Éxodo 7:1-25
7 Ari icantanajiri Tasorentsi Moiseshi:
—Pamene, nocoacaaquempi pinquempetacantea narorica anta pincatsariqui. Irioquea pirenti quempetempine pineanate.
2 Pincamanteri maaroni noncantempiri. Impoiji iriori incanteri pincatsari irishinejeitantajeariri pishanincapee irijajeitaje iipatsitequi.
3 Iro cantaincha noncantacaashireacayempari inquisoshiretantanaqueari. Aisati nonijaajeiteri egiptosati oshequi caari ineapinijeiti, iroajeitanaquero cavaco nomayeteri.
4 Yora pincatsari eiro iquemisantavaquempitsi. Iro cantaincha nonijaasanoteri notasorenca Egiptoqui. Noasanquetaasanojeiteri, irosati noimisoquijajeitantajeariri ishanincapee Israel, tempa iriojeitaque noshanincapee
5 Ariorica irineajeitaquero ora nonijaajeiteriri aisati ariorica paajeitanajeri pishanincapee, impoiji iriojeitanaque narotaque Tasorentsisanori.
6 Yora Moiseshi jeri Aarón imoncarataquero maaroni icantaqueriri Tasorentsi.
7 Yora Moiseshi ocarataque 80 irosarentsite, irioquea Aarón ocaratanaque 83 irosarentsite, iquenquetsatacantacariri pincatsari.
Opeaca irinchaquiire Aarón maranque
8 Ari icantajiri aisati Tasorentsi Moiseshi jeri Aarón:
—Ariorica incantavaquempi pincatsari: ‘Jentsite, ponijayenaro caari noneapiniti, queariorica itiancaquempi Tasorentsi’, irosati pincantantaqueari Aarón irojoquimoteri irinchaquiire quipatsiqui, irineavaquerota ompeanaquea maranque.
9 -
10 Irosati ijatashitantajari ineajeitapaaqueri icarajeitiri amitacoyetiriri. Ari yojoquimotaqueri Aarón irinchaquiire quipatsiqui, irosati opeantanaca maranque. Imoncarataquero icantaqueriri Tasorentsi.
11 Irosati icajemacantajeitantanacari pincatsari iotincaripee jeri sheripiaripee iotashiyetarori paitapeerica. Aisati iquempejeivetapaacaro iriori.
12 Aparopeeni yojocajeitapaaquero irinchaquiire quipatsiqui, opeajeitanaca iroori maranque. Iro cantaincha yora irashi Aarón iniitajeitavaqueri irashipee iriori.
13 Ineajeivetacaro pincatsari oca yonijaaqueriri. Iro cantaincha aiquero iquisoshiretanaqueri, te inquemisanteriji Moiseshi jeri Aarón. Moncarataca icantaqueriri Tasorentsi: “Eiro iquemisantimpitsi.” Irotaque yonijaaqueriri, irosati ipiantanaja.
Intarori oashinoncantsi: opeaca nija irajantsi
14 Impoiji icantajiri Tasorentsi aisati:
—Pineaqueri meeca pincatsari, aiquero iquisoshiretanaqueri. Te incoyeji irishinetajempi paajeitantanajeariri pishanincapee.
15 Iro cantaincha pijatamane capichaji quitaite nijaqui, aitaque poyeamaneriri pincatsari. Paanaqueroyea pinchaquiire peaintachari maranque.
16 Ariorica pineavaqueri impocaque, pincantavaqueri: ‘Itiancana Tasorentsi, yora iquemisantajeitiri noshanincapee, icanti: Pishinejeitajeri noshanincapee irijajeitajeta caaraiteriqui impincatsajeitantapaajenari. Iro cantaincha te pinquemisantenaji.
17 Irotaque icantantacari Tasorentsi: Meeca piotasanotantenari narotaque Tasorentsisanori. Nompasaajatantaquearorica ninchaquiirequi nija, irosati ompeantanaquea irajantsi.
18 Incamaarantayetanaque shimapee, oshitijencatasanotanaque catsini. Tecatsi paajeitanajero pirajeitajeri.’
19 Icantiri aisati Tasorentsi Moiseshi:
—Pincanteri pirenti iroanquerota pinchaquiire, irijicotantayetearota nijapee, nijatenipee, opiojayetanta incajarepee, jero yoantayetaroriqui inijatepee egiptosati, onquiramotijayetanaqueta maaroni.
20 Ari ijatamanaque Moiseshi jeri Aarón capichaji quitaiteni nijaqui, yoyeapairi pincatsari. Ineantavacariri ipocaque itsipajeitacari amitacoyetiriri, irosati icantantavacari icantaqueriri Tasorentsi. Irosati ipasaajatimotantacari Aarón nija. Aisati ijicoyetanaquero maaroni otimayetinta incajare jero nijatenipee, irosati oquiraajayetantanaca.
21 Tecatsi iraajeitajero irirajeitajeri, aisati icamajeitanaque shimapee. Oshitijencatasanotanaque catsini, otsoteanaquero maaroni Egiptoqui.
22 Ineantacarori pincatsari, irosati icajemacantajeitantanajari iotincaripee jeri sheripiaripee jitasorentsiveeyetatsiri; aisati iquempejeitapaajiro iriori. Aiquero iquisoshiretasanotanaqueri pincatsari, te inquemisanteriji Moiseshi jeri Aarón. Moncarataca icantaqueriri Tasorentsi: “Eiro iquemisantimpitsi.”
23 Irosati ipiantanaja iriori pincatsari ivancoqui, oquempetimotacari tecatsi irineaque.
24 Ineajeitantacarori maaroni savicajeitatsiri Egiptoqui, te oncameetsajatanajeji, tecatsi iraajeitajero irirajeitajeri. Irosati iquianontantayetanaca otsapijapeequi nija Nilo irajeitajiri.
25 Ari avisanaque 7 quitaiteri iquiraajatacantacarori Tasorentsi nija Nilo.
