Éxodo 40:1-38
40 Ari iquemajiri Moiseshi Tasorentsi icantiri:
“Ariorica intanajearo quitaiteri yora shoncapaajantsine cashiri Abib, irosati poatiacantantaquearo Nonanteari aisati Pancotsi pampatotimentantenari.
2 -
3 Aitaque poacanterori tsompoina Cajón onantari Nocantacantiri, aisati pimpashicacotaquero.
4 Impoiji poiminqueacantero iroori meesa jeri tsiorontsi. Cameetsa poacantayetaquero. Impoiji povicacantayeteri intsiotantanaqueari.
5 Aisati pominqueacantero iroori orijaniqui altar pintaapinitantenarori casancavaneyetatsiri aisati pimontetacantaquero Cajón. Impoiji pishintsaacantero onticaashitanaqueari anta pinqueantapinitearoriqui.
6 Iroquea antearo altar, poacantero anta pinqueantapinitearoriqui Nonanteari.
7 Impoiji poacantero iroori chomo ontsipatimataquearo altar, irosati pijaacantantaquea nija.
8 Aisati poatiacantayetaquero otincamijaniquipee, pishoncacantaquero maaroni oyaaraiteritequi. Pisaatencatacantaquero nianqui pinqueantapiniteari, impoiji pinticaashitacantaquero.
9 “Irosati paantaquea quejitsi, pinashitacaari pisaitantayetaquearori Nonanteari jero maaroni timayetatsineri. Aitaque pincantaquerori. Pinashitacaasanotenaro oncameetsatasanotanaque maaroni.
10 Aisati pinquempetaquero antearo altar jero maaroni timayetatsineri. Aitaque pincantaquerori, tempa irotaque oncameetsatasanotanaque catsini.
11 Aisati pisaitaquero iroori chomo jero osavicantanaqueari. Aitaque pincantaquerori, irotaque pinashitacaasanotenari.
12 “Ariorica pintsoncacantayetaquero poacantayetero, irosati paantanaqueari pirenti jeri itomipee, poatiapeeri quempeji pinqueantapinitearoriqui Pancotsi pampatotimentantenari, pincanteri incaajeite.
13 Impoiji pinquitsaateri pitijacantaqueneriri lino cameetsamaotasanotatsiri. Irosati pisainatantaqueari quejitsi, pinashitacanteariri impeanteari antaveetatsineri Nonanteariqui.
14 Aisati pinquempetaqueri iriori itomipee, pinquitsaajeitaqueri impoiji pisainajeiteri. Piquempetaqueri Aarón irotaque impeajeitanteari iriori antaveejeitatsineri. Aitaque inquempejeitajea iriori irishanincajeitajeari coajicani incantaitatiyempani.”
15 -
Yoatiacantaquero Moiseshi Inantari Tasorentsi
16 Ari ishoncapaaja cashiri, aparotanaji quitaiteri, intantanajearori osarentsi apitetatsineri, omoncaratapaaja ishitoantajeitanajari Egiptoqui. Irosati yoatiacantantacaro Moiseshi Irinanteari Tasorentsi. Imoncarataquero icantaqueriri.
17 –
18 Intacantacaro oncatiantanaqueari taaverapee jero otincamipee. Impoiji yoanquetacantayetaquero atancotashiyetanacari otanto, irosati ipashicacantantacaro, aisati yoicotacantaquero. Imoncarataquero icantaqueriri Tasorentsi.
19 -
20 Impoiji yaacotaquero Icantacantiri Tasorentsi, itetaquero Cajóqui, ari yashitacotaquero; irosati isaquiintacantantacaro inchaquiiqui oyempitapeequi. Irosati yaacotantanacaro yoiminqueacotaquero tsompoina Irinanteariqui. Impoiji ipaencaquero oticaashiro, aisati ipashicaquero Cajón. Imoncarataquero icantaqueriri Tasorentsi.
21 -
22 Aisati yoiminqueacantaquero iroori meesa, yoacantaquero araquerora oticaashiroqui.
23 Impoiji yoveshintsaacantaquero tantapee inashitacaanariri Tasorentsi.
24 Aisati yoiminqueacotacantaqueri tsiorontsi, yoayetavaqueneri maaroni yovetsicashiyetaqueriri imontetacaaqueri meesa, irosati itsiotantacari.
25 -
26 Aisati iquempetacantaquero orijaniqui altar, iquempejitaquero oticaashiro, irosati itaantaca casancavaneri.
27 -
28 Impoiji ishintsaacantaquero oticaashitanacari inqueapinitenta. Irosati yoiminqueacotacantantacaro iroori antearo altar intayetanteanariri Tasorentsi virantsipee jero ivanquirepee.
29 -
30 Aisati yoaquero antearo chomo, jero altar otsipataimaatacaro Pancotsi irampatotimentanteariri, impoiji ijaacantaque nija inquivapinijeiteari.
31 Irotaque yaajatapinitiri Moiseshi jeri Aarón aisati itomipee, iquivacotapinijeitari aisati iquivaquiitapinijeitari.
32 Ariorica iqueapinijeiti Pancotsiqui, aisati ariorica iquempejitapinitaro antearo altar, iquivapinijeita. Imoncarataquero icantaqueriri Tasorentsi Moiseshi.
33 Iro yovecarantacarori yovetsicacantaquero oyaaraiterite, ishoncacantaquero maaroni Pancotsi yapatotimentanteariri Tasorentsi. Aisati yominqueacantaquero antearo altar, aisati yoanquetacantaquero oticaashiropee iqueantapintaroriqui oyaaraiteri.
Aniireapaaque mencori omanapaaquero Pancotsi yapatotimentantariri
(Núm. 9.15-23)
34 Itsoncacantantacarori Moiseshi yovetsicacantaquero Pancotsi irampatotimentanteariri Tasorentsi, irosati osaviincantapaaca mencori omanapaaquero, aisati ishipaquireacotapaaquero Tasorentsi catsini Inantari.
35 Irotaque caari imatanta Moiseshi inqueero; tempa otimantapaacaro itasorenca Tasorentsi.
36 Yora ishanincapee Israel, ariorica ineiro oancapinita mencori, irosati irovajeitantanajea.
37 Eirorica oancatsi, irosati incantea irisavicajeite iroyeavajerota oancanajea.
38 Aitaque ocantari, yaniijeitantapaacari ishanincajeitaniri Israel osamani, ineapinijeitaquero ora imencorite Tasorentsi otimapaaque Inantariqui maaroni quitaiteripeequi, aisati tsiteniripeequi oquempetacaro paamari oquitasantetacotapinitaquero.
