tiancaqueriri, aisati iotanaque queario ineajeitaqueri yoashinoncaapiniyeetaqueri. Aisati iotanaque queario icavintsaajeitaqueri. Irosati yoivotashijeitanacari ipincatsatanaqueri Tasorentsi.
